1, 2. ¿Tlenon inpan nochiujtika miyekej itekipanojkauan Jehová, niman kenon kimijtlakoua yejuin?

MATITLANEMILIKAN itech tlen kixnamiktokej miyekej tokniuan. Se tokniuj telpochtli kijliaj ika kipiya se kokolistli tlen kikixtilijtias ikojtilis. Okse tokniuj akin melak tekitki niman ikipiya ipantsin 50 xiuitl kikixtiaj ipan itekiyo, niman maski melak kitejtemoua okse tekitl, xueli kinextia. Se tokniuj siuatl akin iueyi, kita ika aman xok ueli kitekichiuilia Jehová ijkon ken ijkuak ichpochtli katka.

² Tla noijki ijkon topan nochiujtika, kanaj tiknemiliaj ika xok titepaleuijkej. Niman yejuin uelis techijtlakos, uelis kichiuas maka sa matipakikan, maka kuajli matomachilikan niman noijki uelis kichiuas maka kuajli matouikakan iuan oksekimej.

3. ¿Kenon techita Satanás niman akin kichiuaj ken yejua?

³ Satanás niman akin kichiuaj ken yejua nion xtechpatiojkaitaj. Satanás kita ika xtitepaleuijkej niman xtechtlakaita. Se tonajli okijli Eva ika sa no yejua ueliskia noyekanas, san ika, yejua kuajli kimatstoya ika Eva mikiskia tla xkitlakamatiya Jehová. Satanás kiyekana política, ken notekitiltia tomin niman kinyekana tlaneltokiltin tlen xmelajkej. Ika yejon, miyekej akin kitejtemouaj kipiyaskej tomin, akin tekitij ipan política niman akin tlayekanaj ipan tlaneltokiltin tlen xmelajkej noijki xakaj kipatiojkaitaj niman xkinmajmana tlen kimachiliaj oksekimej.

4. ¿Tlenon tikitaskej ipan yejuin tlamachtijli?

 ⁴ San ika, Jehová xijkon techita, yejua kineki kuajli matomachilikan niman techpaleuiya ijkuak tikixnamikij se tlauejli tlen kichiua matiknemilikan ika xtitepaleuijkej (Sal. 136:23; Rom. 12:3). Ipan yejuin tlamachtijli, tikitaskej kenon Jehová techpaleuiya ijkuak tikualoj, ijkuak xtikpiyaj tomin niman ijkuak tiknemiliaj ika xok miyek tikchiuaj ipan itekiyo pampa yotiueuentsintiakej. San ika, kachtopa matikitakan tleka uelis tikneltokaskej ika toTajtsin techpatiojkaita.

5. ¿Tleka tikmatstokej ika Jehová techpatiojkaita?

⁵ Jehová melak techpatiojkaita maski san otexchijchiuj ika “tlajli” (Gén. 2:7). ¿Tleka kuajli tikmatstokej yejuin? Matikteneuakan se, pampa yejua otexchijchiuj niman ijkon matiuelikan matikinpiyakan ikualneskayouan (Gén. 1:27). Ipampa yejon, san tejuamej otechmakak se kualtsin tekitl: matikintlajpiyakan yolkamej niman nochi tlen onka ipan tlaltikpaktli (Sal. 8:4-8).

6. ¿Tlenon yokichiuj Jehová pampa techpatiojkaita?

⁶ Maski Adán otlajtlako, Jehová ok kinpatiojkaita nochimej ikoneuan. Ika yejon, okuajtitlan iKonetsin, Jesús, niman ijkon makitemaka inemilis ken tlaxtlauijli ipampa totlajtlakoluan (1 Juan 4:9, 10). Itechkopa tlaxtlauijli, toTajtsin kinyolitis nochimej akin yomijkej ipampa itlajtlakol Adán, kema, kinyolitis akin yolmelajkej niman noijki akin xyolmelajkej (Hech. 24:15). Ipan iTlajtol techititia ika tinochimej techpatiojkaita, maski tla tikualoj, tla xtikpiyaj tomin niman maski tla yotiueuentsintiakej (Hech. 10:34, 35).

