1. ¿Tlenon kuajli kichiuas mapano tlaxtlauijli?

IPAMPA tlaxtlauijli, imikilis Jesucristo, uelis tikseliskej miyek tlateochiualistin. Se neskayotl, tlaxtlauijli, kichiua ika ikoneuan Adán akin kitlasojtlaj tlen melajki uelis nochiuaskej ichanejkauan toTajtsin se tonajli. Okse tlateochiualistli tlen temaka ika uelis tinemiskej nochipa ika pakilistli. Niman xsan yejon, tlaxtlauijli tlapaleuiya itech tlemach tlen melak ueyi kijtosneki ipan iluikak niman ipan tlaltikpaktli (Hebreos 1:8, 9).

2. a) ¿Tlenon melak ueyi kijtosneki itech iluikak niman itech tlaltikpaktli tlen Jesús okiteneuj ipan teoyotl? (Xkita tlaixkopinajli kampa peua tlen tomachtijtokej). b) ¿Tlenon tikitaskej ipan yejuin tlamachtijli?

² Ijkuak poliuiya ome xiuitl ika mikiskia Jesús, yejua okimititi inomachtijkauan kenon kichiuaskej teoyotl ika yejuin tlajtoltin: “ToTajtsin akin tinemi ne iluikak, machipaui motoka. Mauajla motekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak” (Mateo 6:9, 10, TNM). Ipan yejuin tlamachtijli tikitaskej kenon tlaxtlauijli noteneua iuan manochipaua itoka Jehová, iTekiuajyo toTajtsin niman manochiua tlen kineki toTajtsin .

3. a) ¿Tlenon kineskayotia itokayo toTajtsin? b) ¿Kenon Satanás okitsokuilo itokayo Jehová?

³ Kachtopa tlen Jesús okitlajtlan ipan teoyotl okijto manochipaua itokayo toTajtsin. Itokayo Jehová kineskayotia akinon niman kenon yejua. San yejua kipiya ueyi chikaualistli niman melajkayotl. Jesús okitokayoti “NoyekTajtsin” (Juan 17:11). Pampa Jehová yejua chipauak, nochi tlen kichiua niman nochi itlanauatiluan tlen kitlalia chipauak. San ika, ipan xochitlalpan Edén, Satanás oteasijkamachilti ika xkinamiki ken kinmaka tlanauatiltin tlaltikpakchanejkej. Yejua okijto tlen xmelauak itech Jehová niman okitsokuilo itokayo toTajtsin noso kenon yejua (Génesis 3:1-5).

4. ¿Kenon Jesús okichipauj itokayo toTajtsin?

⁴ Jesús okitlasojtlak itokayo toTajtsin ika nochi iyojlo niman okichiuj nochi tlen ouel niman ijkon manochipaua itokayo (Juan 17:25, 26). ¿Kenon okichipauj? Ika tlen okichiuj niman tlen ika otemachti. Ijkon Jesús okinpaleui oksekimej makitakan ika itlanauatiluan Jehová melaktikej niman nochi tlen toTajtsin techtlajtlanilia kichiua pampa kineki kuajli matinemikan (xpoua Salmo 40:9, 10). * Jesús yejua xkeman okikauj toTajtsin maski Satanás okichiuj matlajyoui niman mamiki. Yejua okiteititi ika se tlakatl akin xtlajtlakole uelis kitlakamatis Jehová nochipa.

5. ¿Kenon uelis tikchiuaskej manochipaua itokayo Jehová?

⁵ ¿Kenon uelis tikteititiskej ika tiktlasojtlaj itokayo Jehová? Ika tlen tikchiuaj. Jehová kineki ika matichipaujkej (xpoua 1 Pedro 1:15, 16). Yejuin kijtosneki ika san yejua tikueyichiuaskej niman san yejua tiktlakamatiskej ika nochi toyojlo. Maski ijkuak techtlaueltokaj, tiknekij tochikauaskej tinemiskej ken Jehová techmachtia. Ijkuak tinemij ken kijtoua itlanauatiluan Jehová, tikueyichiuaj itokayo (Mateo 5:14-16). Tikteititiaj ika itlanauatiluan tepaleuiyaj niman ika Satanás se tekajkayaujketl. Pampa titlajtlakolejkej, uelis topopoloskej. San ika, ijkuak ijkon topan nochiuas, toyolkuepaskej niman tokojtiliskej ika xok tikchiuaskej tlen kitsokuiloua itokayo Jehová (Salmo 79:9).

