Matitekitikan san sekan iuan tlanechikojli
“Itechkopa Cristo [...] sajsalijtokej san sekan ken se cuerpo yejuan kuajli sajsalijtikaj nochiuiyan” (EFESIOS 4:16).
TLAKUIKALTIN 53 NIMAN 107
1. ¿Tlenon nochipa yokichiujkej Jehová niman itekipanojkauan?
JEHOVÁ niman Jesús san sekan yotekitkej. Kachtopa, Jehová okichijchiuj iKoneuj Jesús, niman sakin iuan otekit ijkuak okichijchiujkej okseki tlemach. Biblia kijtoua ika Jesús onen “inakastlan ken se kuajli tekitketl” (Proverbios 8:30). Noijki ijkon, itekipanojkauan toTajtsin nochipa san sekan yotekitkej itech tlen yejua yokinnauatijka. Se neskayotl, Noé niman ichanejkauan san sekan otekitkej ijkuak okichijchiujkej akajli. Sakin, israelitas san sekan otekitkej ijkuak okichijchiujkej tabernáculo, ijkuak kipepetoniayaj niman kitkiyaj oksekan. Ijkuak yonochijchiujka teopan, israelitas nokuikatiayaj niman kitsotsonayaj tlakuikaltin san sekan niman ijkon kiueyichiuayaj Jehová. Itekipanojkauan toTajtsin youelkej yokichiujkej yejuin pampa nopaleuiyaj se iuan okse niman san sekan yotekitkej (Génesis 6:14-16, 22; Números 4:4-32; 1 Crónicas 25:1-8).
2. a) ¿Kenon tekitiyaj akin kachtopa okichiujkej ken Cristo? b) ¿Tlenon tikitaskej ipan yejuin tlamachtijli?
2 Akin kachtopa okichiujkej ken Cristo noijki nochipa san sekan otekitkej. Pablo, itlatitlankauj Cristo, okimijli ika tlatlamantik noso sesejneka tlen ueliyaj kichiuaskej niman tekitl tlen yokinmakakaj. San ika, san sekan nemiyaj pampa nochimej kitokayaj Jesucristo. Pablo okinneskayoti ken se tlalnakayotl, tlen kipiya miyek partes niman ueli san sekan nopaleuiyaj (xpoua 1 Corintios 12:4-6, 12). ¿Kenon tejuamej uelis san sekan titekitiskej itech tenojnotsalistli, ipan tlanechikojli niman iuan tochanejkauan? Matikitakan.
MATOPALEUIKAN ITECH TEKITL IJKUAK TITENOJNOTSAJ
3. ¿Tlenon okitak Juan?
3 Ipan kachtopa siglo, Jehová okichiuj ika Juan, itlatitlankauj Cristo, makita chikome iluikaktekitkej akin kinpitsayaj trompetas. Ijkuak ika makuijli iluikaktekitketl okipits itrompeta, Juan okitak “se sitlalin yejuan oualeu ipan cielo, niman ouetsiko ipan tlaltikpaktli”. Yejuin “sitlalin” okikuik se llave ika okitlapo puerta kampa melak uejkatlan niman kampa xtlaj tlauijli. Kuakon ompa opeuj kisa poktli. Niman itech poktli ouajkiskej melak miyekej chapolimej. Yejuin chapolimej xoyajkej itech xiujtli, oyajkej itech tlaltikpakchanejkej akin “xkipiaj isello Dios ipan inixkuateu” (Apocalipsis [Revelación] 9:1-4). Juan kimatiya ika chapolimej melak tlaijtlakouaj, ijkon ken okichiujkej ipan Egipto ijkuak onen Moisés (Éxodo 10:12-15). Chapolimej tlen okimitak Juan kineskayotia tokniuan akin tlapejpeniltin yaskej iluikak akin kiteijliaj ika chikaualistli tlajtojli itech tlaneltokiltin xmelajkej. Imiuan yonosentlalijkej melak miyekej akin kichiaj nemiskej ipan tlaltikpaktli. Nochimej san sekan kichiuaj yejuin tekitl tlen yokinpaleui miyekej tlaltikpakchanejkej mamakisakan itech tlaneltokijli tlen xmelauak niman itech Satanás.
4. a) ¿Tlenon ueyi tekitl yotechmakak Jehová? b) ¿Tlenon noneki tikchiuaskej tla tiknekij tikchiuaskej tekitl tlen toTajtsin yotechmakak?
