1-3. a) ¿Tlenon ouijtika tikpatlaskej sakin ijkuak yotoapolaktijkej? b) Ijkuak xtikchiayaj tla ouijtika yeskia tikitaskej tikpatlaskej tlen noneki, ¿tlenon uelis totlajtoltiskej? (Xkimita tlaixkopinaltin kampa peua tlen tomachtijtokej).

IPAN miyek xiujtin, Kevin nauiltiaya ika tomin, pokiya noso tlachichinaya, melak tlauaniya niman kitekitiltiaya drogas ^[1] (xkita nota kampa ontlami). Sakin onomachti itech Jehová niman okinek iuan nouikas. San ika, ononek kipatlas miyek tlemach ipan inemilis. Yejua ouel okipatlak inemilis ika itlapaleuilis Jehová niman ika ikojtilis tlen kipiya iTlajtol, Biblia (Hebreos 4:12).

² Sakin ijkuak Kevin yonoapolaktijka, yejua ok nonekiya kipatla seki tlemach ipan inemilis niman ijkon melak kuajli kichiuaskia ken se akin kichiua ken Cristo (Efesios 4:31, 32). Yejua nimantsin kualaniya. Ika yejon, melak ouijtika kitaya noteltis ijkuak peuaya kualani. Kevin kijtoua ika yejuin tlen melak ouijtika kitaya xok kichiuas itech seki tlemach tlen xkuajli kichiuaya ijkuak xinoapolaktiaya. San ika, yejua ouel okipatlak miyek tlemach ipan inemilis ijkuak okitlajtlanili Jehová makipaleui niman ijkuak opeuj nomachtia Biblia.

 ³ Ijkuak xitapolaktiayaj, tejuamej ononek tikpatlaskej itlaj tlen ueyi ipan tonemilis niman ijkon ueliskia tinemiskej ken temachtia Biblia. San ika, hasta aman tikitaj ika ok noneki tikpatlatiaskej itlaj tlen xueyi ipan tonemilis niman ijkon tikixkopinaskej toTajtsin niman Jesucristo (Efesios 5:1, 2; 1 Pedro 2:21). Se neskayotl, kanaj tikitaj ika nochipa tikijtouaj itlaj tlen xtikuelitaj noso san nochipa titlajtouaj itech oksekimej. Noso kanaj kemantika tomojtiaj tlen oksekimej uelis kinemiliskej noso kijtoskej itech tlen tikchiuaj. Kanaj tikyejyekojtokej tikpatlaskej ken tikchiuayaj ipan miyek xiuitl. San ika, xtoteltiaj ika topopolouaj ika tlen otopopolojkej kachtopa. Ika yejon matotlajtoltikan: “¿Tleka melak ouijtika nikpatlas seki tlemach tlen xueyi ipan nonemilis? ¿Tlenon noneki nikchiuas niman ijkon nikpatlatos nonemilis ijkon ken kijtoua Biblia?”.

4. ¿Tleka xueli tikyolpaktiaj Jehová itech nochi tlen tikchiuaj?

⁴ Tiktlasojtlaj Jehová niman tiknekij ika nochi toyojlo tikyolpaktiskej. San ika, teyolkoko ika kemantika xuelij tikyolpaktiaj, pampa titlajtlakolejkej. Kanaj kemantika tomachiliaj ijkon ken Pablo, itlatitlankauj Cristo, akin okijto: “Pampa maski sanoyej nikneki nikchiuas on tlen kuajli, xueli nikchiua” (Romanos 7:18; Santiago 3:2).

5. a) ¿Tlenon ononek tikpatlaskej ijkuak xitoapolaktiayaj? b) ¿Tlenon ok ouijtika techmaka tikchiuaskej aman?

⁵ Kachtopa ononek tijkauaskej tlen tikchiuayaj tlen Jehová kitlauelita niman sakin ouel otochiujkej iteixpantijkauan Jehová (1 Corintios 6:9, 10). Maski ijkon, ok tikpiyaj tlajtlakojli (Colosenses 3:9, 10). Ika yejon ok topopolouaj itech tlen tikchiuaj maski tla youejkauj ika otoapolaktijkej. Kanaj kemantika, tikmachiliaj xkuajli ileuilistli noso tikitaj ika melak ouijtika tikpatlaskej itlaj ipan tonemilis. Niman kanaj hasta ikipiya miyek xiuitl ika tochikaujtokej xtikchiuaskej itlaj tlen tlajtlakojli kichiuaj matikchiuakan.

