Matitlaneltokakan itech Jehová niman tikpiyaskej nemilistli
“Xtlaneltoka itech Jehová ika nochi moyojlo, niman maka xmopaleui san ipan motlamachilis” (PROV. 3:5).
1. ¿Tleka noneki ika tinochimej matechyolseuikan?
NONEKI ika tinochimej matechyolseuikan. Kanaj mojmostla tikixnamiktokej tlen kichiua matajmanakan, matoyolkokokan niman matitlajyouikan. Kanaj titlajyouiyaj pampa yotiueuentsintiakej, pampa tikpiyaj se kokolistli noso pampa miki se akin tiktlasojtlayaj. Sekimej titlajyouiyaj pampa tlaltikpakchanejkej texchiuiliaj tlen xkuajli. Mojmostla miyekixtiuj tlen xkuajli ipan yejuin tlaltikpaktli. Kema, tlen panotika ipan yejuin xkuakualtin tonaltin techititia ika tinemij itlamiyan tonaltin niman ika iajsitika yejon tonajli ijkuak tinemiskej ipan se yenkuik tlaltikpaktli (2 Tim. 3:1). Maski ijkon, kanaj yotiuejkaujkej tikchiatokej ika toTajtsin makichiua tlen yokijto niman kanaj mojmostla miyekixtiuj totlaueluan. Kuakon, ¿kanon uelis tiknextiskej yolseuilistli?
2, 3. a) ¿Tlenon tikmatstokej itech Habacuc? b) ¿Tleka tomachtiskej amoxtli Habacuc?
2 Tomachtiskej amoxtli Habacuc niman ijkon tiknankiliskej yejuin tlajtoltilistli. Maski Biblia xmiyek techijlia itech teotlajtoketl Habacuc, iamox melak techyolchikaua. Itokayo kanaj kijtosneki “Tlanapalojli”. Yejuin uelis kichiuas matiknemilikan ome tlemach. Uelis tiknemiliskej ika Jehová technapaloua niman ijkon techyolseuis, noso uelis tiknemiliskej ika itekipanojkauan chikauak najsitokej itech niman ika itech tlaneltokaj. Teotlajtoketl Habacuc okinots Jehová niman okichiuili seki tlajtoltilistin. Jehová okinankili niman okichiuj makijkuilo nochi tlen okijtokej pampa kimatstoya ika yejuin techpaleuiskia (Hab. 2:2).
3 Biblia xmiyek techijlia itech yejuin teotlajtoketl, san kijtoua kenon iuan ononojnots Jehová. Yejuin amoxtli, yeuejkaui onoijkuilo niman onka ipan iTlajtol toTajtsin, “onijkuiloj para ma tikpiakan totlamachalis itechkopa on ijyouilistli niman teyoltlalilistli yejuan techmaka on Yektlajkuilojli” (Rom. 15:4). ¿Kenon techpaleuiya amoxtli Habacuc? Kachtopa, techpaleuiya matikasikamatikan tlenon kijtosneki titlaneltokas itech Jehová. Ika ome, techmelajkaijlia ika uelis tikpiyaskej yolseuilistli maski san katlejua tlauejli tikixnamiktoskej. Aman ika itikmatstokej yejuin, matomachtikan amoxtli Habacuc.
MATIKNOTSAKAN JEHOVÁ
4. ¿Tleka Habacuc melak najmanaya?
4 (Xpoua Habacuc 1:2, 3). * Ipan itonaluan Habacuc, melak nochiuaya tlen xkuajli. Yejua melak najmanaya pampa tlaltikpakchanejkej kichiuayaj tlen xkuajli niman san nokalaktiayaj ipan tlauejli. ¿Kemanon popoliuiskia tlen xkuajli? ¿Tleka Jehová xtlaj kichiuaya? Maski san kanon ontlachiaya, Habacuc kitaya ika sa no ichanikniuan israelitas kinochiuiliayaj tlen xkuajli niman sa no yejuamej tetlajyouiltiayaj. Yejua kimachiliaya ika xakaj ueliskia kipaleuis, kuakon, okitlatlaujti Jehová itlaj makichiua. Habacuc kanaj yopeujka kinemiliaya ika Jehová xkajmanaya tlen nochiujtoya niman ika melak nouejkaujtoya. ¿Kemantika ijkon yotomachilijkaj?
