1, 2. ¿Tlenon uelis totlajtoltiskej itech tlen okijto Jesús ipan Mateo 24:14?

JESÚS okijto ika sa itlamiyan tonaltin notenojnotsaskia kuajli tlajtoltin itech Tekiuajyotl ipan nochi tlaltikpaktli (Mateo 24:14, TNM). Iteixpantijkauan Jehová ipan nochi tlaltikpaktli techixmatij pampa titenojnotsaj. Sekimej kuelita tlen titenojnotsaj, san ika, oksekimej xkuelitaj. Maski oksekimej xkuelitaj tlen titenojnotsaj, techtlakaitaj ipampa totekiyo. Nesi ika san tejuamej tikchiuaj tekitl tlen Jesús okijto nochiuas. ¿Yemelak yejon? ¿Kenon kuajli tikmatstokej ika tenojnotsalistli se tekitl tlen Jesús okijto manochiua?

² Miyekej religiones kijtouaj ika tenojnotsaj tlen Jesús okijto. San ika, yejuamej san kichiuaj ipan teopan, ipan televisión noso ipan Internet. Niman kanaj yejuamej san kimijliaj kenon onomachtijkej itech Jesús. Oksekimej kinemiliaj ika kinpaleuiyaj tlaltikpakchanejkej ika tlen kinpoloua noso ijkuak nochiuaj ken tlapajtikej noso tlamachtijkej kinemiliaj ika ijkon tenojnotsaj. San ika ¿yejon kijtosneki titenojnotsas tlen okijto Jesús?

3. Ika tlen kijtoua Mateo 28:19, 20, ¿tlenon naui tlemach noneki kichiuaskej inomachtijkauan Jesús?

³ ¿Kinekiya Jesús ika inomachtijkauan makinchiakan tlaltikpakchanejkej mauajlakan intech? ¡Ka! Sakin ijkuak yoyoliujka,  Jesús okimijli melak miyekej inomachtijkauan: “Xuiyan niman xkinmachtikan tlaltikpakchanejkej ipan nochi kalpamej, xkinapolaktikan [...] xkinmachtikan makitlakamatikan nochi tlajtlamach tlen yonemechnauatij” (Mateo 28:19, 20, TNM). Kuakon inomachtijkauan Jesús noneki kichiuaskej naui tlemach. Kinmachtiskej tlaltikpakchanejkej, kinnapolaktiskej niman kimachtiskej makitlakamatikan. San ika, kachtopa noneki ika yejuamej yaskej. Se ixtlamatki itech Biblia kijtoua ika se akin tlaneltoka kipiya ika yas ontenojnotsas maski nisiuj noso melak uejka (Mateo 10:7; Lucas 10:3).

4. ¿Tlenon kijtosneki “michtlajtlamajkej itech tlakamej” yeskia inomachtijkauan?

⁴ ¿Tlenon kinekiya Jesús itech inomachtijkauan? ¿Kinekiya ika san inselti matenojnotsakan noso kinekiya makichiuakan ken grupo? Pampa san se xueliskia kinnojnotsas nochimej tlaltikpakchanejkej, inomachtijkauan nonekiya tenojnotsaskej ken grupo. Yejon tlen Jesús kinekiya manochiua ijkuak okimijli inomachtijkauan “nenkintejtemoskej tlakamej [noso michtlajtlamajkej itech tlakamej TNM]” (xpoua Mateo 4:18-22). Jesús xtlajtouaya san itech se michtlajtlamaketl, tlen kitekitiltia itlaj tlen ika kajsi san se michin. Yejua tlajtouaya ijkuak kinmajsi miyek michimej ika redes. Yejuin kijtosnekiya nopiyas chikaualistli, kimatiskej ken kichiuaskej niman san sekan miyekej matekitikan (Lucas 5:1-11).

5. ¿Katlejua naui tlajtoltilistin tikinnankiliskej niman tleka?

