1, 2. ¿Tlenon opanok ipan iluitl Pentecostés itech xiuitl 33?

IPAN iluitl Pentecostés itech xiuitl 33 opanok itlaj tlen melak temojkatlachialti. Katka se tonajli domingo ika kualkan, niman ne Jerusalén nemiyaj 120 inomachtijkauan Jesús ipan se cuarto tlen onkatka ikuatipan se kajli (Hech. 1:13-15; 2:1). Ijkuak xiajsiya yejon tonajli, Jesús yokimijlika manokauakan Jerusalén pampa kiseliskiaj itlaj tlen melak ueyi kijtosnekiskia (Hech. 1:4, 5, TNM). ¿Tlenon opanok?

² “Nimantsin ouajtlakokomokak ne ipan cielo ken ijkuak sanoyej chikauak ajaka. Niman on ajakatl okakistik ijtik nochi on kajli”. Ijkuakon, nochimej akin ompa nemiyaj okitakej ika inkuatipan “ouajnonextij ken itlaj tlitl”, niman nochimej okiselijkej espíritu santo (Hech. 2:2-4). Melak temojkatlachialti kenon Jehová okinmakak iespíritu santo akin ompa nemiyaj (Hech. 1:8). Yejuamej akin kachtopa okintlapejpenijkej ika espíritu santo * niman akin ueliskiaj tekiuajtiskej iuan Jesús ne iluikak.

3. ¿Tleka tokniuan ipan kachtopa siglo kuajli kimatstoyaj ika yokintlapejpenijkaj ika espíritu santo?

³ Tla tejua ompa teuan tinemiskia, xkeman tikilkauaskia yejon tonajli. Mokuatipan uajnonextiskia “ken itlaj tlitl”, niman  titlajtoskia tlatlamantik tlajtoltin (Hech. 2:5-12). Kuajli tikmatstoskia ika yomitstlapejpenijkaj ika espíritu santo. San ika, ¿nochipa panoua tlen temojkatlachialti ijkuak toTajtsin tetlapejpenia ika espíritu santo? Matikitakan.

4. Ipan kachtopa siglo, ¿kemanon okintlapejpenijkej tokniuan ika espíritu santo?

⁴ Kachtopa matikitakan kemanon okintlapejpenijkej inomachtijkauan Jesús akin onenkej ipan kachtopa siglo. Ipan iluitl Pentecostés itech xiuitl 33, xsan okintlapejpenijkej ika espíritu santo yejon 120 inomachtijkauan Jesús akin nemiyaj ipan se kajli. Ika teotlak, sa no ipan yejon tonajli, okseki 3,000 inomachtijkauan Jesús okinmakakej espíritu santo tlen Jesús okijtoka kiseliskiaj. Yejuamej okintlapejpenijkej ijkuak onoapolaktijkej (Hech. 2:37, 38, 41, TNM). San ika, seki xiuitl ika tlayekapan, xnochimej okintlapejpenijkej ijkuak onoapolaktijkej. Samaritanos okintlapejpenijkej sakin ika yonoapolaktijkaj (Hech. 8:14-17, TNM). Jehová noijki otetlapejpeni ken xkeman kichiuaya, yejua okintlapejpeni Cornelio niman ichanejkauan ijkuak nion xinoapolaktiayaj (Hech. 10:44-48, TNM).

