Tlen okijkuilo Juan 20:1-31
20 Ijkuak domingo,* María Magdalena san kualkantsin oyaj kampa tlalkontli. Ijkuakon ok* tlayoua katka, niman okitak ika yokejkuanijkaj tetl tlen ika okitsaukkaj tlalkontli.
2 Kuakon, onotlalojtikis okitato Simón Pedro niman okse akin Jesús kimachtiaya niman kitlasojtlaya, niman okimijli: “¡Yokikixtitoj toTeko ne kampa otiktlalijkaj niman xtikmatij kanon yokuikakej!”.
3 Kuakon, Pedro niman okse akin Jesús kimachtiaya oyajkej kampa tlalkontli.
4 On omemej onotlalojkej, pero okse akin Jesús kimachtiaya más onotlalo niman kachtopa oajsik kampa tlalkontli.
5 Ijkuak oontlachix tlaijtik, ompa okimitak tlakentin de lino, pero xokalak.
6 Kuakon Simón Pedro, akin ikuitlapan uajlaya noijki oajsik niman okalak kampa tlalkontli. Niman ompa okimitak tlakentin de lino.
7 Tlakentli tlen ika okitlapachouilijkaj itsontekon Jesús oksekan tejkuixtoya,* niman xokitlalijkej iuan on okseki tlakentin.
8 Sakin, noijki okalak on okse akin Jesús kimachtiaya, akin kachtopa oajsika kampa tlalkontli. Ijkuak oajsik niman okitak, otlaneltokak.
9 Yejuamej xekajsikamatiyaj Tlajkuiloltin kampa kijtouaya ika Jesús nonekiya nokuiteuas intech akin yomikkej.
10 Kuakon, yejuamej onokuepkej inchan.
11 Pero María onokauj kiyauak, ompa chokatoya. Ijkuak chokatoya, oontlachix ijtik tlalkontli
12 niman okimitak ika omemej ángeles tlakenistakej yeuatoyaj kampa okitlalijkaj itlalnakayo Jesús. Se, yeuatoya kampa itsontekon niman okse kampa ikxiuan.
13 Niman yejuamej okitlajtoltijkej: “Siuatsintli, ¿tleka tichokatika?”. Yejua okinnankili: “Yokuikakej noTeko niman xnikmati kanon yokitlalijkej”.
14 Ijkuak yokijto yejuin, yejua onokuep niman okitak ika Jesús ompa notelketstoya,* pero xokixmat tla yejua katka.
15 Jesús okitlajtolti: “Siuatl, ¿tleka tichoka? ¿Akinon tiktejtemoua?”. Yejua okinemili ika katka tlakatl akin kitlajpiaya huerta, niman okijli : “Noteko, tla tejua yotikitkik itlalnakayo, xnechijli kanon yotiktlali niman nejua nikitkis”.
16 Jesús okijli: “¡María!”. Ijkuak yejua kuajli okitak, okijli ika hebreo: “¡Rabbóni!”. Yejon tlajtojli kijtosneki maestro.
17 Jesús okijli: “Maka sa notech xmajsi pampa xeniauj kampa Tajtli. Xuiya kampa nemij nokniuan, niman xkimijli: ‘Nias kampa noTaj niman nemoTaj. Niman kampa noTajtsin niman nemoTajtsin’”.
18 María Magdalena okimitato akin Jesús kinmachtiaya, niman okimijli: “¡Yonikitak toTeko!”. Niman okimijli tlen yejua yokijlijka.
19 Yejon domingo yotlapoyajka niman akin Jesús kinmachtiaya san sekan yonosentlalijkaj, pero yokintsaukkaj puertas ika llave pampa kinmakasiyaj judíos. Kuakon, Jesús imixpan ouajnonexti niman okimijli: “Xpiyakan yolseuilistli”.
20 Ijkuak yokijto yejuin, okimititi imauan niman iyelchikiuj. Niman akin Jesús kinmachtiaya melak oyolpakkej ijkuak okitakej toTeko.
21 Jesús oksejpa okimijli: “Xyolsejtokan. Ijkon ken Tajtli onechajtitlan, nejua noijki nimechontitlani”.
22 Ijkuak otlan kijtoua yejon, okimilpits niman okimijli: “Xselikan espíritu santo.
23 Tla nemejuamej nenkitlapopoluiyaj yakaj, kitlapopoluiskej. Tla xnenkitlapopoluiyaj, xkitlapopoluiskej”.
24 Pero Tomás, akin kijliayaj Gemelo niman teuan katka itech 12 akin okintlapejpenijkej ximiuan nemiya ijkuak ouajla Jesús.
25 Yejua ika, on oksekimej akin Jesús kinmachtiaya, kijliayaj: “¡Yotikitakej toTeko!”. Pero yejua okimijli: “Nejua san nikneltokas tla nikimita niman nikimajsi imauan kampa okitetsotsonkej* ika clavos niman nikajxilia iyelchikiuj”.
26 Ijkuak youajchikueyitka, akin Jesús kinmachtiaya oksejpa san sekan yonosentlalijkaj ipan kajli, niman Tomás imiuan nemiya. Maski puertas tsauktoyaj ika llave, Jesús imixpan ouanonexti niman okimijli: “Xpiyakan yolseuilistli”.
27 Sakin, okijli Tomás: “Xkuajkui momajpil niman xkimita nomauan; xkuajkui moma niman xkajsi noyelchikiuj. Xtlaneltoka niman maka sa xkijto ika xniyoliui”.
28 Kuakon, Tomás okijli: “¡NoTeko niman noTajtsin!”.
29 Jesús okijli: “¿Yotitlaneltokak san pampa yotinechitak? Mayolpakikan akin tlaneltokaj maski xkitaj”.
30 Jesús noijki okinchiuj okseki miyek milagros imixpan akin kinmachtiaya niman yejon xonoijkuilo ipan yejuin libro.
31 Pero, yejuin onoijkuilo para nemejuamej xneltokakan ika Jesús yejua Cristo, iKoneuj toTajtsin, niman para xpiyakan nemilistli tla itech nentlaneltokaj.
Notas
^ Noso “kachtopa tonajli ipan semana”.
^ Noso “sanken”.
^ Noso “okitekimilo”.
^ Noso “ijkatoya”.
^ Noso “okitepaxojkej”.
