Tlen okijkuilo Mateo 13:1-58
-
EJEMPLOS ITECH IGOBIERNO TOTAJTSIN (1-52)
-
Akin toka (1-9)
-
Tleka Jesús temachtiaya ika ejemplos (10-17)
-
Okimijli tlenon kijtosneki yejon ejemplo tlen tlajtoua itech akin toka (18-23)
-
Trigo niman xkuajli xijtli (24-30)
-
Iteyo mostaza niman levadura (31-33)
-
Jesús kintekitiltia ejemplos para manochiua tlen yonoijtojka (34, 35)
-
Kimijlia tlenon kijtosneki yejon ejemplo tlen tlajtoua itech trigo niman xkuajli xijtli (36-43)
-
“Tesoro tlen iyantoya” niman “perla tlen melak patioj” (44-46)
-
“Tlen ika michajsij” (47-50)
-
“Akin kikixtia tlen yenkuik niman tlen xyenkuik itech itesoro” (51, 52)
-
-
Jesús xkitlakaitaj kampa onoskalti (53-58)
13 Ipan yejon tonajli, Jesús ouajkis ipan kajli niman onotlali itenko mar.
2 Niman pampa melak miyekej oyejkokej yejua otlejkok ipan se barco niman ompa onotlali, niman akin ompa oajsikej san ijkatoyaj itenko mar.
3 Kuakon opeuj kinmachtia ika ejemplos. Okimijli: “¡Xkakikan! Se tlakatl oyaj otokato.
4 Niman ijkuak tokatiaya, seki ixinach oxixintia itenko ojtli niman ouajlajkej totomej niman okikuajkej.
5 Okseki oxixin kampa tejteyo niman kampa xmás onkatka tlajli, yejon xinachtli nimantsin opeuj noskaltia pampa tlajli xuejkatlan katka.
6 Pero, ijkuak ouajkis tonaltsintli, plantas otonaltlatlakej. Niman pampa xuejkatlan onkatka inneluayo, opilinkej.
7 Okseki oxixin kampa uitsyo niman pampa uitstli onoskalti, okixijmikti.
8 Niman okseki oxixin ipan kuajli tlajli niman opeuj tlatlakiltiaj: seki omiyekiyak 100 veces más; okseki 60, niman okseki 30.
9 Akin kipiya inakas, kuajli matlakaki”.
10 Kuakon, akin kinmachtiaya okinisiuijkej niman okitlajtoltijkej: “¿Tleka tikinmachtia ika ejemplos?”.
11 Yejua okinnankili: “Nemejuamej mechkauiliaj xkasikamatikan tlen xakaj kimati itech iGobierno toTajtsin,* pero yejuamej ka.
12 Pampa akin kipiya más kimakaskej, niman miyek kipiyas; pero akin xkipiya kikuiliskej hasta tlen kipiya.
13 Ika yejon nikinmachtia ika ejemplos, pampa maski tlachiaj, xtlachiaj, niman maski tlakakij, xtlakakij nion xtlaj kasikamatij.
14 Inpan nochiua tlen okijto teotlajtojketl Isaías: ‘Nemejuamej nentlakakiskej, pero xkeman nenkasikamatiskej. Nenkitaskej, pero xkeman nenkitaskej.
15 Pampa yejuin pueblo yoyoltechikauj, yononakastsajtsaukkej niman yonixtsajtsaukkej para xkeman tlachiaskej, xkeman tlakakiskej, nion itlaj kasikamatiskej, nion nokuepaskej itech toTajtsin para nejua manikinpajti’.
16 ”Pero nemejuamej xpakikan pampa nentlachiaj niman nentlakakij.
17 Pampa nimechijlia ika miyekej teotlajtojkej niman akin kipiayaj kuajli inyojlo okinekkej kitaskej tlen nemejuamej nenkitstokej, pero xokitakej, niman okinekkej kikakiskej tlen nemejuamej nenkikaktokej, pero xokikakkej.
18 ”Kuakon, aman xkakikan tlen kijtosneki ejemplo itech akin toka.
19 Ijkuak yakaj kikaki itech iGobierno toTajtsin pero xkasikamati, akin Xkuajli uajlauj* niman kuiuitla tlen okitokakej ipan iyojlo. Yejuin xinachtli tlen okitokakej itenko ojtli.
