1, 2. Ijkuak Pedro yomichtlajtlamaj nochi yeuajli, ¿tlenon okimachtijkej?

CHIKOMEJ inomachtijkauan Jesús yomichtlajtlamajkej nochi yeuajli ipan mar de Galilea. San ika, nion se michin xokajsikej. Ijkuak iuajtlanestiaya, Jesús, akin yoyoliujka, nemiya itenko mar niman kimitstoya. Kuakon “Jesús okimijlij: ‘Xkonchapanikan nemomatlau iyekmakopa on barco niman nenkimajsiskej michimej’. Ijki okichijkej niman kemaj xok ueliyaj kixtiayaj on inmatlau ne ijtik on atl pampa sanoyej miyek michin ijtik uajlaya” (Juan 21:1-6).

² Ipan yejon kualkan, Jesús okintlakualti inomachtijkauan ika pan niman michimej. Kuakon okonitak Simón Pedro niman okitlajtolti: “Simón, ikoneu Jonás, ¿más tinechtlajsojtla xken yejuamej in?”. Jesús kimatiya ika Pedro melak kuelitaya michtlajtlamas. Nesi ika Jesús kitlajtoltiaya Pedro tla kitlasojtlaya yejua niman tlen yotemachtijka xijkon ken itekiyo ika michtlajtlamas. Kuakon Pedro okinankili: “NoTeko, tejua tikmati ika nimitstlajsojtla” (Juan 21:15). Pedro onomachti yejuin: itlasojtlalis itech Cristo noneki melak ueyi makijtosneki xijkon ken itlasojtlalis itech itlaj okse. Ipan yejon tonajli ika  tlayekapan, yejua okiteititi itlasojtlalis itech Cristo ijkuak nochipa melak onochikauj tenojnotsas niman miyek tekitl okichiuj ipan tlanechikojli.

3. ¿Itech tlenon noneki totlajpiyaskej akin tikchiuaj ken Cristo?

³ ¿Tlenon uelis tomachtiskej itech tlen Jesús okijli Pedro? Ika melak noneki totlajpiyaskej maka tikpoloskej totlasojtlalis itech Cristo. Jesús kimatiya ika ipan yejuin tonaltin oniaskia tlen techkuaajmanas, tikixnamikiskiaj tlen ouijtika niman miyek ajmantli. Ipan se neskayotl kampa Jesús okiteneuj se tokaketl, okijto ika sekimej tlaltikpakchanejkej kiseliskiaj “itlajtol Dios” niman kachtopa kinyolpajtiskia. San ika, sakin pampa “sa komatstokej ken ijki nopanoltiskej, niman sanoyej kinekij notomintiskej”, ueliskia “kelkaua[skej] itlajtol Dios”, niman xok kinyolpaktiskia (Mateo 13:19-22; Marcos 4:19). Tla xtotlajpiyaj, tlen techajmana mojmostla ipan tonemilis, uelis kichiuas maka kuajli matiktekichiuilikan Jehová. Ika yejon, Jesús okinmelajkaijli inomachtijkauan: “Xmotakan sa no nemejuamej. Ma ka xmoyoltechikauakan  ika on tlen xkuajli, nion ma ka xtlauantinemikan, nion itlaj xkomatstiakan on tlen ika nemotekipanoskej” (Lucas 21:34).

4. ¿Tlenon techpaleuis matikitakan tla xtikpolouaj totlasojtlalis itech Cristo? (Xkita tlaixkopinajli kampa peua tlen tomachtijtokej).

⁴ Ijkon ken Pedro, uelis tikteititiskej ika tiktlasojtlaj Cristo tla kachtopa tiktejtemouaj titenojnotsaskej ipan tonemilis. ¿Kenon uelis kuajli tikmatstoskej ika ijkon tikchiujtokej? Uelis totlajtoltiskej: “¿Tlenon melak ueyi kijtosneki ipan nonemilis? ¿Nechyolpaktia niktekichiuilis Jehová? ¿Noso nechyolpaktia nikchiuas okseki tlemach?”. Techpaleuis matiknankilikan yejuin tla tikitaj yeyi tlemach itech tonemilis kampa uelis tikpoloskej totlasojtlalis itech Cristo: tekitl, yolpaktilistli niman tlemach tlen uelis tikpiyaskej.