5. Ijkon ken kijtoua 2 Corintios 1:21, 22, ¿tlenon panoua ijkuak yakaj kitlapejpeniaj ika espíritu santo?

⁵ Aman matikitakan tlenon panoua ijkuak kintlapejpeniaj tokniuan ika espíritu santo. Ijkuak kemach kintlapejpeniaj, kanaj sekimej hasta xuelij kineltokaj ika Jehová yokintlapejpeni niman kanaj notlajtoltiaj tleka okintlapejpenijkej. Niman oksekimej kanaj tlamantik ken nomachiliaj ijkuak kintlapejpeniaj. Apóstol Pablo okijto tlenon inpan nochiua nochimej tokniuan tlapejpeniltin: “Niman ijkuak onenkineltokakej, Dios omechsellaroj * ika on Espíritu Santo yejuan omechprometerouilijka. Aman, on Espíritu Santo techmelajkaititia ika melauak Dios techmakas on herencia yejuan otechprometerouilij” (Efes. 1:13, 14). Kuakon, Jehová kitekitiltia iespíritu santo niman ijkon  kuajli kimasikamachiltis tokniuan ika yokintlapejpeni niman kinmelajkaititis ika yejuamej nemiskej iluikak niman xnemiskej nikan ipan tlaltikpaktli (xpoua 2 Corintios 1:21, 22).

6. ¿Tlenon noneki kichiuas se tlapejpenijli niman ijkon yas iluikak?

⁶ ¿Kijtosneki ika akin tlapejpenijli xok itlaj uelis kiteltis mauiya iluikak? Ka, xyejon kijtosneki. San kijtosneki ika yejua yokitlapejpenijkej mauiya iluikak. San ika, noneki kilnamikis yejuin tlajtoltin: “Nokniuan, xchiuakan kanika para nenkimatiskej ikan nochi nemoyojlo ika Dios melauak yomechnots niman yomechtlapejpenij. Tla ijkon [...] nenkichiuaskej xkaman nenuetsiskej” (2 Ped. 1:10). Kuakon, maski tla yakaj yokitlapejpenijkej, san uelis yas iluikak tla melajkanemi (Filip. 3:12-14; Heb. 3:1; Apoc. 2:10).

7. ¿Kenon kimatij tlapejpeniltin ika yaskej iluikak?

⁷ Kuakon, ¿kenon kimati yakaj ika yas iluikak? Matikitakan tlenon okimijkuilouili Pablo sekimej tlapejpeniltin akin nemiyaj Roma. Yejua okimijli: “On Espíritu Santo yejuan onenkiselijkej xmechuika para nenesclavos yeskej oksejpa itech on nemojtijli, yej kichiua para nentekoneuan itech Dios. Yejua ika, tikijtouaj: ‘Abba, toTajtsin’. On Espíritu Santo niman toyojlo techijlia ika tiikoneuan Dios” (Rom. 1:7; 8:15, 16). Tikitaj ika itechkopa iespíritu santo, toTajtsin kuajli kimasikamachiltia tlapejpeniltin ika yaskej iluikak (1 Tes. 2:12).

8. Itech tlen kijtoua 1 Juan 2:20, 27, ¿tleka xnoneki yakaj makimijli tlapejpeniltin ika yejuamej yokintlapejpenijkej?

⁸ Jehová kichiua ika tlapejpeniltin kuajli makimatstokan ipan intlamachilis niman ipan inyojlo ika yaskej iluikak (xpoua 1 Juan 2:20, 27, TNM). * Yejuamej noijki noneki makinmachti Jehová ipan tlanechikojli ijkon ken tinochimej. San ika, xnoneki yakaj makimijli ika yejuamej tlapejpeniltin. Jehová yokitekitilti iespíritu santo tlen melak kojtik niman ijkon kimasikamachiltis ika yokintlapejpeni.

9. Ijkon ken kijtoua Efesios 1:18, ¿tlenon inpan nochiua akin kintlapejpeniaj yaskej iluikak?

⁹ Miyekej akin kitekichiuiliaj Jehová kanaj xkuajli kasikamatij tlenon kimachiliaj akin kintlapejpeniaj. Niman xuelij kasikamatij yejon pampa xteuan tlapejpeniltin. ToTajtsin okinchijchiuj tlaltikpakchanejkej niman ijkon manemikan ipan tlaltikpaktli, niman xne iluikak (Gén. 1:28; Sal. 37:29). San ika, toTajtsin yokintlapejpeni sekimej itekipanojkauan niman ijkon manemikan ne iluikak. Ika yejon, akin kintlapejpeniaj, xok kichiaj nemiskej ipan tlaltikpaktli niman aman tlamantik ken tlanemiliaj. Kema, Jehová kichiua melak makinekikan yaskej iluikak (xpoua Efesios 1:18).