7. ¿Tleka akin tiitekipanojkauan Jehová kuajli tikmatstokej ika yejua techpatiojkaita?

⁷ Akin tiitekipanojkauan Jehová uelis más tikneltokaskej ika yejua techpatiojkaita. ¿Tleka ijkon tikijtouaj? Pampa yejua okitak kenon otikselijkej kuajli tlajtoltin niman otechpaleui itech matonisiuikan (Juan 6:44). Ijkuak opeuj tonisiuiyaj itech Jehová, yejua noijki otechnisiui (Sant. 4:8). Noijki, nokojtilia niman kixeloua tiempo niman ijkon techmachtis. Yejua kuajli techixmatstika niman kimati ika uelis tinemiskej ken yejua kuelita. Techititia ika techtlasojtla ijkuak techmelajkatlalia (Prov. 3:11, 12). ¿Xmelak ika kuajli nesi ika toTajtsin techpatiojkaita?

8. ¿Kenon uelis techpaleuis Salmo 18:27-29 kuajli matikixnamikikan tlen ouijtika?

⁸ Tekiuaj David kuajli kimatstoya ika Jehová kitlasojtlaya niman kipaleuiaya. Yejuin okichiuj kuajli makixiko nochi tlen ipan onochiuj, ken ijkuak sekimej okijlikej ika katka se “xkuajli tlakatl” (2 Sam. 16:5-7). Ijkuak melak toyolajmanaj niman tikixnamikij tlen ouijtika, Jehová uelis kichiuas kuajli matitlanemilikan niman techpaleuis matikxikokan maski san tlenon tikixnamiktoskej (xpoua Salmo 18:27-29). Tla toTajtsin techpaleuiya, xitlaj techteltis matiktekichiuilikan ika pakilistli (Rom. 8:31). Matikitakan tlenon ueliskia topan nochiuas kampa melak noneki matikilnamikikan ika Jehová techpatiojkaita niman techtlasojtla.

9. ¿Kenon uelis tomachiliskej ijkuak tikpiyaj se kokolistli?

⁹ Ijkuak tikpiyaj se kokolistli, uelis melak xkuajli tomachiliskej niman kanaj tiknemiliskej ika xok titepaleuijkej. Kanaj tipinauiskej pampa oksekimej kitaj ika xok miyek tiuelij tikchiuaj noso pampa noneki yakaj matechpaleui. Niman, maski sekimej xkimatij tla tikualoj, kanaj tipinauij pampa xok tiuelij tikchiuaj tlen yeuejkaui tikchiuayaj. Ijkuak ijkon titlajyouiyaj, Jehová techyolchikaua. ¿Kenon kichiua?

10. Ijkon ken kijtoua Proverbios 12:25, ¿tlenon uelis techpaleuis ijkuak tikualoj?

 ¹⁰ Ijkuak tikualoj, “sen kuajli tlajtojli” uelis techpaleuis kuajli matomachilikan (xpoua Proverbios 12:25). Jehová yokintlali ipan Biblia kualtsitsintin tlajtoltin tlen techilnamiktiaj ika yejua techpatiojkaita maski tikualoj (Sal. 31:19; 41:3). Tla miyekpa tikamapouaj yejon kualtsitsintin tlajtoltin, toTajtsin techpaleuis matikixnamikikan tlen xkuajli tikmachiliaj pampa tikualoj.

11. ¿Kenon Jehová okipaleui se tokniuj?

