1-3. a) ¿Kanaj tlenon opanok iuan Evodia niman Síntique? b) ¿Tlenon uelis tikchiuaskej niman ijkon maka maonia tlauejli ken yejon? (Xkita tlaixkopinajli kampa peua tlen tomachtijtokej).

TEJUAMEJ melak tiktlasojkaitaj Biblia pampa tikmatij ika ualeua itech toTajtsin. Biblia kipiya tlajtolpaleuilistli tlen techpaleuis maka tikpiyaskej tlauejli niman techyektlalia ijkuak topopolouaj. Kuakon, ¿kenon noneki tikitaskej tlajtolpaleuilistin? Matitlanemilikan itech ome tokniuan siuamej akin onenkej ipan kachtopa siglo, Evodia niman Síntique. Biblia kijtoua ika yejuamej onokualanijkej, san ika, xtlaj techijlia tleka. Matikonnemilikan kanaj tlenon ouel opanok.

² Kanaj Evodia okinnots sekimej tokniuan ipan ichan matlakuatij. San ika, xokinots Síntique. Sakin, ijkuak Síntique okinkak oksekimej kijtouayaj kenon okuelilijkej tlakuajli, yejua melak okualan. Kanaj yejua okinemili: “Xueli nikneltoka ika Evodia xonechnots. Niknemiliaya ika melak kuajli touikaj”. Síntique kimachiliaya ika Evodia kitlauelitaya niman xkinekiya iuan nemis. Kuakon Síntique okinnots sa noyejuamej matlakuatij ichan, san ika, xokinots Evodia. Yejuin tlen opanok kanaj okichiuj ika maka maonia yolseuilistli ipan tlanechikojli. Biblia  kijtoua ika Pablo okinyektlali niman okinyolchikauj manoyolseuikan. Yejuamej okikajkej tlen okimijli niman okitekichiuilijkej Jehová ika tlayekapan ika paktli (Filipenses 4:2, 3).

³ Aman ipan totlanechikol, kemantika noijki uelis tikpiyaskej se tlauejli iuan se tokniuj. San ika, tla tikchiuaj tlen kijtoua Biblia, uelis tikyektlaliskej tlaueltin niman hasta uelis tikchiuaskej maka maonia tlauejli. Ijkuak tiktlakamatij tlen kijtoua Biblia, tikteititiaj ika melauak tiktlasojkaitaj amoxtli tlen ualeua itech toTajtsin (Salmo 27:11).

4, 5. ¿Katlejua tlajtolpaleuilistli tlen tiknextiaj ipan iTlajtol toTajtsin techpaleuis matikteltikan ken tomachiliaj?

⁴ Kemantika melak ouijtika tikteltiskej ken tikmachiliaj. Kanaj uelis melak tajmanaskej noso tikualaniskej tla yakaj itlaj otechijli noso otexchiuili tlen xkinamiki pampa oksekan tiualeuaj, tlamantik noso sejneka ken tinesij. Niman yejon uelis melak techyolkokos tla akin ijkon texchiuilia se tokniuj. ¿Tlenon tlajtolpaleuilistli uelis techpaleuis?

⁵ Jehová kimati tlen uelis panos ijkuak tlaltikpakchanejkej xkiteltiaj ken nomachiliaj. Ijkuak tikualanij, uelis tikijtoskej noso tikchiuaskej itlaj tlen sakin tikitaskej ika xnonekiya matikchiuakan. Ipan Biblia, Jehová techijlia tlenon tikchiuaskej ijkuak tikmachiliaj tlauejli ijkuak kijtoua: “Maka nimantsin xkualani”. Melak titlapaleuiskej maka maonia tlauejli ijkuak tiktlakamatij yejon tlajtolpaleuilistli niman ijkuak xnimantsin tikualanij (xpoua Eclesiastés 7:9; * Proverbios 16:32). * Biblia noijki techijlia ika matikintlapopoluikan oksekimej. Jesús okijto ika tla xtikintlapopoluiyaj oksekimej, Jehová xuelis techtlapopoluis (Mateo 6:14, 15). Kanaj nonekis tikpiyaskej ijyouilistli niman tiknektoskej tikintlapopoluiskej.