6, 7. a) ¿Tlenon kichiua kuajli iuan matouikakan Jehová maski titlajtlakolejkej? b) ¿Tleka noneki matiktlatlanilikan Jehová matechtlapopolui?

⁶ Maski tikpiyaj tlajtlakojli, uelis kuajli iuan touikaskej Jehová niman tiktekichiuiliskej. Nochipa matikilnamikikan kenon opeuj kuajli iuan touikaj Jehová. Yejua okitak itlaj tlen kuajli totechkopa niman okinek ika matikixmatikan (Juan 6:44). Yejua noijki kimati tlenon xueli kuajli tikchiuaj niman tlen ouijtika techmaka tikchiuaskej. Noijki kimati ika nochipa topopolouaj itech tlen tiknekij tikchiuaskej. San ika, Jehová kineki kuajli iuan matouikakan.

⁷ Jehová melak techtlasojtla pampa okitemakak se ueyi tetlayokolijli. Okuajtitlan iKoneuj ipan tlaltikpaktli niman ijkon yejua ueliskia kitemakas inemilis ken tlaxtlauijli ipampa totlajtlakoluan (Juan 3:16). Ijkuak topopolouaj, uelis tiktlajtlaniliskej Jehová matechpaleui niman ipampa tlaxtlauijli, uelis kuajli tikmatstoskej ika yejua techtlapopoluis niman ok uelis kuajli iuan touikaskej (Romanos 7:24, 25; 1 Juan 2:1, 2). Matikilnamikikan ika Jesús omik inpampa tlajtlakolejkej akin noyolkuepaj. Kuakon, maski tla tikmachiliaj ika tlen yotikchiujkej melak xkuajli, noneki maka kema matijkajkauakan tiktlajtlaniliskej Jehová matechtlapopolui. Tla xtiktlajtlaniliskej matechtlapopolui, yeskia kentla tikmapeuaskej matechmapapakakan ijkuak timatsokuiltikej. Melak tiktlasojkamachiliaj Jehová ipampa tlen yokichiuj ika matiuelikan iuan matouikakan maski titlajtlakolejkej (xpoua 1 Timoteo 1:15).

8. ¿Tleka noneki matikmatstokan tlen noneki tikyektlaliskej itech tonemilis?

⁸ Kema, xuelis tikijtoskej ika xueyi kijtosneki itlaj tlen tlajtlakojli kichiuaj matikchiuakan noso tiktejtemoskej tlen tikijtoskej niman ijkon xtikpatlaskej tonemilis. Jehová kineki ika nochimej tlaltikpakchanejkej iuan manouikakan (Salmo 15:1-5). Tla tejuamej tiknekij tonisiuiskej itech, noneki tikyejyekoskej tikixkopinaskej niman noijki iKoneuj. Noijki tikyejyekoskej tikmapeuaskej  xkuajli ileuilistli niman matikpopolokan nochi yejon ipan tonemilis. Maski melak youejkauj ika yotoapolaktijkej, melak noneki nochipa matikyektlalitiakan tonemilis (2 Corintios 13:11).

9. ¿Kenon tikmatij ika noneki nochipa tikyenkuilijtiaskej tonemilis?

⁹ Pablo okimijkuilouili Efesios: “Nemejuamej nenkikauaskej tlen yeuejkaui nenmonemilis ken kachtopa nenkichiuayaj niman ijtlakaujtiuj itech xkuajli ileuilistli tlen tekajkayaua. Niman noneki ika nochipa nenkiyenkuiliskej kojtilistli tlen onka ipan nenmotlanemilil, niman noneki xmotlalilikan yenkuik nenmonemilis tlen onochijchiuj ken kineki toTajtsin ika melauak itech tlen melaktik niman tlasojtlalistli tlen xtekaua” (Efesios 4:22-24). Yejon kijtosneki ika noneki nochipa tochikauaskej ika topatlaskej niman “noneki [mato]tlalilikan yenkuik [to]nemilis”. Maski melak youejkauj ika tiktekichiuiliaj Jehová, uelis nochipa tomachtijtiaskej itech ikualneskayouan. Niman Biblia uelis techpaleuis matikpatlakan ken tinemij niman ijkon tochiuaskej ken Jehová kuelita.

10. a) ¿Tlenon noneki tikchiuaskej niman ijkon topatlatiaskej ika itlapaleuilis iTlajtol toTajtsin? b) ¿Tlenon uelis totlajtoltiskej?