¹¹ Matikitakan tlenon ipan onochiuj Jorge. Ijkuak ok telpochtli katka, okajsik se kokolistli tlen totoka kikixtilijtiaya ikojtilis, yejuin kichiuaya makinemili ika xok itlaj ueliskia kichiuas. Yejua kijtoua: “Melak xkuajli oninomachili ijkuak onechajsik yejuin kokolistli. Ninajmanaya pampa aman miyekej kitaskiaj ika nikualouaya. Ijkuak más opeuj nikualo, niknemiliaya kenon nopatlaskia nonemilis. Melak oniajmankamik, ika yejon, oniktlajtlanili Jehová manechpaleui”. ¿Kenon okitlajpix toTajtsin? Jorge kijtoua: “Nochipa san nitlanemilijtoya ipan nokokolis, kuakon, onechijlikej manikinamapoua seki tlaxeloltin itech Salmos kampa Jehová techijlia ika yejua najmana inpampa itekipanojkauan. Mojmostla nikinamapouaya yejon tlaxeloltin. Melak nechpaleuiayaj niman nechyolseuiayaj. Sakin, miyekej okitakej ika más iniuetskaya, niman kijtouayaj ika yejuin kinyolchikauaya. Onikitak ika Jehová yonechnankilijka. Yonechpaleuijka manikpatla ken ninomachiliaya. Opeuj nitlanemilia itech ken Jehová nechita maski nikualo”.

12. ¿Tlenon uelis tikchiuaskej niman ijkon tikitaskej ika Jehová techpaleuijtika?

¹² Tla tikualoj, kuajli matikmatstokan ika Jehová kimati tlenon tikixnamiktokej. Matiktlajtlanilikan matechpaleui matikitakan  tlen topan nochiua ken kinamiki. Matomachtikan Biblia niman ijkon uelis tikinnextiskej kualtsitsintin tlajtoltin tlen Jehová ompa yokintlali. Kuajli matikimitakan tlaxeloltin kampa techititiaj ika Jehová melak kinpatiojkaita itekipanojkauan. Tla ijkon tikchiuaj, tikitaskej ika yejua kintlasojtla akin nochipa kitekichiuiliaj (Sal. 84:11).

13. ¿Kenon uelis nomachiliskej akin kinyekanaj inchanejkauan ijkuak kinkixtiaj ipan intekiyo?

¹³ Tla tejuamej tikinyekanaj tochanejkauan, melak tiknekij tikinmakaskej tlen kinpoloua. Aman tej, matikonnemilikan ika se tokniuj kikixtiaj ipan itekiyo maski xokichiuj tlen xkuajli. Maski melak kitejtemoua okse tekitl, xueli kinextia. Ipampa yejuin, kanaj nomachilia ika xok uelis kinmakas ichanejkauan tlen kinpoloua. ¿Kenon kipaleuis tla tlanemilia itech tlen Jehová yokijto kichiuas ika tlayekapan?

14. ¿Tleka Jehová kichiua tlen kijtoua?

¹⁴ Jehová nochipa kichiua tlen kijtoua (Jos. 21:45; 23:14). Niman ijkon kichiua pampa kineki manoueyiteneua itoka. Yejua kuajli yokijto ika kintlajpiyas itekipanojkauan, ika yejon, kita ika noneki kichiuas tlen yokijto (Sal. 31:1-3). Noijki, kimatstika ika melak xkuajli tomachiliskiaj tla yejua xnajmanaskia topampa. Yejua yotechmelajkaijli ika techmakas tlen techpoloua niman tlen ika tikchikauaskej totlaneltokil, niman xitlaj uelis kitsakuilis ijkon makichiua (Mat. 6:30-33; 24:45).

15. a) ¿Tlenon okixnamijkej tokniuan ipan kachtopa siglo? b) ¿Tlenon techititia Salmo 37:18, 19?

¹⁵ Ijkuak tikilnamikij tleka Jehová kichiua tlen kijtoua, xsajnoye tajmanaj ijkuak xtikpiyaj tomin. Matitlanemilikan intech tokniuan akin onenkej ipan kachtopa siglo.  Ijkuak melak okitlaueltokakej tlanechikojli tlen onkatka Jerusalén, “nochimej on tlaneltokakej ochojcholojkej”, san apóstoles ompa onokaujkej (Hech. 8:1). Ika yejon, kanaj miyekej xkipiayaj tomin. Kanaj okipolojkej inchan, intekiyo niman kampa tlanemakayaj. San ika, Jehová xokinkauj, niman yejuamej ok yolpakiyaj (Hech. 8:4; Heb. 13:5, 6; Sant. 1:2, 3). ToTajtsin okinpaleui yejon tokniuan, niman uelis kuajli tikmatstoskej ika noijki techpaleuis (xpoua Salmo 37:18, 19).

