Ijkuak xok niometlamatiya niman opeuj nitlapaleuiya ken precursor, opeuj nikinselia miyek tlateochiualistin tlen xkeman niknemiliaya nikinseliskia (Efes. 3:20). ¿Tlenon opanok? Manimechijli kenon nochi opeuj.

Oninemiko Berlín (Alemania) ipan 1939, yopanoka seki metstin ika yopeujka ika okpa Guerra ipan nochi tlaltikpaktli. Ijkuak itlantoya yejon guerra ipan 1945, okomintitlankej aviones niman ijkon makintlajkalitij bombas ne Berlín. Seki bombas ouetsitoj nisiuj kampa tichantiyaj. Nochanejkauan niman nejua ouel otajsikej kampa xtlaj ueliskia topan nochiuas. Niman pampa tiknekiyaj tinemiskiaj ika toyojlo, otiajkej Erfurt, kampa nonan onemikoya.

Nonan melak kitejtemouaya tlen melauak. Okinpouj tlen okijkuilojkej filósofos niman oyaj ipan seki teopantin, san ika, xitlaj okuelitak. Kanaj ipan 1948, omemej iteixpantijkauan Jehová otechtlajpalotoj. Nonan okinpanolti niman miyek okintlajtolti. Maski nion xpanouaya se hora, yejua otechijli nejua niman nokniuj siuatl akin más pitentsin: “Yoniknexti tlen melauak”. Kuakon, opeuj tiauej tlanechikoltin ne Erfurt.

Ipan 1950, otokuepkej Berlín niman opeuj tiauej ipan tlanechikojli Berlín-Kreuzberg. Ijkuak oksekan otichantitoj, otiajkej ipan tlanechikojli Berlín-Tempelhof. Sakin, nonan onoapolakti. San ika, nejua xnikmatiya tla ninoapolaktis. ¿Tleka?

Xmás kuajli niktekichiuiliaya Jehová pampa melak nipinauiya. Maski nontenojnotsaya, ome xiuitl xoniknek yakaj niknojnotsas. Nochi onopatlak ijkuak opeuj ninosentlalia imiuan tokniuan akin okiteititijkaj ika yolchikaujkej niman ika melajkanemiyaj itech Jehová. Sekimej yonenkaj ipan campos de concentración nazis noso yokintsajkaj ne Alemania oriental. Oksekimej ueliskiaj kintsakuaskiaj pampa san ichtaka kinkalakiayaj amatlajkuiloltin Alemania oriental. Melak onechtlanemililti tlen okichiujkej. Tokniuan melak miyek okichiujkej ipampa Jehová niman inpampa tokniuan maski ueliskiaj kinmiktiskiaj noso ueliskiaj kintsakuaskiaj.  Ika yejon, oniknemili ika nejua nonekiya ninokojtilis maka sa nipijpinauis.

Opeuj xok más nipinaui ijkuak ikalpan toTajtsin otechijli ika ipan 1955 melak chikauak titenojnotsaskiaj. Ipan se carta tlen okis ipan amatlajkuilojli itoka Informador, * tokniuj Nathan Knorr okijto ika yejuin tlen kinekiya kichiuas ikalpan toTajtsin katka se ueyi tekitl tlen xkeman nochiuaya. Okijto ika tla tinochimej akin titenojnotsayaj titlapaleuiayaj, ipan nochi yejon metstli melak tiyolpakiskiaj ken xkeman tiyolpakiyaj. Niman ijkon opanok. Sakin, oninosentemakak itech Jehová niman ipan 1956 oninoapolakti iuan notaj niman nokniuj siuatl. Xouejkauj, ononek niktlapejpenis okse itlaj tlen ueyi kijtosnekiya.

