Tlen okijkuilo Juan 9:1-41
9 Ijkuak panotiaya, okitak se tlakatl akin desde ijkuak ouajnen xtlachiaya.
2 Niman akin kinmachtiaya okitlajtoltijkej: “Rabí, ¿tleka yejuin tlakatl ijkon ouajnen: yejua otlajtlako noso itajuan?”.
3 Jesús okinnankili: “Xotlajtlakojkej nion yejua nion itajuan, pero yejuin opanok para kuajli manoteititi tlen toTajtsin ueli kichiua.
4 Aman ika xetlayoua noneki tikchiuaskej tlen onechnauati akin onechajtitlan. Xakaj ueli tekiti ijkuak yetlayoua.
5 Aman ika nikan ninemi, nejua niitlauil yejuin mundo”.
6 Ijkuak yokijto yejuin, ochijchak ipan tlajli niman ika ikualak okichijchiuj sokitl. Sakin okitlalili yejon tlakatl akin xtlachiaya
7 niman okijli: “Xmixamiti* ne kampa tanque de Siloam”.* Kuakon yejua oyaj, onixamito, niman ijkuak ouajnokuep yetlachiaya.
8 Kuakon akin nisiuj chantiyaj kampa yejua chanti niman akin kitayaj kenijki kitlajtlantinemiya tomin ijkin opeuj kijtouaj: “Yejuin tlakatl akin san notlajtlalijtinemiya para kitlajtlanis tomin, ¿xmelak?”.
9 Sekimej kijtouayaj: “Kema yejua”. Oksekimej kijtouayaj: “Ka xyejua, pero ijkon tlachiasneki”. Niman yejon tlakatl kijtouaya: “Kema, nejua”.
10 Kuakon okitlajtoltijkej: “Niman, ¿tleka aman ueli titlachia?”.
11 Yejua okinnankili: “Yejon tlakatl akin itoka Jesús okichijchiuj sokitl niman onechtlalili ipan nixtololojuan. Sakin onechijli: ‘Xuiya Siloam niman xmixamiti’. Niman nejua oniaj, oninixamito niman ouel onitlachix”.
12 Kuakon okitlajtoltijkej: “¿Kanon nemi yejon tlakatl?”. Yejua okinnankili: “Xnikmati”.
13 Yejuamej okuikakej ixpan fariseos yejon tlakatl akin xtlachiaya.
14 Yemelak, ijkuak Jesús okichijchiuj sokitl niman okipajti yejon tlakatl, katka sábado.
15 Kuakon fariseos noijki opeuj kitlajtlajtoltiaj tleka aman ueliya tlachiaya. Yejua okimijli: “Onechtlalili sokitl ipan nixtololojuan, oninixami niman aman ueli nitlachia”.
16 Kuakon sekimej fariseos opeuj ijkin kijtouaj itech Jesús: “Yejuin tlakatl xualeua itech toTajtsin pampa xkitlakaita tonajli sábado”. Oksekimej kijtouayaj: “Pero ¿kenijki se tlakatl akin tlajtlakole uelis kinchiuas milagros ken yejuin?”. Yejuamej xnotlajtolnamikiyaj.
17 Niman oksejpa okitlajtoltijkej yejon tlakatl akin xtlachiaya: “Tejua, akin omitspajti, ¿tlenon tiknemilia itech?”. Yejon tlakatl okinnankili: “Yejua se teotlajtojketl”.
18 Pero, yejon judíos xkineltokayaj ika yejon tlakatl xtlachiaya niman ika aman yeueliya tlachiaya, hasta ijkuak okomonotskej itajuan.
19 Okintlajtoltijkej: “¿Yejuin nemokoneuj akin nenkijtouaj ika ijkuak onen xtlachiaya? Kuakon, ¿tleka aman ueli tlachia?”.
20 Niman itajuan okinnankilijkej: “Tikmatstokej ika yejuin tokoneuj, niman ika ijkuak onen xtlachiaya.
21 Pero, xtikmatij tleka aman ueli tlachia niman xtikmatij akinon okipajti. Xtlajtoltikan yejua, yeueyi, yeuelis mechnankilis”.
22 Itajuan ijkon okinnankilijkej pampa kinmakasiyaj judíos; judíos yokijtojkaj ika konkixtiskiaj ijtik kajli kampa yejuamej kiueyichiuaj toTajtsin akin kijtoskiaj ika Jesús yejua Cristo.
23 Yejua ika, itajuan okijtojkej “Yeueyi, yejua xtlajtoltikan”.
24 Kuakon ika okpa okonotskej yejon tlakatl akin xtlachiaya niman okijlijkej: “Xueyichiua toTajtsin. Tejuamej tikmatij ika yejon tlakatl tlajtlakole”.
25 Yejua okinnankili: “Nejua xnikmati tla tlajtlakole. San nikmatstika ika xnitlachiaya niman aman kema ueli nitlachia”.
26 Kuakon okitlajtoltijkej: “¿Tlenon omitschiuili? ¿Kenijki omitspajti?”.
27 Yejua okinnankili: “Yonimechijli, pero nemejuamej xnennechkakisnekij. ¿Tleka oksejpa nenkinekij nenkikakiskej? ¿Noijki nenkinekij mamechmachti?”.
28 Ijkuak ijkin okikakkej, yejuamej ijkin okitlauelnankilijkej: “Tejua mitsmachtia yejon tlakatl, pero tejuamej otechmachti Moisés.
29 Tikmatij ika toTajtsin okinots Moisés, pero nion xtikmatij kanon oualeuj yejon tlakatl”.
30 Tlakatl akin xtlachiaya okinnankili: “Melak temojkatlachialti ika yejua onechpajti, niman nemejuamej nion xnenkimatij kanon ualeua.
31 Tikmatij ika toTajtsin xkinkaki akin tlajtlakolejkej, pero kema kinkaki akin kitlakaitaj niman kichiuaj tlen kitlajtlani.
32 Desde yeuejkaui, xkeman tikakij ika se tlakatl makipajti yakaj akin xtlachia ijkuak onen.
33 Yejuin tlakatl xtlaj ueliskia kichiuas tla xualeuaskia itech toTajtsin”.
34 Kuakon okijlijkej: “Tejua melak titlajtlakole desde ijkuak otinen niman, ¿tikneki titechmachtis?”. Niman okuajkixtijkej.
35 Jesús okikak ika yokuajkixtijkaj, niman ijkuak okinexti ijkin okitlajtolti: “¿Titlaneltoka itech iKoneuj Tlakatl?”.
36 Yejua okinankili: “¿Akinon, noteko? Xnechijli para uelis itech nitlaneltokas”.
37 Jesús okinankili: “Tejua yotikitak niman iuan titlajtojtika”.
38 Kuakon okijto: “Itech nitlaneltoka, noTeko”. Niman okititi ika kitlakaita.*
39 Niman Jesús okijto: “Oniuajla onitetlajtlakolmakako ipan yejuin mundo, para akin xtlachiaj matlachiakan niman akin tlachiaj maka matlachiakan”.
40 Fariseos akin ompa iuan nemiyaj niman okikakkej yejuin, okijlijkej: “¿Tejuamej noijki xtitlachiaj?”.
41 Jesús okinnankili: “Xnentlajtlakolejkej yeskiaj tla xnentlachiaskiaj. Pero, pampa nemejuamej nenkijtouaj ‘Titlachiaj’, kuakon nentlajtlakolejkej”.
Notas
^ Noso “xmoxayakapajpakati”.
^ Siloam kijtosneki “okititlankej”.
^ Noso “ixpan onotlakuantelkets”.