4 Jehová yotechmakak se ueyi tekitl. Kipiya ika titenojnotsaskej itech kuajli tlajtoltin tlen kuajkuis Tekiuajyotl. Niman ipan nochi tlaltikpaktli noneki kimatiskej ijkuak xiyejko tlapopolouilistli (Mateo 24:14; 28:19, TNM, 20). Kipiya ika tikimijliskej makonikan “atl yejuan [...] kitemaka nemilistli” akin amikij. Yejuin kijtosneki ika noneki tikinmachtiskej itech Biblia nochimej akin kinekij kimatiskej (Apocalipsis 22:17). Tla tiknekij tikchiuaskej tekitl tlen yotechmakak toTajtsin, noneki topaleuiskej niman san sekan titekitiskej ipan tlanechikojli (Efesios 4:16).
5, 6. ¿Kenon tikteititiaj ika san sekan tinemij ijkuak titenojnotsaj?
5 Noneki topaleuiskej niman kuajli toyekanaskej niman ijkon uelis tikinnojnotsaskej melak miyekej tlaltikpakchanejkej. Tlen techijliaj ipan tlanechikojli techpaleuis matikchiuakan yejon, ken ijkuak tosentlaliaj ijkuak tontenojnotsaskej. Yejon tlen techijliaj ken titenojnotsaskej techpaleuiya matikimijlikan kuajli tlajtoltin nochimej tlaltikpakchanejkej niman ueli tikintemakaj melak miyek amatlajkuiloltin tlen tlajtouaj itech Biblia. Noijki kemantika techtlajtlaniliaj matitlapaleuikan ijkuak nochiua se ueyi tekitl. Ijkuak tikchiuaj yejuin tekitl, titekititokej imiuan melak miyekej tokniuan akin kiteijliaj san noijki tlajtojli itech nochiuiyan tlaltikpaktli. Noijki titekititokej imiuan iluikaktekitkej, pampa yejuamej techpaleuiyaj matitenojnotsakan (Apocalipsis 14:6).
6 Melak techyolpaktia ijkuak tikpouaj ipan amoxtli Anuario ken notenojnotstika ipan nochi tlaltikpaktli. Okse tlen noijki techpaleuiya matopaleuikan tikchiuaskej itekiyo toTajtsin ijkuak nopanoltia uejueyimej tlanechikoltin. Ipan se ueyi tlanechikojli, miyekej yauej pampa kachtopa tinochimej san sekan tikinnotsaj mauiyan. Niman ompa tinochimej tijkakij san se tlamachtijli. Tlamachtiltin, tlen noteititia niman tlamauisoltin teyolchikaua matikmakakan Jehová nochi tlen tiuelij. Okse tlen techpaleuiya san sekan matinemikan ijkuak noilnamiki imikilis Cristo ipan nochi xiujtin (1 Corintios 11:23-26). Ijkuak xajsi tonajli, tinochimej tiauej techajchan tikinnotsaj touan manosentlalikan. Niman nochipa ipan yejon fecha, tonajli 14 metstli nisán, tosentlaliaj tla yokalak tonajli. Ijkon tiktlakamatij tlen otlanauati Jesús niman tikititiaj Jehová ika tiktlasojkamatij tlen yokichiuj topampa.
7. ¿Tlenon uelij tikchiuaj pampa san sekan titekitij?
7 San se chapoli xmiyek kichiua. San ika, ijkuak miyekej, uelij kichiuaj melak ueyi tekitl. Noijki ijkon tejuamej, xuelis titenojnotsaskej ipan nochi tlaltikpaktli san toselti. San ika, titekitij san sekan niman topaleuiyaj se iuan okse, ijkon ken chapolimej. Ika yejon uelij tikinnojnotsaj itech Jehová melak miyekej tlaltikpakchanejkej niman tikinpaleuiyaj makitlakaitakan.
MATOPALEUIKAN ITECH TEKITL IPAN TLANECHIKOJLI
8, 9. a) ¿Tlenon neskayotl okikuik Pablo tlen ika otemachti ika melak noneki san sekan matinemikan? b) ¿Tlenon noneki tikchiuaskej niman ijkon san sekan titekitiskej ipan tlanechikojli?