6. ¿Tlenon ueliskia panos tla xtikteltiaj ken tomachiliaj?

⁶ Tla xtikteltiaj ken tomachiliaj, uelis xkuajli tomachiliskej niman hasta uelis peuas tikualaniskej iuan yakaj. Niman yejon uelis kichiuas ika sekimej ipan tlanechikojli noijki ijkon manomachilikan. Maski tikyejyekoskej tikiyanaskej ika tikualanij, oksekimej sakin kitaskej kenon tomachiliaj. Kuakon tokniuan nion xkinekiskej touan nemiskej (Proverbios 26:24-26). Tlayekankej ipan tlanechikojli kitekitiltiskej Biblia ika techpaleuiskej matikpopolokan tlauejli niman tikintlapopoluiskej oksekimej (Levítico 19:17, 18; Romanos 3:11-18). Ijkuak tikchiuaskej yejuin, tikchiujtoskej tlen kijtoua amoxtli tlen ualeua itech Jehová.

7, 8. a) ¿Kenon Jehová kiyekana ikalpan? b) Xteneua seki itech tlen technauatia Biblia matikchiuakan niman tleka noneki matikintlakamatikan.

⁷ Ipan yejuin tonajli, Jehová yejua kiyekana niman kimachtia seki itech ikalpan tlen onka ipan tlaltikpaktli. ¿Kenon? Yejua yokitlali “Cristo yejua tlayekanketl” itech tlanechikojli niman Jesucristo yokitlali “tekitketl” yolmelauak makimachti niman makiyekana ikalpan toTajtsin (Efesios 5:23; Mateo 24:45-47). Ijkon ken grupo akin otlayekan ipan kachtopa siglo, yejuin tekitketl yemelak kitlasojkaita Biblia pampa iTlajtol toTajtsin (xpoua 1 Tesalonicenses 2:13). Matikitakan itech seki tlemach ken techyekana Biblia.

⁸ Biblia techijlia matiuiyan ipan tlanechikoltin nochipa (Hebreos 10:24, 25). Noijki techtlajtlanilia tinochimej matikneltokakan tlen temachtia Biblia (1 Corintios 1:10). Niman techijlia matiknekikan kachtopa “[tik]chiuaskej nochi on tlen Dios [tech]nauatia” (Mateo 6:33). Biblia technauatia matitenojnotsakan techajchan niman nochiuiyan kampa nemij tlaltikpakchanejkej (Mateo 28:19, 20; Hechos 5:42; 17:17; 20:20).  Kimijlia tlayekankej ika makitakan tlanechikojli maonia chipauak (1 Corintios 5:1-5, 13; 1 Timoteo 5:19-21). Niman noijki techijlia matikpiyakan chipauak totlalnakayo niman maka matikpiyakan tlanemilijli noso tikchiuaskej tlen Jehová kitlauelita (2 Corintios 7:1).

9. ¿Akinon okitlali Jesús matechpaleui matikasikamatikan iTlajtol toTajtsin?

⁹ Sekimej tlaltikpakchanejkej kinemiliaj ika xnoneki yakaj makintomili tlen kijtoua Biblia. San ika, itech xiuitl 1919 ika tlayekapan, Jesús kitekitiltia “tekitketl” yolmelauak makinpaleui ikalpan toTajtsin makasikamati tlen Biblia temachtia niman kipaleuis makitlakamati. Ijkuak tiktlakamatij Biblia, titlapaleuiyaj maonia chipauak tlanechikojli, maonia yolseuilistli niman san sekan matinemikan. Kuakon, xmotlajtolti: “¿Xnijkaua Jesús niman nikchiua tlayekanalistli tlen kitemaka ‘tekitketl’ yolmelauak?”.

