Tikchiuas tlen kuajli: Itlaj tlen tejua noneki tiktlapejpenis
Tlen tejuamej tiktlapejpeniaj ika toyekanaskej, uelis techijtlakos noso techpaleuis. ToTajtsin Jehová kimatstok, ika yejon, kineki matoyekanakan ika tlen yejua techijlia.
Jehová kineki nochipa matiyolseujtokan niman matiyolpakikan.
“Nejua ninemoTEKO Dios. Nejua nemechititia tlen kuajli para nemejuamej; nemechyekana ipan on ojtli yejuan noneki nenkinejnemiskej. Tla nemejuamej nenkitlakamatiskiaj notlanauatiluan, sanoyej kuajli nennemiskiaj kenon ayajtok yejuan xkaman uaki, yejuan yej noskaltijtiu, niman nemomelajkanemilis, kojtik yeskia kenon iakoxonajlo on mar” (Isaías 48:17, 18).
Aman, miyekej kichiuaj tlen san yejuamej kinemiliaj ika kuajli. San ika, Jehová yejua kimati tlen uelis techpaleuis pampa yejua otexchijchiuj. Yejua kineki matokauilikan matechyekana pampa san ijkon kuajli tinemiskej. Tla tiktlakamatij toTajtsin, kuajli matikmatstokan ika nochi tlen tikchiuaskej kuajli onkisas, nochi tlen tiktlapejpeniskej kuajli yes niman kichiuas matiyolseujtokan niman matiyolpakikan.
Jehová xtechtlajtlanilia tlen xuelis tikchiuaskej.
“In tlanauatijli yejuan aman nemechnauatia xsanoyej ouijtikaj para nenkasikikamatiskej nion para nenkichiuaskej” (Deuteronomio 30:11).
Para tinemiskej ken toTajtsin kineki, kanaj nonekis tikpatlaskej ken titlanemiliaj niman tlen tikchiuaj. San ika, Jehová xtechtlajtlanilia tlen xuelis tikchiuaskej. Pampa yejua otexchijchiuj, kuajli kimatstok tlenon ueli tikchiuaj niman tlenon ka. Niman ijkuak kuajli tikixmatij, tikitaj ika “itlanauatiluan xyetikej” (1 Juan 5:3).
Jehová kijtoua ika kinpaleuis akin kinekij kitlakamatiskej.
“Pampa nejua nemoTEKO Dios, nemechmayantiu. Nejua nemechilia: ‘Maka xmomojtikan. Nejua nemechpaleuiya’” (Isaías 41:13).
Uelis tinemiskej ken toTajtsin kineki pampa yejua techpaleuis. Yejua kitekitiltia iTlajtol, Biblia, para techpaleuis, techyolchikauas niman techyolseuis.
Ipan nochi tlaltikpaktli miyekej yokitakej ika pampa kitlakamatij tlen Biblia kijtoua, aman más kuajli nemij. ¿Tikuelitaskia tikmatis tla noijki mitspaleuis Biblia? ¿Tikuelitaskia tikmatis tlen temachtia? Kanaj uelis tipeuas ika amatlajkuilojli ¡Nochipa uelis tiyolpakis! tlen tiknextis ipan jw.org niman xtiktlaxtlauas. Kipiya yejuin yeyi tlamachtiltin:
-
“¿Uelis mitspaleuis Biblia?”.
-
“Biblia techyolseuiya”.
-
“¿Uelis tikneltokas tlen kijtoua Biblia?”.
Ijkuak timomachtis iTlajtol toTajtsin, tikitas ika tlen ompa kijtoua hasta aman techpaleuiya niman “itlanauatiluan xkaman nopatlaskej; kisaj ipan tlen melauak niman ipan tlen melajki” (Salmo 111:8). Maski tlen kijtoua Biblia melak tepaleuiya, toTajtsin xkeman texchiualtia matiktlakamatikan (Deuteronomio 30:19, 20; Josué 24:15). Yejon itlaj tlen cada se noneki kitlapejpenis.
