Tinemiskej san ika achijtsin techyolpaktia
DANIEL NIMAN MÍRIAM ononamiktijkej ipan septiembre xiuitl 2000 niman xtlaj kinpolouaya ipan innemilis ijkuak chantiyaj Barcelona (España). Daniel kijtoua: “Totekiyo techkauiliaya matitlakuatij ipan restaurantes, matipaxialotij okseki países niman kuajli matotlakentikan. Niman noijki miyekpa tiueliyaj titenojnotsayaj”. San ika, itlaj okipatlak innemilis.
Ipan se ueyi tlanechikojli ipan xiuitl 2006, Daniel okikak se tlamachtijli kampa onotetlajtolti: “¿Tikchiujtokej nochi tlen tiuelij niman ijkon tikinpaleuiskej makinextikan ojtli tlen kinmakas nemilistli ika nochipa akin ‘papalakachijtiuej kampa kominmiktiskej’?” (Proverbios 24:11). Ipan tlamachtijli onoijto ika nonekiya matitenojnotsakan itech tlen temachtia Biblia pampa yejuin kichiuas ika tlaltikpakchanejkej maka makipolokan innemilis (Hechos 20:26, 27). Daniel kilnamiki: “Onikmachili kentla Jehová nejua nechnotstoskia”. Yejon tlamachtijli noijki okijto ika ijkuak tochikauaj tiktekichiuiliaj Jehová melak tiyolpakij. Daniel kimatiya ika yejon katka tlen melauak, pampa Míriam ikatka precursora niman melak pakiya.
Yejuin tlamachtijli melak okitlanemililti Daniel. Ika yejon, sakin okinemili ika yoyejkoka tonajli ijkuak ueyi kipatlas inemilis. Opeuj tekiti san achijtsin, onochiuj precursor niman okinemili kenon yejua niman Míriam melak pakiskiaj tla yaskiaj ontlapaleuiskej kampa melak noneki tenojnotskej.
KIXNAMIKIJ TLEN OUIJTIKA NIMAN KISELIAJ TLEN TEYOLPAKTI
Ipan mayo xiuitl 2007, Daniel niman Míriam okikaujkej intekiyo niman oyajkej Panamá, se país kampa yotlaixmatkaj. Ompa tenojnotsayaj kampa onka miyek tlaltin tlen onka atlajkotian ipan Bocas del Toro, ipan mar Caribe. Miyekej akin ompa chantij kimixmatij ken ngäbe. Daniel niman Míriam okinemilijkej ika ueliskiaj nemiskej Panamá kanaj chikueyi metstin ika tomintsin tlen yokejyeujkaj.
Yejuamej kistinemiyaj ipan tlaltin tlen onka atlajkotian ipan barco niman bicicleta. Ok kilnamikij se tonajli ijkuak otlejkokej 30 kilómetros ipan bicicleta seki tepetsitsintin ijkuak melak tona katka. Daniel melak yosiaujka niman kimachiliaya ika sotlauis. San ika, chanejkej ngäbe akin okimixmatkej niman ompa nemiyaj melak kuajli okinselijkej, niman yejuin opanok pampa Daniel niman Míriam ouelkej seki tlajtoltin ipan intlajtol. Xouejkaujkej ikipiayaj 23 akin kinmachtiayaj itech Biblia.
¿Tlenon opanok ijkuak otlan intomin? Daniel kijtoua: “Opeuj tichokaj ijkuak otiknemilijkej ika nonekiskia tokuepaskej España. Melak techajmanayaj tikinkaujteuaskej tonomachtijkauan”. San ika, se metstli sakin okiselijkej itlaj tlen okinyolpakti. Míriam kijtoua: “Otechnotskej matitekitikan ken precursores especiales. Melak otechyolpakti pampa ouel otokaujkej kampa titepaleuijtoyaj”.
TLEN MELAK KINYOLPAKTIA
Pampa ikalpan toTajtsin okipatlak ken nochiuaya seki tekitl, Daniel niman Míriam okikaujke tekitiskej ken precursores especiales ipan xiuitl 2015. ¿Tlenon kichiuaskiaj aman? Otlaneltokakej itech tlen kijtoua Salmo 37:5: “Xtlali moojui itech Jehová, niman xtlaneltoka itech, niman yejua kichiuas itlaj mopampa”. Okinextijkej se tekitl tlen kinkauilia matekitikan ken precursores regulares, niman aman tlapaleuiyaj ipan se tlanechikojli tlen onka ipan Veraguas (Panamá).
Daniel kijtoua: “Ijkuak ok tinemiyaj España, xtikmatiyaj tla ueliskia tinemiskej san ika achijtsin. Amanin tikchiuaj, niman xtlaj techpoloua itech tlen yemelak noneki”. ¿Tlenon melak kinyolpaktia? Yejuamej kijtouaj: “Tikinpaleuiskej akin yolyemankej makixmatikan Jehová yejon tlen melak techyolpaktia xken itlaj okse”.
