IPAN Biblia, Génesis tlaxelojli ueyi 22, kijtoua ika toTajtsin okinauati Abrahán mauiya uejka kampa kontemakaskia se uentli. Yejuin tlen kijtoua: “Abrahán okajsik tlakotl ipampa uentli tlen notlatia niman okimamaltili ikoneuj Isaac. Kuakon yejua okajsik ipan imauan tlitl niman cuchillo, niman omemej onejnenkej san sekan” (Génesis 22:6).

Biblia xkijtoua kenon tlaltikpakchanejkej akin yeuejkaui onenkej kitlikuiltiayaj tlitl. Kuakon, ¿okitlikuiltikej tlitl Abrahán iuan Isaac niman sakin okitkikej kampa oyajkej? Se ixtlamatki okijto ika xuelis nonemilis ika okitkikej tlitl tlen tlikuitiaya ijkuak uejka oyajkej. Yejua kinemilia kanaj Abrahán niman ikoneuj okitkikej nochi tlen nonekiskia niman ijkon kitlikuiltiskiaj tlitl.

San ika, oksekimej ixtlamatkej kijtouaj ika yeuejkaui ouijtika katka kitlikuiltiskej tlitl. Kuakon ijkuak ueliyaj, tlaltikpakchanejkej kitlaliayaj tlitl ika tlixochtli itech okseki tlitl tlen itlikuitoya. Kanaj kikuiyaj seki tlixochtli tlen yokitlalijka se akin nisiuj chantiya kampa yejuamej chantij. Miyekej ixtlamatkej kinemiliaj ika Abrahán kanaj okitejtemo tlixochtli ijkuak xiyayaj uejka. Kinemiliaj kanaj kitkiya tlixochtli ika itlaj ken se kontsintli tlen pilkatiaya ika se cadena (Isaías 30:14). Ika yejon, kanaj Abrahán ouel okikuik yejon tlixochtli niman seki tlakotsitsintin tlen nonekiya ika kitlikuiltiskia tlitl.