TOTENOJNOTSALIS melak ueyi kijtosneki. San ika, miyekej tlaltikpakchanejkej xijkon kinemiliaj. Maski sekimej kinekij kimatiskej tlen kijtoua Biblia, xkitaj tla melak noneki nomachtiskej touan.

Matikitakan se neskayotl. Se tlakatl itoka Gavin yaya ipan tlanechikoltin ipan Kajli kampa Tosentlaliaj. Yejua xkinekiya makimachtikan itech Biblia. ¿Tleka? Pampa yejua san achijtsin kimatstoya tlen kijtouaya Biblia niman xkinekiya makimatikan oksekimej itech yejon. Noijki, xkinekiya nokalaktis itech se religión niman xkinekiya makikajkayauakan. ¿Tlenon tiknemilia tejua itech Gavin? ¿Tiknemilia ika onkatka ken uelis nopaleuis? Tlen Biblia temachtia melak tepaleuij. Ika yejon, Jehová okimijli israelitas ika itlajtoluan yeskia “kentla ajuaxtli, ijkon ken kiyaujtli yemanki ipan xiujtli” (Deuteronomio 31:19, 30; 32:2). Aman matikitakan naui tlemach kenon ajuaxtli uelis ijkon tikchiuaskej ijkuak tikinnojnotsaskej nochimej tlaltikpakchanejkej (1 Timoteo 2:3, 4).

Ajuaxtli yemanki. Ajuaxtli miyek tlachipintli ika atl tlen ualeua itech ajakatl niman tikitaj ajuaxtli ipan xiujtli. ¿Tleka kijtoua Biblia ika itlajtoluan Jehová “kentla ajuaxtli”? Pampa yejua kinnotsaya itekipanojkauan ika tlajtoltin yemankej niman ika tlasojtlalistli. ¿Kenon uelis tikchiuaskej ken yejua? Tla tiktlakaitaj intlaneltokilis tlaltikpakchanejkej kampa tontenojnotsaj niman matikinyolchikauakan matlanemilikan niman yejuamej makitlapejpenikan kichiuaskej tlen kuajli. Tla tikteititiaj ika tajmanaj inpampa kinekiskej techkakiskej. Tla ijkon tikchiuaj, melak kuajli tonkisaskej itech totlanojnotsalis.

Ajuaxtli teseseli. Totenojnotsalis yes kentla ajuaxtli tla totlajtoluan teseselijkej noso tla ken tikimijliaj tlaltikpakchanejkej kuelkakij. Matitlanemilikan kenon uelis tikinpaleuiskej makixmatikan Biblia. Matikilnamikikan Gavin tlen yotikteneujkej. Kachtopa, se tokniuj itoka Chris okijli ika tla kineki nomachtis Biblia. San ika, xokichiualti ika manomachti. Yejua kinekiya ika Gavin kuajli manomachili nochipa ijkuak tlajtouaya itech Biblia iuan. Tokniuj Chris okijli ika Biblia kipiya se ueyi tlamachtijli tlen melak ueyi kijtosneki itech tlen tlajtoua. Tla kixmati itech tlen Biblia tlajtoua, kipaleuis melak kuajli kasikamatis tlanechikoltin. Noijki yejon tokniuj okijli Gavin ika teotlajtoltin itech Biblia okitlaneltokiltijkej ika tlen kijtoua Biblia yemelauak. Miyekpa otlajtokej itech teotlajtoltin. Gavin melak kuajli onomachili niman sakin okinek nomachtis itech Biblia.

Ajuaxtli kitemaka nemilistli. Ipan Israel itech tonaltin ijkuak xkiyauiya melak tonaya niman ueliskia panoskia miyek metstli ika xkiyaui. Tla xoniaskia ajuaxtli, nochi tlen xoxojkij katka uakiskia ueliskia niman popoliuiskia. Biblia okijto tlen nochiuaskia ipan yejuin tonaltin, ika tlaltikpakchanejkej kinekiskiaj “kikakiskej itlajtol Jehová” (Amós 8:11). Yeskiaj kentla melak amikiskiaj, pampa kinekiskiaj kimatiskej itech toTajtsin. Ika yejon, Biblia kijtoua ika ijkuak tlapejpeniltin tenojnotsaj kuajli tlajtoltin kentla ajuaxtli tlen ualeua itech Jehová (Miqueas 5:7). Niman okse grupo tlen noixmatij ken “oksekimej borregos” kinpaleuiyaj itech yejon tekitl (Juan 10:16). Tlajtojli tlen tikteijliaj yejon tlen Jehová ika kinpaleuiya akin kinekij kimatiskej tlen melauak niman ijkon nomachtiskej itech toTajtsin niman kuajli iuan nouikaskej. ¿Tiktlasojkaitaj yejuin tlajtoltin?

Ajuaxtli se tlateochiualistli tlen ualeua itech Jehová. (Deuteronomio 33:13). Totenojnotsalis uelis yes ken se tetlayokolijli noso tlateochiualistli ika akin kinekij kimatiskej tlen melauak. Ijkuak Gavin opeuj nomachtia Biblia okitak se tlateochiualistli pampa okimat tlanankilistin itech tlen notlajtoltia. Xuejkaujtipan opanok onoapolakti niman aman ika inyojlo tenojnotsaj tlajtoltin itech Tekiuajyotl iuan isiuauj, Joyce.

Tla totenojnotsalis tikitaj ken ajuaxtli, tochikaualis ika tlen tikchiuaj tikitaskej ika melak ueyi kijtosneki. ¿Tleka? Pampa san se tlachipintli se ajuaxtli xtlaj ueli kichiua, san ika, ijkuak miyek tlachipintli nosentlalia kipatsoua tlajli. Noijki ijkon, kanaj san toselti tikitaskej ika xtlaj tikchiuaj. San ika, pampa melak timiyekej iteixpantijkauan Jehová tiuelij titenojnotsaj “nochiuiyan ipan in tlaltikpaktli” (Mateo 24:14). ¿Yes se tlateochiualistli tlen ualeua itech Jehová ijkuak tikinnojnotsaj oksekimej? Kema, totlajtoluan yes kentla ajuaxtli ijkuak titenojnotsaj, yemanki teseseli niman kitemaka nemilistli.