5. ¿Tlenon itekiyo se akin tlayekana itech ichanejkauan?

⁵ Pedro michtlajtlamaya xsan pampa melak kiyolpaktiaya. Yejuin tekitl kichiuaya pampa ijkon kinmakaskia ichanejkauan tlen kinpolouaya. Ipan yejuin tonajli, noijki ijkon, Jehová yokinnauati akin tlayekanaj itech inchanejkauan ika makinmakakan tlen kinpoloua (1 Timoteo 5:8). Ika yejon, yejuamej noneki chikauak tekitiskej niman ijkon kichiuaskej yejuin. San ika, aman ipan sa itlamiyan tonaltin, tekitl uelis melak techkuaajmanas.

6. ¿Tleka uelis melak techkuaajmanas tekitl?

⁶ Nemij miyekej tlaltikpakchanejkej akin kitejtemouaj tekitl. Ipampa yejuin, nochimej kichiuaj nochi tlen uelij ika kipiyaskej se tekitl. Miyekej kimachiliaj ika noneki tekitiskej miyek horas maski san achijtsin makintlaxtlauilikan. Empresas kiyejyekouaj kichiuaskej miyek tekitl ika achijtsitsintin tekitkej. Yejuin kichiua ika sekimej tekitkej manokuaajmanakan, melak masiauikan niman hasta makualokan. Miyekej kinajmanaj ika uelis kipoloskej intekiyo tla xkichiuaj ken kintlajtlaniliaj kampa tekitij.

7, 8. a) ¿Akinon noneki xkeman tijkauaskej? b) ¿Tlenon onomachti se tokniuj chanej Tailandia itech tekitl?

 ⁷ Akin tikchiuaj ken Cristo melak noneki maka keman tijkauaskej Jehová san ipampa totekiyo noso yakaj okse (Lucas 10:27). Totekiyo techpaleuiya matiknextikan tlen techpoloua niman techkauilia matiktekichiuilikan toTajtsin. San ika, tla xtotlajpiyaj, totekiyo uelis techtsakuilis matikueyichiuakan Jehová. Tejuamej uelis tomachtiskej itech tlen ipan onochiuj se tokniuj chanej Tailandia. Yejua okijto: “Ipan notekiyo nikinyektlaliaya computadoras niman melak nikuelitaya. San ika, nonekiya nitekitis melak miyek horas. Ika yejon, nion xnikpiaya tiempo ika nikchiuas tlen nechpaleuis maninouika iuan toTajtsin. Kuakon onikitak ika tla niknekiya kachtopa niktlalis ipan nonemilis iTekiuajyo toTajtsin, nonekiya nikpatlas notekiyo”. ¿Tlenon okichiuj yejuin tokniuj?

⁸ Tokniuj kijtoua: “Kanaj itech se xiuitl oninoyektlali niman kuakon oniknemili nikinnemakas helados ipan calle. Ijkuak kemach nipeuaya, san achijtsin niktlaniya tomin niman yejon okichiuj maninajmana. Ijkuak nechitayaj akin imiuan nitekitiya, nechuejuetskiliayaj niman nechtlajtoltiayaj tleka niknemiliaya ika nikinnemakas helados melak kuajli katka xijkon ken nikinyektlalis computadoras kampa onka aire acondicionado. Nejua onikchiuili teoyotl Jehová, oniktlajtlanili manechpaleui manikxiko tlen nikixnamiktoya niman manikpiya tiempo ika nikchiuas tlen nechpaleuis kuajli iuan maninouika. Xouejkauj opanok, opeuj panoua tlen kuajli. Opeuj melak nikixmati tlenon kueliliaj akin nikintlanemakiltiaya niman melak kuajli nikinchijchiuaya helados. Xuejkaujtipan, niknemakaya nochi helado tlen nikchijchiuaya mojmostla. Nejua melak kuajli niktlaniya xijkon ken ijkuak nikinyektlaliaya computadoras. Yejon okichiuj manipaki pampa ipan notekiyo xok onka tlen nechkuaajmana. Niman tlen melak ueyi kijtosneki, aman ninomachilia nisiuj itech Jehová” (xpoua Mateo 5:3, 6).

9. ¿Kenon uelis nochipa tikitaskej tekitl ken kinamiki?