8 Pablo okimijli tokniuan akin chantiyaj Éfeso kenon nochiua tekitl ipan tlanechikojli niman okimijli: “Ma titoskaltikan ikan nochi tlen kuajli” (xpoua Efesios 4:15, 16). Pablo otlajto itech se tlalnakayotl tlen ika okinmachti nochimej akin kichiuayaj ken Cristo ika uelis tlapaleuiskej ipan tlanechikojli san sekan manemikan. Niman ijkon uelis kichiuaskej ken Jesús, akin itsontekon yejon tlalnakayotl. Pablo okijto ika se tlalnakayotl nochi ipartes nopaleuiyaj san sekan. Ika yejon, tla titelpokamej noso ka, kuajli tomachiliaj noso tikualoj, ¿tlenon noneki tikchiuaskej tinochimej?
9 Jesús yokintlali tlayekankej matlayekanakan ipan tlanechikojli. Yejua kineki matikintlakaitakan niman matikchiuakan tlen technauatiaj (Hebreos 13:7, 17). Kemantika melak ouijtika tikitaskej tikchiuaskej yejon. Tla tiktlajtlaniliaj Jehová matechpaleui, yejua techmakas iespíritu santo niman techpaleuis matitetlakamatikan. Tla tiyolyemankej niman titekitij iuan tlayekankej, melak titlapaleuiskej ipan tlanechikojli. Tinochimej san sekan tinemiskej niman mojmostla ueyixtias totlasojtlalis itech oksekimej.
10. ¿Kenon tlapaleuiyaj tokniuan akin kinpaleuiyaj tlayekankej san sekan manemikan tokniuan ipan tlanechikojli?
10 Tlapaleuijkej noijki tlapaleuiyaj ika tokniuan manemikan san sekan ipan tlanechikojli. Yejuamej melak chikauak tekitij niman ijkon kinpaleuiyaj tlayekankej niman melak notlasojkamati tekitl tlen kichiuaj. Se neskayotl, yejuamej kitaj ika nochipa matikinpiyakan amatlajkuiloltin tlen ika titenojnotsaj. Yejuamej noijki kuajli kinseliaj akin uajlauej ipan Kajli kampa Tosentlaliaj. Tlapaleuiyaj ijkuak nochipaua kampa tosentlaliaj niman ijkuak noyektlalia. Ijkuak tikinpaleuiyaj tokniuan akin tlapaleuijkej, titlapaleuiyaj ika san sekan manemikan tokniuan ipan tlanechikojli niman tiktekichiuiliskej Jehová ken yejua kuelita (uelis tikitas Hechos 6:3-6).
11. ¿Tlenon uelis kichiuaskej telpokamej niman ijkon san sekan manemikan tokniuan ipan tlanechikojli?
11 Sekimej tlayekankej yotekitkej chikauak miyek xiuitl ipan tlanechikojli. San ika, kanaj pampa ikipiyaj miyek xiuitl, xok uelis chikauak tekitiskej ijkon ken kachtopa. Tokniuan akin telpokamej melak kuajli tepaleuiskej. Tla kinmachtiaj telpokamej, uelis kiseliskej seki tekitl. Aman tokniuan akin tlapaleuijkej uelis nochikauaskej niman ijkon ika tlayekapan uelis nochiuaskej tlayekankej (1 Timoteo 3:1, 10). Sekimej tokniuan tlayekankej akin telpokamej katkaj aman tekitij ken tlayekankej ipan circuito niman kinpaleuijtokej tokniuan ipan miyek tlanechikoltin. Tinochimej tiktlasojkamatij manemikan tokniuan telpokamej akin kinektokej tekitiskej ipampa tlanechikojli (xpoua Salmo 110:3; * Eclesiastés 12:1). *
MATITLAPALEUIKAN SAN SEKAN MANEMIKAN TOCHANEJKAUAN
12, 13. ¿Tlenon uelis kinpaleuis nochimej ipan se familia san sekan manemikan?
12 ¿Tlenon uelis tikchiuaskej niman ijkon san sekan tinemiskej iuan tochanejkauan? Melak noneki matikueyichiuakan toTajtsin ken familia nochi semanas. Tajtin niman tekoneuan uelis mojmostla ok melak notlasojtlaskej tla san sekan nomachtiaj itech Jehová. Se neskayotl, uelis kiyejyekoskej tlenon kijtoskej ijkuak ontenojnotsaskej. Yejuin kinpaleuis melak kuajli tenojnotsaskej. Ijkuak se kikaki kenon ichanejkauan tlajtouaj itech Jehová niman kitaj kenon kitlasojtlaj pampa kinekij kiyolpaktiskej, nochi familia san sekan kuajli nemi.
