TLAMACHTIJLI 5
Nemouan tiaskej
“Tiknekij nemouan tiaskej, pampa yotiktekakilijkej ika toTajtsin nemouan nemi” (ZAC. 8:23, TNM).
TLAKUIKAJLI 26 Tikchiua nopampa
TLEN TIKITASKEJ *
Akin kimixmatij ken “oksekimej borregos” (“majtlaktli tlakamej”) melak kitlasojkamatij san sekan kitekichiuiliskej Jehová imiuan tlapejpeniltin (on “judío”). (Xkimita párrafos 1 niman 2).
1. ¿Tlenon yokijtoka Jehová ika panotoskia ipan yejuin tonaltin?
YEUEJKAUI, Jehová yokijtoka tlenon panotoskia ipan yejuin tonaltin, yejua okijto: “Ipan yejon tonaltin majtlaktli tlakamej itech nochi tlajtoltin tlen onka ipan países kajsiskej, kema, kajsiskej itlaken se judío, kijtojtoskej: ‘Tiknekij nemouan tiaskej, pampa yotiktekakilijkej ika toTajtsin nemouan nemi’” (Zac. 8:23, TNM). Yejuin “judío” kijtosneki nochimej tokniuan akin toTajtsin yokintlapejpeni ika espíritu santo, akin noijki kimixmatij ken ikoneuan toTajtsin (Gál. 6:16). Niman on “majtlaktli tlakamej” kijtosneki nochimej akin kiseliskej nemilistli tlen xkeman tlamis ipan yejuin tlaltikpaktli. On “majtlaktli tlakamej” kimatstokej ika Jehová yejua akin yokintlapejpeni tokniuan akin yaskej iluikak niman melak kitlasojkamatij ika imiuan kitekichiuiliaj toTajtsin.
2. ¿Tlenon kijtosneki ika on “majtlaktli tlakamej” yauej imiuan akin tlapejpeniltin?
2 Ipan yejuin tonaltin xtikmatij kenon intoka nochimej tlapejpeniltin akin ok nokauaj ipan tlaltikpaktli. * Maski ijkon, akin kichiaj nemiskej ipan yejuin tlaltikpaktli uelis imiuan “yaskej” tlapejpeniltin. ¿Kenon uelis imiuan yaskej? Biblia kijtoua ika on “majtlaktli tlakamej” chikauak kajsiskiaj “itlaken se judío” niman kijtoskiaj: “Tiknekij nemouan tiaskej, pampa yotiktekakilijkej ika toTajtsin nemouan nemi”. Yejuin tlaxelojli kiteneua san se “judío”, san ika, noijki kijtoua ika on “majtlaktli tlakamej” kijliaj “judío” ika imiuan yaskej. Yejuin techititia ika on “judío” xkijtosneki san se tlakatl, yej kijtosneki nochimej tlapejpeniltin. Akin xtlapejpeniltin kitekichiuiliaj Jehová imiuan akin yaskej iluikak. San ika, yejuamej xkimitaj tlapejpeniltin ken intlayekankauan, pampa kuajli kimatstokej ika san Jesús inTlayekankauj (Mat. 23:10).
3. ¿Tlenon tiknankiliskej ipan yejuin tlamachtijli?
3 Ipan yejuin tonaltin, sekimej tokniuan tlapejpeniltin ok nemij ipan tlaltikpaktli. Ika yejon, kanaj sekimej notlajtoltiaj: ¿kenon tlapejpeniltin noneki noitaskej sa no yejuamej?, ¿kenon noneki tikimitaskej akin kikuaj pan niman konij vino ijkuak noilnamiki imikilis Cristo? niman ¿noneki tajmanaskej tla miyekixtiuej sejse xiuitl akin tlapejpeniltin? Nochi yejuin tiknankiliskej ipan yejuin tlamachtijli.
¿KENON TLAPEJPENILTIN NONEKI NOITASKEJ SA NO YEJUAMEJ?