⁹ Jehová kuelita ijkuak tejuamej chikauak titekitij. Chikauak titekitis mitsmakas motlaxtlauil (Proverbios 12:14). San ika, noneki kuajli matikitakan ika tekitl maka melak ueyi kijtosnekis xijkon ken totekiyo itech Jehová. Itech tlen techpoloua Jesús okijto: “Xtejtemojtiakan, tej, kachtopa iTekiuajyo toTajtsin niman imelajkayo, niman nochi okseki tlemach noijki nenkiseliskej” (Mateo 6:33, TNM). San ika ¿kenon uelis tikmatiskej tla tikitaj tekitl ken kinamiki? Uelis totlajtoltiskej: “¿Melak nechyolpaktia notekiyo niman xueyi nikita itekiyo Jehová noso nion achijtsin xnechpaktia?”. Tla titlanemiliaj itech yejuin, uelis techpaleuis kuajli matikitakan tlenon yemelak tiktlasojtlaj.

10. ¿Tlenon ueyi tlamachtijli otemachti Jesús?

¹⁰ Jesús otechmachti tlenon noneki kachtopa yes ipan tonemilis. Se tonajli, yejua okintlajpaloto ome siuamej ikniujtin, María niman Marta. Kuakon Marta nimantsin opeuj kichijchiua tlakuajli, san ika, María onotlali nisiuj itech Jesús niman kikaktoya tlen temachtijtoya. Niman Marta hasta okualan pampa María xkipaleuijtoya. Jesús okijli Marta: “María oitlapejpenij on tlen más  kuajli, niman xakaj kikuilis” (Lucas 10:38-42). Nikan Jesús otemachti tlen ueyi kijtosneki. Tla tiknekij maka matechtsakuili tlen techpoloua niman tikteititiskej ika tiktlasojtlaj Cristo, noneki tiktlapejpeniskej “tlen más kuajli”. Yejuin kijtosneki ika ken touikaj iuan Jehová noneki nochipa yes tlen melak ueyi kijtosnekis ipan tonemilis.

11. ¿Tlenon kijtoua Biblia itech timoseuis niman timoyolpaktis?

¹¹ Tinochimej tikpiyaj miyek tlen tikchiuaj ipan tonemilis. Ika yejon, kemantika noneki toseuiskej. Biblia kijtoua yejuin: “Xonka itlaj tlen melak kuajli itech se tlakatl ken matlakua niman makoni niman mayolpaki ipan chikauak itekiyo” (Eclesiastés 2:24). Jesús kimatiya ika inomachtijkauan nonekiya manoseuikan. Se neskayotl, ijkuak melak chikauak yotenojnotskaj, yejua okimijli: “Xuajuiyan, tiauij neka kampaka xakaj nemi, niman ompa tiueliskej titoseuiskej achijtsin” (Marcos 6:31, 32).

12. ¿Tleka melak noneki matikitakan ken kinamiki yolpaktilistli? Xkijto se neskayotl.

¹² Ijkuak toyolpaktiaj techpaleuiya matoseuikan niman kuajli matomachilikan. San ika, ipan tonemilis noneki kuajli matikitakan ika maka melak ueyi kijtosnekis toyolpaktiskej. Ipan kachtopa siglo, miyekej kipiayaj yejuin tlanemilijli: “Ma titlakuakan niman ma tatlikan, pampa mostla timikiskej” (1 Corintios 15:32). Ipan yejuin tonajli, miyekej noijki ijkon tlanemiliaj. Se neskayotl, se telpochtli chanej Europa occidental opeuj yauj ipan tlanechikoltin. San ika, yejua melak kuelitaya noyolpaktis niman hasta okikajkauj nosentlalis. Sakin, okitak ika pampa san noyolpaktiaya yokichiujka makipiya miyek ajmantli. Kuakon oksejpa opeuj nomachtia Biblia, niman ika yolik ouel opeuj tenojnotsaj. Ijkuak yonoapolaktijka okijto: “Ninajmana pampa onikpolo tiempo ijkuak xnikitaya ika niktekichiuilis Jehová kuajkui pakilistli xijkon ken san timoyolpaktis ken kichiuaj oksekimej”.

