MELAK techyolseuiya niman techyoltlalia ijkuak yakaj texchiuilia itlaj tlen kuajli. Ijkuak tikitaj ika yakaj najmana topampa niman techpaleuiya, melak tiktlasojkamatij. Kema, melak tikuelitaj ijkuak techititiaj iknelilistli. ¿Kenon uelis tikiskaltiskej yejuin kualneskayotl?

Iknelilistli kijtosneki timajmanas inpampa oksekimej, kema, tiknekis ika oksekimej kuajli manemikan. Noteititia ika tlajtoltin tlen teyolchikauaj niman ika tlen tikchiuaj. Yejuin se kualneskayotl tlen kuajli nesi, xsan kijtosneki tikteititis ika titetlakaita niman kuajli titenotsa. Tla melak titetlasojtla niman titeasikamati, uelis tikteititis iknelilistli. Niman xsan yejon, iknelilistli noteneua ipan itlakilyo espíritu santo, niman akin tikchiuaj ken Cristo kipiya ika tikiskaltiskej (Gál. 5:22, 23, TNM). Kuakon, matikitakan kenon Jehová niman iKoneuj yokiteititijkej yejuin kualneskayotl niman kenon tejuamej noijki uelis ijkon tikchiuaskej.

Jehová yolkuajli niman kimasikamati nochimej, maski akin “xitlaj kitlajsojkamatij” niman akin “xkuajkualtin tlakamej” (Luc. 6:35). Se neskayotl, Jehová kichiua ika “on tonaltsintli ma kisa impan on yejuan xkuajkualtin tlakamej niman yejuan kuajkualtin. Niman no kichiua para kiaui impan on yolchipajkej niman yejuan xyolchipajkej” (Mat. 5:45). Akin xkinekij kiseliskej ika Jehová yejua akin otexchijchiuj noijki kinpaleuiya tlen yejua techmaka, niman ijkon uelis nemiskej niman pakiskej.

Itech tlen Jehová okinchiuili Adán niman Eva, tikitaj ika yejua melak teiknelia. Sakin ika yejuamej otlajtlakojkej, Adán niman Eva okimijtsonkej ixiujyo higokojtli niman ika onotlapachojkej. San ika, Jehová kimatstoya ika nonekiskia kitlaliskej okse intlaken tlen kinpaleuiskia pampa xok chantiskiaj ipan Xochitlalpan Edén, niman tlajli kampa aman chantiskiaj melak xkuajli katka pampa onkatka uitstli niman xiujtli tlen uitsyo. Kuakon, Jehová okimititi iknelilistli niman okinchijchiuili intlakenueyak ika inkuetlaxio yolkamej (Gén. 3:7, 17, 18, 21).

Jehová kimiknelia nochimej, maski “on yejuan xkuajkualtin tlakamej niman yejuan kuajkualtin”, san ika, melak kineki kimititis iknelilistli itekipanojkauan akin yolmelaujkanemij. Se neskayotl, ipan tonaltin ijkuak nemiya Zacarías, se iluikaktekitketl melak najmantoya pampa yonoteltijka ika kichijchiujtoyaj teopan tlen onkatka Jerusalén. Jehová okikak tlen kajmanaya yejon iluikaktekitketl niman okinankili ika iknelilistli niman okijli tlajtoltin tlen okiyolchikauj (Zac. 1:12, 13). Jehová noijki ijkon okichiuili teotlajtoketl Elías. Yejon teotlajtoketl melak onajmanka niman okitlajtlanilijka Jehová makikuili inemilis. Jehová kuajli okasikamat kenon nomachiliaya Elías niman okititlanili se iluikaktekitketl niman ijkon makiyolchikaua. Noijki, okasikamachilti Elías ika xsan iselti nemiya. Sakin ika okipaleuijkej Elías niman okijlikej  yejon kualtsitsintin tlajtoltin, yejua ouel okichiuj itekiyo (1 Rey. 19:1-18). Itech nochimej itekipanojkauan toTajtsin, ¿akinon melak kuajli okiteititi iknelilistli?

Ijkuak otenojnotstinen ipan yejuin tlaltikpaktli, Jesús kixmatiyaj ika yolkuajli katka niman teasikamatiya. Yejua xkeman tenotsaya ika chikauak tlajtoltin nion xsan tenauatijtoya. Yejua oteikneli ijkuak okijto: “Xuajlakan notech nemochimej yejuan yonensiaukej pampa hasta aman xnenkinextiaj temakixtilistli niman pampa on tlajtlamach tepajsoloualistin sanoyej mechyetiliaj, niman nejua nemechmakas neseuijli” (Mat. 11:28-30). Pampa yejua teikneliaya, tlaltikpakchanejkej kitokayaj Jesús maski san kanon yaya. Yejua okintlakualti pampa okimikneli, okinpajti akin kualouayaj niman akin xkojtikej katkaj, niman okinmachti miyek tlemach itech iTajtsin (Mar. 6:34; Mat. 14:14; 15:32-38).

