Tlen okijkuilo Juan 17:1-26
17 Sakin ika yokijto yejuin, Jesús oajkotlachix niman okijto: “NoTaj, yoyejkok hora. Xchiua maueyixto moKoneuj para moKoneuj mitsueyiteneuas,
2 ijkon ken yotikauili ika yejua makinmaka nemilistli tlen xkeman tlami nochimej akin yotikinmaktili.
3 Yejuin kijtosneki nemilistli tlen xkeman tlami, tla mitsixmatij* tejua akin melauak toTajtsin niman noijki tla kixmatij Jesucristo, akin otikuajtitlan.
4 Nejua yonimitsueyiteneuj ipan yejuin mundo niman yoniktlamilti tekitl tlen otinechnauati.
5 Aman noTaj, xchiua maniueyixto monakastlan ijkon ken niueyixtoya achto uajnemiskiaj akin nemij ipan yejuin mundo.
6 ”Yonikimititi motoka akin otinechinmakak ipan yejuin mundo. Moyaxkauan* katkaj niman otinechinmakak niman yokintlakamatkej motlajtoluan.
7 Aman yekimatij ika tejua otinechmakak nochi tlen nikpiya.
8 Pampa yonikimijli tlen tiknekiya makimatikan, yejuamej yokiselijkej niman yokimatkej ika motech oniualeuj niman yokineltokakej ika tejua otinechajtitlan.
9 Nikchiua oración inpampa, xnikchiua oración inpampa akin xmitstekichiuiliaj. Niktlajtlani xkinpaleui akin yotinechinmaktili pampa moyaxkauan.
10 Niman nochi tlen noyaxka, moyaxka niman nochi tlen moyaxka, noyaxka. Niman yejuamej yokichijkej maniueyixto.
11 ”Nejua xok ninemi ipan yejuin mundo pero yejuamej kema. Niman nejua motech niauj. NoTaj, tejua melak tichipauak, yejua ika, nimitstlajtlanilia xkintlajpiya ipampa motoka, yejon tokayotl tlen tejua otinechmakak. Para yejuamej san noijki matlanemilikan ijkon ken tejuamej san noijki ken titlanemiliaj.
12 Ijkuak imiuan ninemiya, nejua nikintlajpiaya ipampa motoka, yejon tokayotl tlen otinechmakak. Nejua yonikintlajpix niman nion se xokipopolojkej, san akin kipopoloskej para manochiua tlen ijkuilijtika.
13 Pero, aman motech niauj. Niman nochi yejuin nikijtoua chika ninemi ipan yejuin mundo para yejuamej makimachilikan kenijki melak niyolpaki.
14 Yonikimijli motlajtoluan. Pero, akin nemij ipan yejuin mundo yokintlauelitakej pampa xkichiuaj ken yejuamej, ijkon ken nejua xnikchiua ken akin xmitstekichiuiliaj.
15 ”Xnimitstlajtlanilia xkinkixti de yejuin mundo, nimitstlajtlanilia xkinmakixti itech akin Xkuajli.
16 Yejuamej, xkichiuaj ken akin nemij ipan yejuin mundo, ijkon ken nejua xnikchiua ken yejuamej.
17 Xkinchipaua ika tlen melauak, motlajtol yejua tlen melauak.
18 Ijkon ken tejua otinechajtitlan ipan yejuin mundo, nejua noijki onikomontitlan ipan yejuin mundo.
19 Niman ninochipaua inpampa para yejuamej noijki machipauikan ika tlen melauak.
20 ”Xsan nikchiua oración inpampa, noijki nikchiua oración inpampa akin sakin tlaneltokaskej ika tlen yejuamej kimijliskej,
21 para yejuamej san noijki matlanemilikan. Ijkon ken tejua, noTaj, nouan tinemi niman nejua mouan ninemi. Nimitstlajtlanilia ika yejuamej touan manemikan. Ijkon, akin nemij ipan yejuin mundo kineltokaskej ika tejua otinechajtitlan.
22 Yejon ueyilistli tlen otinechmakak nejua yonikinmakak. Ijkon, yejuamej san noijki matlanemilikan ijkon ken tejuamej san noijki ken titlanemiliaj.
23 Nejua imiuan ninemis niman tejua nouan tinemis para nochimej san sekan manemikan. Ijkon, akin nemij ipan yejuin mundo kimatiskej ika tejua otinechajtitlan, niman ika otikintlasojtlak ijkon ken nejua otinechtlasojtlak.
24 NoTaj, nikneki ika akin otinechinmakak nouan manemikan kampa nejua ninemis para makitakan kenijki tejua yotinechueyitlali. Pampa otinechtlasojtlak achto ika uajnemiskiaj akin nemij ipan yejuin mundo.*
25 NoTaj, tejua nochipa tikchiua tlen kuajli. Oksekimej xmitsixmatij, pero nejua nimitsixmati niman yejuamej yokimatkej ika tejua otinechajtitlan.
26 Yonikimititi motoka, niman nochipa ijkon nikchiuas. Ijkon, tikintlasojtlas ken nejua otinechtlasojtlak niman nejua imiuan ninemis.
Notas
^ Ika griego, tlajtojli tlen nikan notekitiltia kijtosneki itlaj tlen xkeman tlami.
^ Noso “Motlatkiuan”.