10. Seki itech ikalpan toTajtsin tlen onka ipan iluikak, ¿tlenon kijtoua amoxtli Ezequiel?

¹⁰ Ika tlen kijtoua Biblia tomachtiaj ika itekipanojkauan Jehová ipan iluikak noijki melak kuajli ken noyekanaj. Se neskayotl, Ezequiel okitak se tlatlachalistli ika Jehová kinejnemiltia se carro tlen ueliya nimantsin yaya kampa toTajtsin kinekiya mauiya (Ezequiel 1:4-28). Yejon carro kineskayotia seki itech ikalpan toTajtsin tlen onka ipan iluikak, tlen Jehová kiyekana. Niman yejon carro kipaleuiya seki itech ikalpan tlen onka ipan tlaltikpaktli. San matiknemilikan itech miyek tlen yonopatlak ipan ikalpan toTajtsin itech xiujtin tlen san kemach yotiuajpanokej. Matikilnamikikan ika Jehová kichiua tlen nopatla. Xuejkaujtipan Jesucristo iuan iluikaktekitkej kipopoloskej tlen kiyekana Satanás. Kuakon sa achijtsin poliui nochimej kitlakaitaskej itoka Jehová niman kiseliskej ika san yejua kimelaua matlayekana.

11, 12. ¿Tlenon youel yokichiuj ikalpan Jehová ipan yejuin tonaltin?

¹¹ Matiknemilikan tlen ikalpan Jehová youel yokichiuj ipan yejuin tonaltin. Kichijchiuaj kaltin. Melak miyekej tokniuan yotekitkej chikauak kichijchiuaskej oficina kampa noyekanaj nochi sucursales tlen kipiyaj iteixpantijkauan Jehová ipan Warwick (Nueva York, Estados Unidos). Melak miyekej oksekimej tokniuan ipan nochi tlaltikpaktli kinchijchiuaj Kaltin kampa Tosentlaliaj niman sucursales. Tlen kichiuaj yejon tokniuan kiyekana Departamento Mundial de Diseño y Construcción tlen onka Nueva York. Melak tiktlasojkamatij ika melak chikauak tekitij ika tlapaleuiyaj manochijchiuakan yejon kaltin uejueyimej. Niman itekipanojkauan Jehová akin nemij nochiuiyan kitemakaj tlen yejuamej kipiyaj ika tlapaleuiskej manochijchiuakan yejuin kaltin. Jehová kinteochiua itekipanojkauan pampa yolyemankej niman xkeman kikauaj (Lucas 21:1-4).

¹² Tlamachtijli. Jehová melak kineki kinmachtis itekipanojkauan (Isaías 2:2, 3). Matiknemilikan itech kampa tikseliaj tlamachtijli. Ken Tlamachtijli tlen kiselia se Precursor, Tlamachtijli tlen kiseliaj Akin Tenojnotsaj itech iTekiuajyo toTajtsin, iTlamachtil Galaad, Tlamachtijli tlen kiseliaj Yenkuikej Betelitas, Tlamachtijli tlen kiseliaj Tlayekankej ipan Circuitos iuan insiuauan, Tlamachtijli tlen kiseliaj Tlayekankej ipan tlanechikojli, Tlamachtijli itech iTekiyo Tekiuajyotl niman Tlamachtijli tlen kiseliaj Akin Tlayekanaj ipan se Sucursal iuan insiuauan. Niman noijki tikpiyaj página ipan Internet tlen otiktlapojkej, kampa uelis tiknextiskej Biblia niman okseki amatlajkuiloltin ika miyek tlajtoltin. Noijki yejon página kipiya tlamachtijli itech kokonej, familias niman itech tlen kemach panotika. ¿Yotiktekitilti jw.org ipan motenojnotsalis niman ijkuak tikueyichiua toTajtsin ken familia?

13. ¿Tlenon noneki tikchiuaskej aman pampa tinemij ipan ikalpan Jehová?

