1, 2. a) ¿Tlenon kijtouaj sekimej tlaltikpakchanejkej ika toTajtsin matechyekana? b) ¿Tlenon tikitaskej ipan yejuin tlamachtijli?

SEKIMEJ kijtouaj: “Xnoneki matechyekanakan. San tinochimej noneki kuajli touikaskej iuan toTajtsin”. San ika, ¿yemelak yejuin tlanemilijli? ¿Tlenon yonoteititi?

² Ipan yejuin tlamachtijli, tikitaskej ika Jehová okitlali nochi tlemach ken noneki manoyekana niman ika yejua kiyekana ikalpan. Noijki tikitaskej tlenon noneki tikchiuaskej ijkuak ikalpan Jehová techyekanas (1 Corintios 14:33, 40). Ipan kachtopa siglo, ikalpan Jehová onoyekan ika iTlajtol toTajtsin niman ouel otenojnots kuajli tlajtoltin ipan miyekan. Ijkon ken yejuamej, tejuamej noijki matijkauilikan Biblia matechyekana ipan yejuin tonajli. Niman ijkuak tiktlakamatij ijkuak techyekana ikalpan toTajtsin, kuajli tonkisaj. Ueli titenojnotsaj ipan nochi tlaltikpaktli. Noijki tlanechikojli ueli onka chipauak, onka yolseuilistli niman san sekan tinemij.

3. ¿Tlenon kichiua matikneltokakan ika toTajtsin kuajli okitlali nochi ken noneki manoyekana?

³ Ijkuak tikitaj nochi tlen toTajtsin okichijchiuj, kuajli nesi ika se toTajtsin akin kuajli tlayekana. Yejua “okichijchiuj tlaltikpaktli ika tlamachilistli. Niman melak kuajli okintlali iluikamej ika asikamatilistli” (Proverbios 3:19). Niman onka miyek tlen tejuamej xtikmatij itech tlen  Jehová okichijchiuj. Kanaj san achijtsin tlen yonokak itech yejua (Job 26:14). Kema, kuajli nesi ika maski xmiyek tikmatij itech ken onotlali nochi tlen onka ipan tlaltikpaktli niman ipan iluikamej, melak kuajli ken noyekanaj (Salmo 8:3, 4). Sitlalimej onka millones niman kuajli ken onotlalijkej. Niman san matiknemilikan itech planetas kenon nouiyoniaj iyeualiyan tonajli. Yejuin ijkon san pampa Jehová melak kuajli okitlali kenon nouiyoniskej planetas niman sitlalimej. Ijkuak titlanemiliaj itech kenon yejua kuajli okinchijchiuj iluikamej niman tlaltikpaktli, tiknekij tikueyichiuaskej niman nochipa tinemiskej itech (Salmo 136:1, 5-9).

4. ¿Tleka ixtlamatkej xueli tlanankiliaj itech miyek tlajtoltilistin tlen melak noneki manomati?

⁴ Ika tlen ixtlamatkej yonomachtijkej itech nochi tlen onka ipan iluikamej niman ipan tlaltikpaktli yokichiuj ika miyekan ipan tonemilis melak kuajli matinemikan. San ika, xueli kinankiliaj tlajtoltilistin tlen melak noneki manomati. Se neskayotl, akin nomachtiaj tlen onka ipan iluikak niman ken tekiti xueli kuajli techijliaj kenon onochijchiuj nochi tlen onka ipan iluikamej niman tlaltikpaktli. Noso tleka nemij tlaltikpakchanejkej, yolkamej niman onka okseki tlemach ipan tlaltikpaktli. Niman melak miyekej tlaltikpakchanejkej xueli kijtouaj tleka melak tiknekij tinemiskej nochipa (Eclesiastés 3:11). Ixtlamatkej niman oksekimej tlaltikpakchanejkej kijtouaj ika toTajtsin xnemi niman yejuamej kichiuaj manoneltoka evolución. Ika yejon, tlaltikpakchanejkej xkimatij tlanankilistin itech tlen notlajtoltiaj. San ika, toTajtsin techijlia yejon tlanankilistin ipan amoxtli tlen ualeua itech, ipan Biblia.

5. ¿Kenon techpaleuiya tlanauatiltin itech tlen onochijchiuj?

