Tlen okijkuilo Juan 8:12-59
8 12 Kuakon, Jesús oksejpa opeuj ijkin kimijlia: “Nejua niintlauil akin nikan chantij. Akin nouan yas xkeman nemis kampa tlayouatok. Kipiyas tlauijli tlen kitemaka nemilistli”.
13 Kuakon fariseos okijlijkej: “San no tejua kuajli titlajtojtika motech. Xmelauak tlen tikijtoua”.
14 Jesús okinnankili: “Maski san no nejua kuajli nitlajtoua notech, melauak tlen nikijtoua. Pampa nejua nikmati kanon oniualeuj niman kanon niauj. Pero nemejuamej xnenkimatij kanon oniualeuj nion kanon niauj.
15 Nemejuamej nentetlajtlakolmakaj ijkon ken kichiuaj tlakamej, nejua xakaj niktlajtlakolmaka.
16 Niman tla nitetlajtlakolmakaskia, nikchiuaskia ijkon ken kinamiki* pampa xnoselti ninemi, noTaj, akin onechajtitlan, nouan nemi.
17 Noijki, ipan Tlanauatijli tlen omechmakakej ijkin kijtoua: ‘Melauak tlen omemej kiteijliaj’.
18 San no nejua kuajli nitlajtoua notech, niman noijki kuajli tlajtoua notech noTaj, akin onechajtitlan”.
19 Kuakon, okitlajtoltijkej: “¿Kanon nemi moTaj?”. Jesús okinnankili: “Nemejuamej xnennechixmatij nejua nion noTaj. Tla nennechixmatiskiaj, noijki nenkixmatiskiaj noTaj”.
20 Nochi yejuin okijto ijkuak temachtijtoya ipan templo, kampa onkatkaj cajas tlen kipiayaj tomin. Pero, xakaj ouel okajsik, pampa xeajsiya ihora.
21 Kuakon, oksejpa ijkin okimijli: “Nejua nias niman nemejuamej nennechtejtemoskej, pero, nenmikiskej pampa nentlajtlakolejkej. Kampa nejua niauj nemejuamej xuelis nenyaskej”.
22 Judíos ijkin opeuj kijtouaj: “¿Kanaj nomiktis? Pampa kijtoua ‘Kampa nejua niauj nemejuamej xuelis nenyaskej’”.
23 Kuakon, yejua noijki okijto: “Nemejuamej nenualeuaj de nikan tlatsintlan, nejua niualeua de ne tlakpak. Nemejuamej nenualeuaj de yejuin mundo, nejua xniualeua de yejuin mundo.
24 Yejua ika, onimechijli: ‘Nenmikiskej pampa nentlajtlakolejkej’. Pampa tla xnenkineltokaj ika nejua yejon tlakatl, nenmikiskej pampa nentlajtlakolejkej”.
25 Kuakon, ijkin okitlajtoltijkej: “¿Niman tejua tiakinon?”. Jesús okinnankili: “¿Tlen para nimechnotsa?
26 Nikpiya miyek tlen uelis nikijtos nemotech niman onka miyek tlemach tlen uelis niktlajtlakolmakas. Akin onechajtitlan nochipa kijtoua tlen melauak niman nejua nikimijlia akin nemij ipan yejuin mundo tlen onikak itech yejua”.
27 Pero, yejuamej xokasikamatkej ika kinnojnotstoya itech iTaj.
28 Kuakon, Jesús okijto: “Ijkuak nenkipiloskej iKoneuj Tlakatl ipan kojtli melaktik, kuakon nenkimatiskej ika nejua yejon tlakatl. Niman ika xtlaj nikchiua san pampa nejua nikneki, nejua nikijtoua tlen Tajtli onechmachti.
29 Niman akin onechajtitlan nouan nemi, xnoselti nechkaua, pampa nejua nochipa nikchiua tlen yejua kuelita”.
30 Miyekej itech otlaneltokakej ijkuak yejua ijkon okijto.
31 Kuakon, Jesús ijkin okimijli judíos akin itech otlaneltokakej: “Tla nenkichiuaj tlen nitemachtia,* nenkiteititiskej ika yemelak nejua onimechmachti.
32 Nenkixmatiskej tlen melauak niman on tlen melauak mechmakixtis”.
33 Yejuamej okinankilijkej: “Tejuamej tiualeuaj itech Abrahán niman xkeman tinemij ken tlakeualtin, ¿tleka tikijtoua ‘mechmakixtiskej’?”.
34 Jesús okinnankili: “Kuajli nimechijlia ika nochimej akin kichiuaj se tlajtlakojli, nochiuaj kentla intlakeual tlajtlakojli.
