1, 2. ¿Tlenon kimijlia iluikaktekitketl sekimej siuamej akin nemiyaj kampa okitokakej Jesús, niman tlenon kimijlia Jesús ijkuak kinnisiuiya?

MATITLANEMILIKAN itech tlen panoua ipan tonajli 16 de nisán itech xiuitl 33. Ijkuak iuajtlanestiaya, sekimej siuamej akin melak noyolkokouaj yauej ne kampa okitokakej Jesús. Yopanoka kanaj se tonajli iuan tlajko ika okitokakej Jesús, niman aman yejuin siuamej ompa yayaj pampa kinekiyaj kitlaliliskej itlalnakayo Jesús “on ajuiyalistli tsakuanki niman aceite”. Ijkuak ajsij kampa okitokakej Jesús, mojkatlachiaj pampa xkinextiaj itlalnakayo. Se iluikaktekitketl kimijlia ika yoyoliujka, niman noijki kimijlia: “Yejua achtoj yas yakatstias para Galilea niman ompa nenkitaskej” (Mat. 28:1-7; Luc. 23:56; 24:10).

² Ijkuak yejon siuamej kitlalkauiyaj “on tlalkontli”, Jesús kinnisiuiya niman kimijlia: “Xuiyan, xkinmachistitij nokniuan para ma uiyan Galilea, niman ompa nechitaskej” (Mat. 28:10). Kema, Jesús kinekiya nosentlalis imiuan inomachtijkauan. Nesi ika kinekiya kimijlis itlaj tlen melak ueyi kijtosneki. ¿Tleka ijkon tikijtouaj? Pampa yejon tlen kachtopa okichiuj sakin ika oyoliuj.

3, 4. ¿Tleka uelis tikijtoskej ika tlen Jesús otlanauati ipan Mateo 28:19, 20 xsan nonekiya kichiuaskiaj apóstoles? (Xkita tlaixkopinajli tlen onka ixpan yejuin revista).

³ (Xpoua Mateo 28:16-20, TNM). * Ijkuak Jesús onosentlali  imiuan inomachtijkauan, okinmakak se tekitl tlen melak nonekiya makichiuakan ipan yejon tonaltin, niman yejon tekitl sa no yejua tlen aman tikchiujtokej. Jesús okimijli: “Xuiyan niman xkinmachtikan tlaltikpakchanejkej ipan nochi kalpamej, [...] xkinmachtikan makitlakamatikan nochi tlajtlamach tlen yonimechnauati”.

⁴ Jesús kineki ika nochimej inomachtijkauan matenojnotsakan, kema, yejuin tekitl xsan okinmakak on 11 apóstoles akin omelajkanenkej. ¿Tleka kuajli tikmatstokej yejuin? Pampa xsan iapóstoles onosentlalijkej ne Galilea ijkuak Jesús okitemakak yejon tlanauatijli. ¿Tikilnamikij tlenon okimijli iluikaktekitketl on siuamej akin nemiyaj kampa okitokakej Jesús? Yejua okimijlika: “Ompa nenkitaskej”. Kema, yejuamej noijki kitaskiaj Jesús ne Galilea. Yejua ika, uelis tikijtoskej ika kanaj yejon siuamej noijki onosentlalijkej ne Galilea. Niman apóstol Pablo kijtoua ika Jesús “san sekan okinnotitij más de makuijli ciento tokniuan” (1 Cor. 15:6). ¿Kanon opanok yejon?

5. ¿Tleka kuajli tikmatstokej ika tlen noteneua ipan 1 Corintios 15:6 opanok ipan tlanechikojli tlen onochiuj ne Galilea?