Opanokej xiujtin, nikmatstoya ika melak kuajli yeskia tla ninochiuaskia precursor. San ika, ok nikijtouaya ika yejon nikchiuaskia más tlayekapan. Oniknemili ninomachtis Berlín, ijkon nikmatstoskia kenon nitlakouas niman kenon nitlanemakas. Sakin, oniknemili ika nonekiya nitekitis itech tlen yoninomachtijka niman ijkon melak kuajli nikchiuaskia notekiyo. Kuakon, ipan 1961 onikseli se tekitl ne Hamburgo, se kalpan tlen melak ueyi ipan Alemania niman tlen onka itenko mar. Ijkuak más ninotemakaya ipan notekiyo, más nikijtouaya ika sakin kuajli niktekichiuiliskia toTajtsin. ¿Tlenon nikchiuaskia?

Niktlasojkamachilia Jehová ika onechkauili manikimixmati tokniuan akin melak tetlasojtlayaj. Yejuamej onechpaleuijkej manikasikamati ika kachtopa noneki tiktekichiuiliskej toTajtsin. Miyekej noamigos yonochiujkaj precursores niman onechititijkej ika nejua noijki ueliskia ijkon nikchiuaskia. Noijki, tokniuj Erich Mundt, akin onenka ipan se campo de concentración, onechyolchikauj manitlaneltoka itech Jehová. Onechijli ika, ipan campo de concentración, tokniuan akin sa no yejuamej intech otlaneltokakej xotlaxikojkej. San ika, akin melak otlaneltokakej itech Jehová yejuamej akin omelajkanenkej niman akin melak otlapaleuijkej ipan tlanechikojli.

Noijki, tokniuj Martin Poetzinger, akin teuan otekit ipan Grupo akin Tlayekana ipan nochi tlanechikoltin, nochipa kinyolchikauaya tokniuan niman kimijliaya: “Toyolchikaualis yejon tlen más tlasojti itech nochi tlen tikpiyaj”. Onitlanemili itech yejuin tlajtoltin niman yejon okichiuj manijkaua notekiyo niman maninochiua precursor, yejuin opanok ipan junio de 1963. Melak kuajli tlen oniktlapejpeni. Maski nion xpanouaya ome metstli niman nion xnipeuaya niktejtemouaya tekitl, onechnotskej manitlapaleui ken precursor especial. Niman sakin onechnotskej maniuiya ipan iTlamachtil Galaad número 44. Jehová miyek yonechmakaka ken nion xnikchiaya.

Melak miyek oniuel itech tokniuan niman más itech tokniuan Nathan Knorr niman Lyman Swingle. Intech yejuamej oniuel itlaj tlen melak kualtsin: ika nochipa noneki titlaxikoskej kampa techontitlaniskej. Yejuamej otechyolchikaujkej matokauakan kampa techontitlaniskiaj maski melak ouijtika yeskia. Tokniuj Knorr otechtlajtolti: “¿Tlenon nenkitaskej? ¿Nenkitaskej tla xtlachipaujkan, tla miyekej moyotsitsintin noso tla xitlaj ika timopanoltis? ¿Noso nenkimitaskej kojtin, xochimej niman kenon miyekej yolpaktinemij? Xkintlasojtlakan tlaltikpakchanejkej”. Se tonajli, tokniuj Swingle techijlitoya tleka sekimej nimantsin kikajkauaj kitekichiuiliaj Jehová. Ijkuak tokniuj ijkon kijtotoya, nesiya ika san kijyouijtoya xchokas. Onotelti achijtsin hasta ijkuak opanok ika chokasnekiya. Yejon oajsik ipan noyojlo, niman onikijto nochipa nitekichiuas ipampa Cristo niman inpampa tokniuan (Mat. 25:40).

Ijkuak otechijlikej kanon tiaskej, yeyimej betelitas otechtlajtoltijkej kanon otechontitlankej. Kuakon, opeuj tikimijliaj. Betelitas kijtouayaj tlen kualtsin onkatka kampa yaskiaj sekimej tokniuan, san ika, ijkuak nejua onikijto ika niaskia República del Congo, xok yakaj onauat niman san okijtokej: “Ah, Congo. Jehová mamitspaleui”. Ipan yejon tonaltin miyek noijtouaya itech guerra tlen ompa nochiujtoya, kijtouayaj ika miyekej kinmiktiayaj niman ika nochiuaya tlen xkuajli. San ika, xonikilkauj tlen oniuel Galaad. Ijkuak kemach yotikiskaj Galaad ipan septiembre  de 1967, nejua imiuan Heinrich Dehnbostel niman Claude Lindsay otiajkej Kinsasa, icapital Congo.