⁵ Jehová okitlali miyek tlanauatiltin itech tlen okichijchiuj. Yejuin tlanauatiltin xnopatlaj. Akin tekitij ken electricistas, plomeros, ingenieros, pilotos, cirujanos niman oksekimej kinpaleuiya yejon tlanauatiltin ijkuak kichiuaj intekiyo. Se neskayotl, toyojlo nochipa onka kampa onotlali maonia ipan totlalnakayo niman se tlapajtiketl xkitejtemoua oksekan ipan totlalnakayo. Noijki tla tejua tiuajtsikuinis itech se kojtli niman tikyejyekos tipatlanis ken se tototl, uelis itlaj mopan nochiuas. Tejuamej tiktlakamatij tlanauatiltin itech tlen onochijchiuj pampa tiknekij tinemiskej.

6. ¿Kenon tikmatij ika Jehová kineki ika itekipanojkauan makiueyichiuakan ken kinamiki?

⁶ Jehová melak kuajli ken okitlali tlen okichijchiuj ipan iluikamej niman ipan tlaltikpaktli. Kuajli tikmatstoskej ika yejua kineki ika itekipanojkauan makiueyichiuakan ijkon ken kinamiki. Niman Jehová kitekitiltia Biblia ika techmachtia kenon tikueyichiuaskej. San uelis tipakiskej niman kuajli tomachiliskej ipan tonemilis tla tijkauiliaj Jehová matechyekana ika iTlajtol Biblia niman ikalpan.

7. ¿Tlenon techmachtia itech ken onochijchiuj Biblia?

⁷ Biblia yemelak se tetlayokolijli tlen ualeua itech toTajtsin. Sekimej ixtlamatkej kijtouaj ika Biblia san kipiya amoxtin itech judíos niman itech akin okichiujkej ken Cristo tlen okitlalijkej tlakamej yeuejkaui. San ika, toTajtsin okinemili akinomej kimijkuiloskej yejon amoxtin, kemanon kimijkuiloskej niman tlenon kijkuiloskej. Ipampa yejuin nochi amoxtin itech Biblia techpaleuiya matikasimakatikan tlenon kineki techijlis toTajtsin. Peua itech Génesis niman ontlami ipan Apocalipsis noso Revelación, Biblia techititia ika nemiskia se tekoneuj akin kichiuaskia manokuepa tlaltikpaktli oksejpa se xochitlalpan. Niman tejuamej yotomachtijkej ika yejuin tekoneuj yeskia Jesucristo niman ika yejua yeskia tekiuaj akin kiteititis ika san Jehová kimelaua matlayekana ipan iluikamej niman ipan tlaltikpaktli (xpoua Génesis 3:15; * Mateo 6:10, TNM; * Apocalipsis 11:15).

8. ¿Tlenon teititia ika israelitas melak kuajli ken noyekanayaj?

⁸ Israelitas noyekanayaj ika Tlanauatijli tlen okimakakej Moisés. Se neskayotl, nemiyaj siuamej akin okintlalijkaj makichiuakan tekitl itenko  kampa nosentlaliayaj (Éxodo 38:8). Israelitas noijki kipiayaj tlanauatiltin itech kenon kejkuaniskej inkaluan niman tabernáculo ijkon ken kinamiki. Sakin, tekiuaj David okintlali teopixkej niman levitas makichiuakan tekitl ken kinamiki ipan teopan (1 Crónicas 23:1-6; 24:1-3). Ijkuak israelitas kitlakamatiyaj Jehová, yejua kinteochiuaya. Yejuamej noyekanayaj ken kinamiki, kipiayaj yolseuilistli niman san sekan nemiyaj (Deuteronomio 11:26, 27; 28:1-14).

9. ¿Kenon nesi ika ipan kachtopa siglo tlanechikoltin melak kuajli ken noyekanayaj?

⁹ Tlanechikoltin ipan kachtopa siglo noijki melak kuajli ken noyekanayaj. Nemiya se grupo akin tlayekanaya ipan nochi tlanechikoltin ipan yejon tonaltin. Ika ipeujyan, yejuin grupo katka itlatitlankauan Cristo. Sakin noijki opeuj teuan nopouaj oksekimej tlayekankej ipan yejon grupo (Hechos 6:1-6; 15:6). Jehová okinyekan tokniuan itech yejon grupo niman oksekimej tokniuan akin imiuan tekitiyaj makijkuilokan amatlajkuiloltin ika tlajtolpaleuilistli niman makitemakakan tlanauatiltin ipan tlanechikoltin (1 Timoteo 3:1-13; Tito 1:5-9). ¿Kenon okinpaleui tlanechikoltin tlayekanalistli tlen okiselijkej itech grupo akin kinyekanaya?

