Tla yejuin melauak yeskia, matiknemilikan kenon techijtlakoskia ipan tonemilis. Se neskayotl, ikoneuj se tokniuj san yejua onomikti. Tajtli melak noyolkokoua itech tlen opanok. Yejua notlajtoltia tla Jehová ikimatiya yejuin niman okinemili ika yejua niman isiuauj ueliskiaj kixikoskej yejuin tlen melak teyolkoko. Ipan yejuin tonaltin, timiyekej tikixnamikij tlen teyolkoko. Kuakon, ¿uelis tiknemiliskej ika Jehová kinemilia nochi tlemach tlen nochiua ipan tonemilis?

Tla tikitaj 1 Corintios 10:13, tikitaskej ika Biblia xtemachtia ika Jehová kita tlenon uelis tikxikoskej niman sakin kitlapejpenia tlen tlatlatalistin tikixnamikiskej. Matikitakan naui tlemach itech tleka tikijtouaj yejuin.

Kachtopa, pampa Jehová okinchijchiuj tlaltikpakchanejkej mauelikan kitlapejpeniskej tlen kichiuaskej. Yejua kineki ika tejuamej matiktlapejpenikan tlenon tikchiuaskej (Deuteronomio 30:19, 20; Josué 24:15). Tla tiktlapejpeniaj tlen kuelita Jehová, uelis titlaneltokaskej ika yejua techyekanas (Proverbios 16:9). San ika, tla xkuajli tiktlapejpeniaj tlen tikchiuaskej, nonekis tikixnamikiskej seki tlajyouilistli (Gálatas 6:7). Tla Jehová kitlapejpenia tlatlatalistin tlen tikixnamikiskej, ¿yemelak tiueliskiaj tiktlapejpeniskej tlen tikchiuaskej?

Ika ome, pampa Jehová xtechmakixtia itech tlen xtikchiaj mapano (Eclesiastés 9:11). Yakaj uelis itlaj xkuajli ipan nochiuas san pampa nemis kampa xkinamiki niman ijkuak xnoneki. Jesús otlajto itech tlen xkuajli opanok ijkuak omijkej 18 tlaltikpakchanejkej pampa inpan ouets se torre. Yejua kuajli okijto ika toTajtsin xokichiuj ika mamikikan yejon tlaltikpakchanejkej (Lucas 13:1-5, TNM). Xkinamiki tiknemiliskej ika toTajtsin kitlapejpenia akinon nemis noso akinon mikis ijkuak panoua itlaj tlen xkuajli.

Ika yeyi, pampa tinochimej noneki tikteititiskej ika tiknekij tinemiskej itech Jehová. Satanás okijto ika san tiktekichiuiliaj Jehová ipampa tlen techmaka. Noijki okijto ika xtinemiskej itech Jehová tla tikixnamikij tlatlatalistin (Job 1:9-11; 2:4; Apocalipsis 12:10). Tla Jehová techmakixtiskia itech seki tlatlatalistin, ueliskia nesis ika Satanás melauak tlen kijtoua.

Ika naui, pampa Jehová kitlapejpenia xkimatis nochi tlen topan nochiuas ika tlayekapan. Kema, tla yejua kinekiskia, uelis kimatis tlenon panos (Isaías 46:10). San ika, ipan Biblia nesi ika onka tlen Jehová xkineki kimatis tlen panos (Génesis 18:20, 21; 22:12). ¿Tleka? Pampa tetlasojtlani niman yolmelajki. Yejua kineki ika tejuamej matiktlapejpenikan tlenon tikchiuaskej (Deuteronomio 32:4; 2 Corintios 3:17).

Kuakon, ¿tlenon okijtosnek Pablo ijkuak okijto ika Jehová “mechpaleuis para on tetlatlatalistin ma ka nemopan uajlakan yejuan sanoyej temojtij yejuan nemejuamej xuelis nenkixikoskej”? Nikan, Pablo tlajtouaya itech tlen Jehová kichiua ijkuak tikixnamiktokej tlatlatalistli, niman xtlajtouaya kachtopa tikixnamikiskej * (xkita nota). Tla titlaneltokaj itech Jehová, yejua techpaleuis maski san katlejua tlatlatalistli tikixnamikiskej ipan tonemilis (Salmo 55:22). Aman matikitakan ome tlemach itech tleka Pablo okijto yejuin.

