Deuteronomio 22:25-27 xsan kinekiya kiteititis ika yejon tlakatl kipiaya tlajtlakojli, pampa yejon ikuajli nesiya. Yejuin tlanauatijli kinekiya kiteasikamachiltis ika on siuatl yemelak xkipiaya tlajtlakojli. Matikitakan okseki tlaxeloltin.

Okseki tlaxeloltin tlen kachtopa noteneuaj ipan yejuin capítulo tlajtouaj itech se tlakatl akin “ipan on ueyikalpan” onotekak iuan se siuatl akin yokijtlankaj. Pampa siuamej akin yokimijtlankaj kimitayaj ken akin yononamiktijkaj, on tlakatl kipiaya tlajtlakojli pampa iuan oauilnen. ¿Tlenon kijtouayaj itech siuatl? Pampa on siuatl “xokitsajtsilij yakaj ma kimanaui ipan on ueyikalpan”, kuakon, yejua noijki kipiaya tlajtlakojli. Tla tsajtsiskia, miyekej kikakiskiaj niman konmanauiskiaj noso konpaleuiskiaj. San ika, pampa xotsajtsik, on omemej kintlajtlakoltiayaj pampa oauilnenkej (Deut. 22:23, 24).

Sakin, Tlanauatijli kiteneuaya yejuin: “Pero tla sen tlakatl kinextia ipan campo sen ichpochtli yejuan yokijtlan okse tlakatl, niman kichiualtia iuan ma noteka, tla ijkon, san kimi[k]tiskej on tlakatl yejuan okichiualtij iuan ma noteka. On ichpochtli xitlaj kichiuiliskej pampa yejua xokichiu tlajtlakojli yejuan noneki ika mikis. In tlen okichiu in tlakatl sano ijki ken ijkuak sen tlakatl kimiktia okse tlakatl, pampa yejua okinextij iselti neka campo on ichpochtli yejuan yokijtlankaj, niman maski on siuatl tsajtsiskia, xakaj ueliskia kimanauiskia” (Deut. 22:25-27).

Ijkuak ijkin panouaya, “on uejueyixtokej tlayekankej” kineltokiliayaj on siuatl. Kinemiliayaj ika yejuin siuatl otsajtsika, san ika, xakaj ouel okimanauito. Yejua ika, on siuatl xoauilnenka. San ika, on tlakatl kema oauilnenka pampa okinajnauilti niman “okichiualtij iuan ma noteka”.

Kuakon, maski yejuin tlanauatijli kinekiya kiteititis ika on siuatl xkipiaya tlajtlakojli, noijki kuajli kiteasikamachiltis ika on tlakatl kipiaya tlajtlakojli pampa otenajnauiltijka niman oauilnenka. Uelis kuajli tikmatstoskej ika “on uejueyixtokej tlayekankej” kuajli tetlajtoltiayaj niman kitayaj tlenon yemelak opanoka niman ijkon tetlajtlakolmakaskej ken Jehová kinekiya manochiua (Éx. 20:14; Deut. 13:14; 17:4).