Melak titlajtos. Maka xnemili tla noneki nochi tiktetomilis. Jesús tetlajtoltiaya niman ijkon tepaleuiaya matlanemilikan niman kuajli makasikamatikan tlamachtijli (Mt 17:24-27). Tlajtoltilistin kichiuaj kualtsin manopanolti tlamachtijli, noijki ueli noita tlenon kineltoka akin kimachtijtokej niman tla kasikamati tlen kimachtiaj (be-S pág. 253 párrs. 3, 4). Ijkuak tiktlajtoltis, xtlamachia niman xkauili yejua mamitsnankili. Tla xkimati kenon mitsnankilis, maka xkijli; xchiuili okseki tlajtoltilistin niman ijkon kuajli matlanankili (be-S pág. 238 párrs. 1, 2). San yolik xtlajto niman ijkon tikpaleuis akin tikmachtijtika makasikamati yenkuik tlamachtijli (be-S pág. 230 párr. 4).

Tikchiuas ouijtika manasikamati. Xmochikaua maka xkijli nochi tlen tikmatstika itech tlen nenmomachtijtokej (Jn 16:12). Xmomachtikan san itech tlen tlajtoua yejon párrafo (be-S pág. 226 párr. 4, pág 227 párr. 1). Tla melak miyek tikteneua itech tlen nenmomachtijtokej, maski melak makualtsin, kichiua ika maka makasikamati tlen noneki (be-S pág. 235 párr. 3). Tla akin tikmachtijtika yokasikamat, xpano ipan okse párrafo.

San tipanotias ipan tlamachtiltin. Tiknekij tajsiskej ipan iyojlo, xsan tikpouiliskej tlamachtijli (Lu 24:32). Xtekitilti ikojtilis iTlajtol toTajtsin ijkuak tikinteneuas textos tlen kipaleuis makasikamati tlamachtijli (2Co 10:4; Heb 4:12; be-S pág. 144 párrs. 1-3). Xkintekitilti neskayomej tlen nimantsin manasikamatikan (be-S pág. 245 párrs. 2-4). Xnemili tlenon kixnamikij akin tikinmachtijtika niman tlenon kineltokaj, niman itech yejon xtlajto ipan motlamachtil. Xkintlajtolti: “¿Tlenon tiknemilia itech tlen yotiuel aman? ¿Tlenon techmachtia itech Jehová? ¿Kenon tiknemilia mitspaleuis tla tikchiua ipan monemilis yejuin tlajtolpaleuilistli?” (be-S pág. 238 párrs. 3-5; pág. 259 párr. 1).