¿Akinomej? Nochimej akin uajlaskej ipan totlanechikoluan, akin kemach uajlauej noso akin youejkauj tikimixmatstokej (Ro 15:7; Heb 13:2). Kanaj techuajtlajpalos se tokniuj akin ualeua okse país noso akin youejkauj xok tenojnotsa niman oksejpa uajlauj maski yopanok miyek xiuitl ika xok touan nosentlaliaya. ¿Kenon timomachiliskia tejua tla ijkon mopan nochiuaskia? ¿Xtitetlasojkamachiliskia mamitsselikan ika tlasojtlalistli? (Mt 7:12). Ika yejon, kuajli tla tokojtiliaj tikintlajpalouaj oksekimej ijkuak xipeuaj totlanechikoluan niman ijkuak yotlankej. Yejuin kichiua maonia tlasojtlalistli niman noijki kiueyichiua Jehová (Mt 5:16). Kanaj xuelis titlajtoskej imiuan nochimej akin ompa nemiskej. San ika, tla tinochimej tokojtiliaj titlapaleuiskej, nochimej kuajli nomachiliskej. *

Nochipa kuajli matiteselikan, xsan ijkuak nochiua itlaj tlen ueyi kijtosneki, ken ijkuak noilnamiki imikilis Cristo. Ijkuak akin kemach techuajtlajpalouaj, kitaj kenon kuajli totlasojtlaj ken Cristo otetlasojtlak, kanaj melak kinekiskej kiueyichiuaskej toTajtsin niman uajlaskej ipan tlaneltokijli tlen melauak (Jn 13:35).