⁵ Tla tiknekij tikmatiskej akinomej tenojnotsaj itech kuajli tlajtoltin, noneki tiknankiliskej yejuin naui tlajtoltilistin:

• ¿Itech tlenon noneki tenojnotsaskej?

• ¿Tlenon ipampa kinekiskej tenojnotsaskej?

• ¿Kenon tenojnotsaskej?

• ¿Kech ika ueyi yeskia intekiyo niman hasta kemanon notenojnotsas?

Ijkuak nonankiliskej yejon tlajtoltilistin techpaleuis matikmatikan akinon kichiuaj yejuin tekitl tlen ika kinmakixtiaj innemilis tlaltikpakchanejkej. Niman techyolchikauas matitenojnotsakan nochipa (1 Timoteo 4:16).

6. ¿Tleka kuajli tikmatstokej ika iteixpantijkauan Jehová kiteijliaj tlajtojli tlen noneki notenojnotsas?

⁶ Xpoua Lucas 4:43. Jesús otenojnots “kuajli tlajtoltin itech iTekiuajyo toTajtsin” niman kinekiya ika inomachtijkauan noijki yejon matenojnotsakan. ¿Akinomej kinnojnotsaj nochimej niman kimijlia san yejon tlajtojli? San iteixpantijkauan Jehová. Hasta akin xkuelitaj tlen tikchiuaj kimatstokej yejon. Se neskayotl, se teopixki akin yokistinen ipan miyek países yokintlajtolti iteixpantijkauan Jehová tlenon tenojnotsaj. Yejua okijto: “Nochimej yejuamej xtlamachilisejkej san noijki nechnankiliaj: ‘Kuajli tlajtoltin itech iTekiuajyo toTajtsin’”. Tlen okijto teopixki techititia ika tejuamej kema titlamachilisejkej pampa san sekan tinemij ken akin melauak kichiuaj ken Cristo (1 Corintios 1:10). ITekiuajyo toTajtsin yejon tlen melak tlajtoua ipan Amatl Tekakistilijketl Kiteijlitika iTekiuajyo Jehová. Yejuin revistas onka ipan 254 tlajtoltin niman nochijchiuaj kanaj 59,000,000 revistas. Ika yejon, kuajli nesi ika yejuin revistas noxeloua ipan nochi tlaltikpaktli.

7. ¿Kenon tikmatij ika tlayekankej itech okseki religiones xkiteijliaj tlajtojli tlen noneki manotenojnotsa?

⁷ Akin san kijtoua ika kichiuaj ken Cristo xtenojnotsaj iTekiuajyo toTajtsin. Niman tla tlajtouaj itech iTekiuajyo toTajtsin, miyekej kijtouaj yejon san tlen tikmachiliaj ipan toyojlo (Lucas 17:21). Yejuamej xkinmachtiaj tlaltikpakchanejkej ika Tekiuajyotl onka ipan iluikak niman ika Jesús yejua Tekiuaj. Yejuamej san tlajtouaj itech Jesús ipan Navidad noso Semana Santa. Xtemachtiaj ika iTekiuajyo toTajtsin kiyektlalis nochi  tlen kinmajmana tlaltikpakchanejkej niman ika xok uejkaujtipan kipopolos kokolistli (Apocalipsis [Revelación] 19:11-21). Kuajli nesi ika tlayekankej itech okseki religiones xkimatij tlenon Jesús kichiuas ken Tekiuaj ipan iTekiuajyo toTajtsin. Niman pampa yejuamej xkasikamatij itech tlenon noneki manotenojnotsa, xkasikamatij tleka noneki matenojnotsakan.

8. ¿Tlenon ipampa xnoneki matiknekikan matitenojnotsakan?

