Maski akin tikchiuaj ken Cristo xnoneki matiktlakamatikan Tlanauatijli tlen okimakakej Moisés, toTajtsin kichia ok matiktlakamatikan yejuin ome tlanauatiltin tlen melak ueyi kijtosnekij: tiktlasojtlaskej toTajtsin niman tikintlasojtlaskej oksekimej (Mt 22:37-39). Pampa xsan ijkon uajnesi, yejuin tlasojtlalistli noneki tikiskaltiskej. ¿Kenon? Se tlen techpaleuiya matikiskaltikan ijkuak tikpouaj Biblia mojmostla. Ijkuak tikpouaj Biblia niman titlanemiliaj itech kenon yejua, ueli tikitaj “tlen kikualnextia Jehová” (Sl 27:4). Ipampa yejuin, totlasojtlalis ueyiya niman peua titlanemiliaj ken yejua. Yejuin kichiua matiktlakamatikan itlanauatiluan ken ijkuak kijtoua matikintlasojtlakan oksekimej niman maka matikchiakan tikseliskej itlaj (Jn 13:34, 35; 1Jn 5:3). Matikitakan yeyi tlemach tlen techpaleuis matikuelitakan ijkuak tikpouaskej Biblia.

• Matiktekitiltikan totlanemililuan. Matiknemilikan ika ompa tinemij. ¿Tlenon tikitaskiaj, tijkakiskiaj niman tikijnekuiskiaj? ¿Tlenon okimachilijkej akin ompa noteneuaj?

• Matikpapatlakan ken tiamapouaj. Uelis chikauak tiamapouaskej noso tijkakiskej se tlamachtijli niman tikitstiaskej ipan Biblia. Noijki uelis tikpouaskej tlaxelojli ueyi kampa onokixti texto tlen mojmostla nopoua noso matikpouakan amoxtin itech Biblia ijkon ken onoijkuilojtiajkej. Xsan uelis tikpouaskej Biblia kampa peua hasta kampa ontlami, noijki uelis tikpouaskej itech yakaj akin Biblia kiteneua noso uelis tikpouaskej itech itlaj tlen tiknekij tikmatiskej. Se neskayotl, uelis tiktekitiltiskej sección 4 noso 16 itech amoxtli pitentsin Tlen tepaleuiya timomachtis iTlajtol toTajtsin ijkuak tikpouaskej itech Jesús.

• Matikpouakan niman matikasikamatikan. Melak kuajli tla tikpouaj maski san se tlaxelojli ueyi itech Biblia niman tikasikamatij xken tikpouaskej miyek tlaxeloltin san pampa nimantsin tiknekij tikpouaskej miyek. Matitlanemilikan itech tlen ikuitlapan niman iyekapan ijkuiliujtok. Kuajli matikixtlalokan tlen tikpouaj. Matiktekitiltikan mapas niman textos tlen uajlauej itlajkotian Biblia ipan página tlen tikpoujtokej. Niman matiktejtemokan se itech tlen xtikasikamatij. Tla tiuelij, ken tiuejkauij ika tiamapouaj noijki ijkon matiuejkauikan titlanemiliskej itech.