13. a) Xkijto se neskayotl tlen makiteititi tleka uelis techijtlakos tla melak uejkaujtipan toyolpaktiaj b) ¿Tlenon uelis techpaleuis matikitakan yolpaktilistli ken kinamiki?

¹³ Ijkuak toyolpaktiaj noneki matechpaleui kuajli matomachilikan niman matikpiyakan kojtilistli. Kuakon ¿kech noneki tiuejkauiskej ijkuak toyolpaktiskej? Techpaleuis matikmatikan tla titlanemiliaj itech yejuin: miyekej tlaltikpakchanejkej kuelitaj kikuaskej pasteles niman dulces, san ika, tikmatij ika tla nochipa kikuaj yejon, uelis kimijtlakos. Tla tiknekij kuajli tinemiskej, noneki tijkuaskej tlen texchikaua. Noijki ijkon, tla uejkaujtipan tipanouaj ika san toyolpaktiaj, uelis ijtlakauis ken touikaj iuan Jehová. ¿Tlenon uelis techpaleuis matikmatikan tla tikitaj yolpaktilistli ken kinamiki noso ka? Uelis tikchiuaskej yejuin. Matiktlapejpenikan se semana niman matikijkuilokan kech horas tikchiuaj itekiyo Jehová, ken tiaskej ipan tlanechikoltin, titenojnotsaskej niman titemachtiskej itech Biblia. Sakin uelis tikijkuiloskej kech horas tipanouaj ipan yejon semana ika toyolpaktiaj, ken ijkuak tauiltiaj, tikitaj televisión noso ipan videojuegos. Ijkuak tikitaskej kech otiuejkaujkej ipan yejuin ome, tikitaskej tla noneki tikpatlaskej itlaj (xpoua Efesios 5:15, 16).

14. ¿Tlenon uelis techpaleuis matiktlapejpenikan tlen kuajli ika toyolpaktiskej?

¹⁴ Jehová techkauilia matiktlapejpenikan tlenon ika toyolpaktiskej. Akin tlayekanaj itech inchanejkauan noijki uelis kitlapejpeniskej tlenon ika noyolpaktiskej inchanejkauan. Ipan Biblia, Jehová techmaka tlajtolyekanalistin  tlen teititiaj kenon tlanemilia. Yejon tlajtolyekanalistin uelis techpaleuiskej matiktlapejpenikan tlen kuajli * (xkita nota). Tlen kuajli ika timoyolpaktis se “tetlayokolijli itech toTajtsin” (Eclesiastés 3:12, 13). Tinochimej tikpiyaj tlen tikuelitaj niman ika yejon xsan noijki tiktlapejpeniaj tlen ika toyolpaktiskej (Gálatas 6:4, 5). San ika, maski san tlenon ika toyolpaktiskej, noneki kuajli matiktlapejpenikan. Jesús okijto: “Kampa nemejuamej nenkipiaskej nemorriquezas, no ompa onyas nemoyojlo” (Mateo 6:21). Totlasojtlalis itech toTekiuaj, Jesús, techyolmapeua matitlanemilikan, matitlajtokan niman matikchiuakan tlen makiteititi ika iTekiuajyo melak ueyi kijtosneki xijkon ken itlaj okse (Filipenses 1:9, 10).

15, 16. a) ¿Kenon uelis nion xtikitaskej ika kachtopa tiktejtemouaj miyek tlemach tlen patioj? b) ¿Tlenon kuajli tlajtolpaleuilistli otechmakak Jesús itech tlemach tlen uelis tikpiyaskej?

¹⁵ Ipan yejuin tonajli, miyekej kinemiliaj ika noneki kipiyaskej nochi tlen kemach kistika ken tlakentli, teléfonos, computadoras niman okseki tlemach. Kachtopa kitejtemouaj miyek tlemach tlen patioj, pampa kinemiliaj ika tomin niman tikpiyas miyek tlemach melak ueyi kijtosneki xijkon ken itlaj okse. Tejua akin tikchiua ken Cristo, ¿tlenon tikita melak ueyi kijtosneki? Xmotlajtolti: “¿Uejkaujtipan san nitlanemilia itech carros tlen yenkuik kistokej noso tlakentli tlen kemach kistika niman nion xninomachtia achtopa nias ipan tlanechikoltin? ¿Melak  miyek tlen nikchiua mojmostla niman xok niuejkaui ijkuak nikchiua teoyotl noso nikpoua Biblia?”. Tla xtotlajpiyaj, uelis peuas tiktlasojtlaskej miyek tlemach tlen uelis tikpiyaskej niman uelis tikitaskej ika yejon melak ueyi kijtosneki xijkon ken totlasojtlalis itech Cristo. Noneki titlanemiliskej itech itlajtoluan Jesús: “Xmotakan sa no nemejuamej niman xmotlapiakan para ma ka sanoyej xnekikan nenmoyaxkatiskej tlajtlamach” (Lucas 12:15). ¿Tleka okijto Jesús yejuin?