⁸ Inomachtijkauan Jesús xnoneki matenojnotsakan ipampa tomin noso pampa kinekij kinchijchiuaskej uejueyimej inkaluan. Jesús okimijli inomachtijkauan ika xokitlaxtlaujkej tlen okiselijkej niman maka makitlajtlanikan tomin itech tlen kiteijliaj (Mateo 10:8). Kuakon xnoneki titenojnotsaskej pampa tiknekij tiktlaniskej tomin (2 Corintios 2:17). Inomachtijkauan Jesús xnoneki makintlaxtlauilikan pampa tenojnotsaj (xpoua Hechos 20:33-35). Maski Jesús kuajli otlanauati itech yejuin, miyekej tlaneltokiltin san kisetlalijtokej tomin ipampa inteopanuan niman ijkon uelis kintlaxtlauiliskej itlayekankauan niman akin intech tekitij. Ika yejon, miyekej tlayekankej itech akin san kijtouaj kichiuaj ken Cristo melak yonotomintijkej (Apocalipsis 17:4, 5).

9. ¿Kenon yokiteititijkej iteixpantijkauan Jehová ika yejuamej nochikauaj tenojnotsaj ipampa tlen noneki makichiuakan?

⁹ ¿Kitetlajtlaniliaj tomin iteixpantijkauan Jehová ipan kaltin kampa nosentlaliaj ipan uejueyimej tlanechikoltin? Ka. Intekiyo nochiua ika tomintsin tlen kitemakaj ika nochi inyojlo (2 Corintios 9:7). Xiuitl tlen otiuajpanokej, iteixpantijkauan Jehová otenojnotskej itech kuajli tlajtoltin kanaj ipan 2,000 millones. Okinmachtijkej itech Biblia ipantsin 9 millones tlaltikpakchanejkej nochi metstin. Yejuamej xokintlaxtlauilijkej ika otenojnotskej. Yejuamej ika pakilistli okikuikej intomin ika okichiujkej yejuin tekitl. Se tlakatl okijto itech tekitl tlen kichiuaj iteixpantijkauan Jehová: “Tlen yejuamej kinekij kichiuaskej, tenojnotsaskej niman temachtiskej”. Noijki okijto ika yejuamej xkinpiyaj intlayekankauan akin kintlaxtlauiliskej. Tla tejuamej xtitenojnotsaj ipampa tomin, ¿tleka tiknekij titenojnotsaskej? Tejuamej tiknekij tikchiuaskej yejuin tekitl pampa tiktlasojtlaj Jehová niman tikintlasojtlaj tlaltikpakchanejkej. Yejon tlen yokijtoka nochiuas tlen kijtoua ipan Salmo 110:3 (xpoua). *

10. ¿Kenon otenojnots Jesús niman inomachtijkauan?

¹⁰ ¿Kenon otenojnots Jesús niman inomachtijkauan? Yejuamej oyajkej san kanon kampa kinnextiayaj tlaltikpakchanejkej. Se neskayotl, yejuamej otenojnotskej ipan ojtli, kampa tlanemakalo niman techajchan (Mateo 10:11; Lucas 8:1; Hechos 5:42; 20:20). Ijkuak notenojnotsa techajchan ken noneki, ueli kinnextiaj nochimej tlaltikpakchanejkej.

11, 12. Ijkuak notenojnotsa kuajli tlajtoltin, ¿tleka xnoijki kichiuaj akin kijtouaj ika kichiuaj ken Cristo ijkon ken iteixpantijkauan Jehová itech ken tenojnotsaj?

¹¹ ¿Tenojnotsaj akin san kijtouaj kichiuaj ken Cristo ken okichiuj Jesús? Kemantika kintlaxtlauiliaj ika makinmachtikan akin imiuan nemij. San ika, tlayekankej xkinmachtiaj akin yenkuikej, san akin ompa nemij imiuan. Niman kemantika, yejuamej yokimijlikej oksekimej akin imiuan nemij matenojnotsakan. Se neskayotl, ipan xiuitl 2001, Juan Pablo II okijto ipan se amatlajkuilojli ika nochimej akin católicos noneki tenojnotsaskej itech Evangelio niman noijki melak makinekikan kichiuaskej ken itlatitlankauj Cristo, Pablo, akin okijto: “Melak ninajmana tla nejua xnitenojnotsa itech Evangelio”. Yejua okijto ika yejuin tenojnotsalistli xnoneki kichiuaskej san akin melak kuajli yonomachtijkej, noneki kichiuaskej nochimej akin nemij ipan yejon tlaneltokijli. San ika, san achijtsitsintin okichiujkej yejuin.