4. ¿Tlenon kimititia 1 Corintios 11:27-29 nochimej akin tlapejpeniltin, niman tleka melak noneki makilnamiktokan?
4 Tlapejpeniltin melak noneki makilnamiktokan tlen kijtoua 1 Corintios 11:27-29 (xpoua). ¿Kenon ueliskia se tlapejpenijli “xkitlakaitas” pan niman vino ijkuak noilnamiki imikilis Cristo? Tla kikua yejon pan niman tla koni yejon vino maski xkintlakamatstika itlanauatiluan toTajtsin (Heb. 6:4-6; Heb. 10:26-29, TNM). Akin tlapejpeniltin kimatstokej ika noneki melajkanemiskej tla kinekij yaskej iluikak (Filip. 3:13-16).
5. ¿Kenon tlapejpeniltin noneki noitaskej sa no yejuamej?
5 Iespíritu santo Jehová xkichiua ika tlaltikpakchanejkej manoueyimatikan, yej kichiua más mayolyemankej (Efes. 4:1-3; Col. 3:10, 12). Ika yejon, akin tlapejpeniltin xnoueyimatij. Xkinemiliaj ika san yejuamej más kipiyaj espíritu santo xijkon ken oksekimej itekipanojkauan toTajtsin. Noijki xkinemiliaj ika yejuamej más kuajli kixmatij tlen kijtoua Biblia xijkon ken oksekimej. Yejuamej xkeman kijliskiaj yakaj: “Tejua noijki titlapejpenijli, noijki noneki tijkuas pan niman tikonis vino ijkuak noilnamiki imikilis Cristo”. Tlapejpeniltin yolyemankej niman kasikamatij ika san Jehová uelis kijtos akinon yas iluikak.
6. Ijkon ken kijtoua 1 Corintios 4:7, 8, ¿tlenon xnoneki kichiuaskej akin tlapejpeniltin?
6 Maski akin tlapejpeniltin kimatij ika se tlateochiualistli yaskej iluikak, xkichiaj ika oksekimej makinueyikaitakan (Filip. 2:2, 3). Noijki kimatstokej ika, ijkuak Jehová okintlapejpeni, xokichiuj ika nochimej makimatikan. Ika yejon, se tokniuj tlapejpenijli xmojkatlachia ijkuak sekimej xmás kineltokiliaj ika toTajtsin yokitlapejpeni. Kimatstokej ika Biblia techmachtia ika xnoneki nimantsin tikneltokiliskej akin kijtos ika toTajtsin yokimakak se ueyi tekitl (Apoc. 2:2). Yejuamej xnoueyimatij, ika yejon, ijkuak yakaj kemach kixmatij, xkijliaj ika yejuamej tlapejpeniltin. Noijki xkiteijlitinemij ika yejuamej yaskej iluikak (xpoua 1 Corintios 4:7, 8).
7. ¿Tlenon xkichiuaj akin tlapejpeniltin, niman tleka?
7 Akin tlapejpeniltin xsan nosentlaliaj imiuan akin noijki tlapejpeniltin, kentla tla kipiyaskiaj se grupo kampa san yejuamej kinnamiki ompa manemikan. Noijki, xkintejtemouaj oksekimej akin noijki tlapejpeniltin niman ijkon nonojnotsaskej itech kenon Jehová okintlapejpeni. Nion xkichiuaj grupos kampa san yejuamej nomachtiskej Biblia (Gál. 1:15-17). Tla ijkon kichiuaskiaj, tlanechikojli xexeliujtoskia niman yejuamej kixnamiktoskiaj iespíritu santo toTajtsin. ¿Tleka ijkon tikijtouaj? Pampa espíritu santo kichiua ika tokniuan ipan tlanechikojli san sekan manemikan niman nochimej mayolseujtokan (Rom. 16:17, 18).
¿KENON NONEKI TIKIMITASKEJ AKIN TLAPEJPENILTIN?