Tikitaj ika Jesús melak oteikneli pampa ijkuak teuan nonojnotsaya yejua teasikamatiya niman techiuiliaya tlen kuajli. Maski ijkuak kinekiya noseuis, yejua kinseliaya ika iknelilistli nochimej akin kitejtemouayaj (Luc. 9:10, 11). Se neskayotl, se siuatl akin yotlajyouijka 12 xiuitl, okinisiui Jesús niman okajsik itlaken pampa okinemili ika ijkon pajtiskia itech ikokolis. Yejua xueliskia kichiuaskia yejon pampa yejua tsokuiltik katka ijkon ken kijtouaya tlanauatijli (Lev. 15:25-28). San ika, Jesús xokajuak, okikneli niman okijli: “Nokoneu, otipajtik pampa otitlaneltokak. Xuiya ikan yolseuilistli. On kualolistli xok tikpia” (Mar. 5:25-34). ¡Tikitaj ika melak oteikneli!

Neskayomej tlen yotikimitakej kuajli techititiaj ika iknelilistli se kualneskayotl tlen noteititia ika tlen tikchiuaj. Pampa Jesús kinekiya kuajli techasikamachiltis yejuin, otlajto itech se samaritano akin kuajli okichiuj. Maski samaritanos niman judíos xnouikayaj, samaritano tlen Jesús okiteneuj okikneli se judío akin okitlachtekilijkej, okiuisojkej niman okitlajkaltejkej sotlajtok. Yejon samaritano okipajti, okuikak kampa ueliskia noseuis niman otlatlaxtlauj niman ijkon makitlajpiyakan. Hasta okiteijli ika tla nonekiya okse itlaj, yejua kitlaxtlauaskia (Luc. 10:29-37).

Melauak ika iknelilistli noteititia ika tlen tikchiuaj, san ika, noijki noteititia ika tlajtoltin tlen teyolchikauaj niman teyolseuiyaj. Kema, maski “tlen kajmankamiktia iyojlo se tlakatl yejon tlen kajmana”, Biblia kijtoua ika “kuajli tlajtojli yejon tlen kiyolpaktia” (Prov. 12:25). Iknelilistli niman yolkuajlilistli techpaleuis matikinyolchikauakan oksekimej ika tlajtoltin tlen kiteititiaj ika tajmanaj inpampa. * Yejuin melak kinyolchikauas niman ijkon ueliskej kixnamikiskej tlaueltin ipan innemilis (Prov. 16:24).

Pampa titlachijchiujtin ken “itlachialis toTajtsin”, tinochimej uelis tikiskaltiskej yejuin kualneskayotl (Gén. 1:27). Matikimitakan seki neskayomej tlen nesij ipan Biblia. Pablo, itlatitlankauj Cristo, okuikakej Roma niman se soldado romano itoka katka Julio kitlajpixtiaya. Yejuin soldado melak kuajli ken okichiuili Pablo pampa “okauilij para ma kinnotsati itetlajsojkauan” niman ijkon ueliskej kipaleuiskej ipan ueyikalpan Sidón (Hech. 27:3). Sakin, akin chantiyaj atlajkotian Malta melak okiknelijkej Pablo niman oksekimej akin iamimiktoyaj. Otlatlatijkej niman ijkon manototonikan, niman melak okinpaleuijkej (Hech. 28:1, 2). Tikitaj ika melak kuajli tlen okichiujkej. San ika, tikteititis iknelilistli xsan kijtosneki kemantika tikchiuas tlen kuajli.

Tla melak tiknekij tikyolpaktiskej Jehová, kipiya ika nochipa tikteititijtoskej yejuin  kualneskayotl tlen ualeua itech toTajtsin. Melauak ika kemantika techtekiyomakas tikchiuaskej tlen kuajli inpampa oksekimej. ¿Tleka? Kanaj pampa miyekej xkinekij matitenojnotsakan, pampa xmelak titenotskej noso kanaj pampa ok san totech titlanemiliaj. San ika, uelis tijkauaskej nochi yejuin tla tiktlajtlanij espíritu santo niman tla tikchiuaj ijkon ken Jehová (1 Cor. 2:12).