20 Xinachtli tlen okitokakej kampa tejteyo kijtosneki akin ika nochi iyojlo nimantsin kiselia iTlajtol toTajtsin.
21 Pero pampa xuejkatlan toktokej ineluayouan, san achijtsin noskaltia. Niman ijkuak kixnamiki tlen xkuajli noso kitlauelitaj ipampa iTlajtol toTajtsin, nimantsin uetsi.*
22 Xinachtli tlen onotokak kampa uitsyo kijtosneki akin kikaki iTlajtol toTajtsin pero kikauilia ika tlen panoua ipan yejuin tiempo niman tomin makixijmiktikan, yejua ika, yejon planta xtlaj kitlakiltia.
23 Niman xinachtli tlen okitokakej ipan kuajli tlajli kijtosneki akin kikakij iTlajtol toTajtsin niman kasikamatij tlen kijtosneki. Sekimej kimiyekiliaj 100 veces más; okseki 60, niman okseki 30”.
24 Kuakon okimijli yejuin okse ejemplo: “IGobierno toTajtsin ken se tlakatl akin okitokak kuajli xinachtli ipan itlal.
25 Ijkuak nochimej kochiyaj, ouajla intlauelikniuj, okitokak xkuajli xijtli kampa trigo niman oyaj.
26 Ijkuak ikojyo trigo okis niman ouajnes itlakilyo, noijki ouajnes xkuajli xijtli.
27 Kuakon, yejon tlakeualtin ouajlajkej kampa inteko niman okijlijkej: ‘Noteko, ¿xotiktokak kuajli xinachtli ipan motlal? Kuakon, ¿tleka onka xkuajli xijtli?’.
28 Yejua okimijli: ‘Yejuin okichiuj se tlakatl, yakaj akin techtlauelita’. Itlakeualuan okitlajtoltijkej: ‘¿Tikneki matiakan niman matikuiuitlakan?’.
29 Yejua okinnankili: ‘Maka, pampa tla nenkuiuitlaj xkuajli xijtli, kanaj noijki uelis nenkuiuitlaskej trigo.
30 Xkauilikan san sekan manoskaltikan hasta ijkuak tiksentlaliskej, niman ijkuak nosentlalis trigo nikimijlis akin tlasentlaliskej ika kachtopa makuiuitlakan xkuajli xijtli niman makisasalokan para kitlatiskej niman sakin nikimijlis makisentlalikan trigo niman makejyeuakan kampa nitlayejyeua’”.
31 Noijki okimijli yejuin okse ejemplo: “IGobierno toTajtsin kentla se iteyo mostaza tlen se tlakatl okitokak ipan itlal.
32 Yejuin xinachtli tlen más pitentsin xijkon ken nochi on okseki xinachtli pero ijkuak noskaltia más ueyiya xijkon ken plantas tlen kintokaj ipan huerta pampa nokuepa kentla se kojtli niman totomej niyanaj ipan imakojyouan”.*
33 Niman noijki okimijli yejuin okse ejemplo: “IGobierno toTajtsin ijkon ken levadura tlen se siuatl okimaxakualo iuan 10 kilos de harina, satepan nochi tixtli onajkok”.
34 Jesús okintekitilti ejemplos para kimijlis nochi yejuin akin kikakiyaj. Yejua xkeman kinnotsaya tla xkintekitiltiaya ejemplos.
35 Ijkon onochiuj tlen yonoijtojka ipampa* teotlajtojketl, akin okijto: “Ijkuak nitlajtos nikintekitiltis ejemplos, nikteijlis nochi tlen iyantok desde ijkuak nochi opeuj”.*
36 Sakin, ijkuak okimijli nochimej mauiyan, yejua okalak ipan kajli, akin okinmachti okinisiuijkej niman okitlajtoltijkej: “Xtechijli tlenon kijtosneki ejemplo itech xkuajli xijtli”.
37 Yejua ijkin okimijli: “Akin kitoka kuajli xinachtli, iKoneuj Tlakatl.
38 Tlajli, yejuin mundo. Kuajli xinachtli, ikoneuan iGobierno toTajtsin. Niman xkuajli xijtli, ikoneuan akin Xkuajli.
39 Niman Diablo yejon tetlauelikniuj akin okitokak xkuajli xijtli. Ijkuak nosentlalia, kijtosneki itlamiyan tlen nochiua ipan yejuin tiempo niman ángeles yejuamej akin tlasentlaliaj.