⁵ Kuajli tikmatstokej ika Pablo kiteneujtoya yejon tlanechikojli tlen onochiuj ne Galilea tlen noteneua ipan Mateo 28. ¿Tleka kuajli tikmatstokej yejon? Kachtopa, pampa miyekej inomachtijkauan Jesús ualeuayaj Galilea. Yejuamej xonakiskiaj tla nosentlaliskiaj ipan se kajli ne Jerusalén. San ika, ipan tepetl tlen onkatka Galilea tlaueyi katka, ika yejon, miyekej ueliskiaj ompa nosentlaliskiaj. Ika ome, Jesús yonosentlalijka imiuan iapóstoles ne Jerusalén sakin ika oyoliuj. Tla Jesús kinekiskia ika san 11 iapóstoles matenojnotsakan niman matemachtikan, san yejuamej kimijliskia ijkuak imiuan onosentlalijka. San ika, xijkon okichiuj, yejua okintlajtlanili iapóstoles niman oksekimej inomachtijkauan tlakamej niman siuamej manosentlalikan ne Galilea (Luc. 24:33, 36).

6. ¿Kenon techititia Mateo 28:20 ika tlen Jesús otlanauati ok nochiujtoskia ipan yejuin tonaltin, niman kenon nesi ika notlakamatstika yejon tlanauatijli?

⁶ Aman matikitakan okse tlemach tlen techititia ika Jesús xsan iapóstoles okinnauati makichiuakan yejon tekitl. Ijkuak Jesús kitemakatoya yejon tlanauatijli, yejua noijki okijto: “Nemouan ninemi hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (Mat. 28:20, TNM). Ijkon ken Jesús okijto, ipan yejuin tonaltin melak miyekej tikinpaleuijtokej manochiuakan inomachtijkauan Cristo. Sejse xiuitl, kanaj 300,000 tlaltikpakchanejkej noapolaktijtokej. Kema, miyekej nochiujtokej iteixpantijkauan Jehová.

7. ¿Tlenon tikitaskej aman, niman tleka?

⁷ Miyekej akin tikinmachtiaj Biblia nopatlaj niman noapolaktiaj. San ika, oksekimej nesi ika xmás kinekij nochiuaskej inomachtijkauan Cristo. Kuelitaj tlen tikimititiaj, san ika, kanaj xnoyolchikauaj noapolaktiskej. Tinochimej akin titemachtiaj Biblia tiknekij ika tonomachtijkauan makichiuakan tlen ueltiuej niman makitekichiuilikan Jehová. Ipan yejuin tlamachtijli, tikitaskej kenon uelis tikinpaleuiskej manopatlakan niman más makitlasojtlakan Jehová. San ika ¿tleka melak noneki matikmatikan yejuin? Pampa kanaj ajsis tonajli ijkuak tiktlapejpeniskej tla ok nonekis tikinmachtijtoskej.

8. ¿Tleka miyekej xuelij kasikamatij ika Jehová kintlasojtla?

⁸ Jehová kineki ika tlaltikpakchanejkej makitekichiuilikan pampa yemelak kitlasojtlaj. Akin tiiteixpantijkauan Jehová tiknekij tikinpaleuiskej makitakan ika Jehová najmana inpampa niman ika melak kintlasojtla. Tiknekij  makimatikan ika Jehová “imintataj on iknomej” niman ika yejua “kinmanauiya on kakaualtsitsimej” (Sal. 68:5). Ijkuak akin tikinmachtiaj Biblia kasikamatij kenon Jehová kintlasojtla, kanaj yejuamej más kitlasojtlaskej Jehová. San ika, sekimej xuelij kasikamatij ika toTajtsin kintlasojtla pampa intaj xkeman okintlasojtlak (2 Tim. 3:1, 3). Kuakon, ijkuak tikinmachtijtoskej, miyekpa matitlajtokan itech ikualneskayouan Jehová. Matikinpaleuikan makasikamatikan ika toTajtsin kineki kinmakas se nemilistli tlen xkeman tlamis niman ika kinektika kinpaleuis makipiyakan yejon nemilistli. ¿Tlenon más uelis tikchiuaskej?

9, 10. ¿Katlejua amoxtin noneki ika titemachtiskej, niman tleka san yejon amoxtin noneki tikintekitiltiskej?