Xkipiya ika tikimitaskej tokniuan tlapejpeniltin nion tokniuan tlayekankej ken akin melak uejueyixtokej. (Xkita párrafo 8). *
8. ¿Tleka melak noneki matotlajpiyakan itech kenon tikimitaj tokniuan akin tlapejpeniltin? (Noijki xkita nota).
8 ¿Kenon noneki tikimitaskej tokniuan siuamej niman tlakamej akin tlapejpeniltin? Xkuajli yeskia tla yakaj melak tikueyikaitaskiaj, maski tla yejua tlapejpenijli, akin kixmatij ken ikniuj Cristo (Mat. 23:8-12). Ijkuak Biblia tlajtoua itech tlayekankej, kijtoua: “Xmouikakan ikan tlaneltoktli ken yejuamej”, san ika, xkijtoua tla noneki tikchiuaskej nochi tlen se tlaltikpakchane kichiua noso kijtoua (Heb. 13:7). Melauak ika Biblia kijtoua ika sekimej tokniuan kema kinamiki “ma kintlakaitakan”. Niman kinamiki ijkon makintlakaitakan pampa “kuajli tlayekanaj intech on tlaneltokakej” niman pampa chikauak “tenojnotsaj ika on kuajli tlajtojli niman temachtiaj”, xpampa tlapejpeniltin (1 Tim. 5:17). Tla tejuamej melak tikinueyikaitaj akin tlapejpeniltin, yejuin tokniuan kanaj xkuajli nomachiliskej, * noso hasta ueliskia tikchiuaskej manoueyimatikan, niman yejon melak xkuajli yeskia (Rom. 12:3). ¿Xmelak ika xtiknekiskiaj tikchiuaskej ika se tlapejpenijli makichiua itlaj tlen melak xkuajli? (Luc. 17:2).
9. ¿Kenon uelis tikintlakaitaskej akin tlapejpeniltin?
9 ¿Kenon uelis tikintlakaitaskej akin Jehová yokintlapejpeni? Kachtopa, maka matikintlajtoltikan kenon okimatkej ika toTajtsin okintlapejpeni. Yejon itlaj tlen xtechnamiki matikmatikan (1 Tes. 4:11; 2 Tes. 3:11). Noijki xnoneki tiknemiliskej ika pampa se tokniuj tlapejpenijli, kuakon, isiuatsin niman itajuan noso oksekimej ichanejkauan noijki tlapejpeniltin. ToTajtsin yejua akin kintlapejpenia mauiyan iluikak, yejuin xsan notepanoltilia (1 Tes. 2:12). Noijki xtitetlajtoltiskej tlen uelis kichiuas maka kuajli manomachilikan oksekimej. Se neskayotl, xkeman tiktlajtoltiskiaj isiuatsin se tokniuj tlapejpenijli kenon nomachilia ijkuak konnemilia ika xnemis iuan iueuentsin ipan xochitlalpan. Tejuamej kuajli tikmatstokej ika toTajtsin Jehová kinmakas itekipanojkauan nochi tlen kinpoloua niman ijkon manemikan ika inyojlo ipan xochitlalpan (Sal. 145:16).
10. ¿Tleka xkuajli yeskia tla yakaj tikueyikaitaj?
10 Noijki, ijkuak tejuamej xtikinueyikaitaj tlapejpeniltin, sa no tejuamej totlajpiyaj. ¿Tleka ijkon tikijtouaj? Pampa Biblia techijlia ika sekimej tlapejpeniltin uelis kikauaskej Jehová (Mat. 25:10-12; 2 Ped. 2:20, 21). Yejua ika, tla tejuamej xtikinueyikaitaj tlaltikpakchanejkej, xkeman tikimitaskej ken totlayekankauan, maski tla yejuamej tlapejpeniltin, maski melak kimixmatij noso melak youejkaujkej kitekichiuiliaj Jehová (Jud. 16). Kuakon, maski tla kemantika yejuamej kikauaj tlanechikojli noso xyolmelajkanemij, tejuamej xtikpoloskej totlaneltokil niman xkeman tijkauaskej Jehová.
