1, 2. a) ¿Kenon tomachiliaj itech Biblia? b) ¿Katlejua amoxtli itech Biblia melak tikuelita?

ITEIXPANTIJKAUAN Jehová tiktlasojtlaj tlen kijtoua Biblia. Tlen kijtoua Biblia techyolchikaua, techmaka tlamachialistli niman kuajli techyekana (Romanos 15:4). Biblia xkipiya intlanemilil tlakamej, Biblia iTlajtol toTajtsin (1 Tesalonicenses 2:13).

² Tinochimej tikuelitaj se amoxtli itech Biblia. Sekimej kuelitaj Evangelios pampa ompa nesi kenon Jesús okiteititi ikualneskayouan Jehová (Juan 14:9). Oksekimej kuelitaj amoxtin tlen tlajtoua itech teotlajtoltin ken Apocalipsis noso Revelación, kampa kijtoua itlaj tlen xok uejkaujtipan nochiuas (Apocalipsis 1:1). Sekimej kuajli nomachiliaj ijkuak kipouaj Salmos niman oksekimej melak kuelitaj tlajtolpaleuilistin tlen kipouaj ipan amoxtli Proverbios. Kuajli nesi ika Biblia onoijkuilo makinpaleui nochimej tlaltikpakchanejkej.

3, 4. a) ¿Kenon timomachilia itech toamatlajkuiloluan? b) ¿Katlejua amatlajkuiloltin tikinseliaj tlen noijkuilouiliaj sekimej tlaltikpakchanejkej?

³ Pampa tiktlasojtlaj Biblia, noijki tikintlasojtlaj amatlajkuiloltin tlen kisaj itech iTlajtol toTajtsin. Nochi amoxtin, amatlajkuiloltin, revistas niman oksekimej amatlajkuiloltin yejon tlen techmaka Jehová. Nochi yejon techpaleuiya matinemikan nisiuj itech toTajtsin niman  matikpiyakan chikauak totlaneltokil (Tito 2:2).

⁴ Miyek amatlajkuiloltin onoijkuilouilijkej iteixpantijkauan Jehová. San ika, onka seki amatlajkuiloltin tlen onoijkuilouilijkej telpokamej noso tajtin. Niman melak miyek tlamachtiltin niman videos tlen notlaliaj ipan página ipan Internet tlen otiktlapojkej onochijchiuilijkej akin xiteixpantijkauan Jehová. Nochi yejuin tlen onka teititia ika Jehová nochipa kichiua tlen yokijto, ika kinmakatikaj tlamachtijli nochimej tlaltikpakchanejkej (Isaías 25:6).

5. ¿Tlenon kuajli tikmatstokej ika kiyolpaktia Jehová?

⁵ Timiyekej tikuelitaskiaj tikpouaskej uejkaujtipan Biblia niman toamatlajkuiloluan. San ika, xnochipa ueli uejkaujtipan tipanouaj tomachtiaj nochi amatlajkuiloltin. Uelis kuajli tikmatstoskej ika Jehová yolpaki ijkuak kuajli tiktekitiltiaj tiempo ika titlapouaskej niman tomachtiskej Biblia niman toamatlajkuiloluan (Efesios 5:15, 16). San ika, onka se tlanemilijli tlen xnoneki tikpiyaskej. Matikitakan katlejua.

6. ¿Tlenon uelis kichiuas maka matechpaleui nochi tlen techmaka Jehová?

⁶ Tla xtitlanemiliaj ken noneki, kanaj uelis tiknemiliskej ika seki amoxtin ipan Biblia noso seki amatlajkuiloltin xtechpaleuiya. Se neskayotl, ¿tlenon tikchiuaskej tla itlaj ipan Biblia xtikitaj kenon techpaleuiya ipan tonemilis? Noso ¿tlenon tikchiuaskej ika amatlajkuiloltin tlen xtejuamej kachtopa otechijkuilouilijkej? ¿San totoka tikpouaskej noso nion xtlaj tikpouaskej? Tla ijkon titlanemiliaj, uelis topolouiliskej miyek tlamachtijli tlen tepaleui. ¿Kenon uelis tikchiuaskej maka ijkon topan manochiua? Noneki matikilnamikikan ika nochi tlamachtijli tlen tikpiyaj ualeua itech Jehová. Ipan Biblia kijtoua yejuin: “Nejua, Jehová, moTajtsin, Akin mitsmachtia kuajli xnemi, Akin mitsyekana ipan ojtli kampa noneki tinejnemis” (Isaías 48:17). Ipan yejuin tlamachtijli, tikitaskej yeyi tlemach tlen ika techititis ika tepaleui nochi tlen uajlauj ipan Biblia.