10. ¿Tlenon panouaya ijkuak tlanechikoltin ipan kachtopa siglo kichiuayaj tlanauatiltin tlen kitemakaya grupo akin kinyekanaya? (Xkita tlaixkopinajli kampa peua tlen tomachtijtokej).

¹⁰ (Xpoua Hechos 16:4, 5). Ipan kachtopa siglo, sekimej tokniuan kintlapalouayaj tlanechikoltin niman ijkon kimijliskej “tlanauatiltin yejuan otlanauatijkej on apóstoles niman [...] tlayekankej itech tokniuan yejuan nemiyaj ne Jerusalén” ken grupo akin tlayekanaya ipan nochi tlanechikoltin. Tlanechikoltin okichiujkej yejon tlanauatiltin niman yolchikauiyaj “ipan intlaneltok niman on tlaneltokakej mojmostla más miyekixtiayaj”. ¿Tlenon uelis tomachtiskej itech inneskayo tlen techpaleuis ipan yejuin tonajli ipan totlanechikol?

11. ¿Tlenon noneki kichiuaskej tlayekankej niman tlapaleuijkej ijkuak kiseliaj tlayekanalistli itech ikalpan toTajtsin?

¹¹ Grupo akin tlayekana ipan se Sucursal, tlayekankej ipan circuito niman tlayekankej ipan tlanechikojli noneki kitlakamatiskej tlayekanalistli tlen kiseliaj itech ikalpan toTajtsin. Kema, amoxtli tlen ualeua itech toTajtsin techijlia tinochimej matikintlakamatikan akin tlayekanaj (Deuteronomio 30:16; Hebreos 13:7, 17). Akin nemij itech toTajtsin xkixnamikij itlayekanalis nion xkualanij itech tlayekanalistli tlen kiseliaj. Tejuamej xtiknekij tikchiuaskej ken Diótrefes akin xkintlakaitaya tokniuan akin tlayekanayaj (xpoua 3 Juan 9, 10). Ijkuak tikchiuaj tlayekanalistli tlen tikseliaj, titlapaleuiyaj maonia yolseuilistli ipan tlanechikojli niman san sekan matinemikan. Ika yejon, uelis totlajtoltiskej: “¿Nikinpaleuiya nokniuan maka keman makikauakan Jehová? ¿Nimantsin nikchiua tlayekanalistli tlen nikselia itech ikalpan Jehová?”.

12. ¿Kenon kintlaliaj tlayekankej niman tlapaleuijkej aman?

¹² San kemach, Grupo akin Tlayekana ipan nochi tlanechikoltin okipatlak ken kintlaliaj tlayekankej niman tlapaleuijkej ipan se tlanechikojli. Ipan “Tlen notlajtoltiaj akin kitaj revistas” itech Amatl Tekakistilijketl 15 noviembre 2014, okijto ika ipan kachtopa siglo, grupo akin tlayekanaya ipan nochi tlanechikoltin okinnauatij tlayekankej ipan circuito yejuamej makintlalikan tlayekankej niman tlapaleuijkej. Kuakon, ipan septiembre xiuitl 2014, tlayekankej ipan circuito opeuj kichiuaj yejuin tekitl. Ijkuak tlayekankej ipan se tlanechikojli kijtouaj ika se tokniuj kichiua tlen notlajtlani niman ijkon uelis nochiuas tlayekanketl noso tlapaleuijketl, tlayekanketl ipan circuito nochikaua kixmatis yejon tokniuj niman ichanejkauan. Se neskayotl, yejua uelis iuan tenojnotsas yejon tokniuj (1 Timoteo 3:4, 5). Kuakon tlayekanketl ipan circuito niman tlayekankej ipan tlanechikojli nosentlaliaj. Yejuamej melak kuajli kitaj tlenon kitlajtlani iTlajtol toTajtsin itech akin uelis nochiuas se tlayekanketl noso tlapaleuijketl (1 Timoteo 3:1-10, 12, 13; 1 Pedro 5:1-3).

13. ¿Kenon uelis tikteititiskej ika tikchiuaj tlayekanalistli tlen tikseliaj itech tlayekankej?

