Tikasikamatis okse tlaltikpakchane kijtosneki tiuelis titlanemilis ken yejua, tikmatis niman tikmachilis tlen kimachilia. Se tlapajtiketl, akin ixtlamatki itech ken tekitij totlanemililuan, itoka Rick Hanson kijtoua ika “ititlachijchiujtin ika matiuelikan titeasikamatiskej”.

XNEMILI YEJUIN: ¿Tleka tejuamej ueli titeasikamatij niman yolkamej xuelij? Biblia kijtoua ika toTajtsin okichijchiuj tlakatl ijkon ken yejua itlachialis (Génesis 1:26). Ika yejon, maski san achijtsin uelis tikixkopinaskej niman tikinteititiskej ikualneskayouan. Kuakon, ijkuak se tlaltikpakchane kasikamati yakaj okse, yejua san kixkopintika Jehová, toTlachijchiujkauj akin techiknelia niman techasikamati (Proverbios 14:31).

ToTajtsin techasikamati niman kitlauelita kitas kenon titlajyouiyaj. Ijkuak Biblia tlajtoua itech kenon okintlajyouiltijkej israelitas ipan Egipto niman kenon ipan 40 xiuitl otlajyouijkej ipan tlaluaktli, kijtoua ika “ipan nochi intlajyouilis yejua noijki otlajyoui” (Isaías 63:9). Kuajli xkita ika toTajtsin xsan kimatiya ika ikalpan tlajyouijtoya, noijki kimachiliaya kenon tlajyouiaya. Yejua okijto: “Kuajli nikixmati nochi tlen kintlajyouiltia” (Éxodo 3:7). “San akinon mechkitskia”, kijtoua toTajtsin, “nejua noixtololo kikitskia” (Zacarías 2:8). Kuakon, ijkuak texchiuiliaj itlaj tlen xkuajli, kentla yejua noijki kichiuilijtoskiaj.

Biblia kuajli techijlia ika, maski tikmachiliskej ika toyojlo techtlajtlakolmaka niman ika toTajtsin xkimelaua techiknelis, yejua “más nochi kimati xken toyojlo, niman yejua nochi kimati” (1 Juan 3:19, 20). ToTajtsin melak kuajli techixmati, xijkon ken tejuamej. Kuajli kimati tlenon topan nochiua, tlenon tiknemiliaj niman tlenon tikmachiliaj. Niman yejua noijki kimachilia tlen tikmachiliaj.

 Biblia kuajli techijlia:

• “Kuakon tejua titenotsas, niman Jehová tlanankilis; tiktlajtlanis mamitspaleuikan, niman yejua kijtos: ‘¡Nikan ninemi!’” (ISAÍAS 58:9).

• “Pampa nejua kuajli nikimixmatstika tlanemililtin tlen niknemilijtika nemotechkopa, ijkon kijtoua Jehová, tlanemililtin tlen kipiyaj yolseuilistli, niman xkipiyaj tlen xkuajli, tlen mechmakas se kuajli nemilistli niman tlamachialistli. Niman nemejuamej ninnechnotsaskej niman nenuajlaskej niman ninnexchiuiliskej teoyotl, niman nejua nimechkakis” (JEREMÍAS 29:11, 12).

• “Xsentlali nixayouan ipan mokuetlaxatekon. ¿Xnestokej ipan moamox?” (SALMO 56:8).

¿Uelis techpaleuis matikixnamikikan tlen xkuajli topan nochiua tla tikmatij ika toTajtsin techasikamati? Matikitakan tlen ipan onochiuj María.

“Nikmachiliaya ika xkinamikiya tlen nopan nochiujtoya, ijkuak onikitak kenon nokoneuj, akin kipiaya 18 xiuitl, okijyoui cáncer ipan ome xiuitl niman sakin omik. ¡Nikualantoya iuan Jehová pampa xtlaj okichiuj ipampa!

”Nikmachiliaya ika Jehová xnechtlasojtlaya. Opanok chikuasen xiuitl, niman oniktlajtlajtouili se tokniuj siuatl akin kuajli iuan ninouika ipan notlanechikol itech kenon ninomachiliaya. Sakin ika yejua onechkak niman xonechtlajtolkoton, maski melak oniuejkauj, onechijli se texto tlen oajsik ipan noyojlo: 1 Juan 3:19, 20, kampa kijtoua: ‘Dios más nochi kimati xken toyojlo, niman yejua nochi kimati’. Sakin onechtomili ika Jehová kasikamati totlajyouilisuan.

”Maski ijkon, nejua ok nikualantoya. Kuakon, onikpouj Salmo 94:19, tlen kijtoua: ‘Ijkuak ajmantli nechyolajmanaya, otinechyolchikauj niman otinechyolseui’. ¡Onikmachili ken tla nejua onechijkuilouilikej yejuin tlaxelojli! Sakin, ouel onikijli Jehová kenon ninomachiliaya pampa nikmatiya ika nechkaktoya niman nechasikamatiya, yejon tlen melak onechyolseui”.

¡Melak techyolchikaua tikmatiskej ika toTajtsin kasikamati niman kimachilia tlen tikmachiliaj! San ika, ¿tleka onka miyek tlajyouilistli? ¿Kanaj techtlajyouiltia toTajtsin ipampa se tlajtlakojli? ¿Yejkos tonajli ijkuak kipopolos tlajyouilistli? Yejuin tlajtoltilistin nonankiliskej ipan tlamachtiltin tlen uajlauej.