7. ¿Tleka noneki tiktlaposkej totlanemilil ijkuak tikpouaskej Biblia?

⁷ Matiktlapokan totlanemilil ijkuak titlapouaskej. Seki tlen kijtoua ipan Biblia san okimijkuilouilijkej sekimej tlaltikpakchanejkej. San ika, Biblia kuajli kijtoua: “Nochi Yektlajkuilojli itech Dios uajlitikaj, niman [...] techpaleuiya” (2 Timoteo 3:16). Ika yejon, noneki matiktlapokan totlanemilil ijkuak tikpouaskej Biblia. Se tokniuj kiyejyekoua kilnamikis tlen onomachti san achijtsin itech Biblia. Ijkuak ijkon kichiua, ueli kitaj tlamachtijli tlen xnimantsin nesi. Kuakon, ijkuak achtopa tikpouaskej Biblia, noneki tiktlajtlaniliskej Jehová matechtlapouili totlanemilil niman matechmaka tlamachilistli matikasikamatikan tlenon kineki tomachtiskej (Esdras 7:10; xpoua Santiago 1:5).

8, 9. a) ¿Tlenon noneki totlajtoltiskej ijkuak tikpouaskej Biblia? b) ¿Tlenon tomachtiaj itech Jehová ijkuak tikpouaj tlen kitlajtlani makichiuakan tlayekankej?

⁸ Matotlajtoltikan. Ijkuak tikpouas Biblia, xmotelti niman xmotlajtolti yejuin: “¿Tlenon nechmachtia yejuin itech Jehová? ¿Kenon uelis niktekitiltis yejuin tlamachtijli ipan nonemilis? ¿Kenon uelis niktekitiltis ika nikinpaleuis oksekimej?”. Ijkuak titlanemiliskej itech yejon tlajtoltilistin, melak kuajli tikitaskej kenon techpaleuiya tlen tikpoua ipan Biblia. Matikitakan se neskayotl. Biblia kijtoua tlenon noneki kichiuas se niman ijkon nochiuas tlayekanketl ipan tlanechikojli (xpoua 1 Timoteo 3:2-7). San ika, xtinochimej titlayekankej, niman ika yejon kanaj uelis tiknemiliskej ika xuelis techpaleuis yejuin tlen notlajtlani. San ika, matotlajtoltikan yeyi tlajtoltilistin tlen otikinteneujkej ipeujyan párrafo ika matikitakan yejuin tlen notlajtlani kenon uelis techpaleuis tinochimej.

⁹ “¿Tlenon nechmachtia yejuin itech Jehová?”. Jehová techijlia ika yejuin tlen kintlajtlanilia  makichiuakan tlayekankej. Yejua yokintlali yejuin uejueyimej tlanauatiltin makichiuakan akin kitlajpiyaskej tlanechikojli. Yejuin techititia ika Jehová melak kitlasojkaita tlanechikojli. Biblia kijtoua ika Jehová “okinkou ikan [iKoneuj] iyesyo” akin nemij ipan tlanechikojli (Hechos 20:28). Kuakon Jehová kineki ika tlayekankej makitemakakan kuajli neskayotl. Niman toTajtsin kintlajtlanilis yejuamej tleka niman kenon okinpaleuijkej tokniuan ipan tlanechikojli. Yejua kineki ika tejuamej kuajli matomachilikan ken techtlajpiya (Isaías 32:1, 2). Ijkuak tikpouaj yejon tlen notlajtlani ipan Biblia, tikitaj ika Jehová melak najmana topampa.

10, 11. a) ¿Kenon uelis tikchiuaskej ipan tonemilis ijkuak tikpouaj tlen notlajtlani makichiuakan tlayekankej? b) ¿Kenon uelis tiktekitiltiskej yejuin ika tikinpaleuiskej oksekimej?

¹⁰ “¿Kenon uelis niktekitiltis yejuin tlamachtijli ipan nonemilis?”. Tla tejua yopeuj titekiti ken tlayekanketl, noneki nochipa xpoua yejuin tlen notlajtlani niman xyejyeko timoyektlalis. Tla tejua tikneki “[ti]tekitis ken tlayekanketl”, noneki tikyejyekos tikchiuas nochi tlen tiuelis (1 Timoteo 3:1). San ika, tinochimej tiueliskej itech yejon tlen notlajtlani. Se neskayotl, Jehová kichia ika tinochimej kuajli matitlanemilikan niman kuajli matijkuikan totlamachilis (Filipenses 4:5; 1 Pedro 4:7). Ijkuak tlayekankej kitemaka se kuajli neskayotl, uelis tikchiuaskej ken yejuamej (1 Pedro 5:3; Hebreos 13:7).