¹² ¿Tlenon uelis tikijtoskej itech iteixpantijkauan Jehová? San yejuamej akin tenojnotsaj ika Jesús yopeuj tlanauatia ken Tekiuaj ipan 1914 ika tlayekapan. Yejuamej kitlakamatij Jesús niman tenojnotsaj yejon tlen kachtopa kichiuaj ipan inemilis (Marcos 13:10). Se amoxtli tlen tlajtoua itech tlaneltokiltin kijtoua ika iteixpantijkauan Jehová kitaj melak ueyi kijtosneki tenojnotsaskej. Noijki okijto ika ijkuak kinnextiaj tlaltikpakchanejkej akin xkipiyaj tlen kikuaskej, akin inselti nemij niman akin kualoj nochikauaj kinpaleuiskej. San ika, xkeman kilkauaj ika tenojnotsaskej yejon tlen melak noneki kichiuaskej, ika kiteijliskej ika popoliuis tlen xkuajli nochiua ipan yejuin tlaltikpaktli niman temachtiskej kenon makisaskej. Iteixpantijkauan Jehová xkikajkaua ika tenojnotsaj yejon tlajtojli niman kichiuaj ken okichiuj Jesús niman inomachtijkauan.

13. ¿Kech ika ueyi notenojnotsaskia?

¹³ Jesús okimijli inomachtijkauan ika tenojnotsaskiaj niman temachtiskiaj ipan “nochimej países”. Noijki okinnauati ika temachtiskej “ipan nochi tlaltikpaktli” (Mateo 24:14; 28:19, 20, TNM). Yejuin kijtosneki ika kuajli tlajtoltin noneki noteijlis nochiuiyan ipan tlaltikpaktli.

14, 15. ¿Tlenon teititia ika iteixpantijkauan Jehová kuajli kichiujtokej tlen Jesús okijto niman kech ika ueyi? (Xkita tlaixkopinajli kampa peua tlen tomachtijtokej).

¹⁴ San iteixpantijkauan Jehová kuajli kichiujtokej tlen okijto Jesús nochiuas ika notenojnotsas ipan nochi tlaltikpaktli. ¿Tleka tikijtouaj yejon? Ipan Estados Unidos, nemij kanaj 600,000 tlayekankej itech akin kijtouaj ika kichiuaj ken Cristo. Niman nemij kanaj 1,200,000 iteixpantijkauan Jehová. Ipan nochi tlaltikpaktli nemij kanaj 400,000 teopixkej católicos. San ika, ipantsin 8 millones nemij iteixpantijkauan Jehová akin tenojnotsaj kuajli tlajtoltin ipan 240 países niman territorios. ¡Kuajli nesi ika iteixpantijkauan Jehová tenojnotstokej ipan nochi tlaltikpaktli, niman yejuin melak kiueyichiua Jehová! (Salmo 34:1; 51:15).

¹⁵ Tejuamej tiknekij tiknojnotsaskej miyekej tlaltikpakchanejkej hasta kampa tiueliskej aman ijkuak ok xiyejko tlapopolouilistli. Ika yejon, yotikintlajtolkuepkej niman yotikinchijchiujkej melak miyek amoxtin, revistas,  amatlajkuiloltin niman teyoleuilistli ipan ueyi tlanechikojli niman teyoleuilistli ijkuak noilnamiki imikilis Cristo ipantsin 700 tlajtoltin. Tejuamej xtiktlajtlanij tomin ijkuak tikintemakaj yejon amatlajkuiloltin. Ipan xiuitl tlen youajpanok, otikinchijchiujkej 4,500 millones amatlajkuiloltin niman amoxtin. Noijki yotikinchijchiujkej 200 millones Traducción del Nuevo Mundo de las Santas Escrituras ipantsin 130 tlajtoltin. Niman página tlen otiktlapojkej ipan Internet onka ipantsin 750 tlajtoltin. San iteixpantijkauan Jehová kichiujtokej yejuin ueyi tekitl.