6. ¿Tleka uelis Jehová techitas melajkej maski titlajtlakolejkej?

⁶ Jehová kintlapopoluiya nochimej intlajtlakoluan, tlapejpeniltin noso akin teuan itech “oksekimej borregos”, tla tlaneltokaj itech tlaxtlauijli. Yejua kiselia makiueyichiuakan akin nosentemakaj itech. Yejua kimita akin tlapejpeniltin ken ikoneuan yolmelaujkej. Akin kichiaj nemiskej ipan tlaltikpaktli noijki kimita yolmelaujkej niman uelis iuan nouikaskej (Juan 10:16; Romanos 5:1, 2; Santiago 2:21-25). Ika yejon, aman tlaxtlauijli kichiua kuajli matouikakan iuan toTajtsin niman manochipaua itoka.

7. ¿Tlenon tlateochiualistin uelis onias ipampa tlaxtlauijli?

⁷ Ipan teoyotl Jesús okijto: “Mauajla motekiuajyo”. ¿Kenon tlaxtlauijli iuan noteneua iTekiuajyo toTajtsin? Itech yejuin Tekiuajyotl nopouaj Jesús niman 144,000 akin okintlapejpenijkej itech tlaltikpakchanejkej. Tlaxtlauijli kichiua ika yejon tlaltikpakchanejkej mayoliuikan ipan iluikak (Apocalipsis 5:9, 10; 14:1). Yejuamej nochiuaskej tekiuajkej niman teopixkej, niman tlanauatiskej iuan Jesús ipan tlaltikpaktli ipan mil xiuitl. Ipan yejon mil xiuitl, Jehová kikuis Tekiuajyotl ika kichiuas  tlaltikpaktli se xochitlalpan niman ika kinpaleuis tlaltikpakchanejkej maka ok makipiyakan tlajtlakojli. Itekipanojkauan Jehová ipan iluikak niman ipan tlaltikpaktli nochiuaskej san se familia (Apocalipsis 5:13; 20:6). Jesús kipopolos Satanás niman kipopolos nochi tlaueltin tlen yokichiuj maonia (Génesis 3:15).

8. a) ¿Kenon Jesús okinpaleui inomachtijkauan makasikamatikan ika iTekiuajyo toTajtsin melak ueyi kijtosneki? b) ¿Kenon tikpaleuiyaj Tekiuajyotl ipan yejuin tonajli?

⁸ Jesús okinpaleui inomachtijkauan makasikamatikan ika melak ueyi kijtosneki iTekiuajyo toTajtsin. ¿Kenon? Sakin ijkuak yonoapolaktijka, nimantsin opeuj tenojnotsa “kuajli tlajtoltin itech itekiuajyo toTajtsin” nochiuiyan kampa yaya (Lucas 4:43, TNM). Noijki okimijli inomachtijkauan ika nochiuaskiaj iteixpantijkauan “nochiuiyan ipan in tlaltikpaktli” (Hechos 1:6-8). Ipan yejuin tonajli, ipampa tenojnotsalistli itech Tekiuajyotl, tlaltikpakchanejkej uelis nomachtiskej itech tlaxtlauijli niman uelis ika nopaleuiskej iTekiuajyo toTajtsin. Tejuamej tikteititiaj ika tinemij itech Tekiuajyotl ijkuak tikinpaleuiyaj tlapejpeniltin matenojnotsakan kuajli tlajtoltin ipan nochi tlaltikpaktli (Mateo 24:14; 25:40).

9. ¿Tleka uelis kuajli tikmatstoskej ika Jehová yemelak kichiuas tlen yokijto ipampa tlaltikpakchanejkej?

⁹ ¿Tlenon okijtosnek Jesús ika yejuin tlajtoltin: “Manochiua [...] tlen tejua tikneki”? Ijkuak Jehová kijtoua itlaj nochiuas, ijkon nochiua (Isaías 55:11). Ijkuak Satanás okixnamik Jehová, xouel okitelti. ¿Tlenon kinekiya Jehová kichiuas ika tlaltikpaktli? Yejua kinekiya ika tlaltikpaktli matemi ika ikoneuan Adán niman Eva akin xkipiyaskiaj tlajtlakojli (Génesis 1:28). Tla Adán niman Eva mikiskiaj ijkuak ok xkinpiayaj inkoneuan, xueliskia nochiuas tlen toTajtsin kinekiya ika tlaltikpaktli. Kuakon Jehová okinkauili makinpiyakan inkoneuan. Ika tlaxtlauijli nochimej akin kiteititiskej tlaneltokijli uelis xok tlajtlakolejkej yeskej niman nemiskej nochipa. Jehová kintlasojtla tlaltikpakchanejkej niman kineki ika tejuamej matikpiyakan se kualtsin nemilistli.

