Tlen okijkuilo Mateo 8:1-34
-
Jesús okipajti se tlakatl akin kipiya lepra (1-4)
-
“Se tlakatl akin kinyekanaya soldados” kiteititia ika tlaneltoka (5-13)
-
Jesús miyekej kinpajtia ne Capernaúm (14-17)
-
Kenon uelis tikchiuas ken Jesús (18-22)
-
Jesús kichiua maka sa maajakakiyaui (23-27)
-
Jesús komontitlani demonios makalakikan ipan pitsomej (28-34)
8 Jesús nemiya ipan tepetl niman ijkuak ouajtemok miyekej iuan ouajlajkej.
2 Kuakon, oyejkok se tlakatl akin kipiaya se kokolistli tlen itoka lepra. Ixpan onotlakuantelkets* niman okijli: “NoTeko, nejua nikmatstika ika tla tejua tikneki uelis tinechpajtis”.*
3 Kuakon, Jesús okonajsik niman okijli: “Kema nikneki. Xpajti”. Niman yejon tlakatl nimantsin opajtik.
4 Jesús okijli: “Maka yakaj itlaj xkijli. Pero xuiya ne kampa teopixki niman xtemaka yejon uentli tlen Moisés otlanauati para makimatikan ika yotipajtik”.
5 Ijkuak okalak Capernaúm, okinisiui se tlakatl akin kinyekanaya soldados niman okitlajtlanili makipaleui.
6 Okijli: “NoTeko, se notlakeual tlajyouijtika pampa melak kualo niman xueli nokuiteua”.
7 Yejua okijli: “Nikpajtis ijkuak ompa najsis”.
8 Pero yejon tlakatl akin kinyekanaya soldados okinankili: “NoTeko, xkinamiki xkalaki nochan. Tejua san xtlanauati, niman notlakeual pajtis.
9 Pampa nejua noijki nikchiua tlen nechnauatiaj niman nikinnauatia soldados akin nikinyekana. Se nikijlia ‘¡Xuiya!’ niman yauj niman okse nikijlia ‘¡Xuajla!’* niman uajlauj. Niman notlakeual nikijlia ‘¡Xchiua yejuin!’ niman kema kichiua”.
10 Ijkuak Jesús okikak yejon, omojkatlachix niman okimijli akin imiuan yaya: “Nimechijlia ika nikan Israel xniknextia yakaj akin ijkon machikajto itlaneltok.
11 Nimechijlia ika uajlaskej miyekej akin ualeuaj de nochi mundo* niman noseuiskej kampa mesa iuan Abrahán, Isaac niman Jacob ne kampa iGobierno toTajtsin.*
12 Pero, akin toTajtsin okinnots para makalakikan ipan iGobierno kinkixtiskej kiyauak kampa tlayouatok. Ompa chokaskej niman notlankochtekiskej”.*
13 Kuakon, Jesús okijli yejon tlakatl akin kinyekanaya soldados: “Xuiya mochan niman manochiua tlen otiktlajtlan pampa otikteititi ika melak titlaneltoka”. Ijkuak Jesús otlan kijtoua yejuin, tlakeuajli opajtik.
14 Sakin, Jesús okalak ichan Pedro, niman okitak ika imonan Pedro tlajkaltoya pampa kipiaya totonki.
15 Kuakon, Jesús okajsik ipan ima niman okipajti. Niman imonan Pedro onokuiteuj niman opeuj kitlakualchiuilia.
16 Ijkuak ouajteotlak, okinuikilijkej Jesús miyekej akin kinpiayaj demonios. Jesús san tlanauatiaya, niman espíritus kisayaj. Noijki, okinpajtij nochimej akin tlajyouijtoyaj.
17 Nochi yejuin opanok para manochiua tlen yonoijtoka ipampa* teotlajtojketl Isaías: “Yejua otechinkixtili nochi tokokolisuan niman nochi tlen techkokouaya”.
18 Ijkuak Jesús okitak ika melak miyekej yokiyeualojkaj, ijkin okimijli akin kinmachtiaya: “Matipanokan ipan okse lado”.
19 Niman se escriba okinisiui niman okijli: “Maestro, nias maski san kanon tias”.
20 Pero Jesús okinankili: “Ostomej kipiyaj inteostouj niman totomej kipiyaj intepajsol, pero iKoneuj Tlakatl xkipiya kanon kitekas itsontekon”.
21 Niman se akin okimachti okijli: “NoTeko, kachtopa xnechkauili maniktokati notaj”.
22 Jesús okinankili: “Tejua nochipa xuiya nouan niman xkinkauili ika akin yomikkej makintokakan inmikatsitsinuan”.
23 Ijkuak Jesús otlejkok ipan se barco, akin kinmachtiaya noijki iuan oyajkej.
24 Nimantsin, opeuj chikauak ajakakiyaui niman hasta iapolaktoya yejon barco. Pero Jesús kochtoya.
25 Yejuamej okinisiuijkej niman okitlatlachialtijkej,* niman ijkin okijlijkej: “¡NoTeko, xtechmakixti! ¡Timikiskej!”.
26 Pero yejua okimijli: “¿Tleka melak nemomojtiaj? Noneki más nentlaneltokaskej”. Kuakon, onokuiteuj niman okajuak ajakatl niman mar. Niman xok itlaj okakistik.
27 Akin kinmachtiaya melak omojkatlachixkej niman onoijlikej: “¿Akinon yejuin tlakatl? Hasta ajakatl niman mar kitlakamatij”.
28 Ijkuak Jesús oajsik itenko kampa chantiyaj gadarenos, omemej tlakamej akin kinpiayaj demonios niman akin ouajkiskej kampa kintokayaj akin yomikkej okinamikitoj. Yejon tlakamej melak xkuajkualtin katkaj, yejua ika, xakaj ompa panouaya.
29 Niman opeuj chikauak kijtouaj: “¿Tlenon otikchiuako nikan iKoneuj toTajtsin? ¿Otitechtlajyouiltiko achto ajsis tonajli?”.
30 Ompa nisiuj tlakuajkuajtoyaj melak miyekej pitsomej.
31 Kuakon, demonios ijkin okitlajtlanilijkej Jesús: “Tla titechkixtis, xtechontitlani ipan pitsomej”.
32 Niman yejua okimijli: “¡Xuiyan!”. Kuakon, yejon demonios okiskej itech tlakamej niman okalakkej ipan pitsomej. Niman nochimej pitsomej oonnoxinijkej ipan mar niman omikkej.
33 Niman akin kintlajpiayaj yejon pitsomej ocholojtejkej. Oyajkej ipan ciudad niman nochi okiteijlikej. Noijki okiteijlikej tlen okinpanok akin kinpiayaj demonios.
34 Kuakon, nochimej akin ompa chantiyaj okitejtemotoj Jesús, niman ijkuak okinextijkej okitlajtlanilijkej oksekan mauiya.
Notas
^ Noso “okititi ika kitlakaita”.
^ Noso “tinechchipauas”.
^ Noso “Xuiki”.
^ Ika griego kijtoua “este niman oeste”.
^ Ika griego kijtoua “Gobierno tlen onka cielo”.
^ Noso “notlantijsiskej”. Ijkon kichiuayaj para kiteititiskej ika tlauelmikij.
^ Noso “itechkopa”.
^ Noso “okixitijkej”.