¹³ Se tlateochiualistli tinemiskej ipan ikalpan Jehová niman tikmatiskej tlenon yejua kineki matikchiuakan. San ika, pampa aman tikmatij  tlen kuelita, noneki tiktlakamatiskej niman tikchiuaskej tlen kuajli. Niman maski miyekej tlaltikpakchanejkej kuelitaj kichiuaskej tlen xkuajli, tejuamej noneki tiktlauelitaskej “tlen xkuajli” ijkon ken Jehová kitlauelita (Salmo 97:10). Tejuamej xkeman tiknekij tochiuaskej ken akin kinemiliaj “ika kuajli tlen xkuajli niman ika xkuajli tlen kuajli” (Isaías 5:20). Tejuamej tiknekij tikyolpaktiskej Jehová, ika yejon kuajli yotiknemilijkej ika tinemiskej tichipaujkej itech nochi (1 Corintios 6:9-11). Tlen Jehová techijlia ipan Biblia techpaleuiya. Noijki tiktlasojtlaj niman tiknekij nochipa itech tinemiskej. Ika yejon, tikchiuaj itlayekanalis ipan tochan, ipan tlanechikojli, kampa titekitij, ipan kaltlamachtijli noso san kanon kampa tinemiskej (Proverbios 15:3). Matikitakan seki kampa noneki tikteititiskej ika xtijkauaj toTajtsin.

14. ¿Kenon uelis tajtin kiteititiskej ika xkikauaj Jehová?

¹⁴ Tikimiskaltis mokoneuan. Tajtin kiteititiaj ika xkikauaj Jehová ijkuak kichiuaj tlen kijtoua iTlajtol toTajtsin itech kenon kimiskaltiskej inkoneuan. Noijki yejuamej noneki maka makikauilikan makinmaua ken tlanemiliaj miyekej tlaltikpakchanejkej ipan yejuin tonajli (Efesios 2:2). Se neskayotl, kanaj oksekan se tajtli uelis kinemilis ika nantli yejua kinmachtis inkoneuan pampa ompa ijkon kichiuaj. San ika, Biblia kuajli kijtoua ika tajtin yejua akin kinmachtis ikoneuan itech Jehová (Efesios 6:4). Tajtin niman nantin akin kitlasojtlaj Jehová kinekij ika inkoneuan kuajli iuan manouikakan, ijkon ken Samuel okichiuj ijkuak telpokatsin katka (1 Samuel 3:19).

15. ¿Kenon noteititia ika xtijkauaj Jehová ijkuak kitlapejpeniaj itech tlenon tikchiuaskej tlen ueyi kijtosneki?

¹⁵ Ijkuak tiktlapejpeniskej tlen tikchiuaskej. Ijkuak tiktlapejpeniskej tlen ueyi kijtosneki tikchiuaskej ipan tonemilis, tikteititiskej ika xtijkauaj Jehová tla tiktejtemouaj tlenon kinemilia. Ikalpan toTajtsin niman iTlajtol uelis techpaleuis.  Se neskayotl, ipan yejuin tonajli, sekimej tajtin niman nantin yauej ipan okse país ontekitij. Ijkuak ompa nemij, kinemiliaj kintitlaniskej inkoneuan ipan inpaís kampa nemij inchanejkauan. Ijkon omemej ok uelis tekitiskej niman kitlaniskej tomin. Tikmatij ika yejuin se san iselti noneki kitlapejpenis tlenon kichiuas, san ika, tajtin uelis notlajtoltiskej: “¿Tlenon kinemilis Jehová itech tlen niktlapejpenis nikchiuas?” (xpoua Romanos 14:12). Melak kuajli yes tla kachtopa tiknemiliaj tlenon kijtoua Biblia niman ijkon tiktlapejpeniskej tlenon tikchiuaskej itech tochanejkauan niman totekiyo. Noneki tijkauiliskej toTajtsin matechpaleui pampa xuelis toyekanaskej san tejuamej (Jeremías 10:23).

16. ¿Tlenon okitlapejpeni kichiuas se nantli ijkuak otlakat ikoneuj niman tlenon okipaleui makichiua tlen kuajli?