10. ¿Kenon tlaxtlauijli kinpaleuiya tlaltikpakchanejkej akin yomijkej?

¹⁰ ¿Tlenon panos ika melak miyekej tlaltikpakchanejkej akin omijkej niman xouel okixmatkej Jehová? ToTajtsin kineki manemikan. Kuakon yejua kichiuas ika oksejpa uajnemiskej akin yomijkej. Tlaxtlauijli kichiua ika oksejpa makipiyakan nemilistli. Ijkon yejuamej uelis nomachtiskej itech Jehová niman nemiskej nochipa (Hechos 24:15). Jehová akin itech ualeua nemilistli. Ijkuak Jehová oksejpa kinmakas nemilistli akin yomijkej, yejua nochiuas ken inTaj (Salmo 36:9). Ipan teoyotl tlen Jesús okichiuj, okijto ika Jehová yejua “toTajtsin” akin nemi ne iluikak (Mateo 6:9). Jehová yokimakak Jesús se ueyi tekitl itech yoliuilistli. Jesús okijto: “Nejua nikinyoliuitia on yejuan mimikej niman nikinmaka nemilistli oksejpa” (Juan 6:40, 44; 11:25).

11. ¿Tlenon yokijto toTajtsin kichiuas ipampa “sanoyej miyek tlakatl”?

¹¹ Jesús noijki okijto: “Nochi akin kichiuas on tlen Dios kineki, yejua nokniu tlakatl, noso nokniu siuatl, niman yejua nonan” (Marcos 3:35). ToTajtsin kineki ika makiueyichiuakan nochimej tlaltikpakchanejkej, itech nochi raza niman tlajtoltin. Yejuamej noteneuaj ken “sanoyej miyek tlakatl ijkak, niman xakaj ueliya kimpouaya”. Yejuamej kipiyaj tlaneltokijli itech tlaxtlauijli niman kinekij kitlakamatiskej toTajtsin. Yejuamej noijki kiueyichiuaj niman kijtouaj: “Totemakixtilis tikseliaj itech toDios yejuan yeuatikaj ipan iueyixtikaj trono niman itech on Borreguito” (Apocalipsis 7:9, 10).

12. Ipan teoyotl tlen Jesús okichiuj, ¿tlenon tomachtiaj itech tlen Jehová kineki ipampa tlaltikpakchanejkej?

 ¹² Yotomachtijkej miyek itech Jehová niman tlen yokijto kichiuas ipampa tlaltikpakchanejkej ipan teoyotl tlen Jesús okichiuj. Kachtopa, tinochimej noneki tikchiuaskej nochi tlen tiueliskej niman ijkon tikchipauaskej itokayo Jehová niman tikueyiteneuaskej (Isaías 8:13). Inemilis Jesús, tlen kichiua maueli matimakisakan, noijki kiueyiteneua itokayo toTajtsin. San xkonemili, itoka Jesús kijtosneki “Jehová toTemakixtijkauj”. Ika ome, Jehová kikuis iTekiuajyo ika kuajkuis nochi tlen techpaleuis ipampa tlaxtlauijli akin tiktlakamatij. Niman ika yeyi, kuajli tikmatstokej ika xtlaj uelis kiteltis tlen Jehová kineki kichiuas (Salmo 135:6; Isaías 46:9, 10).

13. ¿Tleka noneki timoapolaktis?

¹³ Se ken kuajli tikteititiaj ika tiktlasojkamatij tlaxtlauijli ijkuak tosentemakaj itech Jehová niman toapolaktiaj. Ijkuak tikchiuaj yejuin, tikteititiaj ika titlaneltokaj itech tlaxtlauijli niman ika “titeyaxkauan itech” Jehová (Romanos 14:8). Ijkuak toapolaktiaj, tiktlajtlaniliaj Jehová matechmaka totlamachilis tlen “xtechtlajtlakolmakas” (1 Pedro 3:21). Jehová technankilia ijkuak kichiua ika matechpaleui tlaxtlauijli. Noijki kuajli tikmatstokej ika yejua techmakas nochi tlen yotechijli (Romanos 8:32).

14. ¿Tleka Jehová technauatia matotlasojtlakan?