13 ¿Kenon uelis akin yononamiktijkej nopaleuiskej niman san sekan nemiskej? (Mateo 19:6). Tla omemej kitlasojtlaj Jehová niman san sekan kitekichiuiliaj, melak kuajli nemiskej niman yolpakiskej. Melak noneki ika manotlasojtlakan niman manotlakaitakan, ijkon ken Abrahán iuan Sara, Isaac iuan Rebeca niman Elqaná iuan Ana (Génesis 26:8; 1 Samuel 1:5, 8; 1 Pedro 3:5, 6). Ijkon uelis san sekan nemiskej niman melak kuajli nouikaskej iuan toTajtsin (xpoua Eclesiastés 4:12). *
Kinpaleuis san sekan manemikan tajtin niman tekoneuan tla kiueyichiuaj toTajtsin ken familia. (Xkita párrafo 12 niman 15).
14. Tla toixnamik xkitekichiuilia Jehová, ¿tlenon techpaleuis kuajli iuan matinemikan?
14 Biblia kuajli kijtoua ika maka matonamiktikan iuan se akin xkitekichiuilia toTajtsin (2 Corintios 6:14). Maski ijkon, sekimej tokniuan kipiyaj imixnamik akin xiteixpantijkauj Jehová. ¿Tleka? Kanaj sekimej onochiujkej iteixpantijkauan Jehová ijkuak yononamiktijkaj. San ika, teueuentsin noso tesiuauj xokinek nomachtis tlen melauak. Noso oksekimej kanaj ononamiktijkej iuan se akin kema iteixpantijkauj Jehová, san ika, sakin xok okinek. Tla ijkon topan nochiujtika, uelis kuajli tinemiskej iuan toixnamik tla tiktlakamatij tlajtolyekanalistin tlen uajlauej ipan Biblia, maski kemantika ouijtika yes. Matikitakan tlen ipan opanok Mary niman itech iueuentsin, David. Yejuamej katkaj iteixpantijkauan Jehová, san ika, se tonajli David xok okinek yas ipan tlanechikojli. Mary onochikauj kichiuas tlen noneki makichiua se tesiuauj niman okiteititi kualneskayomej. Yejua okinmachti itech Jehová chikuasen inkoneuan niman xkeman okikauj yas ipan tlanechikoltin niman ipan uejueyimej tlanechikoltin. Opanotiajkej xiujtin niman ikoneuan onoskaltijtiajkej, niman sakin onochantitoj oksekan. Mary melak ouijtika kitaya aman kitekichiuilis Jehová san iselti. San ika, yejua xkeman okikauj Jehová. Hasta kinkauaya revistas kampa iueuentsin uelis kimitaskia. Kuakon, se tonajli iueuentsin opeuj kinpoua. Ika yolik oksejpa opeuj yauj ipan tlanechikoltin. Kipiayaj se imixuiuj tlen kipiaya chikuasen xiuitl akin nochipa kixelouiliaya kampa noseuis. Niman tla David xajsiya ipan tlanechikojli, telpokatsin kijliaya: “Abuelito, melak onimitstemo ipan tlanechikojli”. Ijkuak yopanoka 25 xiuitl, David oksejpa opeuj kitekichiuilia toTajtsin. Yejua iuan isiuauj oksejpa san sekan kitekichiuiliaj niman melak yolpakij.
15. Kenon uelis akin youejkaujkej ononamiktijkej kinpaleuiskej akin kemach ononamiktijkej?
15 Satanás kineki kinxexelos familias. Ika yejon, akin yononamiktijkej niman kitekichiuiliaj Jehová kipiyaj ika nopaleuiskej se iuan okse niman san sekan nemiskej. San ika, maski youejkauj ika yononamiktijkej noso ka, noneki kinemiliskej tlenon uelis kichiuaskej niman noijliskej niman ijkon melak kuajli nemiskej iuan imixnamik. Akin youejkaujkej ika yononamiktijkej uelis kimititiskej se kuajli neskayotl akin san kemach yononamiktijkej. Kanaj uelis kinnotsaskej akin kemach yononamiktijkej ijkuak kiueyichiuaj toTajtsin ken familia. Ijkon yejuamej kitaskej ika maski mapano miyek xiuitl, akin yononamiktijkej noneki san sekan nemiskej niman notlasojtlaskej (Tito 2:3-7).