5. ¿Tlenon tiuelij itech tlen kijtoua amoxtli Habacuc? (Xkita tlaixkopinajli kampa peua tlen tomachtijtokej).
5 ¿Xok tlaneltokaya Habacuc itech Jehová? ¿Kinemiliaya ika Jehová xkichiuaskia tlen yokijtoka? Ka, xijkon opanok. Habacuc kitlajtlanilijtoya Jehová makipaleui ika tlen xkasikamatiya niman ika itlaueluan, niman yejuin techititia ika yejua ok kineltokaya ika ueliskia noyektlalis tlen nochiujtoya. Habacuc najmanaya pampa xkasikamatiya tleka toTajtsin xitlaj kichiuaya niman tleka kitekauiliaya matlajyoui. Pampa toTajtsin okichiuj ika Habacuc makijkuilo tlen kajmanaya, tiuelij yejuin: xkipiya ika tomojtiskej tikijliskej tlen techajmana niman tlen xtikasikamatij. Niman hasta toTajtsin techijlia matikijlikan tlen techajmana (Sal. 50:15; 62:8). Proverbios 3:5 techijlia yejuin: “Xtlaneltoka itech Jehová ika nochi moyojlo, niman maka xmopaleui san ipan motlamachilis”. Kanaj Habacuc kixmatiya yejuin tlaxelojli niman kanaj okitlali ipan iyojlo.
6. ¿Tleka melak noneki matikchiuakan teoyotl?
6 Habacuc tlaneltokaya itech Jehová, akin iuan nouikaya niman akin iTajtsin katka. Ika yejon, yejua okinek kinotsas. Habacuc xokiyejyeko san iselti kiyektlalis tlen kixnamiktoya niman xsan noyolkokojtinemiya, okijli toTajtsin tlen kimachiliaya niman tlen kajmanaya. Tejuamej uelis tikchiuaskej ken yejua. Jehová, akin kikaki toteoyouan, techijlia matikititikan ika itech titlaneltokaj niman matikijlikan tlen techajmana (Sal. 65:2). Tla ijkon tikchiuaj, tikitaskej kenon Jehová kinnankilis toteoyouan. Tikmachiliskej kenon technapaloua ika tlasojtlalistli ijkuak techyolseuiya niman techyekana (Sal. 73:23, 24). Yejua techpaleuis matikasikamatikan kenon kita tlen tikixnamiktokej, maski san katlejua tlauejli tikpiyaskej. Ijkuak tikchiuiliaj teoyotl Jehová, kuajli nesi ika itech titlaneltokaj.
MATIJKAKIKAN JEHOVÁ
7. ¿Tlenon okijto Jehová ijkuak Habacuc okijli tlen kajmanaya?
7 (Xpoua Habacuc 1:5-7). * Habacuc yokijlika Jehová nochi tlen kajmanaya. San ika, kanaj notlajtoltiaya tlenon kijliskia Jehová. Pampa Jehová kentla se tajtli akin kintlasojtla niman kimasikamati ikoneuan, xokajuak Habacuc ijkuak kijlitoya tlen kimachiliaya. ToTajtsin kimatstoya ika Habacuc tlajyouijtoya niman kitlajtlantoya makipaleuikan. Kuakon, okijli tlen inpan nochiuaskia israelitas akin xyolmelaujkanemiyaj niman ika sa achijtsin poliuiya ika panoskia yejon. Kanaj Habacuc yejua akin kachtopa okijlikej ika popoliuiskia tlen xkuajli nochiujtoya ipan yejon tonaltin.
8. ¿Tleka okimojkatlachialti Habacuc tlen okijli Jehová?