16. ¿Tlenon uelis kichiuas matiknemilikan ika Jehová xkipatiojkaita tlen tikchiuaj ipan itekiyo?

¹⁶ Tla yopeuj tiueuentsintiaj, kanaj tiknemiliaj ika xok miyek uelis tikchiuaskej ipan itekiyo Jehová. Kanaj noijki ijkon tlanemiliaya tekiuaj David ijkuak opeuj ueuentsintia (Sal. 71:9). ¿Kenon techpaleuiya Jehová?

17. ¿Tlenon techmachtia tlen ipan onochiuj tokniuj Jheri?

¹⁷ Matikitakan tlenon ipan onochiuj se tokniuj siuatl akin itoka Jheri. Yejua okinotskej mauiya ipan se tlanechikojli kampa noteijliskia kenon noneki tikintlajpiyaskej kaltin kampa tosentlaliaj, san ika, xkinekiya yas. Yejua kijtoua: “Inilamajtsin, yomik noueuentsin niman xitlaj niueli nikchiua, xok nitepaleui”. ¿Tlenon okichiuj? Tokniuj okichiuili teoyotl Jehová niman okijli nochi tlen kajmanaya. Uajmostla, maski yoajsika ipan Kajli kampa tosentlaliaj, ok notlajtoltiaya tla kinamikiya ompa manemi. Tokniuj akin kiteijlitoya kenon noneki tikintlajpiyaskej kaltin kampa tosentlaliaj okijto ika noneki tokauiliskej matechmachti Jehová, niman ika yejon tlen melak ueyi kijtosnekiya. Jheri kijtoua: “Oniknemili: ‘Yejon kema ueli nikchiua’. Opeuj nichoka pampa onikitak ika Jehová yonechnankilijka. Onikasikamat ika ok ueliskia  itlaj nikchiuas ipampa Jehová niman ika yejua kinekiya nechmachtis”. Jheri noijki kijtoua: “Ninomojtiaya ijkuak onajsik ipan yejon tlanechikojli, san ika, ijkuak oniuajkis, yonikasikamatka ika ok ueliskia nitepaleuis niman aman niuajyolpaktiaya”.

18. ¿Kenon techititia Biblia ika Jehová ok kipatiojkaita tlen tikchiuaj ipan itekiyo maski yotiueuentsintiakej?

¹⁸ Uelis kuajli tikmatstoskej ika Jehová ok techtekitiltis ipan ikalpan maski yotiueuentsintiakej (Sal. 92:12-15). Jesús otechititi ika Jehová kipatiojkaita tlen tikchiuaj ipan itekiyo, maski tejuamej tikitaj ika san achijtsin tikchiuaj (Luc. 21:2-4). Ika yejon, matokojtilikan tikchiuaskej tlen kema tiuelij. Uelis tikinnojnotsaskej oksekimej itech Jehová, uelis tikchiuaskej teoyotl inpampa oksekimej tokniuan niman noijki uelis tikinyolchikauaskej mamelajkanemikan. Maski xmiyek tiuelij tikchiuaj ipan itekiyo, Jehová más kipatiojkaita ika tiknektokej tiktlakamatiskej (1 Cor. 3:5-9).

19. ¿Tlenon techmachtia Romanos 8:38, 39?

¹⁹ Melak tiktlasojkamatij pampa tikueyichiuaj toTajtsin Jehová, akin melauak kinpatiojkaita itekipanojkauan. Jehová otexchijchiuj niman ijkon matikchiuakan tlen yejua kineki, ika yejon, melak tiyolpakij pampa tiktekichiuiliaj (Apoc. 4:11). Kanaj tlaltikpakchanejkej techitaj ika xtitepaleuijkej, san ika, Jehová xijkon techita (Heb. 11:16, 38). Ijkuak melak toyolajmantoskej pampa tikualoj, pampa xtikpiyaj tomin noso pampa yotiueuentsintiakej, matikilnamikikan ika xitlaj uelis “techxelos itech itetlajsojtlalis Dios” (xpoua Romanos 8:38, 39).