¹⁴ Jehová nochi kichiua ipampa iueyi tlasojtlalis. Yejua kineki ika akin kiueyichiuaj makixkopinakan niman manotlasojtlakan se iuan okse (1 Juan 4:8-11). Ijkuak tikintlasojtlaj tlaltikpakchanejkej, kuajli tikteititiaj ika tiknekij tochiuaskej “[ti]tekoneuan itech on [to]Tajtsin iluikak chanej” (Mateo 5:43-48). Itech ome tlanauatiltin tlen uejueyimej, kachtopa tiktlasojtlas Jehová niman ika ome tikintlasojtlas oksekimej (Mateo 22:37-40). Se ken tikteititiaj ika tikintlasojtlaj tlaltikpakchanejkej ijkuak tikinmachtiaj kuajli tlajtoltin itech iTekiuajyo toTajtsin. Tla tiktlakamatij itlanauatil Jehová ika tikintlasojtlaskej oksekimej, niman tokniuan akin melak noneki, “titetlajsojtlaskej ken Dios kineki” (1 Juan 4:12, 20).

15. a) ¿Tlenon tlateochiualistin tikseliaj aman itech Jehová? b) ¿Tlenon tlateochiualistin tikseliskej ika tlayekapan?

¹⁵ Jehová kichiua kuajli matikmatikan ika pampa tikpiyaj totlaneltokil itech tlaxtlauijli, totlajtlakoluan “popoliuis[kej]”. Yejua yemelak kintlapopoluis totlajtlakoluan (xpoua Hechos 3:19-21). Ijkon ken yotomachtijkej, tlaxtlauijli kichiua ika Jehová makinseli sekimej tlaltikpakchanejkej manochiuakan ikoneuan ipan iluikak. Yejuamej tlapejpeniltin (Romanos 8:15-17). Yejua noijki kinnotsa akin nopouaj itech “oksekimej borregos” manochiuakan ichanejkauan ipan tlaltikpaktli. Sakin, ijkuak tlaltikpakchanejkej xok tlajtlakolejkej, kintlatlataskej sa sejpa. Tla xtijkauaj Jehová, noijki techselis ken ikoneuan (Romanos 8:20, 21, TNM; Apocalipsis 20:7-9). Jehová nochipa kintlasojtlas nochimej ikoneuan. Tlaxtlauijli nochipa kichiua matikselikan tlateochiualistin (Hebreos 9:12). Jehová yotechmakak yejuin tetlayokolijli niman xakaj uelis techkixtilis.

16. ¿Kenon tlaxtlauijli techpaleuiya matimakisakan?

¹⁶ Tla toyolkuepaj itech totlajtlakoluan, Satanás xuelis techteltis ika sakin matochiuakan ichanejkauan Jehová. Jesús omik “san sejpa niman para nochipa”. Tlaxtlauijli san sejpa onotemakak (Hebreos 9:24-26). Adán otechpanoltili mikilistli, san ika, imikilis Jesús techmaka nemilistli tlen xkeman tlamis. Tlaxtlauijli uelis techmakixtis itech tlen Satanás kiyekana niman itech mikilistli (Hebreos 2:14, 15).

17. ¿Kenon timomachilia tejua ipampa itlasojtlalis Jehová?

¹⁷ Tlen techijlia toTajtsin nochipa nochiua. Ijkon ken tlanauatiltin tlen Jehová okintlali itech tlen okichijchiuj xkeman nopatlaj, Jehová xkeman nopatla. Yejua nochipa kichiuas tlen yotechijli (Malaquías 3:6). Jehová xsan techmaka nemilistli ken se tetlayokolijli. Yejua techmaka itlasojtlalis. “Tikmatij niman tikneltokaj ika Dios techtlajsojtla. Dios sa no yejua tetlajsojtlalistli” (1 Juan 4:16). Tlen techijlia kichiuas nochipa melauak nochiua. Sa achijtsin poliui, tlaltikpaktli nochiuas se xochitlalpan. Nochimej akin nemiskej kixkopinaskej toTajtsin niman notlasojtlaskej se iuan okse. Kuakon nochimej itekipanojkauan ipan iluikak niman ipan tlaltikpaktli kijtoskej: “Ma toDios kiseli aman niman para nochipa on yekteneualistli, on ueyilistli, on tlamatkilistli, on tetlajsojkamachilistli, on tetlakaitalistli, on poder niman on chikaualistli. Ma ijki nochiua” (Apocalipsis 7:12).