Sa achijtsin poliui ijkuak Jehová xok kitekauilis manochiua tlen xkuajli. Ijkuakon, kinpopoloskej tlaneltokiltin tlen xmelajkej, miyekej kalpamej kixnamikiskej ikalpan toTajtsin, niman Jehová kinpopolos nochimej akin xkuajkualtin ipan Armagedón. Tinochimej sa tiknektokej mayejko yejon tonajli.

Tejuamej xkuajli tikmatij kenon panos ueyi tlajyouilistli. Xtikmatij kemanon peuas, noijki xtikmatij tlenon kijtoskej tekiuajkej ijkuak peuaskej kimixnamikiskej tlaneltokiltin tlen xmelajkej, xtikmatij kech uejkauiskej tekiuajkej kixnamikiskej ikalpan Jehová noso kenon kixnamikiskej. Nion xtikmatij kenon Jehová kinpopolos akin xkuajkualtin ipan Armagedón.

San ika, Biblia kijtoua seki tlen panos ika tlayekapan. Niman tlen techijlia, techpaleuiya maka melak matomojtikan. Seki matikteneuakan itech tlen techijlia Biblia. Techijlia ika itinemij itlamiyan tonaltin (2Ti 3:1). Noijki tikmatstokej ika ijkuak tekiuajkej kimixnamikiskej tlaneltokiltin, Jehová “kinteltlalis” ijkuak peuaskej kixnamikiskej ikalpan niman ijkon maka makipopolokan tlaneltokijli tlen melauak (Mt 24:22). Noijki kuajli tikmatstokej ika Jehová kimakixtis ikalpan (2Pe 2:9). Niman tikmatstokej ika Jehová yokitlapejpeni yakaj akin yolmelajki niman kojtik para kinpopolos nochimej akin xkuajkualtin niman kinmakixtis akin melajkanemiskej itech Jehová ipan Armagedón (Ap 19:11, 15, 16).

Ijkuak ijkin panos, tlaltikpakchanejkej temojti nomojtiskej (Lu 21:26). San ika, tejuamej xtomojtiskej. Kuakon, matikamapouakan niman matitlanemilikan itech ken Jehová okimakixti ikalpan niman itech tlen kichiuas ika tlayekapan. Tla ijkon tikchiuaj, tikchiuaskej tlen kijtoua Lucas 21:28: “Xmoyoleuakan niman sa xonajkotlachixtiakan, pampa saniman mechmakixtiskej”.