Tlen okijkuilo Mateo 16:1-28
16 Ompa fariseos niman saduceos okinisiuijkej Jesús niman pampa kinekiyaj manopopolo okijlijkej makimititi itlaj tlen temojkatlachialti.
2 Yejua okinnankili: “Ijkuak uajteotlaki, nemejuamej nenkijtouaj ‘Nesi xkiyauis pampa cielo melak yochichiliuj’.
3 Niman ika kualkan nenkijtouaj ‘Nesi aman seuas niman kiyauis pampa cielo melak yochichiliuj niman yotlamoxten’. Ueli nenkimatij tlen panos ipampa ken nesi cielo, pero xueli nenkimatij tlen panoua ipan yejuin tiempo.
4 Akin nemij ipan yejuin tiempo, xmelajkanemij* itech toTajtsin niman kichiuaj tlen xkuajli. Yejuamej nochipa kitejtemojtokej se milagro, pero xkitaskej nion se milagro, san tlen yokitakej itech Jonás”. Ijkuak otlan ijkin kimijlia, oyaj niman okinkajteuj.
5 Kuakon opanokej okse lado, pero akin kinmachtiaya okilkajkej kitkiskej pan.
6 Jesús okimijli: “Kuajli xtlatlachixtokan niman maka xkauilikan mamechijtlako inlevadura fariseos niman saduceos”.
7 Kuakon, yejuamej ijkin opeuj noijliaj: “Xotikuajkuikej pan”.
8 Ijkuak Jesús okikak tlen yejuamej kijtojtoyaj, okimijli: “¿Tleka xchikauak nemotlaneltok niman nenkijtojtokej ika xnenkuajkuij pan?
9 ¿Ok xnenkasikamatij de tlenon nitlajtojtika? ¿Xnenkilnamikij ika otlakuajkej 5,000 tlakamej ika makuijli pan niman ika onenkintemiltijkej miyek chikijtin ika tlen onokauj?
10 ¿Niman yonenkilkajkej ika 4,000 tlakamej otlakuajkej ika siete pan niman ika onenkintemiltijkej uejueyimej chikijtin ika tlen onokauj?
11 ¿Tleka xonenkasikamatkej ika xnitlajtojtoya de pan? San onimechijli ika xmotlajpiyakan para maka mechijtlakos inlevadura fariseos niman saduceos”.
12 Ijkuakon okasikamatkej ika xkinnotstoya itech ilevadura pan, kinnotstoya itech tlen temachtiayaj fariseos niman saduceos.
13 Ijkuak oajsik Cesarea de Filipo, Jesús okintlajtolti akin kinmachtiaya: “¿Akinon kijtoua gente ika iKoneuj Tlakatl?”.
14 Yejuamej okinankilijkej: “Sekimej kijtouaj ika Juan Teapolaktijketl. Oksekimej kijtouaj ika Elías. Niman oksekimej ika Jeremías noso okse teotlajtojketl”.
15 Niman yejua okimijli: “Niman nemejuamej tlenon nenkinemiliaj, ¿nejua niakinon?”.
16 Simón Pedro okinankili: “Tejua tiCristo, iKoneuj toTajtsin akin yoltika”.
17 Niman Jesús okinankili: “Yomitsteochijkej Simón, ikoneuj Jonás, pampa yejon xomitsititi nion se tlakatl,* omitsititi noTajtsin akin nemi cielo.
18 Noijki nimitsijlia: tejua tiPedro niman ipan yejuin tetl niktlalis notlanechikol. Niman nion ikojtilis mikilistli* xkitlanis.
19 Nejua nimitsinmakas illaves iGobierno toTajtsin.* Ijkuak toTajtsin akin nemi cielo kijtos ika itlaj nochiuas, tejua noijki tikchiuas. Noijki ijkon, ijkuak toTajtsin akin nemi cielo kijtos ika itlaj xnochiuas, tejua noijki xtikchiuas ipan yejuin mundo”.*
20 Kuakon, okinnauati akin kinmachtiaya ika maka yakaj makijlikan ika yejua katka Cristo.
21 Ijkuakon, Jesús opeuj kimijlia akin kinmachtiaya ika nonekiya yas Jerusalén. Noijki okimijli ika tlayekankej, akin kinyekanaj teopixkej niman escribas kitlajyouiltiskiaj, niman ika nonekiya kimiktiskej niman ipan yeyi tonajli kiyolitiskej.*
22 Pedro oksekan okuikak niman opeuj kajua: “¡NoTeko, xmokneli! Yejon xkeman mopan nochiuas”.
23 Pero Jesús oksekan onokuep niman ijkin okijli Pedro: “¡Neka xuiya Satanás! San tinechtsatsakuilia. Pampa xtitlanemilijtika ken toTajtsin, titlanemilijtika ken se tlakatl”.
24 Kuakon Jesús okimijli akin kinmachtiaya: “Tla yakaj kineki kichiuas ken nejua, maka makichiua san tlen yejua kineki, noneki tlaxikos ijkuak tlajyouis* niman nochipa nechtlakamatis.
25 Pampa akin xkinekis mikis, kipolos inemilis pero akin mikis san nopampa, oksejpa nemis.
26 ¿Tlenon ika kipaleuis yakaj tla nochi kipiya ipan yejuin mundo pero kipoloua inemilis? ¿Noso tlenon uelis kitemakas yakaj para maka mikis?
27 Ika poder tlen iTaj kimaka, iKoneuj Tlakatl uajlas iuan iángeles para kitlaxtlauilis cada se ipampa tlen okichiuj.
28 Kuajli nimechijlia ika sekimej akin nikan nemij xmikiskej hasta ijkuak kitaskej iKoneuj Tlakatl ken se Rey”.
Notas
^ Ika griego kijtoua “tlakapapatla”.
^ Ika griego kijtoua “nakatl niman yestli”.
^ Ika griego kijtoua “ipuertas Hades”, kijtosneki, kampa yauej nochimej akin yomikkej. Xkita tlalkontli.
^ Ika griego kijtoua “Gobierno tlen onka cielo”.
^ Ika griego kijtoua “san tlenon tiksalos ipan yejuin mundo noijki yokisalojkej ipan cielo, niman tlen tiktojtomas ipan yejuin mundo noijki yokitojtonkej ne cielo”.
^ Ika griego kijtoua “kikuiteuaskej”.