¹³ Tlayekankej kitemakaj tlayekanalistli tlen kisa  itech Biblia pampa kinekij kuajli kitlajpiyaskej tlanechikojli. Kuakon tejuamej noneki tikintlakamatiskej pampa tlen techijliaj techpaleuis (1 Timoteo 6:3). Ipan kachtopa siglo, nemiyaj sekimej akin xnoyekanayaj ken kinamiki. Yejuamej xtlaj tekitl kichiuayaj niman san nokalaktiayaj kampa xnonekiya. Kuakon tlayekankej kiyejyekouayaj kinyektlaliskej, san ika, yejuamej xkinekiyaj noyektlaliskej. Pablo okimijli tokniuan ipan tlanechikojli kenon nonekiya kimitaskej ijkuak okijto: “Xpiakan cuidado akinon [ijkon kichiua], niman ma ka sa xchiuilikan cuenta”. Xok nonekiya imiuan manouikakan akin ijkon kichiuayaj, san ika, yejuin xkijtosnekiya tla kintlauelitaskiaj (2 Tesalonicenses 3:11-15). Tlayekankej ipan yejuin tonajli noijki kiyejyekouaj kipaleuiskej se akin xkikaki itlanauatiluan toTajtsin, ken ijkuak se peua kisa iuan yakaj akin xiteixpantijkauj Jehová (1 Corintios 7:39). Tla yejon tlaltikpakchane xkineki kipatlas ken noyekana, tlayekankej uelis kinemiliskej ika kuajli tla kitemakaj se tlamachtijli ipan tlanechikojli kampa kijtoskej ika akin ijkon noyekana uelis kichiuas ika maka kuajli matlajtokan itech tlanechikojli. Tla tlayekankej kitemakaj se tlamachtijli ken yejuin, ¿tlenon tikchiuaskej? Tla tejua tikmati akinon yejon tlaltikpakchane, ¿tijkajkauas ika iuan timosentlalis? Tla ijkon tikchiuaj, kanaj uelis tikpaleuiskej makita ika ken noyekana uelis kijtlakos niman xkiyolpaktia Jehová, niman kanaj hasta uelis kipatlas ken tlanemilia ^[1](xkita nota kampa ontlami).

14. ¿Kenon uelis titlapaleuiskej maonia chipauak tlanechikojli?

¹⁴ Uelis tinochimej titlapaleuiskej ika tlanechikojli maonia chipauak ijkuak tiktlakamatij iTlajtol toTajtsin. Matikitakan tlenon onochiuj ipan Corinto. Pablo yotenojnotska chikauak ipan yejon ueyikalpan niman kintlasojtlaya tokniuan. Yejua yokinpaleuijka miyekej manomachtikan tlen melauak (1 Corintios 1:1, 2). Kanaj melak ouijtika kitaya kiyektlalis tlen nochiujtoya ipan tlanechikojli: notekauiliaya manochiua auilnemilistli. Pablo okimijli tlayekankej: “Xmaktilikan Satanás on tlakatl” akin ijkon kichiua. Yejuamej nonekiya kikixtiskej itech tlanechikojli yejon tlaltikpakchane (1 Corintios 5:1, 4, 5, 7, 12, 13). Ipan yejuin tonajli, tlayekankej uelis kinemiliskej ika yakaj noneki kisas itech tlanechikojli pampa yokichiuj ueyi tlajtlakojli niman xnoyolkuepa. Ijkuak ijkon panos, ¿tikitaskej akin kisa itech tlanechikojli ijkon ken techijlia iTlajtol toTajtsin? Tla ijkon tikchiuaj, titlapaleuiskej ika tlanechikojli maonia chipauak. Noijki uelis tikpaleuiskej yejon tlaltikpakchane makasikamati ika noneki noyolkuepas niman kitlajtlanilis Jehová makitlapopolui.

15. ¿Kenon uelis nochipa onias yolseuilistli ipan tlanechikojli?

¹⁵ Ipan tlanechikojli Corinto onkatka se ueyi tlauejli tlen nonekiya makiyektlali Pablo: sekimej kinuikayaj imikniuan itech tekiuajkej. Pablo okintlanemililti ika yejuin tlajtoltin: “Más kuajli nenkimokauiliskej ma mechkuilikan itlaj” (1 Corintios 6:1-8). Ipan yejuin tonajli, kemantika noijki ijkon nochiua. Popoliui yolseuilistli itech tokniuan ijkuak xkuajli onkisaj imiuan akin tekitij, kanaj kipolouaj tomin niman kinemiliaj ika se san okinejnemili kenon kikuilis tomin okse. Sekimej hasta yoyajkej yonoteiluijkej itech tekiuajkej. San ika, amoxtli tlen ualeua itech toTajtsin techpaleuiya matikasikamatikan ika melak kuajli matikpolokan tomin xijkon ken tiktsokuiloskej tlanechikojli noso tikpoloskej yolseuilistli ^[2] (xkita nota  kampa ontlami). Tla tiknekij tikyektlaliskej uejueyimej tlaueltin, noneki tikchiuaskej tlen okijto Jesús (xpoua Mateo 5:23, 24; 18:15-17). Ijkuak tikchiuaskej yejuin tlajtolpaleuilistli, uelis touikaskej san sekan ipan tlanechikojli.