8 Jehová okititi Habacuc ika kinektoya kipaleuis niman ika ijkon kichiuaskia. Yejon tlaltikpakchanejkej akin xkuakualtin katkaj xok uejkauiskia ika kintlajtlakolmakaskiaj. Ijkuak Jehová okijto “ipan nemotonaluan”, kijtotoya ika tetlajtlakolmakaskia ipan itonaluan teotlajtoketl Habacuc niman ipan intonaluan akin ijkuakon nemiyaj. Aman, ¿yejon tlen kichiaya makinankili Jehová? Ka. Tla ijkon panoskia, nochimej akin chantiyaj Judá melak tlajyouiskiaj. Caldeos noso babilonios nion xkitekichiuiliayaj Jehová, yejuamej xteikneliayaj niman melak xkuakualtin katkaj xijkon ken israelitas akin kixmatiyaj itlanauatil Jehová. Kuakon, ¿tleka Jehová kintekitiltiskia akin xkitekichiuiliayaj niman akin xteikneliayaj niman ijkon kitlajtlakolmakas ikalpan? ¿Kenon tomachiliskiaj tla tejuamej ijkon techijliskiaj?
9. ¿Tlenon onotlajtolti Habacuc?
9 (Xpoua Habacuc 1:12-14, 17). * Habacuc okasikamat ika Jehová kintekitiltiskia babilonios niman ijkon kintlajtlakolmakas akin xkuakualtin katkaj, maski ijkon, yejua ok mojkatlachixtoya. San ika, yejua okijli Jehová ika ok kitaya ken iTepetlauj (Deut. 32:4; Is. 26:4). Habacuc kuajli yokijtoka ika nochipa kineltokaskia ika toTajtsin tetlasojtla niman yolkuajli. Niman pampa Habacuc ijkon yokijtoka, onoyolchikauj oksejpa kinotsas Jehová. ¿Tleka toTajtsin kitekauilijtoya mamiyekiya tlen xkuajli ipan Judá? ¿Tleka xtlaj kichiuaya? ¿Tleka toTajtsin akin nochi ueli kichiua kixikouaya kitas ika miyekixtoya tlen xkuajli? ¿Tleka xtlaj kijtouaya ijkuak nochiuaya tlen xkuajli? Yejua se toTajtsin akin chipauak niman ixtololojuan “melak chipaujkej niman xuelis kitaskej tlen xkuajli”.
10. ¿Tlenon ueliskia topan nochiuas ijkon ken ipan onochiuj Habacuc?
10 Kemantika kanaj tomachiliskej ken Habacuc. Tijkakij tlen techijlia Jehová. Titlaneltokaj itech niman tikpouaj niman tomachtiaj iTlajtol, niman yejuin techmaka tlamachialistli. Tomachtiaj itech tlen yokijto kichiuas ipampa ken techyekana ikalpan. Maski ijkon, kanaj totlajtoltiaj: “¿Kemanon xok titlajyouiskej?”. Matikitakan tlen sakin okichiuj Habacuc niman matikitakan tlenon techmachtia.
MATITLAMACHIAKAN ITECH JEHOVÁ
11. ¿Tlenon okijto kichiuas Habacuc sakin ika okikak tlen okijli Jehová?
11 (Xpoua Habacuc 2:1). * Habacuc melak okipaleui ken ononojnots iuan Jehová pampa okichiuj makipiya yolseuilistli. Kuakon, yejua kuajli okijto ika kichiaskia yejon tonajli ijkuak toTajtsin kipaleuiskia. Yejon xsan itlaj tlen okimachilijtiuets pampa sakin okimelajkaijto: “Ika yolseuilistli nikchia mayejko tonajli ijkuak onias tlajyouilistli” (Hab. 3:16). Oksekimej itekipanojkauan toTajtsin noijki ijkon otlamachixkej niman nochipa otlaneltokakej itech Jehová. Tlen okichiujkej techmachtia matitlaxikokan niman matikchiakan yejon tonajli ijkuak Jehová techpaleuis (Miq. 7:7; Sant. 5:7, 8).
12. ¿Tlenon tiuelij itech tlen okichiuj Habacuc?