¹¹ “¿Kenon uelis niktekitiltis ika nikinpaleuis oksekimej?”. Uelis tiktekitiltiskej yejuin tlen notlajtlani makichiuakan tlayekankej ika tikinpaleuiskej akin tikinmachtiaj itech Biblia. Noijki ika tikinpaleuiskej oksekimej makasikamatikan ika tokniuan tlayekankej xijkon ken oksekimej tlayekankej itech religiones. Niman yejuin techpaleuis matikintlakaitakan yejon tokniuan tlayekankej (1 Tesalonicenses 5:12). Ijkuak melak tikintlakaitaj, yejuamej melak kipiyaskej pakilistli ipan intekiyo (Hebreos 13:17).

12, 13. a) ¿Tlenon okseki tlemach uelis tiktejtemoskej ika tlapaleuilistli tlen tikpiyaj? b) Xkijto ika se neskayotl kenon tla tiktejtemouaj okseki itech tlen tikpoua uelis tiknextiskej tlamachtijli tlen xnimantsin nesi ken tepaleuiya.

¹² Xtejtemo okseki tlamachtijli. Ijkuak tomachtiaj Biblia, uelis tiktejtemoskej kenon nonankiliaj yejuin tlajtoltilistin:

• ¿Akinon okijkuilo yejuin itech Biblia?

• ¿Kanon niman kemanon onoijkuilo?

• ¿Tlenon ueyi kijtosneki tlen nochiujtoya ijkuak onoijkuilo yejuin amoxtli ipan Biblia?

Tikmatiskej nochi yejuin uelis techpaleuis matikitakan tlen techmachtia tlen xnimantsin nesi ken tepaleuiya.

¹³ Se neskayotl, Ezequiel 14:13, 14 kijtoua ika Jehová okijto ika tla se kalpan tlajtlakouaya itech, yejua kipopoloskia niman kichiuaskia matlami nochi tlakuajli niman iyolkauan. Noijki kijtoua: “‘Niman tla yejuin yeyimej tlakamej: Noé, Daniel niman Job nemiskiaj itsajlan, yejuamej kimakixtiskiaj innemilis ipampa tlen melajki okichiujkejʼ, kijtoua Ueyixtika toTeko Jehová”. Tla tiktejtemouaj okseki tlemach, tikitaskej ika Ezequiel okijkuilo yejuin tlajtoltin kanaj 612 xiuitl ijkuak xiuajnemiya Cristo. Noé iuan Job ikipiaya miyek xiuitl ika yomijkaj. San ika, Jehová ok kimilnamikiya pampa oyolmelaujkanenkej itech. Daniel ok yoltoya niman san kipiaya kanaj 20 xiuitl ijkuak Jehová okijto ika yolmelaujki katka ken Noé niman Job. ¿Tlenon tomachtiaj itech yejuin? Ika Jehová kimita niman kintlasojkaita nochimej itekipanojkauan akin yolmelaujkanemij, maski sekimej san telpokamej (Salmo 148:12-14).

14. a) ¿Kenon kinpaleuiya telpokamej nochi tlen noijkuiloua inpampa? b) ¿Kenon kinpaleuiya oksekimej tlen kimijkuilouiliaj telpokamej? (Xkita tlaixkopinajli kampa peua tlen tomachtijtokej).

¹⁴ Tlen noijkuilouiliaj telpokamej. Yotomachtijkej kenon uelis techpaleuis nochi tlen  kijtoua Biblia. Noijki ijkon, nochi toamatlajkuiloluan uelis techpaleuiskej. Matikitakan seki neskayomej. Xiuejkaui Jehová yokitemakak melak miyek tlamachtijli tlen yonoijkuilouilijkej telpokamej ^[1] (xkita nota kampa ontlami). Yejon tlen onoijkuilo kinpaleuiya ken kimapeuaskej tlen ouijtika kixnamikij ipan kaltlamachtijli niman tlen nopatla ipan innemilis ijkuak noskaltijtiuej. San ika ¿kenon uelis tinochimej ika topaleuiskej tlen tikpouaj ipan yejuin amatlajkuiloltin? Ijkuak tikpouaj nochi yejuin tlamachtijli, uelis tomachtiskej tlen tlaueltin kixnamikij telpokamej niman uelis kuajli tikinpaleuiskej niman tikinyolchikauaskej.

15. ¿Tleka noneki matiknekikan tikpouaskej akin tiuejueyimej tlen kimijkuilouiliaj telpokamej?