⁹ Matitemachtikan ika amoxtin ¿Tlenon melauak temachtia Biblia? niman Nochipa xnemikan itech itlasojtlalis toTajtsin. Yejuin ome amatlajkuiloltin onoyektlalijkej niman ijkon tikimasikamachiltiskej akin tikinmachtiaj kenon Jehová kintlasojtla. Matitlanemilikan itech yejuin, ipan capítulo 1 itech toamox Temachtia Biblia kinnankilia yejuin tlajtoltilistin:  ¿najmana toTajtsin topampa?, ¿kenon nomachilia toTajtsin ijkuak topan nochiua tlen xkuajli? niman ¿uelis tiknisiuis Jehová? Niman amoxtli Itlasojtlalis toTajtsin kipaleuis akin tikmachtiaj makasikamati ika tla kichiua ken kijtoua Jehová, melak kuajli nemis niman kuajli nouikas iuan Jehová. Maski miyekej yotikinmachtijkej ika yejuin amoxtin, ok noneki kuajli matomachtikan niman ijkon uelis tikijliskej tonomachtijkauj tlen melak kipaleuis.

¹⁰ Aman matikonnemilikan ika akin tikmachtiaj kineki kimatis itlaj tlen uajnestiuj ipan okse toamatlajkuilol. Tla ijkon panoua, uelis tikijliskej ika uelis iselti kiamapouas yejon amatlajkuilojli. Yejon techpaleuis san matikmachtikan ika amoxtin tlen yotikinteneujkej.

11. ¿Kemanon kinamiki matikijlikan tonomachtijkauj ika noneki tikchiuaskej teoyotl ijkuak iuan tomachtiskej, niman tlenon techpaleuis matikijlikan?

¹¹ Matikchiuakan teoyotl achto tipeuaskej titemachtiskej. Tla yakaj yopeuj tikmachtiaj, melak kuajli tla nimantsin tikijliaj ika noneki tikchiuaskej teoyotl achto tipeuaskej tomachtiskej niman ijkuak titlamiskej. Noneki tikasikamachiltiskej ika san uelis tikasikamatiskej iTlajtol toTajtsin tla tiktlajtlanij espíritu santo. Sekimej tokniuan kinpouiliaj inomachtijkauan tlen kijtoua Santiago 1:5, kampa techijlia: “Tla semej nemejuamej xnenkimatij on tlen kuajli nenkichiuaskej, ‘xtlajtlanilikan Dios tlamatkilistli’”. Sakin, kitlajtoltiaj: “¿Kenon uelis tiktlajtlaniliskej toTajtsin ‘tlamatkilistli’?”. Miyekej nimantsin kasikamatij ika noneki nochiuas teoyotl.

12. ¿Kenon Salmo 139:2-4 uelis kipaleuis akin tikmachtiaj makijli Jehová nochi tlen kajmana?

¹² Matikititikan akin tikmachtiaj kenon kichiuas teoyotl. Kuajli matikasikamachiltikan ika Jehová melak kineki kinkakis iteoyouan. Matiktomilikan ika uelis kijlis nochi tlen kajmana niman tlen xakaj kijliskia. Matikilnamiktikan ika Jehová ikimatstika tlenon tikpiyaj ipan toyojlo (xpoua Salmo 139:2-4). Noijki uelis tikyolchikauaskej makitlajtlanili Jehová makipaleui niman ijkon uelis kipatlas inemilis niman kikajkauas tlen toTajtsin xkuelita. Matikonnemilikan ika akin tikmachtiaj kuelita se iluitl tlen Jehová kitlauelita. Maski kimatstika ika xkuajli, melak kuelita seki tlemach tlen ompa nochiua. Kuakon, uelis tikyolchikauaskej makijli Jehová tlen kimachilia niman makitlajtlanili makipaleui makitlauelita “on tlen xkuajli” (Sal. 97:10).

13. a) ¿Tleka noneki matiknotsakan akin tikmachtiaj mauiya tlanechikoltin? b) ¿Tlenon uelis tikchiuaskej niman ijkon kuajli manomachili akin tikmachtiaj ijkuak yas tlanechikojli?

¹³ Matiknotsakan akin tikmachtiaj mauiya tlanechikoltin. ¿Tleka? Pampa melak kipaleuis tlen kikakis niman tlen kitas ipan tlanechikoltin. Kichiuas machikaui itlaneltokil niman makitlasojtla Jehová. Yejua ika, matikititikan video ¿Tlenon nochiua kampa tosentlaliaj? niman matiknotsakan mauiya ipan totlanechikol. Tla tiuelij, matikijlikan ika uelis tikonanaskej. Ijkuak tikonmachtiskej, melak kuajli tla tikinuikaj tlatlamantikej tokniuan, ijkon kimixmatstias akin nemij ipan totlanechikol. Yejuin kipaleuis kuajli manomachili ijkuak yas tlanechikojli.

