Ipan yejuin tonaltin melak miyekan tlaixpoliui. Ika yejon, tokniuan akin ontlapaleuiyaj kampa tlaixpoliui noneki kimatiskej tlenon kichiuaskej niman kenon tepaleuiskej. Grupo akin tlayekana ipan nochi tlanechikoltin otlanauati ika ipan nochi sucursales maonia se Grupo akin tlapaleuiya kampa tlaixpoliui.

Ijkuak tokniuan akin tlapaleuiyaj ipan yejuin grupo kimatij ika yotlaixpoliuj, nimantsin kiminotsaj tokniuan tlayekankej akin chantij kampa otlaixpoliuj niman komintlajtoltiaj tla itlaj kinpoloua tokniuan. Tla melak otlaixpoliuj niman tokniuan akin ompa chantij xuelij nopaleuiyaj, sucursal kintekitlalis sekimej tokniuan niman ijkon makiyekanakan tekitl tlen nochiuas para kinpaleuiskej tokniuan. Kanaj kominnotsaskej oksekimej tokniuan para matepaleuitij. Noijki kanaj kinsentlaliskej seki tlemach noso kanaj kikouaskej niman kinxexelouiliskej tokniuan akin kinpoloua.

Melak kuajli ika Grupo akin tlapaleuiya kampa tlaixpoliui yejuamej kachtopa makitakan kenon tlapaleuiskej, pampa tla xijkon nochiuaskia, ueliskia san kiokpauiskej tekitl noso san melak ontojlantis, tokniuan xkimatiskej kenon tlapaleuiskej niman más nopopoloskia tomin.

Sucursal kintekitlalis sekimej tokniuan para matepaleuikan. Yejuamej kitaskej kech tomintsin kikuiskej niman kechmej tokniuan nonekis ontepaleuiskej. Yejuin tokniuan kanaj noijki nonekis kominnotsaskej tekiuajkej akin tekiuajtij kampa otlaixpoliuj pampa kemantika yejuamej techpaleuiyaj para más nimantsin matikinpaleuikan tokniuan. Kuakon, tla xakaj mitsijlia xtepaleuiti, timitstlajtlaniliaj maka tiksentlalis tomintsin para tikinpaleuis tokniuan, maka itlaj tikomintitlanilis tokniuan nion maka tias kampa otlaixpoliuj.

Ijkuak itlaj panoua, nimantsin tiknekij tikinpaleuiskej tokniuan pampa melak tikintlasojtlaj (Heb 13:16). Kuakon, ¿kenon uelis tikinpaleuiskej? Melak noneki matikchiuakan teoyotl inpampa tokniuan akin chantij kampa otlaixpoliuj niman noijki inpampa tokniuan akin oyajkej okinpaleuitoj. Noijki uelis tiktemakaskej totomintsin. Sucursales kichiuaj tlen Grupo akin tlayekana ipan nochi tlanechikoltin kimijlia, ika yejon, yejuamej kuajli kimatstokej kanon niman kenon kikuiskej tomintsin tlen tiktemakaj. Niman tla tiknekij tontlapaleuiskej kampa otlaixpoliuj, uelis tiktemiltiskej Solicitud de voluntario local de diseño y construcción (DC-50).

XKITAKAN VIDEO MELAK OAPACHIUILOK BRASIL, SAKIN XNANKILIKAN YEJUIN:

¿Tlenon más otikuelitak itech kenon iteixpantijkauan Jehová otlapaleuitoj Brasil ijkuak oapachiuilok?