Kachtopa, pampa tlatlatalistin tlen tikixnamikiskej “sa no ijki on tetlatlatalistin yejuan oksekimej tlaltikpaktlakamej kimpiaj”. Pampa tinemij kampa Satanás tlayekana, tikixnamikiskej nochi tlajyouilistin, kanaj hasta itlaj tlen melak teyolkoko. San ika, tla titlaneltokaj itech Jehová, uelis tikxikoskej yejon tlatlatalistin niman xkeman tijkauaskej  toTajtsin (1 Pedro 5:8, 9). Tlen ika peua 1 Corintios tlaxelojli ueyi 10, Pablo okijkuilo itech seki tlatlatalistin tlen israelitas okixnamijkej ipan tlaluaktli (1 Corintios 10:6-11). Akin otlaneltokakej itech Jehová ouel okixikojkej yejon tlatlatalistin. San ika, sekimej israelitas xokitlakamatkej Jehová. Yejuamej okikaujkej toTajtsin pampa xotlaneltokakej itech.

Ika ome, pampa “Dios yolmelajki”. ¿Tlenon kijtosneki yejuin? Ijkuak tikitaj kenon Jehová yokinpaleui itekipanojkauan, tikitaj ika yejua kinpaleuiya akin kitlasojtlaj niman kitlakamatij itlanauatiluan (Deuteronomio 7:9). Yejuin techmachtia ika Jehová nochipa kichiua tlen kijtoua (Josué 23:14). Kuakon, uelis kuajli tikmatstoskej ome tlemach. Se, ika Jehová xkikauilis ika se tlatlatalistli manochiua melak ouijtika tlen kichiuas maka matikxikokan. Ome, yejua “[tech]makas se ojtli kampaka uelis [tik]tlalkauiskej” tlatlatalistin.

¿Kenon Jehová “[kin]makas se ojtli kampaka uelis [ki]tlalkauiskej” tlatlatalistin akin itech tlaneltokaj? Kema, yejua uelis techkixtilis se tlatlatalistli. San ika, matikilnamikikan ika Pablo okijto ika Jehová “mechmakas se ojtli kampaka uelis nenkitlalkauiskej on tetlatlatalistli, niman ijki uelis nenkixikoskej”. Kuakon Jehová miyekpa kichiua ika matikpiyakan chikaualistli niman ijkon xtijkauaskej. Aman matikitakan seki kenon kichiua yejuin.

• Jehová “techyoltlalia ipan nochi on tlin techpajsoloua” (2 Corintios 1:3, 4). Yejua uelis kichiuas matikpiyakan yolseuilistli niman kuajli matomachilikan ika Biblia, iespíritu santo niman “tekitketl” yolmelauak (Mateo 24:45; Juan 14:16; Romanos 15:4).

• Jehová uelis kikuis iespíritu santo ika techyekanas (Juan 14:26). Iespíritu santo toTajtsin uelis techpaleuis matikilnamikikan tlen ijkuiliujtok ipan Biblia niman tlajtolyekanalistin. Ika yejon, tejuamej uelis kuajli tiktlapejpeniskej tlen tikchiuaskej.

• Jehová uelis kintekitiltis iiluikaktekitkauan ika techpaleuis (Hebreos 1:14).

• Jehová uelis kintekitiltis tokniuan ika techpaleuis. Yejuamej uelis techyolchikauaskej ika tlen kichiuaj niman tlen kijtouaj (Colosenses 4:11).

Kuakon, ¿tlenon tomachtiaj itech itlajtoluan Pablo tlen tiknextiaj ipan 1 Corintios 10:13? Jehová xkitlapejpenia tlenon tlatlatalistin tikixnamikiskej. San ika, uelis kuajli tikmatstoskej ika tla titlaneltokaj itech Jehová, uelis tikxikoskej san katlejua tlatlatalistli. Tikmatij ika Jehová nochipa techpaleuis niman ijkon xkeman tijkauaskej.