Tlen okijkuilo Juan 21:1-25
21 Sakin, Jesús oksejpa ouajnonexti imixpan akin kinmachtiaya ne kampa onka mar de Tiberíades. Yejua ijkin ken imixpan ouajnonexti.
2 Ompa san sekan nemiyaj Simón Pedro, Tomás, akin kijliayaj Gemelo, Natanael akin ualeuaya ipan se ciudad tlen itoka Caná de Galilea, ikoneuan Zebedeo niman oksekimej omemej akin Jesús kinmachtiaya.
3 Simón Pedro okimijli: “Nikomonajsis michimej”. Yejuamej okijlijkej: “Mouan tiaskej”. Kuakon, oyajkej niman otlejkokej ipan se barco. Pero, ipan yejon yeuajli xtlaj okajsikej.
4 Ijkuak ouajtlanes, Jesús nemiya itenko mar, pero akin kinmachtiaya xokixmatkej.
5 Kuakon, Jesús okimijli: “Nokoneuan, xnenkipiyaj* tlen nenkikuaskej, ¿xmelak?”. Yejuamej okinankilijkej: “Ka”.
6 Niman yejua okimijli: “Xkonchapanikan nemomatlauj* nemomayekma kampa inakastlan barco niman itlaj nenkinextiskej”. Ijkuak okonchapanijkej, melak otenkej ika michimej niman hasta xok ueliyaj kikixtiayaj.
7 Kuakon, yejon akin Jesús kimachtiaya niman kitlasojtlaya, ijkin okijli Pedro: “¡Yejua toTeko!”. Ijkuak Simón Pedro okikak ika yejua toTeko katka, nimantsin okinaki* itlaken pampa tetsotsoltik* katka, niman oonnotlajkal ipan mar.
8 Pero yejon oksekimej akin Jesús kinmachtiaya, oyajkej ipan pitentsin* barco. Yejuamej kitilantiayaj matlatl tlen tentiaya ika michimej. Ijkon okichijkej pampa xuejka nemiyaj, san nemiyaj 90 metros* de itenko mar.
9 Ijkuak oajsikej itenko mar, okitakej ika Jesús yotlatlatijka niman ipan tlixochtli onkatkaj michimej niman pan.
10 Jesús okimijli: “Xkinuajkuikan sekimej michimej tlen onenkimajsikej”.
11 Kuakon, Simón Pedro oontlejkok ipan barco niman okitilantiaj yejon matlatl hasta kampa tlajli. Yejuin matlatl tentoya ika 153 uejueyi michimej. Pero, maski melak miyekej katkaj, xokojkoton.
12 Jesús okimijli: “Xtlakuakij”. Niman nion se de akin kinmachtiaya xkinekiya kitlajtoltis: “¿Tejua tiakinon?”. Pampa kimatstoyaj ika katka toTeko.
13 Jesús okonajsik pan niman michimej niman okinmakak.
14 Yejuin onochiuj ijkuak Jesús ika yexpa ouajnonexti imixpan akin kinmachtiaya sakin ika yokiyolitijkaj itech akin yomikkej.
15 Ijkuak yotlakuajkaj, Jesús ijkin okitlajtolti Simón Pedro: “Simón, ikoneuj Juan, ¿más tinechtlasojtla xijkon ken yejuin michimej?”. Yejua okinankili: “Kema, noTeko, tejua tikmatstika ika nimitstlasojtla”. Jesús okijli: “Xkintlakualti noborreguitos”.
16 Ika okpa, yejua oksejpa ijkin okitlajtolti: “Simón, ikoneuj Juan ¿tinechtlasojtla?”. Yejua okinankili: “Kema, noTeko, tejua tikmatstika ika nimitstlasojtla”. Jesús okijli: “Xkintlajpiya noborreguitos”.
17 Ika yexpa okitlajtolti: “Simón, ikoneuj Juan, ¿tinechtlasojtla?”. Pedro onajman ijkuak okitak ika Jesús ika yexpa okitlajtolti tla kitlasojtlaya. Kuakon okijli: “NoTeko, tejua nochi tikmati. Tejua tikmatstika ika nimitstlasojtla”. Jesús okijli: “Xkintlakualti noborreguitos.
18 Ijkuak titelpochtli katka, san no tejua timotlakentiaya niman tiaya kampa tiknekiya, pero, kuajli nimitsijlia ika ijkuak tiueuentsintias, tikinkuiteuas* momauan niman yakaj okse mitstlakentis niman mitsuikas kampa xtikneki”.
19 Jesús ijkon okijto para kiteititis kenijki mikiskia Pedro niman ijkon kiueyichiuas toTajtsin. Niman sakin, ijkin okijli: “Nochipa nouan xuajla”.*
20 Pedro oonokuep niman okitak ika inkuitlapan uajlaya akin Jesús kitlasojtlaya. Yejua akin onotekak ipan iyelpan Jesús ijkuak tlakuajtoyaj niman ijkin okitlajtolti: “NoTeko, ¿akinon mitstemaktilis?”.
21 Yejua ika, ijkuak Pedro okitak, ijkin okitlajtolti Jesús: “NoTeko, ¿niman yejua tlenon ipan nochiuas?”.
22 Jesús okijli: “Tla nikneki nikan manokaua hasta ijkuak nejua niuajlas, ¿tlenon mitsimportaroua? Tejua nochipa nouan xuajla”.
23 Yejua ika, miyekej tokniuan opeuj kijtouaj ika yejuin akin Jesús kimachtiaya xmikiskia. Pero Jesús xokijli tla xmikiskia, yejua san okijto: “Tla nikneki nikan manokaua hasta ijkuak nejua niuajlas, ¿tlenon mitsimportaroua?”.
24 Yejua akin kiteijlia niman yokijkuilo nochi yejuin, niman tikmatstokej ika melauak tlen kijtoua.
25 Jesús miyek okseki tlen okichiuj, pero, tla nochi noijkuiloskia, niknemilia ika yejuin mundo xueliskia kinxikos yejon libros* tlen noijkuiloskiaj.
Notas
^ Noso “nion se michin”.
^ Yejuin itlaj tlen kikuij para kimajsiskej michimej.
^ Noso “okitlali”.
^ Noso “xmiyek itlaken kipiaya”.
^ Noso “tsitsin”, “tsitsikitsin”, “tsitsini”.
^ Ika griego kijtoua “kanaj 200 codos”.
^ Noso “tikimajkokuis”.
^ Noso “xuiki”.