10. ¿Tlenon kijtosneki “oksejpa titlakatis”? (Noijki xkita nota).

¹⁰ Ijkuak se tokniuj kitlapejpeniaj ika espíritu santo, yejua oksejpa tlakati. * Jesús noijki okiteasikamachilti ika yakaj akin xtlapejpenijli xuelis kasikamatis kenon nomachiliaj akin oksejpa tlakatij noso akin “tlakatij ikan on Espíritu Santo” (Juan 3:3-8).

11. Xkijto kenon nopatla itlanemilil se tokniuj akin kitlapejpeniaj.

¹¹ ¿Kenon nopatla itlanemilil se tokniuj  akin kitlapejpeniaj? Achto kitlapejpeniskiaj, yejua noijki kinekiya chantis nikan ipan tlaltikpaktli niman kipiyas se nemilistli tlen xkeman tlamis. Noijki kichiaya yejon tonajli ijkuak toTajtsin kipopolos nochi tlen xkuajli niman ijkuak kikuepas tlaltikpaktli se xochitlalpan. Kanaj yokinemilijka kenon kinselis ichanejkauan noso iamigos ijkuak yoliuiskej. San ika, ijkuak okitlapejpenijkej, itlanemilil onopatlak. ¿Tleka onopatlak? ¿Kanaj xok kinekiya chantis ipan yejuin tlaltikpaktli? ¿Kanaj melak noyolajmanaya noso tlajyouiaya? Noso ¿kanaj okinemili ika tlatsiuiskia nemis nochipa ipan yejuin tlaltikpaktli? Ka, xyejon opanok. Jehová okikuik iespíritu santo niman ijkon okipatili itlanemilil, niman aman kichia yas iluikak.

12. Itech tlen kijtoua 1 Pedro 1:3, 4, ¿kenon nomachilia se tokniuj akin yokitlapejpenijkej ijkuak tlanemilia itech tlen kiselis?

¹² Tokniuj akin yokitlapejpenijkej kanaj uelis kinemilis ika xkinamiki kiselis yejon tlateochiualistli, san ika, yejua xometlamati ika Jehová yokitlapejpeni. Ijkuak tlanemilia itech tlen kiselis, yejua melak yolpaki niman kitlasojkamachilia toTajtsin (xpoua 1 Pedro 1:3, 4).

13. ¿Kinekij tlapejpeniltin mikiskej niman ijkon yaskej iluikak?

¹³ ¿Kijtosneki ika tlapejpeniltin kinekij mikiskej niman ijkon yaskej iluikak? Apóstol Pablo technankilia yejuin ijkuak otlajto itech intlalnakayo akin tlapejpeniltin, yejua okijto: “Chika tinemij ikan totlaltikpaknakayo, titejeltiaj. In xkijtosneki ika tiknekij tikpoloskej totlaltikpaknakayo, yej tiknekij ma nopatla totlaltikpaknakayo ika on iluikaknakayotl para on tlaltikpaknakayososojli yejuan ueli miki ma popoliui ika on yenkuik nemilistli yejuan nochipa onyas” (2 Cor. 5:4). Kuakon tikitaj ika tlapejpeniltin kuelitaj nemiskej nikan ipan tlaltikpaktli, xkinekij miktiuetsiskej niman ijkon yaskej iluikak. Yejuamej melak yolpakij niman mojmostla chikauak kitekichiuiliaj Jehová imiuan ichanejkauan niman imiuan akin nouikaj. Maski ijkon, nochipa kilnamiktokej tlenon kiseliskej ika tlayekapan (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Tlenon ueliskia kichiuas yakaj makinemili ika yokitlapejpenijkej, san ika, tleka yejon xkiteititia ika tlapejpenijli?