¹⁵ Tokniuan akin xok telpokamej xuelis kinemiliskej ika xnoneki kipouaskej tlen kimijkuilouiliaj telpokamej. Akin iuejueyimej noijki kixnamikij miyek tlen kixnamikij telpokamej tlen tlajtoua ipan yejon tlamachtiltin. Se neskayotl, tinochimej noneki tikmatiskej kenon titlanankiliskej ijkuak kitlatlataj totlaneltokil, tikteltiskej tlen tikmachilia niman tikmapeuaskej tlen texchiualtiaj matikchiuakan. Noijki yejon amatlajkuiloltin tlen okimijlouilijkej telpokamej kipiya tlamachtijli tlen kisa ipan Biblia niman tinochimej uelis techpaleuis.

16. ¿Kenon noijki ueli kinpaleuiya telpokamej toamatlajkuiloluan?

¹⁶ Amatlajkuiloltin tlen kimijkuilouiliaj telpokamej noijki uelis kinpaleuis melak kuajli manouikakan iuan Jehová (xpoua Eclesiastés 12:1, 13). * Niman akin iuejueyimej noijki uelis kinpaleuis. Se neskayotl, ipan metstli abril 2009 ipan ¡Despertad! okis se tlamachtijli “¿Cómo disfrutar la lectura de la Biblia?”. Yejuin tlamachtijli kipiya miyek tlen tepaleui tlen uelis nochiuas niman kipiya se recuadro tlen ueliskia notetekis, kejyeuaskej niman kikuiskej ijkuak nomachtiskej. ¿Uelis kinpaleuis yejuin tlamachtijli akin uejueyimej tlen okis? Se tokniuj, yejua nantli niman tesiuauj okijto ika melak ouijtika kitaya kipouas Biblia. San ika, yejua okitekitilti tlen ompa kijtouaya uelis nochiuas niman aman melak kuelita kipouas Biblia. Yejua kijtoua yolpaki kitas kenon tlajtouaj amoxtin itech Biblia niman ueli tlanemilia. Noijki kijtoua: “Xkeman melak nechyolpaktiaya nikpouas Biblia”.

17, 18. ¿Kenon uelis ika topaleuiskej tlen tikpouaj tlen noijkuilouiliaj akin xiteixpantijkauan Jehová? Xkijto se neskayotl.

 ¹⁷ Tlen noijkuiloua ipampa akin xiteixpantijkauan Jehová. Ipan xiuitl 2008 ika tlayekapan tiyolpakij tikpiyaskej Amatl Tekakistilijketl tlen tomachtiaj ipan tlanechikojli, tlen noijkuilouiliaj iteixpantijkauan Jehová. San ika, noijki nochijchiua se revista tlen kinmakaj akin xiteixpantijkauan Jehová. ¿Kenon uelis ika topaleuiskej yejuin revistas? Matikitakan se neskayotl. Ijkuak tiknotsaj se tlaltikpakchane ipan Kajli kampa Tosentlaliaj niman yauj, melak tiyolpakij. Ijkuak tijkakij tokniuj akin technojnotsa itech Biblia, tiknemiliaj kenon nomachilis yejuin tlaltikpakchane ika tlen kikakis niman kenon kipatlas inemilis. Nochi yejuin kichiuas kuajli matomachilikan niman matiktlasojkamatikan itech tlamachtijli tlen otijkakej.

¹⁸ Noijki ijkon panoua ijkuak tikpouaj amatlajkuiloltin tlen noijkuilouiliaj akin xiteixpantijkauan Jehová. Se neskayotl, Amatl Tekakistilijketl tlen tiktekitiltiaj ika titenojnotsaj niman seki tlen notlalia ipan jw.org tetomilia Biblia ika tlajtoltin tlen xouijtika niman ijkon nimantsin nasikamati. Ijkuak tikpoua yejuin tlen onoijkuilo, melak kuajli tikasikamatij tlamachtijli niman tiktlasojkaitaj tlen temachtia Biblia maski itikmatiyaj. Noijki uelis tomachtiskej okseki ken tiktetomiliskej tlen tikneltokaj ijkuak tontenojnotsaj. Noijki ijkon ika ¡Despertad! tlen kichiua maueyiya totlaneltokil itech toTajtsin niman techpaleuiya kuajli matikteijlikan tlen tikneltokaj (xpoua 1 Pedro 3:15).

19. ¿Kenon uelis tikititiskej Jehová ika tiktlasojkamatij tlen yejua techmaka?

¹⁹ Kuajli nesi ika Jehová techmaka melak miyek tlajtolpaleuilistin niman tlamachtijli tlen techpaleuiya (Mateo 5:3). Nochipa matikpouakan nochi amatlajkuiloltin niman matikchiuakan ipan tonemilis tlamachtijli tlen tikseliaj. Tla ijkon tikchiuaj, techpaleuis tlen Jehová techmaka niman tikititiskej ika melak tiktlasojkamachiliaj (Isaías 48:17).