¿Tlenon okseki tlemach tlen kuajli uelis tikchiuaskej inpampa oksekimej? Kipiya ika totlajtoltiskej: “¿Niteasikamati ijkuak nikinkaki oksekimej? ¿Nikitstika tlenon kinpoloua? ¿Kemanon onikchiuj itlaj tlen kuajli ipampa akin xnochanejkauj noso ipampa akin xiuan ninouika?”. Noijki, uelis tiknemiliskej tikchiuaskej okseki tlemach, ken kuajli tikimixmatiskej oksekimej. Kema, melak kuajli tla tikimixmatij tokniuan ipan tlanechikojli. Ijkon, kuajli tikmatiskej tlenon inpan nochiujtok niman tlenon kinpoloua. Sakin, matikinchiuilikan tlen tejuamej tiknekiskiaj matexchiuilikan (Mat. 7:12). Sa ika tlami, matiktlajtlanilikan Jehová matechpaleui, niman yejua techteochiuas pampa tokojtiliaj titeikneliskej (Luc. 11:13).

Pablo, itlatitlankauj Cristo, se kuajli neskayotl pampa okichiuj tlen kuajli inpampa oksekimej. Biblia kijtoua ika Pablo kuajli kinseliaya nochimej akin yayaj itech (Hech. 28:30, 31). Najmanaya inpampa oksekimej niman kiteititiaya ika itlajtoluan niman ika tlen kichiuaya. Ika yejon, tlaltikpakchanejkej kinekiyaj yaskej itech. Noijki ijkon, tlen tikchiuaj uelis kinyoltilanas oksekimej makiselikan tlen melauak. Tla nochimej tikinchiuiliaj tlen kuajli, maski akin kixnamikij tlen tikneltokaj, uelis yemanis inyojlo niman uelis nopatlaskej (Rom. 12:20). Sakin, hasta yejuamej noijki uelis kinyoltilanas tlen kijtoua iTlajtol toTajtsin.

Ipan xochitlalpan tlen iyejkotika, melak miyekej yoliuiskej niman melak pakiskej ijkuak kinchiuiliskej tlen kuajli, kanaj yejuamej xkeman ijkon okinchiuilijkaj. Pampa kitlasojkamatiskej, noijki ijkon kichiuaskej. Jehová kinmakas nemilistli tlen xkeman tlamis akin tetlasojtlaskej niman akin teasikamatiskej. San ika, akin xkinekiskej kichiuaskej yejuin, Jehová xkinkauilis machantikan ipan xochitlalpan (Sal. 37:9-11). ¡Tikpiyaskej yolseuilistli niman xtomojtiskej ijkuak tichantiskej ipan xochitlalpan! San ika, achto ika yejkos yejon tonajli, ¿kenon techpaleuiya aman tikteititiskej iknelilistli?

Biblia kijtoua ika akin teasikamatij niman akin kichiuaj tlen kuajli, sa no yejuamej nopaleuiyaj (Prov. 11:17). Tlaltikpakchanejkej kinekij kinnisiuiskej niman kinekij kichiuaskej ken yejuamej. Jesús okijto ika ken tejuamej tiktemakaj, noijki ijkon techmakaskej (Luc. 6:38). Niman akin ijkon kichiuaj nimantsin kinnextiaj akin imiuan nouikaskej.

Pablo, itlatitlankauj Cristo, okimijli tokniuan akin chantiyaj Éfeso: “Nemejuamej xtenotsakan, niman xmoyolyemanilikan iuan oksekimej, niman xmotlapojpoluikan iuan oksekimej” (Efes. 4:32). Ipan tlanechikoltin, melak tepaleui ika tokniuan manasikamatikan niman manopaleuikan. Yejuamej xkeman tekamanaluiyaj noso kiteijliaj itlaj tlen teyolkoko, nion xnotejteneuaj. Xtetlajtolchijchiuilijtinemij, yejuamej nokojtiliaj kiteijliskej tlen teyolchikaua (Prov. 12:18). Niman yejuin kichiua ika tokniuan ipan tlanechikoltin machikaui intlaneltokil.

Kema, iknelilistli noteititia ika tlajtoltin niman ika tlen tikchiuaj. Ijkuak titeikneliaj, tikchiuaj ken Jehová akin tetlasojtla niman akin kuelita kitetlayokolis (Efes. 5:1). Noijki, tikinpaleuiyaj tokniuan ipan tlanechikojli machikaui intlaneltokil niman tikinpaleuiyaj oksekimej noijki makinekikan kitekichiuiliskej toTajtsin. Yejua ika, matokojtilikan nochipa matikteititikan yejuin kualneskayotl.