¹⁰ Tiknekij tikchiuaskej tlen kijtoua Biblia. San ika, noneki melak tochikauaskej tla tiknekij ok manopatlatiuj tonemilis. ¿Tleka noneki melak tochikauaskej? ¿Xuelis Jehová kichiuas maka maouijtika matikitakan tikchiuaskej tlen kuajli?

11-13. ¿Tleka Jehová kineki matochikauakan xtikchiuaskej tlen tlajtlakojli kichiua matikchiuakan?

¹¹ Ijkuak titlanemiliaj itech nochi tlen toTajtsin okichijchiuj, xokpa tiknemiliaj ika Jehová melak kipiya kojtilistli ika uelis kichiuas maski san tlenon. Se neskayotl, toTajtsin okichijchiuj Tonajli tlen kipiya kojtilistli. Ipan se segundo, Tonajli kimakaua melak miyek tlauijli niman tlen totonki. San ika, san achijtsin itech yejuin tlauijli niman  tlen totonki yejko ipan tlajli tlen kichiua maonia nemilistli (Salmo 74:16; Isaías 40:26). Jehová noijki kimaka kojtilistli itekipanojkauan ipan tlaltikpaktli ijkuak kinpoloua (Isaías 40:29). Kuajli nesi, tla Jehová kineki, yejua uelis kichiuas maka maouijtika matikitakan tochikauaskej xtikchiuaskej tlen tlajtlakojli kichiua matikchiuakan niman xok tikpiyaskej xkuajli ileuilistli.

¹² Jehová yotexchijchiuj ika tejuamej matiuelikan matiktlapejpenikan. Yejua techkauilia matiktlapejpenikan tla tiktlakamatiskej noso ka. Ijkuak tiktlapejpeniaj tiktlakamatiskej niman tochikauaj tikchiuaskej tlen kineki, tikititiaj ika tiktlasojtlaj niman tiknekij tikyolpaktiskej. Satanás kijtoua ika Jehová xkimelaua matechyekana. San ika, ijkuak tiktlakamatij Jehová, tikititiaj ika tiknekij yejua matechyekana. Niman uelis kuajli tikmatstoskej ika toTajtsin kitlasojkaita nochi tlen tikchiuaj ika tokojtiliaj tiktlakamatiskej (Job 2:3-5; Proverbios 27:11). Ijkuak tochikauaj xtikchiuaskej tlen tlajtlakojli kichiua matikchiuakan maski ijkuak melak ouijtika tikitaj, tikteititiaj ika tinemij itech Jehová niman tikteititiaj ika tikneki yejua matechyekana.

¹³ Jehová techijlia ika noneki tochikauaskej ika tikixkopinaskej ikualneskayouan (Colosenses 3:12; xpoua 2 Pedro 1:5-7). Yejua kineki matochikauakan niman ijkon xtiknemiliskej nion tikmachiliskej tlen xnoneki (Romanos 8:5; 12:9). Nochipa ijkuak melak tochikauaskej ika tikpatlaskej itlaj ipan tonemilis niman tonkisaskej kuajli, melak kuajli tomachiliskej.

14, 15. ¿Tlenon uelis tikchiuaskej niman ijkon tikpiyaskej kualneskayomej tlen kuelita toTajtsin? (Xkita recuadro “ Biblia niman teoyotl okipatlak innemilis”).

¹⁴ ¿Tlenon noneki tikchiuaskej niman ijkon tikpiyaskej kualneskayomej tlen Jehová kuelita? Maka san tejuamej matiknemilikan tlenon noneki tikpatlaskej ipan tonemilis, noneki matijkauilikan toTajtsin matechyekana. Romanos 12:2 kijtoua: “Niman maka xmokauilikan mamechyektlali tlemach ken nochiuaj ipan tlaltikpaktli, tlen noneki, xmopatlakan niman xyenkuilijtiakan nemotlanemilil. Ijkon nemejuamej nenkitaskej tlen kuajli, tlen kiselia niman tlen melak kuajli kineki toTajtsin”. Tla tiknekij tikmatiskej tlen Jehová kineki, noneki tikneltokaskej ika yejua uelis techpaleuis. Noneki tikpouaskej Biblia mojmostla, titlanemiliskej itech tlen tikpouaj niman tiktlajtlaniliskej Jehová matechmaka iespíritu santo (Lucas 11:13; Gálatas 5:22, 23). Tla ijkon tikchiuaj, Jehová uelis techpaleuis matikasikamatikan tlen kuelita niman tiueliskej titlanemiliskej ken yejua. Sakin, tlen tiknemiliskej, tlen tikijtoskej niman tlen tikchiuaskej kiyolpaktis Jehová niman tomachtiskej kenon tochikauaskej xtikchiuaskej tlen tlajtlakojli kichiua matikchiuakan. San ika, maski ijkon nochipa nonekis matochikauakan (Proverbios 4:23).