12 ¿Tlenon tiuelij itech tlen okichiuj Habacuc? Kachtopa, ika nochipa noneki tikchiuiliskej teoyotl Jehová, maski san tlenon tikixnamiktoskej. Ika ome, ika noneki tijkakiskej tlen techijlia Jehová ipan iTlajtol niman itechkopa ikalpan. Ika yeyi, ika noneki titlamachiaskej itech Jehová, noneki tikneltokaskej ika ijkuak nonekis, kipopolos tlen kichiua matitlajyouikan. Tla tikchiuaj nochi yejuin, tikpiyaskej yolseuilistli tlen techpaleuis matitlaxikokan ijkon ken Habacuc. Tlen tikchiaj manochiua tlayekapan techpaleuis matitlamachiakan, niman yejuin kichiuas matinemikan ika toyojlo maski tikpiyaskej tlaueltin. Noijki, tlen tikchiaj manochiua techpaleuis matikneltokakan ika toTajtsin iluikakchane techpaleuis (Rom. 12:12).
13. ¿Kenon Jehová okiyolseui Habacuc?
13 (Xpoua Habacuc 2:3). * Kuajli tikmatstokej ika Jehová oyolpak pampa Habacuc kinektoya kichias yejon tonajli ijkuak kipaleuiskia. ToTajtsin akin nochi ueli kichiua kitstoya tlenon kixnamiktoya Habacuc. Ika yejon, ika tlasojtlalistli okiyolseui niman okijli ika kinankiliskia tlen yokitlajtoltijka. Sa achijtsin poliuiya ika itlaueluan popoliuiskiaj. Kema, toTajtsin kijlitoya Habacuc: “Xtlamachia niman notech xtlaneltoka. Nejua nimitsnankilis maski nesis ika ninouejkaua”. Jehová okilnamikti ika yejua yokitlalijka se tonajli ijkuak kichiuaskia tlen yokijtoka niman okijli matlamachixto. Ijkuak ajsiskia yejon tonajli, teotlajtoketl kuelitaskia tlen nochiuaskia.
¿Tleka kuajli yotikijtokej ika chikauak tiktekichiuiliskej Jehová? (Xkita párrafo 14).
14. ¿Tlenon yotikijtokej tikchiuaskej ijkuak tikpiyaskej tlaueltin?
14 Tla tikchiaj yejon tonajli ijkuak Jehová techpaleuis niman tla kuajli tijkakij tlen techijlia, kuakon, itech titlaneltokaskej niman tikpiyaskej yolseuilistli maski tikixnamikiskej tlaueltin. Jesús okijto maka san matiknemilijtokan kemanon niman tlen tonajli uelis itlaj panos tla toTajtsin ok xitlaj kijtoua (Hech. 1:7). Matikneltokakan ika Jehová kimatstok kemanon kinamiki nokalaktis. Ika yejon, nochipa matitlaxikokan, matitlamachixtokan ika yolyemanilistli niman tlaneltokijli niman maka matosiaujkauakan. Aman ika xiyejko yejon tonajli, kuajli matiktekitiltikan totiempo niman chikauak matiktekichiuilikan Jehová (Mar. 13:35-37; Gál. 6:9).
JEHOVÁ KINMAKAS NEMILISTLI AKIN TLANELTOKAJ ITECH
15, 16. a) Itech tlen kijtoua amoxtli Habacuc, ¿tlenon yokijto kichiuas toTajtsin? b) ¿Tlenon tiuelij itech tlen yokijto kichiuas toTajtsin?
15 ToTajtsin yokijto ika akin yolmelaujki kipiyas nemilistli ipampa itlaneltokil niman ika ipan nochi tlaltikpaktli kixmatiskej iueyilis Jehová (Hab. 2:4, 14). Kema, toTajtsin yokimijli akin tlamachiaj niman akin itech tlaneltokaj ika kinmakas nemilistli tlen xkeman tlamis.