¿NONEKI TAJMANASKEJ TLA MIYEKIXTIUEJ AKIN TLAPEJPENILTIN?
11. ¿Tlenon kinmajmana sekimej tokniuan?
11 Yeuejkaui, sa achijtsitsintin katkaj akin kikuayaj pan niman koniyaj vino ijkuak noilnamiki imikilis Cristo. San ika, aman oksejpa yopeujkej miyekiyaj. ¿Noneki tajmanaskej pampa ijkon panoua? Ka. Matikitakan tleka xnoneki tajmanaskej.
12. ¿Tleka xnoneki tajmanaskej tla miyekixtiuej akin kikuaj pan niman konij vino Ijkuak noilnamiki imikilis Cristo?
12 “ToTEKO kimixmatstikaj yejuan melauak iyaxkauan” (2 Tim. 2:19). Ijkuak noilnamiki imikilis Cristo, nopoua kechmej kikuaj pan niman konij vino, san ika, tokniuan akin tlapouaj xkimatij tla yemelak tlapejpeniltin. Yejuin san Jehová kimatstika. Ika yejon, xnochimej akin kikuaj pan niman konij vino yemelak tlapejpeniltin. Sekimej akin kikuayaj pan niman koniyaj vino, aman xok ijkon kichiuaj. Niman oksekimej kinemiliaj ika tekiuajtiskej iuan Cristo ne iluikak pampa kipiyaj se kokolistli tlen kichiua ijkon makinemilikan. Kuakon, xkuajli tikmatij kechmej tlapejpeniltin ok nemij ipan tlaltikpaktli.
13. ¿Kijtoua Biblia kechmej tlapejpeniltin nemiskej ipan tlaltikpaktli ijkuak peuas ueyi tlajyouilistli?
13 Ok nemiskej tlapejpeniltin nochiuiyan ipan tlaltikpaktli ijkuak Jesús uajlas niman ijkon kinuikas (Mat. 24:31). Melauak ika Biblia kijtoua ika itlamiyan tonaltin ok nemiskej sekimej tlapejpeniltin ipan tlaltikpaktli (Apoc. 12:17). San ika, xkijtoua kechmej ok nikan nemiskej ijkuak peuas ueyi tlajyouilistli.
¿Tlenon tikchiuaskiaj tla se tokniuj peua kikua pan niman koni vino ijkuak noilnamiki imikilis Cristo? (Xkita párrafo 14).
14. ¿Tlenon techmachtia Romanos 9:11, 16 itech ken Jehová tetlapejpenia?
14 Jehová kijtoua kemanon tetlapejpenis (Rom. 8:28-30). Jehová opeuj kintlapejpenia akin yaskej iluikak sakin ika okiyoliti Jesús. Nesi ika ipan kachtopa siglo, nochimej akin yemelak kichiuayaj ken Cristo katkaj tlapejpeniltin. San ika, sakin, maski miyekej kijtouayaj ika tokniuan katkaj, xmelauak tokniuan katkaj. Maski ijkon opanok, ipan yejon tonaltin Jehová okintlapejpeni sekimej tokniuan akin yemelak kineltokayaj Cristo. Yejuamej katkaj ken on trigo tlen Jesús okijto ika noskaltiskia itsajlan on xkuajli xiujtli (Mat. 13:24-30). Ipan yejuin tonaltin, Jehová ok kintlapejpenijtika akin teuan nopouaskej itech on 144,000. * Kuakon, tla toTajtsin kintlapejpenia sekimej tokniuan ijkuak sa achijtsin poliuis ika kipopolos tlen xkuajli ipan tlaltikpaktli, tejuamej xtechmelaua tikijtoskej tleka ijkon kichiua (xpoua Romanos 9:11, 16). * Xtiknekiskiaj tikchiuaskej ken yejon tlakeualtin tlen Jesús okinteneuj ipan se itlamachtil, yejon tlakamej xokuelitakej tlenon okichiuj inteko inpampa akin sa ika teotlak otekitkej (Mat. 20:8-15).
