Tlen okijkuilo Juan 12:1-50
12 Ijkuak poliuiya chikuasen tonajli para kipanoltiskej Pascua, Jesús oajsik Betania, kampa chantiya Lázaro akin yejua okiyolitijka.
2 Ompa okitlakualchiuilijkej Jesús. Marta kintlakualtiaya niman Lázaro ompa nemiya imiuan akin tlakuajtoyaj.
3 Kuakon, María okajsik tlajko litro* de aceite de nardo tlen ajuiyak niman melak patioj, niman okintlalili ikxiuan Jesús. Sakin, okinuachili ika itson. Niman ipan nochi yejon kajli melak kualtsin otlaajuiyayak.
4 Pero, Judas Iscariote se akin kimachtiaya niman yekitemakaskia, ijkin okijto:
5 “¿Tleka xononemakak yejuin aceite tlen ajuiyak ika 300 denarios niman tleka xokinmakakej yejon tomin akin xtlaj kipiyaj?”.
6 Yejua xkinajmanaya akin xtlaj kipiayaj, san kinekiya makitlalikan tomin ipan caja tlen yejua kitlajpiaya para ueliskia kichtekis.
7 Kuakon, Jesús ijkin okijto: “Xkauakan. Ijkon makichiua, pampa kentla nechyektlalijtika para ijkuak nechtokaskej.
8 Pampa akin xtlaj kipiyaj nochipa nemouan nemiskej pero nejua xnochipa nemouan ninemis”.
9 Ijkuak nochi yejon panotoya, miyekej judíos okimatkej ika Jesús nemiya Betania niman okitakoj, pero xsan yejua, noijki okitakoj Lázaro, akin Jesús okiyolitijka.
10 Akin kinyekanaj teopixkej noijki okitakej kenijki kimiktiskej Lázaro.
11 Ijkon okinemilijkej kichiuaskej, pampa miyekej judíos konitayaj niman peuayaj tlaneltokayaj itech Jesús.
12 Uajmostla, miyekej akin oiluipanokoj okimatkej ika Jesús yejkotoya Jerusalén.
13 Kuakon, okintekkej ixijyo palmera niman okinamikitoj, niman ijkin chikauak opeuj kijtouaj: “¡Timitstlajtlaniliaj xtechmakixti! ¡Makiteochiuakan akin Jehová okuajtitlan, iRey Israel!”.
14 Ijkuak Jesús okinexti se burrito, ipan otlejkok, ijkon ken ijkuilijtika:
15 “Maka xmomojti ichpoch Sion. ¡Xkaki! Morey motech uajlauj* ipan se burrito”.
16 Kachtopa, akin kinmachtiaya xokasikamatkej nochi yejuin. Pero, ijkuak Jesús okitlalijkej para maueyixto okilnamikkej ika nochi yejuin ijkuilijtoya itech niman yejon tlen ipan onochiuj.
17 Akin okitakej ijkuak Jesús okijli Lázaro ika mauajkisa ipan itlalkon niman ijkuak okiyoliti, kiteijlijtiayaj tlen opanoka.
18 Noijki, miyekej ipampa yejon okinamikitoj. Pampa okikakkej ika okichijka yejon milagro.
19 Kuakon, fariseos ijkin okinoijlikej: “¡Xkitakan kenijki nochimej iuan yajtokej! Xtlaj ika tepaleuiya tlen tikchijtokej”.
20 Sekimej griegos noijki oyajkaj iluitl okiueyichiuatoj toTajtsin.
21 Yejuamej okinisiuijkej Felipe, akin ualeuaya Betsaida tlen onkatka Galilea niman okijlijkej: “Noteko, tiknekij tikitaskej Jesús”.
22 Felipe okijlito Andrés, niman yejuamej okijlitoj Jesús.
23 Jesús okinnankili: “Yoyejkok hora para makitlalikan maueyixto iKoneuj Tlakatl.
24 Melauak nimechijlia ika tla trigo xuetsi ipan tlajli niman xmiki, nochipa san xinachtli yes. Pero, tla miki, kuakon melak tlatlakiltis.
25 Akin kitlasojtlas inemilis, kipolos.* Pero, akin kitlauelitas inemilis ipan yejuin mundo kiselis nemilistli tlen xkeman tlami.
26 Tla yakaj kineki nechtekichiuilis, nouan mauiya; niman kampa nejua ninemis, noijki ompa nemis akin nechtekichiuilia. Tla yakaj nechtekichiuilia, Tajtli kiueyiteneuas.
