Tlen okijkuilo Juan 16:1-33
16 ”Yonimechijli nochi yejuin para nochipa xtlaneltokakan.
2 Mechajkixtiskej de ne sinagoga. Manimechonijli ika ajsis tonajli ijkuak akin mechmiktiskej kinemiliskej ika kichijtokej tlen kuelita toTajtsin.
3 Pero, kichiuaskej nochi yejuin pampa xekixmatij Tajtli nion nejua.
4 Yonimechijli yejuin para ijkuak ijkon nochiuas, nenkilnamikiskej ika onimechijli.
”Xenimechijliaya pampa nemouan ninemiya.
5 Pero aman niauj kampa akin onechajtitlan, niman nion se de nemejuamej xnechtlajtoltia ‘¿Kanon tiauj?’.
6 Aman más yonemajmankej pampa onimechijli yejuin.
7 Pero, nimechijlia tlen melauak: mechpaleuis tla niauj. Pampa, tla xniauj, espíritu santo xnemopan uajlas; pero, tla niauj, nimechajtitlanilis.
8 Niman, ijkuak espíritu santo uajlas, kimititis gente ika nemij ipan tlajtlakojli, noijki ika nejua xonikchiuj itlaj tlen xkuajli niman kintlajtlakolmakas.
9 Kachtopa kimititis ika nemij ipan tlajtlakojli, pampa yejuamej xkiteititiaj ika notech tlaneltokaj.
10 Sakin, ika xonikchiuj itlaj tlen xkuajli, pampa niauj kampa Tajtli niman nemejuamej xok nennechitaskej,
11 niman sakin kintlajtlakolmakas, pampa akin kiyekana yejuin mundo yokitlajtlakolmakakej.
12 ”Ok miyek onka tlen noneki nimechijlis, pero aman xnenkasijkamatiskej.
13 Pero, ijkuak nenkiseliskej espíritu santo tlen kiteititia tlen melauak, mechpaleuis kuajli xkasijkamatikan nochi tlen melauak. Pampa xkijtos san tlen yejua kuajnemilia, kijtos tlen kikakis niman mechijlis tlen panos ika tlayekapan.
14 Espíritu santo nechueyiteneuas pampa kiselis tlen noyaxka,* niman kichiuas xmatikan.
15 Nochi tlen Tajtli kipiya noijki noyaxka. Yejua ika, onikijto ika kiselis tlen noyaxka niman kichiuas xmatikan.
16 Sa achijtsin poliui xok nennechitaskej, pero noijki sa achijtsin poliui nennechitaskej”.
17 Ijkuak okikakkej yejuin, sekimej akin kinmachtiaya onoijlijkej: “¿Tlenon okijtosnek ijkuak otechijli ‘Sa achijtsin poliui xok nennechitaskej, pero noijki sa achijtsin poliui nennechitaskej’? ¿Niman tlenon okijtosnek ijkuak okijto ‘Pampa niauj kampa Tajtli’?”.
18 Kijtouayaj: “¿Tlenon okijtosnek ijkuak okijto ‘Sa achijtsin poliui’? Xtikmatij de tlenon tlajtotikaj”.
19 Pampa Jesús kimatstoya ika kinekiyaj itlaj kitlajtoltiskej, okimijli: “¿Nemotlajtoltiaj yejon san pampa onikijto ‘Sa achijtsin poliui xok nennechitaskej, pero noijki sa achijtsin poliui nennechitaskej’?
20 Kuajli nimechijlia ika nemejuamej nenchokaskej niman nemajmanaskej, pero oksekimej yolpakiskej. Nemejuamej nemoyolkokoskej, pero sakin nenyolpakiskej.
21 Se siuatl melak nokokoua ijkuak yoajsik hora para kinemitis ikonetsin. Pero, ijkuak yokinemiti konetsintli, kilkaua kenijki melak nokokouaya niman yolpaki pampa youajnen se konetsintli.
22 Noijki ijkon nemopan nochijtok. Amantsin melak nemoyolkokouaj; pero oksejpa nimechitas niman ijkuakon melak nenyolpakiskej, niman xakaj uelis kichiuas maka xyolpakikan.
23 Niman ipan yejon tonajli xok itlaj nennechtlajtoltiskej. Kuajli xmatstokan ika noTaj mechmakas maski san tlenon nenkitlajtlaniskej ika notoka.
24 Hasta aman xeitlaj nenkitlajtlanij ika notoka. Xtlajtlanikan niman nenkiseliskej, ijkon melak nenyolpakiskej.
25 ”Nochi yejuin yonimechijli ika ejemplos. Pero, uajlauj* on hora ijkuak kuajli nimechijlis kenijki Tajtli, niman xok nikinkuis ejemplos.
26 Ipan yejon tonajli, nochi tlen nenkitlajtlaniliskej noTaj nenkichiuaskej ika notoka. Pero, yejon xkijtosneki tla itlaj niktlajtlanis nemopampa.
27 Tajtli mechtlasojtla, pampa yonennechtlasojtlakej, niman yonenkineltokakej ika yejua onechajtitlan.
28 Oniuajla ipan yejuin mundo pampa Tajtli onechajtitlan. Aman nikaua yejuin mundo niman niauj kampa Tajtli”.
29 Akin kinmachtiaya okijlijkej: “Aman kema timitsasijkamatij, pampa xtikinkui ejemplos.
30 Aman yotikasikamatkej ika nochi tikmati niman ika xnoneki yakaj itlaj mamitstlajtolti. Yejua ika tikneltokaj ika omitsajtitlan toTajtsin”.
31 Jesús okinnankili: “¿Aman nentlaneltokaj?
32 Xkakikan yejuin. Ajsis tonajli ijkuak mechxexeloskej, niman yejon tonajli yoyejkok. Nochimej yaskej inchan niman san noselti nechkauaskej. Maski xsan noselti ninemi pampa Tajtli nouan nemi.
33 Nochi yejuin yonimechijli para nimechpaleuis xyolsejtokan. Ipan yejuin mundo nentlajyouiskej. Pero ¡xmoyolchikauakan!, pampa nejua yonikintlan akin chantij ipan yejuin mundo”.