14. ¿Tlenon kichiuas akin tikmachtiaj ijkuak peuas kitlasojtlas Jehová?

¹⁴ Tiknekij ika akin tikmachtiaj Biblia machikaui itlaneltokil (Efes. 4:13). Ijkuak yakaj peua touan nomachtia, kanaj san kineki kitas kenon Biblia uelis kipaleuis ipan inemilis. San ika, ijkuak más kitlasojtlatias Jehová, peuas kinemilis kenon uelis kinpaleuis oksekimej, ken tokniuan akin nemij ipan totlanechikol (Mat. 22:37-39). Noneki tikitaskej kemanon uelis tikijliskej ika tinochimej akin tiktekichiuiliaj Jehová tikuelitaj  tiktemakaskej totomintsin niman ijkon tikpaleuiskej ikalpan Jehová.

15. ¿Kenon uelis tikititiskej akin tikmachtiaj kenon kinyektlalis tlaueltin?

¹⁵ Matikititikan akin tikmachtiaj kenon kinyektlalis tlaueltin. Matikonnemilikan ika se tonomachtijkauj, akin yopeuj tenojnotsa, techijlia ika se tokniuj okiyolkoko. ¿Tlenon tikchiuaskej? Xtikijliskej akinon kipiya tlajtlakojli, yej tikititiskej tlenon kijtoua Biblia makichiua. Uelis tikijliskej ika uelis kitlapopoluis tokniuj noso, tla xueli kilkaua tlen opanok, uelis iuan tlajtos niman ijkon oksejpa kuajli nouikaskej (uelis tikitas Mateo 18:15). Matikpaleuikan makiyektlali tlenon uelis kijtos. Matikititikan kenon kikuis aplicación JW Library^®, amatlajkuilojli Tlen kinpaleuiya ika nomachtiaj iteixpantijkauan Jehová niman jw.org^®. Yejuin kipaleuis makinyektlali tlaueltin. Tla desde aman kimati tlenon kichiuas ijkuak kipiyas tlauejli, más kuajli nouikas imiuan tokniuan.

16. ¿Tlenon panos tla tikimijliaj oksekimej tokniuan touan mauiyan ijkuak tikonitaskej akin tikmachtiaj?

¹⁶ Matikimijlikan oksekimej tokniuan niman tlayekanketl ipan circuito touan mauiyan ijkuak tikonitaskej akin tikmachtiaj. ¿Tleka? ijkon ken otikitakej ipan párrafo 13, yejon melak kipaleuis akin tikmachtiaj. Noijki, kanaj oksekimej tokniuan melak kuajli kipaleuiskej xijkon ken tejuamej. Matikonnemilikan ika akin tikmachtiaj miyekpa yokiyejyeko xok pokis, san ika, xueli kikajkaua. Tla ijkon panoua, kuajli yes tla tikuikaj se tokniuj akin noijki okixnamik yejon. Kanaj yejua uelis kijlis tlen melak kipaleuis. Tla tomojtiaj titemachtiskej pampa touan yauj se tokniuj akin melak kuajli tlamachtia, matiktlajtlanilikan yejua makiyekana tlamachtijli. Maski san kenon, kuajli matikmatstokan ika tokniuan melak kipaleuiskej akin tikmachtiaj. Matikilnamikikan ika tiknekij ika tonomachtijkauj machikaui itlaneltokil.

17, 18. ¿Tlenon techpaleuis matikitakan tla nonekis tikijliskej akin tikmachtiaj ika xok tikmachtiskej?