Ijkuak otajsikej Kinsasa, otomachtijkej francés yeyi metstli. Sakin otiajkej Lubumbashi (yeuejkaui kixmatiyaj ken Elisabethville), nisiuj Zambia. Tokauayaj imiuan misioneros akin chantiyaj centro.

Ompa Lubumbashi miyekan xkeman notenojnotsaya, kuakon, melak tipakiyaj pampa tejuamej tikchiuaskiaj ika miyekej makikakikan tlen melauak. Xouejkauj, melak miyekej tikinmachtiayaj hasta xok tiueliyaj. Noijki tikinnojnotsayaj tekiuajkej niman policías. Miyekej kitlakaitayaj iTlajtol toTajtsin niman techtlakaitayaj pampa titenojnotsayaj. Pampa ompa tlajtouayaj suajili, nejua niman Claude Lindsay otiuelkej yejon tlajtojli. Sakin, otechontitlankej ipan se tlanechikojli kampa tlajtouayaj suajili.

Miyek tlen kualtsin topan onochiuj, san ika, noijki otikixnamijkej tlen ouijtika. Miyekpa otechtlajtolchijchiuilijkej soldados akin yotlauankaj niman noijki policías akin tlauelejkej katkaj. Sejpa, sekimej policías ika armas okalakitoj kampa chantiyaj misioneros, ijkuakon tikpixtoyaj totlanechikol. Otechuikakej comisaría niman ompa otechijlikej matotlalikan ipan tlajli, ijkon tinemiyaj hasta kanaj las 10 ika tlayoua niman sakin otechijlikej matiuiyan.

Ipan 1969, oninochiuj tlayekanketl ipan circuito. Onechtitlankej kampa melak sakayo niman xmás kojyo itech África. Nonekiya uejka ninejnemis niman nipanos kampa onkatka miyek xiujtli niman sokitl. Ipan se kalpan, se kuanaka iuan ikoneuan  kochiyaj itsintlan notlapech. Xkeman nikilkauas kenon chikauak tsajtsiya niman ijkon nechtlatlachialtis ijkuak xitlanesiya. Noijki, kualtsin nikilnamiki kenon ika tlayoua ninotlaliaya imiuan tokniuan, toskouayaj niman ijkon titlajtlajtouayaj itech Biblia.

Noijki onikixnamik tlen ouijtika. Ipan tlanechikoltin nemiyaj akin xmelauak tokniuan katkaj, yejuamej teuamej katkaj ipan Kitawala. * Sekimej yokinmakakaj seki tekitl ipan tlanechikojli. San ika, miyekej itech yejuin tlakamej xouel okinkajkayaujkej tokniuan akin melajkanemiyaj (Jud. 12). Sakin, Jehová okinchipauj tlanechikoltin niman yejon okichiuj ika mamiyekiyakan tokniuan.

Ipan 1971, onechtitlankej sucursal de Kinsasa. Ompa miyek tekitl onikchiuj, nikimitaya cartas tlen tikinseliayaj, nikitaya kech amatlajkuiloltin kinekiyaj tokniuan niman onikchiuj okseki tlemach tlen kichiua Grupo akin kiyekana itech ken notenojnotsa. Ompa Betel, oniuel nikyekana tekitl ipan yejon país kampa xmás onka tomin. Kemantika, correos tlen tikintitlaniyaj ipan avión uejkauiya ika ajsiyaj ipan tlanechikoltin. Notemoltiayaj correos itech aviones tlen yeuejkaui nokuiyaj niman sakin komintitlaniyaj ipan barcos, niman kemantika yejuin barcos onsaliuiyaj kampa onkatka miyek xiujtli tlen onka ipan atl niman ompa nokauayaj seki semanas. San ika, tekitl nochipa nochiuaya maski melak ouijtika katka.