¹⁶ Jesús okimelajkaijto ika “xakaj ueli kintekichiuilia omemej tekomej”. Noijki okijto: “Xakaj uelis kitekichiuilis Dios niman no kinotekimakas on tomin”. Kuakon xuelis tikmakas Jehová nochi tlen tiueli niman noijki san tiktejtemojtinemis tlemach tlen uelis tikpiyas. Jesús okijto ika “se kitlajsojtlas niman okse kitlauelitas” noso “se kipialis kuajli iyojlo niman okse kitlalkauis” (Mateo 6:24). Pampa titlajtlakolejkej, noneki nochipa tikmapeuaskej “on xkuajli toeleuilis”. Se itech yejuin tiknekis kachtopa tiktejtemos miyek tlemach tlen patioj (Efesios 2:3).

17. a) ¿Tleka sekimej kimachiliaj ika ouijtika kitaskej tlemach tlen uelis kipiyaskej ken kinamiki? b) ¿Tlenon techpaleuis maka kachtopa tiktejtemoskej miyek tlemach tlen patioj?

¹⁷ Miyekej san tlanemiliaj itech tlen kinekij niman tlen ika noyolpaktiskej. Ika yejon ouijtika kitaskej ken kinamiki tlemach tlen uelis kipiyaskej (xpoua 1 Corintios 2:14). Pampa xtlanemiliaj ken noneki, melak ouijtika kitlapejpeniskej tlen kuajli itech tlen xkuajli (Hebreos 5:11-14). Kanaj xueli noteltiaj inileuilis itech tlemach tlen uelis kipiyaskej. Ijkuak ikipiyaj seki tlemach, melak kinekij kipiyaskej okseki (Eclesiastés 5:10). San ika, onka itlaj tlen uelis tikchiuaskej niman ijkon tikpopoloskej yejuin tlanemilijli. ¿Tlenon? Tikpouaskej nochipa iTlajtol toTajtsin, yejuin techpaleuis maka ok matiknekikan kachtopa tiktejtemoskej miyek tlemach tlen patioj (1 Pedro 2:2). Jesús otlanemili itech tlamachilistli tlen ualeua itech Jehová, niman yejuin okipaleui makimapeua itlatlatalisuan Satanás (Mateo 4:8-10). Ipan yejuin tonajli, noijki ijkon, tla xtiknekij kachtopa tiktejtemoskej miyek tlemach tlen patioj, noneki tikchiuaskej ipan tonemilis tlamachilistli tlen ualeua itech Jehová. Ijkon tikititiskej Jesús ika yejua melak tiktlasojtlaj xijkon ken tlemach tlen uelis tikpiyaskej.

18. ¿Tlenon kuajli yotiknemili tikchiuas?

¹⁸ Ijkuak Jesús okitlajtolti Pedro “¿más tinechtlajsojtla xken yejuamej in?”, yejua kimachtijtoya ika kitekichiuilis Jehová yejon tlen noneki kitas ika melak ueyi kijtosneki ipan inemilis. Itokayo Pedro kijtosneki “Tlajkotsin Tetl”. Pampa kualneskayomej tlen kipiaya Pedro katkaj kentla tetl (Hechos 4:5-20). Ipan yejuin tonajli, tejuamej noijki tiknekij ika totlasojtlalis itech Cristo machikauak ken se tetl. Kuakon, ipan tonemilis matikitakan ken kinamiki tekitl, yolpaktilistli niman tlemach tlen uelis tikpiyaskej. Tla ijkon tikchiuaj, kentla tejuamej tikijtotoskiaj tlen okijto Pedro: “NoTeko, tejua tikmati ika nimitstlajsojtla”.