Xontlanemili itech kenon melak kuajli nouikaj kokonej kouatsitsintin akin san noijki tlachiaj. Yejuamej melak kuajli nasikamatij. Se directora itech se Centro para el Estudio de los Gemelos, itoka Nancy Segal, akin kouatsitsintin yejua iuan okse ikniuj siuatl, kijtoua ika seki kouatsitsintin “melak kuajli nasikamatij maski xmiyek tlen kijtouaj”. Se siuatl akin kouatsitsintin iuan ikniuj niman sa noijki tlachiaj, okijto itech ken nouikaj: “Melak kuajli toixmatij”.

¿Tlenon kichiua ika melak kuajli manasikamatikan? Maski yemelak ika kampa noskaltiaj niman tlen kimititiaj ijkuak kimiskaltiaj tepaleuiyaj, seki ixtlamatkej yokitakej ika ADN * tepaleuiya pampa tlen kipiyaj san noijki tlachia.

XNEMILI YEJUIN: ToTajtsin okichijchiuj ADN tlen melak temojkatlachialti, ika yejon, kuajli tikmatij ika yejua techasikamati xijkon ken yakaj okse. Kuajli tikasikamatij tleka salmista David okijkuilo: “Kuajli tinechtlapachojtoya ijtik nonan. Noomiyouan xiyantoyaj ijkuak onexchijchiujkej tlaiyankan [...]. Mixtololojuan okitakej ijkuak kemach opeuj ninoskaltia ijtik nonan niman kenon niyeskia nochi ijkuiliujtoya ipan moamox” (Salmo 139:13, 15, 16). ToTajtsin xsan kixmati niman kasikamati ken tlachijchiujtli ADN tlen tikpiyaj, noijki kasikamati nochi tlen topan yonochiuj tlen kichiua matinemikan ken tinemij. Ika yejon, uelis kuajli tikmatstoskej ika yejua melak kuajli techasikamati xijkon ken yakaj okse.

David okijto ipan iteoyouj: “Oh Jehová, tejua kuajli yotinechitak, niman tinechixmati. Tejua tikmati ijkuak ninotlalia niman ijkuak ninotelketsa. Tejua uejka tikinmasikamati notlanemililuan. Xionka nion se tlajtojli ipan nonenepil, san ika, ¡xkita!, oh Jehová, tejua nochi itikmati” (Salmo 139:1, 2, 4). Noijki, Jehová kixmati tlen tikmachiliaj ipan toyojlo niman “kixmatstika nochi tlen kiyekana tlanemililtin” (1 Crónicas 28:9; 1 Samuel 16:6, 7). ¿Tlenon techmachtiaj yejuin tlaxeloltin itech toTajtsin?

Techmachtiaj ika, maski xnochipa tiuelij tikijtouaj tlen tiknemiliaj niman tikmachiliaj ijkuak tikchiuaj teoyotl, toTlachijchiujkauj ikimati. Yejua xsan kita tlen tikchiuaj, noijki kasikamati tleka tikchiuaj. Niman, xsan yejon, toTajtsin noijki ueli kimati tlenon tikchiuaskiaj tla xtlaj techtsakuiliskia. Kema ijkon, pampa toTajtsin yejua akin otexchijchiuj ika matiuelikan matitetlasojtlakan, uelis kuajli tikmatstoskej ika melak kineki kimatis niman kasikamatis tlasojtlalistli tlen ualeua ipan totlanemililuan niman techyekana ipan tlen tikchiuaj (1 Juan 4:7-10).

 Biblia kuajli techijlia:

• “Ma Kichiua nochi in tlajtlamach pampa Dios kintlakaita on yejuan yolmelajkej, niman kaki inoración” (1 PEDRO 3:12).

• ToTajtsin techijlia: “Nikchiuas kuajli xkasikamati, niman nimitsititis ipan tlen ojtli tikistinemis. Kema yemelak ika noixtololo nimitstlajtolpaleuis” (SALMO 32:8).

¿Uelis techpaleuis matikixnamikikan tlen xkuajli topan nochiua tla tikmatij ika toTajtsin techasikamati? Xtlanemili itech tlen okipanok Anna, akin chanti Nigeria. Yejua kijtoua: “Xnikmatiya tlenon nikchiuas, hasta ninotlajtoltiaya tla kinamiki ika ok maninemi. Ijkuak onechijlikej ika nikpiaya cáncer ipan nochichiualuan, noueuentsin yomijka niman nochpokauj nemiya ipan hospital pampa kipiaya hidrocefalia (ijkuak nosentlalia kentla atl ipan cerebro). Melak onechtekiyomakak ninemis ipan hospital ijkuak nochpokauj noijki ompa nemiya niman ijkuak ononek nechtekiskej, nikselis quimioterapia niman radioterapia”.

¿Tlenon okipaleui Anna makixiko nochi yejuin? “Nikuelitaya nitlanemilis ipan tlaxeloltin tlen kipiya Biblia, ken Filipenses 4:6, 7, kampa kijtoua ika ‘Dios mechmakas yolseuilistli on yejuan más ueyi de nochi kech se tlakatl uelis kajsikamatis. Niman in yolseuilistli kejeuas nemoyojlo niman nemotlamachilis’. Nochipa ijkuak nikimilnamikiya yejuin tlajtoltin nikmachiliaya ika nisiuj ninemiya itech Jehová, nikmatiya ika yejua nechasikamatiya, xijkon ken nejua ninasikamatiya. Noijki melak onechyolchikaujkej akin tlaneltokaj ken nejua.

”Maski ok nikinpiya kokolistin, nochpokauj niman nejua kuajli tomachiliaj. Yotiuelkej kuajli titlanemiliskej maski tikinpiyaj tlaueltin pampa Jehová nochipa touan nemi. Santiago 5:11 kijtoua: ‘Tikmatstokej ika kipiaj ueyi tlatiochiualistli on yejuan okixikojkej ikan yolseuilistli on tlajyouilistli. Nemejuamej nenkakinij ken ijki Job okixikoj on tlajyouilistli ikan yolseuilistli niman ken ijki toTeko okitiochiu  ika on tlen kuajli ijkuak yotlajyouij. ToTeko sanoyej tenotski niman teikneliani’”. Jehová kuajli kasikamatiya tlaueltin tlen Job kipiaya, niman uelis kuajli tikmatstoskej ika noijki kasikamati tlaueltin tlen tikinpiyaj.