Onechmojkatlachialti nikitas kenon tokniuan kichiuayaj uejueyimej tlanechikoltin ika achijtsin tomin. Itech seki uejueyimej tlaltemej tlen kinchijchiuaj seki yolkatsitsintin, tokniuan achijtsin kinyejyektlaliayaj niman ijkon kinchijchiuayaj plataformas. Noijki tlachinantiayaj ika sakatl, niman kitekimilouayaj yejon sakatl niman ijkon ompa manotlalikan tokniuan. Tokniuan tlachijchiuayaj ika ojtlatl niman yejon tlen kimamaya kajli, ika kikuatsakuayaj niman ika kinchijchiuayaj mesas. Niman pampa xonkatkaj clavos, tokniuan kinxipeuayaj kojtin niman ika yejon tlasasalouayaj. San nikitaya kenon tlamachilisejkej katkaj yejuin tokniuan niman nechmojkatlachialtiaya kenon tlaxikouayaj. Melak onikintlasojtlak. Melak onikintemo ijkuak ononek oksekan nias.

Ipan 1974, onechtitlankej sucursal de Nairobi (Kenia). Onkatka miyek tekitl pampa sucursal kiyekanaya tenojnotsalistli ipan 10 países tlen nisiuj onkatkaj, ipan seki itech yejon países xtechkauiliayaj matikueyichiuakan Jehová. Miyekpa nechontitlaniyaj manitetlajpaloti ipan yejon países, más ipan Etiopía kampa tokniuan kintlaueltokayaj niman miyek tlen kixikouayaj. Miyekej okinchiuilijkej tlen xkuajli niman okintsajkej; sekimej hasta okinmiktijkej. San ika, oyolmelaujkanenkej pampa kuajli nouikayaj iuan Jehová niman imiuan tokniuan.

Ipan 1980, opanok itlaj tlen melak kualtsin: oninonamikti iuan Gail Matheson, akin ualeua Canadá. San sekan otomachtijkaj Galaad niman nochipa totlajkuilouiliayaj. Yejua tlapaleuiaya Bolivia ken misionera. Ijkuak yopanoka 12 xiuitl, otonextijkej Nueva York, niman xouejkauj ika otonamiktitoj Kenia. Melak niktlasojkamachilia Gail ika nochipa kita tlen tikixnamikij ijkon ken Jehová kita niman nochipa yolpaki san ika tlen kipiya. Nosiuatsin melak nechpaleuiya niman nochipa nouan nemi.

Ipan 1986, opeuj nitlapaleuiya ipan circuito maski noijki ninemiya ipan Grupo akin tlayekana ipan se Sucursal. Gail niman nejua tikomintlajpalouayaj tlanechikoltin itech miyek países tlen kiyekanaya sucursal de Kenia.

Nikilnamiki itlaj tlen kualtsin opanok ipan 1992 ijkuak ne Asmara (tlen onka Eritrea) tikitstoyaj kenon tikchiuaskej se ueyi tlanechikojli. Ijkuakon ok techkauiliayaj matikueyichiuakan Jehová ipan yejon país. San otiknextijkej kampa kejyeuayaj tlayojli, niman ijtik yejon kajli melak xkuajli katka. San ika, melak onechmojkatlachialti ika ipan yejon tonajli ijkuak tosentlaliskiaj, tokniuan melak kualtsin ken okiyektlalijkej, aman kema kinamikiya ompa matikueyichiuakan Jehová. Miyekej tokniuan okitkikej kuajkualtsitsintin tlakentin niman kuajli okitlapachojkej kampa xkuajli nesiya. Melak otipajkej ipan yejon ueyi tlanechikojli, otosentlalijkej 1,279.