16 Matitlanemilikan itech tlen yokijto kichiuas toTajtsin tlen nesi ipan Habacuc 2:4. Yejuin melak ueyi kijtosneki niman hasta Pablo, itlatitlankauj Cristo, yexpa okiteneuj yejuin tlaxelojli ipan iamatlajkuiloluan (Rom. 1:17; Gál. 3:11; Heb. 10:38). Maski san katlejua tlauejli tikixnamikiskej, tla titlaneltokaj itech toTajtsin, tikitaskej kenon Jehová kichiua tlen yokijto. Jehová techijlia matitlanemilijtokan itech tlen tikchiaj manochiua tlayekapan, yejua xkineki san matitlanemilijtokan itech tlen amantsin tikixnamiktokej.
17. ¿Tlenon techmelajkaijlia amoxtli Habacuc?
17 Amoxtli Habacuc techmachtia itlaj akin tinemij itlamiyan tonaltin. Jehová kimijlia akin yolmelaujkej niman akin itech tlaneltokaj ika kinmakas nemilistli. Ika yejon, matikchikaujtokan totlaneltokil itech Jehová maski tikixnamikiskej tlauejli noso ajmantli. Jehová techmelajkaijlia itechkopa Habacuc ika yejua touan nemis niman ika techpaleuis. Ika tlasojtlalistli techtlajtlanilia itech matitlaneltokakan niman matikchiakan yejon tonajli ijkuak iTekiuajyo peuas kiyekanas tlaltikpaktli. Ijkuak ijkon panos, ipan yejuin tlaltikpaktli san nemiskej akin pakiskej niman yolseujkej yeskej, niman nochimej kiueyichiuaskej toTajtsin (Mat. 5:5; Heb. 10:36-39).
MATITLANELTOKAKAN ITECH JEHOVÁ IKA PAKILISTLI
18. ¿Kenon itlajtoluan Jehová okipaleuijkej Habacuc?
18 (Xpoua Habacuc 3:18, 19). * Itlajtoluan Jehová melak okipaleuijkej Habacuc. Yejua otlanemili itech nochi tlen kualtsin okichiuj Jehová ipampa ikalpan, niman yejuin okipaleui melak matlaneltoka itech toTajtsin. Maski kimatstoya ika ok tlajyouijtoskia seki tonaltin, yejua kuajli kimatstoya ika Jehová itlaj kichiuaskia niman ika xuejkauiskia. ¡Yejon melak okiyolseui! Habacuc xok notlajtoltiaya tlen panoskia, aman kineltokaya ika Jehová kimakixtiskia. Tlen okijkuilo ipan Biblia itech kenon melak tlaneltokaya itech Jehová, yejon se itech tlen melak noilnamiki. Miyekej ixtlamatkej kijtouaj ika tlen okijto Habacuc ipan tlaxelojli 18, kijtosneki ika Habacuc tsijtsikuiniskia niman nopapalakachoskia pampa yolpakiya ika tlen kichiuaskia iTajtsin. ¿Xmelak ika tlen okichiuj melak techpaleuiya? Jehová xsan yotechijli tlenon kualtsin kichiuas ika tlayekapan, yejua techmelajkaijlia ika tekititika niman ijkon kichiuas tlen yokijto.
19. ¿Kenon uelis tikpiyaskej yolseuilistli ijkon ken okipix Habacuc?
19 Kema, amoxtli Habacuc techmachtia itlaj tlen melak ueyi kijtosneki: kipiya ika titlaneltokaskej itech Jehová (Hab. 2:4). ¿Tlenon techpaleuis nochipa itech matitlaneltokatokan? Noneki melak kuajli iuan touikaskej. Kuakon, noneki tikchiuaskej yeyi tlemach. Kachtopa, noneki nochipa tikchiuiliskej teoyotl Jehová niman tikijliskej nochi tlen techajmana niman tlen techtekipachoua. Ika ome, noneki kuajli tikitaskej tlenon techijlia ipan iTlajtol niman tikchiuaskej ken techyekana ikalpan. Niman ika yeyi, ika tlaneltokijli niman ijyouilistli noneki tikchiaskej yejon tonajli ijkuak techpaleuis. Yejon tlen okichiuj Habacuc. Maski melak najmanaya ijkuak okipeualti iamox, ijkuak otlan okiteititi ika aman pakiya niman ika tlaneltokaya itech toTajtsin. Matikchiuakan ken yejua okichiuj niman ijkon noijki tikmachiliskej kenon toTajtsin technapaloua ika tlasojtlalistli. San yejua akin uelis techyolseuis ipan yejuin tlaltikpaktli tlen melak xkuajli.