¹⁴ Kanaj timotlajtoltia tla Jehová yomitstlapejpeni ika iespíritu santo. Tla ijkon tiknemilia, xmotlajtolti: ¿melak tikneki tikchiuas tlen toTajtsin kineki?, ¿melak tikuelita titenojnotsas?, ¿tikuelita timomachtis Biblia niman tiuelis “tlajtlamach yejuan más ueyi kijtosnekij itech Dios”?, ¿yotikitak ika toTajtsin melak mitspaleuiya ijkuak titenojnotsa?, ¿tikita ika melak noneki tikinpaleuis oksekimej niman ijkon kuajli manouikakan iuan toTajtsin?, ¿yotikitak ika Jehová melak yomitspaleui ipan nochi monemilis? (1 Cor. 2:10). Tla otikijto “kema”, ¿kiteititia yejuin ika yomitstlapejpenijkej niman ijkon tias iluikak? Ka, xyejon kijtosneki, pampa tinochimej akin tiktekichiuiliaj Jehová, maski titlapejpeniltin noso ka, uelis ijkon tomachiliskej. Jehová uelis kikuis iespíritu santo niman ijkon kinpaleuis nochimej itekipanojkauan makichiuakan tlen yotikonteneujkej. Tla tejua xkuajli tikmati tla titlapejpenijli, kijtosneki ika xtitlapejpenijli. Akin yokintlapejpenijkej xometlamatij, yejuamej kuajli kimatstokej ika yokintlapejpenijkej.

15. ¿Kenon tikmatij ika xnochimej akin kiseliaj espíritu santo kintlapejpeniaj mauiyan iluikak?

¹⁵ Biblia kinteneua miyekej itekipanojkauan toTajtsin akin omelajkanenkej niman okinmakakej espíritu santo, san ika, yejuamej  xokintlapejpenijkej yaskej iluikak. Se neskayotl, iespíritu santo toTajtsin okiyekan David (1 Sam. 16:13). Ipampa espíritu santo, David ouel okixmat Jehová niman ouel okijkuilo seki tlen onka ipan Biblia (Mar. 12:36). Maski ijkon, apóstol Pedro okijto ika David “xotlejkok iluikak” (Hech. 2:34). Aman matitlajtokan itech Juan Teapolaktijketl, yejua noijki okimakakej espíritu santo (Luc. 1:13-16). Jesús hasta okijtoka ika Juan Teapolaktijketl melak ueyixtoya xijkon ken yakaj okse. Maski ijkon, okijto ika Juan xtekiuajtiskia ne iluikak (Mat. 11:10, 11). Jehová okitekitilti iespíritu santo niman ijkon kinpaleuis itekipanojkauan makichiuakan miyek tlemach tlen temojkatlachialti, san ika, xokitekitilti iespíritu niman ijkon ika kintlapejpenis mauiyan iluikak. ¿Kijtosneki yejuin ika yejuamej xoyolmelajkanenkej ijkon ken akin yaskej iluikak ? Ka, yejuin san kijtosneki ika Jehová kinyolitis ijkuak tlaltikpaktli yes se xochitlalpan (Juan 5:28, 29; Hech. 24:15).

16. ¿Kanon kichiaj chantiskej miyekej itekipanojkauan toTajtsin?

¹⁶ Ipan yejuin tonaltin, miyekej itekipanojkauan Jehová xkichiaj yaskej iluikak, ijkon ken Abrahán, Sara, David, Juan Teapolaktijketl niman oksekimej tlakamej niman siuamej akin onenkej yeuejkaui. Yejuamej kinekij nemiskej ipan tlaltikpaktli ijkuak iTekiuajyo toTajtsin tlayekanas (Heb. 11:10, TNM).

17. ¿Tlenon tiknankiliskej ipan okse tlamachtijli?

¹⁷ Ipan tlaltikpaktli ok nemij sekimej tlapejpeniltin (Apoc. 12:17). Ika yejon, kanaj totlajtoltiaj: ¿kenon tlapejpeniltin noneki noitaskej sa no yejuamej?, ¿kenon noneki tikitaskej akin peua kikua pan niman peua koni vino ijkuak noilnamiki imikilis Cristo? niman ¿noneki tajmanaskej tla miyekixtiuej sejse xiuitl akin tlapejpeniltin? Nochi yejuin tiknankiliskej ipan okse tlamachtijli.