Tlen okijkuilo Juan 13:1-38
13 Achto ika ajsiskia on iluitl de Pascua, Jesús yekimatstoya ika yoajsika ihora para yas de yejuin mundo niman nokuepas kampa iTaj. Yejua okintlasojtlak akin kinmachtiaya akin nemiyaj ipan yejuin mundo, okintlasojtlak hasta ijkuak sa ika tlami tonaltin.
2 Yejuamej tlakuajtoyaj ika tlayoua niman Diablo yokichijka ika Judas Iscariote, ikoneuj Simón, makinemili ipan iyojlo kenijki kitemakas Jesús.
3 Kuakon, pampa Jesús yekimatstoya ika iTaj nochi yokimaktilijka niman ika youalejka itech toTajtsin niman itech nokuepaskia,
4 onokuiteuj, okikixti itlaken tlen pani kitlalijtoya, okonajsik okse tlakentli niman ika onoxilansalo.
5 Sakin, yejua okitlali atl ipan se ueyi uajkajli, opeuj kimikxipajpaka akin kinmachtiaya niman opeuj kimikxiuajuatsa ika tlakentli tlen ika onoxilansalo.
6 Ijkuak yekikxipajpakaskia Simón Pedro, yejua okitlajtolti: “NoTeko, ¿tejua tinechikxipajpakas?”.
7 Jesús okinankili: “Aman xtikasikamati tlen nikchijtika, pero sakin tikasikamatis”.
8 Pedro okijli: “Xkeman tinechikxipajpakas”. Niman Jesús okinankili: “Tla xnimitsikxipajpaka, xuelis nouan tinemis”.
9 Simón Pedro okijli: “NoTeko, kuakon maka san xnechinpajpakili nokxiuan, noijki xkinpajpaka nomauan niman notsontekon”.
10 Jesús okinankili: “Akin yonalti chipauak, niman san noneki makinpajpakilikan ikxiuan. Niman nemejuamej nenchipajkej, maski xnennochimej”.
11 Jesús yekimatstoya akinon kitemakaskia. Yejua ika okijto: “Xnennochimej nenchipajkej”.
12 Kuakon, ijkuak yotlan kimikxipajpaka niman yokinotlalilijka itlaken tlen pani kipiaya, oksejpa onotlali kampa onka mesa niman ijkin okimijli: “¿Nenkasikamatij tleka ijkon onikchiuj?
13 Nemejuamej nennechijliaj Maestro niman noTeko, niman yejon melauak, pampa nejua nimechmachtia niman ninemoTeko.
14 Yejua ika, tla nejua, akin ninemoTeko niman nemoMaestro, yonimechikxipajpak, nemejuamej noijki noneki nemokxipajpakaskej.
15 Nejua yonimechititi tlen noneki nenkichiuaskej. Xchiuakan tlen yonimechijli.
16 Kuajli nimechijlia ika akin tlakeuajli xmás ueyixtika ijkon ken iteko niman akin okontitlankej xmás ueyixtika ijkon ken on akin okontitlan.
17 Aman ika yenenkimatij yejuin, nenyolpakiskej tla ijkon nenkichiuaj.
18 Xnenochimej ijkon nimechijlia, pampa nejua nikimixmati akin yonikintlapejpeni. Pero, ijkon nochiua tlen onoijkuilo ipan Tlajkuiloltin, kampa kijtoua: ‘Akin nouan tlakuaya, yonechixnamik’.*
19 Nimechijlia yejuin desde aman, achto ika panos, para ijkuak nochiuas nenkineltokaskej ika melauak tlen ompa ijkuilijtika.
20 Kuajli nimechijlia ika akin kiselia maski san akinon akin nejua onikontitlan, noijki nejua nechselia, niman akin nejua nechselia noijki kiselia akin onechajtitlan”.
21 Ijkuak Jesús yokijto yejuin, melak onajman* niman okijto: “Kuajli nimechijlia ika se akin nikan nemi nechtemakas”.
22 Akin kinmachtiaya san no yejuamej opeuj noitaj, pampa xkimatiyaj akinon kitenejtoya Jesús.
23 Se akin Jesús kimachtiaya niman akin melak kitlasojtlaya, iuan nemiya kampa onka mesa.
24 Kuakon, Simón Pedro okontak akin nemiya iuan Jesús niman okitlajtolti: “¿Itech akinon tlajtojtika?”.
25 Kuakon, yejua onotekak iyelpan Jesús niman okitlajtolti: “¿Akinon, noTeko?”.
26 Jesús okinankili: “Yejua akin nikmakas seki pan tlen nikpatsos”. Niman ijkuak yokipatso pan, okimakak Judas, ikoneuj Simón Iscariote.
27 Ijkuak Judas okajsik pan, Satanás ijtik okalak. Kuakon, Jesús okijli: “Nimantsin xchijtiuetsi tlen yetikchijtika”.
28 Pero akin nemiyaj kampa onka mesa xkimatiyaj tleka ijkon okijli.
29 Sekimej kinemiliayaj ika pampa Judas kitlajpiaya caja kampa kejyeuayaj tomin, Jesús kijlijtoya yejuin “Xkoua tlen tiktekitiltiskej ipan iluitl”, noso kijlijtoya makinmaka seki tomin akin xtlaj kipiyaj.
30 Judas ouajkis ijkuak yokiseli pan tlen Jesús okimakak. Ijkuakon yetlayoua katka.
31 Ijkuak Judas yoyajka, Jesús okijto: “Aman kitlaliaj maueyixto iKoneuj Tlakatl, niman ipampa* yejua kiueyiteneuaj toTajtsin.
32 ToTajtsin kiueyiteneuas, niman yejua nimantsin ijkon kichiuas.
33 Nokonetsitsinuan, sa achijtsin tiempo nemouan ninemis. Nennechtejtemoskej; pero nimechijlis tlen onikimijli judíos: ‘Xuelis nenyaskej kampa nejua niauj’.
34 Nimechmaka se yenkuik tlanauatijli: xmotlasojtlakan. Ijkon ken nejua yonimechtlasojtlak, nemejuamej noijki xmotlasojtlakan.
35 Tla nemotlasojtlaj, nochimej kimatiskej ika nejua onimechmachti”.
36 Simón Pedro okitlajtolti: “NoTeko, ¿kanon tiauj?”. Jesús okinankili: “Kampa nejua niauj amantsin xuelis tias, pero ompa tajsis”.
37 Pedro okinankili: “NoTeko, ¿tleka amantsin xuelis mouan nias? Nejua ninokauilis manechmiktikan mopampa”.
38 Jesús okinankili: “¿Tejua tikmokauilis mamitsmiktikan nopampa? Kuajli nimitsijlia ika xnokuikatis gallo hasta ijkuak tejua yexpa tikijtos ika xtinechixmati”.
Notas
^ Ika griego kijtoua “yonechixnamik ika ikotsteuj noso ikxikeketsol”.
^ Ika griego kijtoua “onajman hasta ipan iespíritu”.
^ Noso “itechkopa”.