35 Noijki, tlakeuajli xnochipa nokaua ichan iteko, tekoneuj kema nochipa ompa nokaua.
36 Kuakon, tla tekoneuj mechmakixtia, yemelak nenmakisaskej.
37 Nejua nikmatstika ika nenualeuaj itech Abrahán, pero nenkinekij nennechmiktiskej pampa xnenkiseliaj tlen nimechijlia.
38 Nejua nimechijlia tlen onikitak ijkuak ninemiya iuan Tajtli. Pero nemejuamej nenkichiuaj tlen yonenkikakilijkej nemotaj”.
39 Kuakon, yejuamej okijlijkej: “Abrahán, yejua totaj”. Jesús okimijli: “Tla Abrahán nemotaj yeskia, nenkichiuaskiaj ijkon ken Abrahán.
40 Pero nejua yonimechijli tlen melauak, tlen onikakili toTajtsin. Niman nemejuamej nenkinekij nennechmiktiskej. Abrahán xijkon okichiuj.
41 Nemejuamej nenkichiuaj ijkon ken nemotaj”. Yejuamej okinankilijkej: “Tejuamej xotiualejkej itech auilnemilistli,* san se totaj tikpiyaj, toTajtsin”.
42 Jesús okinnankili: “Tla toTajtsin nemotaj yeskia, nemejuamej nennechtlasojtlaskiaj. Pampa toTajtsin onechajtitlan niman yejua ika nikan ninemi. Nejua xoniuajla san pampa oniknek, oniuajla pampa yejua onechajtitlan.
43 ¿Tleka xnenkasikamatij tlen nikijtojtika? Pampa xueli nenkinkakij notlajtoluan.
44 Nemejuamej nemotaj Diablo. Niman nenkinekij nenkichiuaskej ijkon ken nemotaj. Yejua opeuj temiktia ijkuak okijto ika toTajtsin tlakajkayaua. Xomelajkanen ipan tlen melauak pampa ipan iyojlo xonka tlen melauak. Ijkuak tlakajkayaua kiteititia kenijki yejua. Pampa yejua se tlakajkayajketl niman intaj akin tlakajkayauaj.
45 Pero, pampa nejua nimechijlia tlen melauak, xnennechneltokaj.
46 ¿Akinon de nemejuamej uelis kiteititis ika yonikchiuj se tlajtlakojli? Tla nikijtoua tlen melauak, ¿tleka xnennechneltokaj?
47 Akin ualeuaj itech toTajtsin kinkakij itlajtoluan toTajtsin, yejua ika nemejuamej xnennechkakij pampa xnenualeuaj itech toTajtsin”.
48 Ijkuak judíos okikakkej yejon, ijkin okijlijkej: “Melauak tlen tikijtouaj ‘Tejua se tisamaritano niman tikpiya se demonio’”.
49 Jesús okinnankili: “Nejua xnikpiya se demonio. San nikueyichiua noTaj, niman nemejuamej xnennechtlakaitaj.
50 Pero nejua xniktejtemoua manechueyiteneuakan: nemi yakaj akin kema kitejtemoua, niman yejua tetlajtlakolmaka.
51 Kuajli nimechijlia ika tla yakaj kitlakamati tlen nikijtoua, xkeman mikis”.
52 Judíos okijlijkej: “Aman kuajli tikmatstokej ika tikpiya se demonio. Abrahán omik niman noijki teotlajtojkej. Pero tejua tikijtoua: ‘Tla yakaj kitlakamati tlen nikijtoua, xkeman mikis’.
53 ¿Tiknemilia ika tejua más tiueyixtika xijkon ken totaj Abrahán, akin omik? Teotlajtojkej noijki omikkej”.
54 Jesús ijkin otenankili: “Tla san no nejua ninoueyiliskia, noueyilis xtlaj ika tepaleuiskia. NoTaj akin nechueyilia, akin nenkijtouaj ika nemoTajtsin.
55 Nemejuamej xnenkixmatij, pero nejua nikixmati. Niman tla nikijtoskia ika xnikixmati, nitlakajkayajtoskia ijkon ken nemejuamej. Pero kema nikixmati niman nikintlakamati itlajtoluan.
56 Nemotaj Abrahán melak yolpakiya ijkuak tlanemiliaya ipan on tonajli ijkuak nejua nejkoskia. Okitak niman oyolpak”.
57 Kuakon, judíos okijlijkej: “Xtikpiya nion 50 años, ¿niman tikijtoua ika yotikitak Abrahán?”.
58 Jesús okimijli: “Melauak nimechijlia ika achto ika Abrahán nemiskia, nejua yeninemiya”.
59 Kuakon okimajkoukkej* temej para kitemojmotlaskej Jesús. Pero yejua oniyan niman ouajkis de on templo.
Notas
^ Ika griego kijtoua “melauak”.
^ Ika griego kijtoua “notlajtol”.
^ Ika griego noijtoua pornéia. Xkita auilnemilistli.
^ Noso “okinpejpenkej”.