¹⁵ San ika, xsan noneki tikpouaskej Biblia mojmostla noijki noneki tomachtiskej Biblia iuan amatlajkuiloltin, ken Amatl Tekakistilijketl niman  ¡Despertad! Miyek tlamachtiltin tlen uajlauej itech yejuin revistas techmachtiaj kenon tikixkopinaskej ikualneskayouan Jehová niman kenon tochikauaskej xtikchiuaskej tlen tlajtlakojli kichiua matikchiuakan. Uelis tiknextiskej seki tlamachtiltin noso tlaxeloltin ipan Biblia tlen melak techpaleuis. Uelis tikimilnamikiskej tlaxeloltin ipan Biblia niman tlamachtiltin itech amatlajkuiloltin tlen kisa ipan Biblia niman ijkon uelis tikinpouaskej oksejpa ijkuak nonekis.

16. ¿Tleka xkipiya ika tokajkauaskej tla tikitaj ika yolik tikpatlaj seki tlemach ipan tonemilis?

¹⁶ Timomachtis tikixkopinas ikualneskayouan Jehová tiuejkauis. Kuakon, tla tejua tikmachilia ika xueli tikpatla seki tlemach ipan monemilis ken tikuelitaskia, maka xmosiaujkaua. Kachtopa kanaj nonekis timochikauas tikchiuas ken Biblia temachtia. San ika, tla peua titlanemilia niman tikchiua ken Jehová kineki, sakin xouijtika mitsmakas titlanemilis ken yejua niman tikchiuas tlen kuajli (Salmo 37:31; Proverbios 23:12; Gálatas 5:16, 17).

17. ¿Tlenon uelis kualtsin tikchiaskej ika tlayekapan tla xkeman tijkauaj tiktekichiuiliaj Jehová?

¹⁷ Matitlanemilikan kenon yes tonaltin ijkuak xok tikpiyaskej tlajtlakojli niman tiktekichiuiliskej Jehová nochipa. Ipan yejon tonaltin, xok nonekis tochikauaskej ika xtikchiuaskej nion se tlemach tlen tlajtlakojli kichiua matikchiuakan niman nimantsin tikchiuaskej ken Jehová kichiua. San ika, aman uelis tikueyichiuaskej Jehová pampa yejua yotechmakak tetlayokolijli, se tlaxtlauijli. Maski titlajtlakolejkej, uelis tikyolpaktiskej toTajtsin tla xtoteltiaj ika tochikauaj tikpatlaskej tonemilis niman tikchiuaskej tlen yejua techmachtia ipan Biblia.

18, 19. ¿Tleka uelis tikmatstoskej ika Biblia uelis techpaleuijtias matikpatlatiakan seki tlemach ipan tonemilis?

¹⁸ Kevin okichiuj nochi tlen ouel niman onochikauj xok nimantsin kualanis. Yejua otlanemili itech tlen kipouaya ipan Biblia niman onochikauj kipatlas inemilis. Yejua noijki okinkak sekimej tokniuan ijkuak okitlajtolpaleuijkej. Maski kanaj ononek panos seki xiuitl ika okipatlatia inemilis, sakin ouel onochiuj ken tlapaleuijketl. Niman ikipiya 20 xiuitl ika tekititika ken tlayekanketl. San ika, aman yejua kimati ika ok noneki nochikauas xkichiuas itlaj tlen tlajtlakojli kichiua matikchiuakan.

¹⁹ Ijkon ken Kevin, tejuamej uelis ok tikyektlalijtiaskej seki tlemach ipan tonemilis. Tla ijkon tikchiuaj, nochipa uelis tonisiuijtiaskej itech Jehová (Salmo 25:14). Niman ijkuak tikchiuaj nochi tlen tiuelij ika tikpatlaskej tonemilis niman ijkon tikyolpaktiskej, yejua techpaleuis kuajli matikisatij. Kuajli tikmatstoskej ika itlapaleuilis iTlajtol toTajtsin, uelis ok tikpatlatiaskej tonemilis (Salmo 34:8).