ToTajtsin melak kuajli ken okichijchiuj totlalnakayo niman ijkon san no yejua manopajti. Ijkuak se tlaltikpakchane noteki, notejtexoua noso itlaj ika notsopinia, “ipan totlalnakayo peua nochiua miyek tekitl niman ijkon peua nopajtia kampa ueyi noso xueyi otokokojkej” (Johns Hopkins Medicine). Totlalnakayo nimantsin tekiti niman ijkon kiteltis kampa tiyeskistokej, totlaluayouan patlauij, kipajtia kampa otokokojkej niman kiyenkuilia tonakayo.

XNEMILI YEJUIN: Tla toTajtsin okichijchiuj totlalnakayo ika sa no yejua maueli manopajti, ¿tiknemiliskiaj ika xuelis techpaleuis ijkuak itlaj techyolkokoua? Salmista kuajli kimatstoya ika toTajtsin ueli “kinpajtia akin noyolajmanaj” niman “kinpajtilia kampa onokokojkej” (Salmo 147:3). San ika, tla tejua mitsyolkokoua itlaj tlen yeuejkaui mopan opanok, ¿tlenon mitspaleuis kuajli xmatsto ika toTajtsin yemelak kipajtis tlen mitsyolajmana aman niman ika tlayekapan?

ToTajtsin techijlia: “Maka xmomojti, pampa mouan ninemi. Maka xmojkamiki, pampa nejua nimoTajtsin. Nejua nimitsyolchikauas, kema, nejua nimitspaleuis” (Isaías 41:10). Tikmatiskej ika Jehová techtlasojtla, techyolseuiya niman techmaka kojtilistli tlen ika tikinxikoskej tlaueltin. Apóstol Pablo okitokayoti yejuin yolseuilistli ken “yolseuilistli on yejuan más ueyi de nochi kech se tlakatl uelis kajsikamatis”. Niman sakin okijto ika nochi tlen ipan opanok ouel okixiko ipampa akin okimakak kojtilistli (Filipenses 4:4-7, 9, 13).

Biblia kichikaua totlaneltokil itech tlen toTajtsin yokijto kichiuas inpampa tlaltikpakchanejkej. Se neskayotl, Apocalipsis 21:4, 5 techijlia tlenon kichiuas toTajtsin niman tleka uelis itech titlaneltokaskej.

• Kipopolos “chokistli”. Jehová kipopolos nochi tlen techtlajyouiltia niman techajmana, maski kanaj oksekimej kitaj ken itlaj tlen xueyi kijtosneki.

• ToTajtsin akin “yeuatika [...] ipan on ueyixtikaj trono” ipan iluikak, kojtik Tekiuaj akin nochi okichijchiuj, kitekitiltis iueyikojtilis niman itlanauatijkayo niman ijkon kichiuas maka sa matitlajyouikan niman techpaleuis ijkuak nonekis.

• Jehová kuajli techijlia ika tlen yokijto kichiuas “melauak niman [...] kuajli para kineltokaskej”. Kijtosneki ika Jehová, toTajtsin akin melauak, tlen yokichiuj kichiua matikneltokakan ika tlen kijtoua melauak kichiua.

“‘Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok’. Kemaj on yejuan yeuatikatka ipan on ueyixtikaj trono okijtoj: ‘Xkita, nejua nikyenkuilia nochi on tlajtlamach’. No ijki okijtoj: ‘Xkijkuilo in tlen tikaktikaj pampa in tlen nimitsijlijtikaj yejua tlen melauak niman nochimej kuajli para kineltokaskej’” (Apocalipsis 21:4, 5).

Tlen toTajtsin yokichijchiuj niman Biblia techpaleuiyaj kuajli matikixmatikan toTaj iluikakchane. Tlen toTajtsin yokichijchiuj, maski xtlajtoua, techyoleua matouikakan iuan toTajtsin, san ika, Biblia kuajli techmelajkaijlia ijkuak kijtoua: “Xnisiuikan Dios niman yejua mechnisiuis” (Santiago 4:8). Niman Hechos 17:27 noijki kijtoua: “Yejua xuejka nemi [itech] cada se de tejuamej”.

Tla tejua tikxeloua tiempo ika tikixmatis toTajtsin, kichiuas machikaui motlaneltokil ika yejua najmana mopampa (1 Pedro 5:7). ¿Kenon tepaleuiya tla titlaneltoka itech Jehová?

Xtlanemili itech tlen ipan opanok Toru, se tlakatl akin chanti Japón. Maski inan okimachti itech toTajtsin, yejua onokalakti imiuan yakuza, se grupo akin nemi Japón niman kichiuaj tlen xkuajli. Yejua kijtoua: “Niknemiliaya ika toTajtsin nechtlauelitaya niman ika nechtlajyouiltiaya ijkuak mikiyaj akin noyeualiujyan nemij, yejuin melak nikmachiliaya ijkuak mikiya yakaj akin niktlasojtlaya”. Toru kijtoua ika tlen nochiuaya ipan yejon grupo okichiuj ika yejua “melak matlauele niman maka mateikneli”. Noijki kijtoua tlenon kitejtemouaya: “Niknekiya nimikis ijkuak ok nitelpochtli niman ika melak manechixmatikan pampa onikmikti yakaj akin melak ueyixtoya xken nejua”.

 San ika, ijkuak yejua niman isiuauj, Hannah, opeuj nomachtiaj Biblia, Toru miyek okipatlak ipan inemilis niman itech ken tlachiaya. “Melak onechmojkatlachialti kenon onopatlak noueuentsin”, kijtoua Hannah. Aman, Toru xometlamati: “ToTajtsin yemelak nemi niman najmana topampa. Xkineki ika yakaj mamiki niman kinektika kintlapopoluis akin yemelak noyolkuepaj. Uelis tikijliskej tlen xakaj okse ueliskia tikijliskiaj niman tlen xakaj kasikamatiskia. Sa achijtsin poliui ika toTajtsin kipopolos nochi tlaueltin, tekokojkayotl niman tlajyouilistli. Niman ipan yejuin tonaltin noijki melak temojkatlachialti ken techpaleuijtika. Melak najmana topampa niman techtlajpiya ijkuak tikpiyaj ueyi ajmantli” (Salmo 136:23).

Ijkon ken ipan onochiuj Toru, ijkuak tikmatij ika toTajtsin uelis kipopolos nochi tlen texchoktia ipampa nochi tlen techyolkokoua niman ika sa achijtsin poliui ijkuak kichiuas, techpaleuis matikpiyakan se kualtsin tlamachialistli niman noijki ika aman kuajli matinemikan. Kema, maski tinemij kampa onka miyek tekokojkayotl, tejua uelis mitspaleuis itlasojtlalis toTajtsin.