27 Aman melak ninajmana. Niman ¿tlenon ueliskia nikijtos? NoTaj, xnechmakixti itech tlen nopan nochiuas. Pero, nejua yejua ika oniuajla.
28 NoTaj, xkueyiteneua motoka”. Kuakon, ne cielo ouajkakistik se tlajtojli tlen ijkin okijto: “Yonikueyiteneuj niman oksejpa nikueyiteneuas”.
29 Akin ompa nemiyaj okikakkej yejon, niman sekimej opeuj kijtouaj ika otlakomon. Oksekimej okijtojkej: “Okuajnots se ángel”.
30 Kuakon, Jesús okijto: “Yejuin tlajtojli ouajkakistik para mechpaleuis, xpara nejua nechpaleuis.
31 Aman kiyolkuitijtokej mundo; aman akin tlayekana ipan yejuin mundo konkixtiskej ne kiyauak.
32 Pero nejua, ijkuak nechpiloskej ipan kojtli melaktik, nikchiuas ika miyekej notech mauajlakan”.
33 Jesús ijkin okijto para kiteititis kenijki mikiskia.
34 Kuakon, akin ompa nemiyaj okinankilijkej: “Tikmatstokej ika Tlanauatijli kijtoua ika Cristo nochipa nemis. ¿Tleka tejua tikijtoua ika iKoneuj Tlakatl noneki kipiloskej ipan kojtli melaktik? ¿Akinon yejon iKoneuj Tlakatl?”.
35 Kuakon, Jesús okimijli: “Tlauijli achijtsin nemouan nemis. Xnejnemikan aman ika tlauilpan para tlayoualyotl xmechtlanis; akin nejnemi kampa tlayouatok xkimati kanon ika yauj.
36 Aman ika nenkipiyaj tlauijli itech xtlaneltokakan para nemochiuaskej ikoneuan tlauijli”.
Ijkuak yokijto nochi yejuin, Jesús oyaj niman oniyan.
37 Maski imixpan yokinchijka miyek milagros, xitech tlaneltokayaj,
38 para nochiuaskej itlajtoluan teotlajtojketl Isaías, akin okijto: “Jehová, ¿akinon yokineltokak tlen yotikteijlijkej?* ¿Niman akinon yokitak ikojtilis* Jehová?”.
39 Isaías noijki okijto tleka yejuamej xueliyaj tlaneltokayaj:
40 “Yokimixtlapacho niman yokinyoltechikauj para maka matlachiakan nion maka maajsi ipan inyojlo niman ijkon kinekiskej nokuepaskej itech toTajtsin niman nejua nikinpajtis”.
41 Isaías ijkon okijto pampa okitak iueyilis niman itech otlajto.
42 Miyekej akin kinyekanayaj judíos itech otlaneltokakej; pero xkiteijliayaj pampa kinmakasiyaj fariseos niman xkinekiyaj makinuajkixtikan de sinagoga,
43 pampa más kinekiyaj ika gente makinueyiteneuakan niman xkinekiyaj kiyolpaktiskej toTajtsin.
44 Pero Jesús ijkin chikauak okijto: “Akin notech tlaneltoka xsan notech tlaneltoka, noijki tlaneltoka itech akin onechajtitlan;
45 niman akin nechita noijki kita akin onechajtitlan.
46 Oniuajla ipan yejuin mundo ken se tlauijli, para ijkon nochimej akin notech tlaneltokaskej xok nemiskej kampa tlayouatok.
47 Tla yakaj kinkaki notlajtoluan pero xkichiua, nejua xniktlajtlakolmaka pampa nejua xoniktlajtlakolmakako yejuin mundo, nejua onikmakixtiko yejuin mundo.
48 Akin xnechselia niman xkinselia notlajtoluan kipiya akin kitlajtlakolmakas: notlajtoluan kitlajtlakolmakaskej ijkuak sa ika tlami tonajli.
49 Pampa tlen onikijto xsan nejua oniknemili, noTajtsin akin onechajtitlan, yejua akin onechijli tlen noneki nikijtos niman tlen noneki nikteijlis.
50 Niman nikmatstok ika akin kitlakamatis itlanauatil kipiyas nemilistli tlen xkeman tlami. Kuakon, nochi tlen nikijtoua, nikijtoua ijkon ken Tajtli yonechijli”.
Notas
^ Kijtosneki, se libra romana, kanaj 327 gramos.
^ Noso “uits”.
^ Ika griego kijtoua “kipojpoloua”.
^ Ika griego kijtoua “tlen yokikakkej totech”.
^ Ika griego kijtoua “ima”.