MATIAKAN IPAN IKALPAN JEHOVÁ
16, 17. ¿Tlenon kichiaj ika tlayekapan itekipanojkauan toTajtsin akin san sekan nemij?
16 Ijkuak israelitas yayaj Jerusalén konueyichiuaskiaj Jehová, nopaleuiayaj se iuan okse. Kiyektlaliayaj nochi tlen nonekiya niman sakin nopaleuiayaj ijkuak peuaj yayaj. Ijkuak ajsiyaj ipan teopan, kiueyichiuayaj Jehová niman kiueyiteneuayaj nochimej san sekan (Lucas 2:41-44). Tejuamej toyektlalijtokej ken tinemiskej ipan yenkuik tlaltikpaktli. Ika yejon, melak noneki matopaleuikan se iuan okse niman san sekan matitekitikan. ¿Yotiknemili kenon uelis tikchiuaskej yejuin?
17 Tlaltikpakchanejkej xexeliujtokej ken nemij niman nokualaniaj itech nochi. San ika, ika itlapaleuilis Jehová, tejuamej tikpiyaj yolseuilistli niman tikasikamatij tlen temachtia Biblia. ¡Melak tiktlasojkamatij ika ijkon tinemij! Ipan nochi tlaltikpaktli tiktekichiuiliaj toTajtsin ijkon ken kineki. Noijki tinemij san sekan ipan yejuin tonaltin. Ijkon ken okijtokej teotlajtokej Isaías niman Miqueas, tinochimej san sekan titlejkouaj ipan tepetl tlen kipiya Jehová (Isaías 2:2-4; xpoua Miqueas 4:2-4). * Tla topaleuiyaj niman san sekan titekitij, xok uejkauis panos tikitaskej ijkuak nochimej tlaltikpakchanejkej kiueyichiuaskej Jehová san sekan ipan nochi tlaltikpaktli. ¡Melak kualtsin tlen tikchiaj ika tlayekapan!
^ párr. 11 Salmo 110:3: “Mokalpan notemakas ika nochi iyojlo ipan tonajli ijkuak titlaixnamikis. Tejua tikinpiya telpokamej akin mitspaleuiskej tlen tsotlanij niman chipaujkej ken ajuaxtli tlen onka ijkuak uajtlanestiuj”.
^ párr. 11 Eclesiastés 12:1: “Xkilnamiki, aman, moUeyitlachijchiujkauj ipan tonaltin ijkuak titelpochtitika, aman ika ok xyejkoj tonaltin melak xkuakualtin, noso ika xyejkoj xiujtin ijkuak tikijtos: ‘Xnikpiya yolpakilistli itech yejon’”.
^ párr. 13 Eclesiastés 4:12: “Niman se uelis kitlanis akin iselti nemi, san ika, omemej uelis nopaleuiskej kixnamikiskej. Niman se mekatl tetsiltik ika yeyi ikpatl xuelis nimantsin xeliuis”.
^ párr. 17 Miqueas 4:2-4: “Niman miyekej países yemelak yaskej niman kijtoskej: ‘Xuajlakan, niman matitlejkokan ipan itepeuj Jehová niman ipan ikal iTajtsin Jacob; niman yejua techmachtis itech iojuiuan, niman yemelak tikistinemiskej ipan iojuiuan’. Pampa itech Sión kisas tlanauatijli, niman itech Jerusalén itlajtol Jehová. Niman yejua kinmelajkatlalis miyekej kalpamej, niman kiyektlalis nochi tlemach itech países tlen melak uejueyixtokej niman uejka nokauaj. Niman inespadas kinkuepaskej arados niman inlanzas kinkuepaskej tepostin tlen ika kitekiskej xiujtli. Se país xok kixnamikis okse país ika espada, nion xok nomachtiskej kenon tlaixnamikiskej ipan guerra. Niman yemelak notlaliskej, inseselti itsintlan ikojyo uva niman itsintlan ikojyo higo, niman xakaj kichiuas makuekuetlakakan; pampa ikamak Jehová akin nochi ueli kichiua yokijto”.