40 Ijkon ken kuiuitlaj xkuajli xijtli niman kitlatiaj, ijkon panos tlen nochiua ipan itlamiyan yejuin tiempo.
41 IKoneuj Tlakatl komontitlanis iángeles niman yejuamej kikixtiskej itech iGobierno toTajtsin nochi tlen kichiua oksekimej matlajtlakokan niman nochimej akin xkitlakamatij tlanauatijli,
42 niman komonxiniskej ipan horno kampa onka tlitl. Ompa chokaskej niman notlankochtekiskej.*
43 Ipan yejon tiempo, akin kipiyaj kuajli inyojlo petlaniskej ipan iGobierno inTajtsin ijkon ken tonaltsintli. Akin kipiya inakas, kuajli matlakaki.
44 ”IGobierno toTajtsin ijkon ken se tesoro tlen iyantoya ipan se tlajli niman se tlakatl okinexti niman pampa melak oyolpak oyaj niman okinemakak nochi tlen kipiaya niman okikouj yejon tlajli.
45 ”IGobierno toTajtsin noijki ijkon ken yejon tlasemanketl akin kintejtemouaya kualtsitsintin perlas.
46 Ijkuak okinexti se perla tlen melak patioj, oyaj, nimantsin okinemakak nochi tlen kipiaya niman okikouj.
47 ”IGobierno toTajtsin noijki ken tlen ika michajsij tlen okonchapanijkej ipan mar niman okinsentlali tlatlamantikej* michimej.
48 Ijkuak oten, okitilantiajkej hasta itenko mar, onotlalijkej niman michimej tlen kuajkualtin okintlalijkej oksekan, pero tlen xkuajkualtin okintlajkalkej.
49 Yejon tlen panos itlamiyan tlen nochiua ipan yejuin tiempo. Ángeles kisaskej para kinxeloskej akin xkuajkualtin itech akin kuajkualtin.
50 Niman komonxiniskej ipan horno kampa onka tlitl. Ompa chokaskej niman notlankochtekiskej.
51 ”¿Onenkasikamatkej nochi yejuin?”. Yejuamej okinankilijkej: “Kema”.
52 Kuakon okimijli: “Tla ijkon, xmatikan yejuin: nochimej maestros akin yokinmachtijkej itech iGobierno toTajtsin, yeskiaj kentla se tlakatl akin kiyekana se kajli, akin kikixtia tlen yenkuik niman tlen xyenkuik itech itesoro”.
53 Sakin ika okimijli nochi yejuin ejemplos, Jesús oksekan oyaj.
54 Ijkuak oajsik kampa onoskalti, opeuj kinmachtia ipan kajli kampa judíos kiueyichiuaj toTajtsin, niman nochimej omojkatlachixkej. Kijtouayaj: “¿Tleka yejuin tlakatl melak tlamachilise niman akinon okimakak poder para makinchiua yejuin milagros?*
55 ¿Xyejuin ikoneuj kojxinketl niman inan itoka María? ¿Niman xikniuan Santiago, José, Simón niman Judas?
56 Niman ikniuan siuamej, ¿xnochimej touan nikan chantij? Kuakon, ¿tleka melak tlamachilise niman ueli kinchiua milagros?”.
57 Niman yejon okichiuj maka itech matlaneltokakan. Pero Jesús okimijli: “Se teotlajtojketl nochiuiyan kitlakaitaj pero kampa onoskalti niman kampa ichan, xkitlakaitaj”.
58 Niman pampa yejuamej xotlaneltokakej, yejua xokinchiuj miyek milagros* ompa.
Notas
^ Ika griego kijtoua “Gobierno tlen onka cielo”.
^ Noso “uits”.
^ Noso “xok tlaneltoka”.
^ Noso “imajmauan”.
^ Noso “itechkopa”.
^ Noso kanaj “achto uajnemiskiaj akin nemij ipan yejuin mundo”. Yejuin kijtosneki achto ika Adán niman Eva kinpiyaskiaj inkoneuan.
^ Noso “notlantijsiskej”. Ijkon kichiuayaj para kiteititiskej ika tlauelmikij.
^ Noso “sesejnekamej”.
^ Noso “tlen temojkatlachialti”.
^ Noso “tlen temojkatlachialti”.