16. ¿Tleka itekipanojkauan toTajtsin san sekan nemij?

¹⁶ ITlajtol toTajtsin techijlia tleka noneki tikchiaskej ika ikalpan san sekan manemikan ijkuak kijtoua: “¡Xkitakan! ¡Melak kuajli niman teyolpakti ika ikniujtin san sekan manemikan!” (Salmo 133:1). Ijkuak israelitas kitlakamatiyaj Jehová, noyekanayaj ken kinamiki niman san sekan nemiyaj. ToTajtsin okijto tlen panoskia itech ikalpan: “San sekan nikinsentlalis, kentla borregos ijkuak kimejyeuaj, kentla ijkuak nemij kampa sakatl” (Miqueas 2:12). Jehová noijki okijto tlen nochiuaskia ika tlayekapan itech ikalpan, ika nomachtiskiaj tlen melauak itech iTlajtol, kitekichiuiliskiaj niman san sekan nemiskiaj. Yejua okijto: “Nejua nikpatlas intlajtol tlaltikpakchanejkej ika se chipauak tlajtojli, ika yejon nochimej yejuamej kiteneuaskej itokayo Jehová, niman ijkon kitekichiuiliskej san sekan” (Sofonías 3:9). ¡Melak tiktlasojkamatij ika ueli tikueyichiuaj Jehová san sekan!

17. ¿Tlenon noneki kichiuaskej tlayekankej ijkuak yakaj ipan tlanechikojli kichiua ueyi tlajtlakojli?

¹⁷ Tla yakaj kichiua se ueyi tlajtlakojli, tlayekankej noneki nimantsin kiyektlaliskej ika tlasojtlalistli. Yejuamej kimatij ika Jehová kineki ika makitlajpiyakan tlanechikojli itech nochi tlen xkuajli tlen uelis kijtlakos, niman ijkon chipauak onias tlanechikojli niman san sekan nemiskej (Proverbios 15:3). Pablo melak kintlasojtlaya ikniuan ipan tlanechikojli Corinto niman okinyektlali ijkuak nonekiya, ijkon kijtoua ipan kachtopa amatlajkuilojli tlen okimijkuilouili. Tikmatstokej ika tlayekankej okichiujkej nimantsin tlen okimijli Pablo pampa ijkuak yopanoka seki metstin, yejua okimijli ika kuajli itech tlen okichiujkej ipan ika ome amatlajkuilojli tlen okimijkuilouili. Tla se tokniuj “kichiua itlaj tlajtlakojli” niman nion xkimati, tlayekankej noneki kiyektlaliskej ika tlasojtlalistli (Gálatas 6:1).

18. a) ¿Kenon iTlajtol toTajtsin okinpaleui tlanechikoltin ipan kachtopa siglo? b) ¿Tlenon tikitaskej ipan okse tlamachtijli?

¹⁸ Kuajli nesi ika akin kichiuayaj ken Cristo ipan kachtopa siglo onoyekankej ika amoxtli tlen ualeua itech toTajtsin. Ika yejon ipan tlanechikoltin onkatka chipaualistli, yolseuilistli niman san sekan nemiyaj (1 Corintios 1:10 Efesios 4:11-13; 1 Pedro 3:8). Niman kuajli okisatoj yejon tokniuan pampa ouelkej otenojnotskej “nochiuiyan imanyan yejua in tlaltikpaktli” (Colosenses 1:23). Ipan yejuin tonajli, itekipanojkauan Jehová noijki san sekan nemij niman noyekanaj ken kinamiki niman tenojnotsaj kuajli tlajtoltin ipan nochi tlaltikpaktli. Ipan okse tlamachtijli, tikitaskej tlen teititia ika melak tiknekij tikueyichiuaskej Jehová akin Ueyixtika niman tiktlakamatiskej itlayekanalis tlen techmaka ipan Biblia, amoxtli tlen ualeua itech (Salmo 71:15, 16).