16. ¿Kenon tikmatij ika iteixpantijkauan Jehová kipiyaj iespíritu santo toTajtsin?

¹⁶ ¿Hasta kemanon titenojnotsaskej? Jesús okijto ika notenojnotsaskia kuajli tlajtoltin hasta ijkuak yejkos tlapopolouilistli. Iteixpantijkauan Jehová xtokajkauaj ika titenojnotsaj ipan yejuin tonaltin pampa Jehová techmaka iespíritu santo (Hechos 1:8; 1 Pedro 4:14). Sekimej religiones uelis kijtoskej: “Tejuamej tikpiyaj espíritu santo”. San ika ¿ueli kichiujtokej yejuamej yejuin tekitl ken iteixpantijkauan Jehová kichiujtokej ipan yejuin tonaltin? Se neskayotl, sekimej yokiyejyekojkej tenojnotsaskej ken iteixpantijkauan Jehová kichiuaj, san ika, yejuamej xnochipa uelij kichiuaj. Oksekimej kinektokej tenojnotsaskej, san ika, xuejkaujtipan kichiuaj. Niman oksekimej kanaj hasta tenojnotsaj techajchan, san ika, xtenojnotsaj kuajli tlajtoltin itech iTekiuajyo toTajtsin. Kuakon yejuamej xkichiujtokej tekitl tlen Jesús okipeualti.

17, 18. a) ¿Tleka uelis kuajli tikmatstoskej ika san iteixpantijkauan Jehová akin tenojnotstokej kuajli tlajtoltin itech Tekiuajyotl ipan yejuin tonajli? b) ¿Tleka xueli tokajkauaj ika titenojnotsaj?

¹⁷ Kuakon, ¿akinomej tenojnotsaj kuajli tlajtoltin ipan yejuin tonajli? San iteixpantijkauan Jehová. ¿Kenon tikmatij ika san yejuamej? Pampa titenojnotsaj tlajtojli tlen noneki manoteijli, kuajli tlajtoltin itech Tekiuajyotl. Tikintejtemouaj tlaltikpakchanejkej ijkuak tenojnotsaj, kuakon tikchiuaj ken kinamiki. Tejuamej ika nochi toyojlo tiknekij titenojnotsaskej, pampa tiktlasojtlaj Jehová niman tlaltikpakchanejkej. Totenojnotsalis se tekitl melak ueyi pampa tikinnojnotsaj nochimej tlaltikpakchanejkej niman ika nochi tlajtoltin. ¡Niman xtijkajkauaskej ika titenojnotsaskej kuajli tlajtoltin itech Tekiuajyotl hasta ijkuak yejkos tlapopolouilistli!

¹⁸ Melak tikmojkaitaj tikitaskej kualtsin tekitl tlen kichiujtokej akin kitekichiuiliaj Jehová ika tenojnotsaj kuajli tlajtoltin ipan yejuin san itlamiyan tonaltin. San ika ¿kenon ueli tikchiuaj nochi yejuin tekitl? Pablo, itlatitlankauj Cristo, kijtoua: “Dios tekiti ipan nemoyojlo. Yejua mechchiualtia [noso mechyolchikaua] sanken nenkinekij niman nenuelij nenkichiuaskej on kuajli yejuan kipaktia” (Filipenses 2:13). Tiknekij ika Jehová nochipa matechmaka chikaualistli tlen techpoloua niman ijkon uelis tikchiuaskej nochi tlen tiuelij ika titenojnotsaskej kuajli tlajtoltin (2 Timoteo 4:5).