Tlen okijkuilo Juan 14:1-31
14 “Maka xmoyolkokokan, xteititikan ika nentlaneltokaj itech toTajtsin niman noijki ika notech nentlaneltokaj.
2 Ichan noTaj melak miyekan kampa uelis nenchantiskej. Tla xijkon yeskia, nejua nimechijliskia. Nejua niauj nikonyektlalis kampa nenyaskej.
3 Noijki, ijkuak yoniaj niman yonimechtlayektlalili niuajnokuepas niman nimechselis nochan, para noijki nouan nennemiskej kampa nejua ninemis.
4 Niman nemejuamej nenkixmatij ojtli para nenyaskej kampa nejua niauj”.
5 Tomás okijli: “NoTeko, xtikmatij kanon tiauj, ¿kenijki uelis tikmatiskej katlejua ojtli?”.
6 Jesús okinankili: “Nejua niojtli, nitlenmelauak niman ninemilistli. Tla xnopampa, xakaj uelis ajsis itech Tajtli.
7 Tla nennechixmatij nejua, noijki nenkixmatiskej noTaj. Aman yenenkixmatij niman yonenkitakej”.
8 Felipe okijli: “NoTeko, maski san xtechititi Tajtli”.
9 Jesús okinankili: “Felipe, youejkauj nemouan ninemi, ¿niman ok* xetinechixmati? Akin yonechitak nejua, noijki yokitak Tajtli. ¿Tleka aman tikijtoua ‘Xtechititi Tajtli’?
10 ¿Xtikneltoka ika nejua ninemi iuan Tajtli niman Tajtli nouan nemi? Nejua xsan nikuajnemilia tlen nimechijlia, noTajtsin kichijtika tlen kineki, niman yejua nouan nemi.
11 Xnechneltokakan ijkuak nimechijlia ika nejua ninemi iuan Tajtli niman Tajtli nouan nemi. Niman, tla xnennechneltokaj, xneltokakan tlen nikchiua.
12 Kuajli nimechijlia ika akin kiteititis ika notech tlaneltoka noijki kichiuas tlen nejua nikchiua. Niman kichiuas tlen más temojkatlachialti pampa nejua niauj kampa Tajtli.
13 Noijki, nejua nikchiuas nochi tlen nenkitlajtlaniskej ika notoka. Ijkon, teKoneuj kichiuas makiueyiteneuakan Tajtli.
14 Nejua nikchiuas nochi tlen nenkitlajtlanij ika notoka.
15 ”Tla nennechtlasojtlaj, nenkichiuaskej tlen nimechnauatia.
16 Niman nejua miyekpa niktlajtlanilis Tajtli mamechmaka okse itlaj tlen nochipa mechpaleuis.
17 Niktlajtlanilis noTajtsin mamechmaka espíritu santo tlen kiteititia tlen melauak. Nemejuamej nenkixmatij pampa nemopan onka niman nemopan nokaua. Pero, oksekimej xuelij kiseliaj pampa xueli kitaj nion xkixmatij.
18 Xnenmoselti nimechkauas, oksejpa niuajnokuepas.
19 Sa achijtsin poliui nemejuamej nennechitaskej pampa nejua niyoltika niman nemejuamej nenyoltoskej, pero oksekimej xok nechitaskej.
20 Ipan yejon tonajli nenkimatiskej ika nejua ninemi iuan noTaj, ika nemejuamej nouan nennemij niman ika nejua nemouan ninemi.
21 Akin kinselia* notlanauatiluan niman kintlakamati, nechtlasojtla. Niman akin nechtlasojtla, noTaj kitlasojtlas, niman nejua niktlasojtlas niman niknokauilis kuajli manechixmati”.
22 Judas akin xIscariote,* ijkin okitlajtolti: “NoTeko, ¿tlenon yopanok? ¿Tleka tikmokauilis kuajli matimitsixmatikan san tejuamej niman oksekimej ka?”.
23 Jesús okinankili: “Tla yakaj nechtlasojtla, kintlakamatis notlajtoluan niman noTaj kitlasojtlas. Niman tiomemej tiuajlaskej kampa yejua nemi niman iuan tichantiskej.
24 Akin xnechtlasojtla xkintlakamati notlajtoluan. Tlen nikijtoua xsan nejua nikuajnemilia, Tajtli akin onechajtitlan, nechijlia tlen nikijtos.
25 ”Yejuin nimechijlia aman ika nemouan ninemi.
26 Pero, Tajtli, ika notoka kuajtitlanis espíritu santo para mamechpaleui. Yejua mechmachtis niman mechilnamiktis nochi tlen yonimechijli.
27 Nimechkajteuilia yolseuilistli; nimechmaka noyolseuilis. Yolseuilistli tlen nejua niktemaka, xijkon ken oksekimej kitemakaj. Xmoyolchikauakan, niman maka xmajmanakan.
28 Onenkikakkej ika onimechijli: ‘Yeniauj niman oksejpa niuajnokuepas’. Tla nennechtlasojtlaj, nenpakiskej pampa niauj kampa Tajtli. Pampa Tajtli más ueyixtika xijkon ken nejua.
29 Nochi yejuin yonimechijli achto ika mapano, para ijkuak panos, nemejuamej nenkineltokaskej.
30 Xok nemouan nitlajtos, pampa uajlauj* akin kiyekana yejuin mundo, maski yejua xitlaj uelis nechchiuilis.
31 Pero, nejua nikchiua ijkon ken Tajtli yonechnauati para nochimej makimatikan ika niktlasojtla. Xmokuiteuakan, tiauej.
Notas
^ Noso “sanken”.
^ Ika griego kijtoua “kinpiya”.
^ Akin noijki kixmatij ken Tadeo.
^ Noso “uits”.