^ párr. 4 Habacuc 1:2, 3: “2 ¿Kech uejkauis, Jehová, ika kipiya ika nitsajtsis manechpaleuikan, niman, tejua xtijkaki? ¿Kech uejkauis ika kipiya ika niktlajtlanis tlapaleuilistli ipampa tlen xkuajli nochiua, san ika, xtlaj tikchiua? 3 ¿Tleka tinexchiualtia manikita tlen xkuajli? ¿Niman tleka tikxikoua tikitas tlajyouilistli? ¿Tleka nixpan onka tlaixpolouilistli niman tlen xkuajli? ¿Niman tleka yomiyekiyak tlauejli niman tlauisokilistli?”.
^ párr. 7 Habacuc 1:5-7: “5 ¡Xkimitakan kalpamej niman kuajli xkitakan! Xmojkamikikan niman xmojkatlachiakan; pampa itlaj panos ipan nemotonaluan tlen xuelis nenkineltokaskej maski mechijliskej. 6 Pampa nejua nikchiuas ika caldeos manokuiteuakan, yejon kalpan tlen xteiknelia niman melak xkuajli. Yejuamej yauej kampa tlapatlako itech tlaltikpaktli niman ijkon kinoyaxkatiskej kampa chantilo tlen xintlatki. 7 Melak temojmotij niman tikinmakasis. Yejuamej kijtouaj tlenon melajki niman kitlaliaj intlanauatil”.
^ párr. 9 Habacuc 1:12-14, 17: “12 ¿Xtejua akin otinen melak yeuejkaui, oh Jehová? Oh noTajtsin, akin Tichipauak, tejua xtimiki. Oh Jehová, tejua otikintlali niman ijkon tikintlajtlakolmakas. NoTepetlauj, tejua otikintlali niman ijkon tikinmelajkatlalis. 13 Moixtololojuan melak chipaujkej niman xuelis kitaskej tlen xkuajli, niman xuelis tijkauilis maonia tlen xkuajli. Kuakon, ¿tleka tijkauilia manemi akin tekajkayaua niman xtlaj tikijtoua ijkuak se xkuajli tlakatl kitoloua akin melajkanemi xijkon ken yejua? 14 ¿Tleka tikchiua ika tlaltikpakchanejkej manemikan ken michimej tlen nemij ipan mar, ken tlajtlamach tlen notechiuilanaj niman tlen xakaj kinyekana? 17 Kuakon, ¿ok kitsonokijtos imatlauj? ¿Kipiya ika kinmiktijtos kalpamej niman nion xkiteititis teiknelilistli?”.
^ párr. 11 Habacuc 2:1: “Kampa nejua nitlajpiya ninotelketstos, niman ninokauas itech tepantli kampa uajtlajpiyalo. Nejua nitlatlachixtos niman ijkon nikitas tlenon kinekis manikteijli niman kenon nitlanankilis ijkuak nechyektlaliskej”.
^ párr. 13 Habacuc 2:3: “Pampa tlatlachalistli ok poliui ijkuak panos, niman isiujkan nejnentika hasta ijkuak nochiuas, niman xtechkajkayauas. Maski tla uejkauiskia, ¡xtlatlachixtia! Pampa melauak yejkos. ¡Xuejkauis ika yejkos!”.
^ párr. 18 Habacuc 3:18, 19: “18 San ika, nejua, melak niyolpakis itech Jehová, nejua melak niyolpakis itech noTajtsin akin notemakixtijkauj. 19 ToTeko Jehová, akin melak ueyixtika, yejua itech ualeua nokojtilis, niman yejua kichiuas ika nokxiuan manochiuakan ken ikxiuan se masatl, niman kichiuas maninejnemi kampa pani. Nikmaka akin tlayekana itech akin tlatsotsonaj ika cuerda”.