15. ¿Tleka tikmatstokej ika xnochimej tlapejpeniltin noixmatij ken “tekitketl” yolmelauak niman tlamachilise tlen noteneua ipan Mateo 24:45-47?
15 Xnochimej tlapejpeniltin noixmatij ken “tekitketl” yolmelauak niman tlamachilise (xpoua Mateo 24:45-47). Ijkon ken ipan kachtopa siglo, aman Jehová niman Jesús noijki san achijtsitsintin tlapejpeniltin kintekitiltijtokej niman ijkon makinmachtikan oksekimej itekipanojkauan. Ipan kachtopa siglo, san achijtsitsintin tlapejpeniltin okijkuilojkej Tlajkuiloltin ika Griego. Ipan yejuin tonaltin, noijki san sekimej tlapejpeniltin kinmakatokej itekipanojkauan Jehová tlen kinpoloua niman ijkon machikaui intlaneltokil.
16. ¿Tlenon yotiuel ipan yejuin tlamachtijli?
16 Matikilnamikikan tlenon yotiuelkej ipan yejuin tlamachtijli. ToTajtsin yokijto ika kinmakas miyekej itekipanojkauan se nemilistli tlen xkeman tlamis nikan ipan tlaltikpaktli, niman noijki yokijto ika san achijtsitsintin yaskej iluikak niman ijkon tekiuajtiskej iuan Jesús. ToTajtsin kinteochiuas nochimej itekipanojkauan, kema, kiteochiuas on “judío” niman noijki on “majtlaktli tlakamej”. San ika, Jehová nochimej kintlajtlanilia makitlakamatikan niman mamelajkanemikan. Nochimej noneki mayolyemankej niman san sekan makiueyichiuakan toTajtsin. Noijki noneki manokojtilikan niman ijkon maonia yolseuilistli ipan tlanechikojli. Sa achijtsin poliui ijkuak toTajtsin kipopolos nochi tlen xkuajli ipan tlaltikpaktli. Yejua ika, tinochimej matiktekichiuilijtokan Jehová niman matokauilikan matechyekana Cristo (Juan 10:16).
^ párr. 5 Ipan yejuin xiuitl, imikilis Cristo tikilnamikiskej ipan tonajli martes 7 de abril. ¿Kenon noneki tikimitaskej akin kikuaj pan niman konij vino ijkuak noilnamiki imikilis Cristo? ¿Noneki tajmanaskej tla miyekixtiuej sejse xiuitl akin tlapejpeniltin? Nochi yejuin tiknankiliskej ipan yejuin tlamachtijli. Seki tlen nikan tomachtiskej otikitakej ipan Amatl Tekakistilijketl de enero de 2016.
^ párr. 2 Ken kijtoua Salmo 87:5, 6, kanaj ika tlayekapan toTajtsin kijtos kenon intoka nochimej akin tekiuajtiskej iuan Jesús ne iluikak (Rom. 8:19).
^ párr. 8 Xkita recuadro “Tlasojtlalistli ‘xsan kenon noyekana’”, itech Amatl Tekakistilijketl de enero de 2016, página 27.
^ párr. 14 Maski Hechos 2:33 techijlia ika Jesús kitemaka espíritu santo, Jehová yejua akin kintlapejpenia akin yaskej iluikak.
^ párr. 14 Tla okseki tikneki tikmatis, xkita “Preguntas de los lectores” itech La Atalaya del 1 de mayo de 2007.
TLAKUIKAJLI 34 Matimelajkanejnentiakan
^ párr. 56 TLEN NESI IPAN TLAIXKOPINAJLI: Xkonnemili ika ipan se ueyi tlanechikojli melak miyekej tokniuan kinekij kinkixtiliskej tlaixkopinaltin tokniuan akin okintitlan oficina kampa noyekanaj nochi sucursales. ¡Melak xtetlakaitaj!