¹⁶ Se siuatl iuan iueuentsin okipixkej inkoneuj ipan okse país niman okinemilijkej kititlaniskej ipan país kampa yejuamej ualeuaj niman ijkon iabuelos makiskaltikan ikoneuj. Ipan yejon tonaltin siuatl opeuj nomachtia Biblia iuan iteixpantijkauan Jehová. Kuakon opeuj kasikamati ika toTajtsin yokimakak se tekitl ika yejua makimachti ikoneuj itech Jehová (Salmo 127:3; Proverbios 22:6). Yejua okichiuili teoyotl Jehová ijkon ken kijtoua iTlajtol (Salmo 62:7, 8). Noijki otlajto iuan akin kimachtiaya itech Biblia niman iuan oksekimej tokniuan ipan tlanechikojli. Maski ichanejkauan niman akin imiuan nouikaya kichiualtiayaj ika makititlani ikoneuj kampa nemij iabuelos, yejua okasikamat ika yejon xkinamikiya kichiuas. Niman iueuentsin melak okimojkaitak tlapaleuilistli tlen okiseli isiuauj niman ikoneuj. Ika yejon, opeuj nomachtia Biblia niman imiuan opeuj yauj ipan tlanechikojli. Kuajli nesi ika yejuin nantli okitak kenon Jehová okinankili teoyotl tlen okichiuili ika nochi iyojlo.

17. ¿Tlenon yotechijli ikalpan Jehová itech akin tikinmachtiaj itech Biblia?

¹⁷ Ijkuak ikalpan toTajtsin techijlia itlaj. Noijki tikteititiaj ika xtijkauaj ikalpan toTajtsin ijkuak tikchiuaj tlen techijlia ikalpan itech kenon tikinpaleuiskej akin tikinmachtiaj itech Biblia. Se neskayotl, yotechijli tlen noneki tikchiuaskej ijkuak yopeuj tomachtiaj iuan yakaj ika amoxtli ¿Tlenon melauak temachtia Biblia? Noneki ipan seki minutos nochipa ijkuak yotitlankej tomachtiaj iuan, matiknojnotsakan itech ikalpan toTajtsin. Uelis tiktekitiltiskej video ¿Tlenon nochiua kampa tosentlaliaj? niman amatlajkuilojli ¿Akinomej kichiuaj tlen kineki Jehová ipan yejuin tonajli? Sakin ijkuak yotlan tomachtiaj nochi amoxtli ¿Tlenon melauak temachtia Biblia?, uelis tikpaleuiskej akin tikmachtiaj itech Biblia melak machikaui itlaneltokil ijkuak tomachtiskej iuan amoxtli Nochipa xnemikan itech itlasojtlalis toTajtsin, niman noijki uelis nomachtis se yejuin amoxtli maski yonoapolakti (Colosenses 2:7). ¿Tikchiujtokej yejuin tlen techijlia ikalpan Jehová?

18, 19. ¿Tleka noneki tiktlasojkamachiliskej Jehová?

¹⁸ Onka miyek tleka matiktlasojkamachilikan Jehová. Matiknemilikan, ika san ipampa yejua tiyoltokej “niman titoliniaj niman tinemij” (Hechos 17:27, 28). Yejua yotechmakak Biblia, amoxtli tlen ualeua itech. Ijkon ken akin kichiuayaj ken Cristo akin chanejkej Tesalónica, tejuamej melak tiktlasojkaitaj yejuin tetlayokolijli pampa tlen kijtoua ualeua itech toTajtsin (1 Tesalonicenses 2:13).

¹⁹ Biblia yotechpaleui matonisiuikan itech Jehová niman yejua yononisiui totech (Santiago 4:8). Melak tiktlasojkamatij ika toTajtsin yotechnots noijki matinemikan itech ikalpan. Tejuamej tomachiliaj ken salmista ijkuak okijkuilo: “Xtlasojkamachilikan Jehová, pampa yejua yolkuajli; itlasojtlalis tlen xtekaua nochipa onias” (Salmo 136:1). Ipan nochi tlaxeloltin pitentsitsintin itech yejuin salmo, salmista miyekpa okijto tlajtoltin “itlasojtlalis tlen xtekaua nochipa onias”. Kema, tla xkeman tijkauaj Jehová niman tikchiuaj itlayekanalis tlen techmaka ikalpan, yejua techmakas nemilistli tlen xkeman tlamis niman nochipa touan nemis.