 Ijkuak tikomintlajpalouayaj tlanechikoltin, melak nopatlaya kampa tokauayaj nochi semanas. Kemantika tokauayaj ipan se ueyi kajli tlen onkatka itempan mar niman kemantika tokauayaj ipan se kaltsintli tlachijchiujtli ika tepostli tlen onkatka kampa nemiyaj miyekej tlakeualtin. Ompa, nonekiya tinejnemiskej kanaj 100 metros tla tiknekiyaj tiaskej baño. San ika, maski san kanon titlapaleuiayaj, melak tikilnamikij kenon chikauak titenojnotsayaj imiuan tokniuan precursores niman tenojnotskej. Sakin, oksekan otechtitlankej, melak tikintemoskiaj tokniuan akin melak kuajli imiuan otouikakej.

Itech xiuitl 1987 niman 1992, tekiuajkej otechkauilijkej matikueyichiuakan Jehová ipan seki países tlen kiyekanaya sucursal de Kenia. Kuakon, onochijchiujkej más oficinas. Ipan 1993, otechtitlankej oficina de Adís Abeba (Etiopía). Yeuejkaui, tokniuan itech yejuin país xkinkauiliayaj makiueyichiuakan Jehová, san ika, aman tekiuajkej yokinkauilijkaj.

Jehová yokichiuj ika melak kuajli manotenojnotsa Etiopía. Miyekej tokniuan yonochiujkej precursores. Ipan xiuitl 2012 ika tlayekapan, nochi xiujtin, ipantsin 20% itech nochimej tenojnotskej yonochiujkej precursores regulares. Noijki, miyekej tokniuan yoyajkej ipan escuelas kampa kinpaleuiyaj kuajli matenojnotsakan, niman yonochijchiujkej ipantsin 120 Kaltin kampa tosentlaliaj. Ipan xiuitl 2004, okejkuanijkej Betel, niman sa no ompa onka se Kajli kampa kipiyaj inueyitlanechikol iTeixpantijkauan Jehová, yejon noijki yokinpaleui tokniuan.

Gail niman nejua melak touikaj imiuan miyekej tokniuan akin chantij Etiopía. Melak tikuelitaj kenon tetlasojtlaj niman kenon kualtsin technotsaj. Teajman ika kemach otechontitlankej sucursal de Europa central pampa opeuj tikualoj. Ompa kualtsin techtlajpiyaj, san ika, tikintemouaj tokniuan akin chantij Etiopía.

Yotikitakej kenon Jehová yokichiuj ika miyekej makixmatikan iTlajtol toTajtsin (1 Cor. 3:6, 9). San xkonnemilikan, ijkuak kachtopa onikinnojnotska sekimej ruandeses akin oyajkaj Congo okikixtitoj cobre, xnemiya nion se tenojnotsketl ne Ruanda, san ika, aman nemij kanaj 30,000 tokniuan. Ipan 1967, nemiyaj kanaj 6,000 tenojnotskej ipan República del Congo, san ika, aman nemij ipantsin 230,000, niman ijkuak conmemoración katka ipan 2018, onosentlalijkej ipantsin 1,000,000 tlaltikpakchanejkej. Ipan nochi países tlen okiyekan sucursal de Kenia, nemij ipantsin 100,000 tenojnotskej.

Ikipiya ipantsin 50 xiuitl, Jehová okintekitilti sekimej tokniuan niman ijkon manechpaleuikan chikauak maniktekichiuili Jehová. Maski ok ninokojtilia ika xok melak nipinauis, yoniuel nitlaneltoka itech Jehová. Pampa ninemiya África, yonechpaleui maniteijyoui niman manipaki san ika tlen nikpiya. Gail niman nejua melak tikintlakaitaj tokniuan akin kuelitaj teseliskej, akin tlaxikouaj niman akin tlaneltokaj itech Jehová. Niktlasojkamachilia Jehová pampa yonechititi ika melak nechtlasojtla. Kuajli yonikitak ika Jehová yonechteochiuj ken nion xnikchiaya (Sal. 37:4).