¹⁷ Tla akin tikmachtiaj xnokojtilia nopatlas, nonekis tiknemiliskej tla ok tikonmachtiskej. ¿Tlenon techpaleuis matikmatikan tlenon tikchiuaskej? Kachtopa, noneki tikitaskej kech ueli kichiua. Sekimej melak ouijtika kitaj nopatlaskej xijkon ken oksekimej. Kuakon matotlajtoltikan: “¿Nesi ika nopatlatiuj maski kixnamiki tlen ouijtika? ¿Nokojtilia kichiuas tlen youel?” (Mat. 28:20). Kanaj akin tikmachtiaj xnimantsin nopatlas, san ika, noneki nesis ipan inemilis ika kichiujtika tlen ueltiuj.

¹⁸ Aman, ¿tlenon tikchiuaskej tla tikitaj ika akin tikmachtiaj xmás kipatiojkaita ika tikmachtiaj Biblia noso nion xkuelita nomachtis? Matiknemilikan ika yotikmachtijkej ika amoxtli Temachtia Biblia, niman kanaj yopeuj tikmachtiaj ika amoxtli Itlasojtlalis toTajtsin, san ika, xkeman yauj ipan se tlanechikojli nion ijkuak noilnamiki imikilis Cristo. Noijki, kanaj  miyekpa xueli iuan tomachtiaj pampa techijlia ika kichiuas okseki tlemach tlen xueyi kijtosneki. Tla ijkon panoua, nonekis iuan titlajtoskej. *

19. ¿Tlenon uelis tikijliskej akin tikmachtiaj tla tikitaj ika xkipatiojkaita ika tikmachtijtokej Biblia, niman kenon uelis tikmatiskej tla ok nonekis tikmachtiskej?

¹⁹ Kanaj uelis ijkin tikijliskej akin tikmachtiaj: “¿Tlenon tikita mitstsakuilia maka xmochiua iteixpantijkauj Jehová?”. Matikonnemilikan ika ijkin technankilia: “Nikuelita ninomachtis Biblia, san ika, xkeman ninochiuas iteixpantijkauj Jehová”. Tla ijkon techijlia maski youejkauj ika tikmachtiaj, kuakon, nonekis kuajli tiknemiliskej tla ok tikmachtiskej. Aman, matiknemilikan ika yejua nimantsin techijlia tlenon kitsakuilia maka makichiua tlen ueltiuj. Kanaj kinemilia ika xkeman uelis tenojnotsas techajchan. Tla tikasikamatij kenon nomachilia akin tikmachtiaj, uelis tikmatiskej kenon tikpaleuiskej.

20. ¿Kenon techpaleuiya Hechos 13:48 matikmatikan tla ok nonekis tikmachtiskej tonomachtijkauj?

²⁰ Teajman ika miyekej akin tikinmachtiaj Biblia tlanemiliaj ken israelitas akin onenkej ipan itonaluan Ezequiel. Jehová okijli ika israelitas kuelkakiyaj tlen kijtouaya Ezequiel. Itlajtoluan katkaj kentla se kualtsin tlakuikajli tlen tlajtoua itech tlasojtlalistli niman tlen kitlakuika akin melak kualtsin nokuikatia. San ika, Jehová noijki okijli ika maski miyekej kikakiskiaj itlajtoluan, xakaj kichiuaskia tlen kimijliskia (Ezeq. 33:32, TNM). Kanaj ouijtika tikitaskej tikijliskej yakaj ika xok tikmachtiskej. San ika, matikilnamikikan ika “xok tikpiyaj miyek tiempo” (1 Cor. 7:29). Yejua ika, kuajli tla xok tikmachtiaj akin xkineki nopatlas, más kuajli tla tikmachtiaj akin yemelak kiteititia ika kineki kipiyas se nemilistli tlen xkeman tlamis (xpoua Hechos 13:48, TNM). *

21. ¿Katlejua texto del año ipan 2020, niman kenon techpaleuis?

²¹ Ipan nochi xiuitl 2020, texto del año techpaleuis kuajli matikchiuakan yejon tekitl tlen otechmakakej. Tiknekij tikinpaleuiskej tlaltikpakchanejkej manochiuakan inomachtijkauan Cristo. Nochipa matikilnamikikan tlen okijto Jesús ipan se tepetl ne Galilea, yejua okijto: “Xuiyan [..,] xkinmachtikan tlaltikpakchanejkej niman xkinapolaktikan” (Mat. 28:19, TNM).