Tikchiuas tlen kuajli: Tlen kuajli techyekana
Matikitakan naujkan kampa Biblia uelis techpaleuis niman techyekanas. Melak miyekej yokitakej ika yejuin melauak.
1. Namiktilistli
Xnochimej san noijki tlanemiliaj itech tlen noneki kichiuaskej akin yononamiktijkej. Niman melak miyek noijtoua itech tlenon noneki kichiuaskej para yolpakiskej.
TLEN BIBLIA KIJTOUA: “On tlakatl noneki kitlajsojtlas isiuau sano ijki ken yejua notlajsojtla, niman on siuatl no noneki kitlakaitas iueuentsin” (Efesios 5:33).
TLEN KIJTOSNEKI: ToTajtsin yejua akin okinnamikti kachtopa siuatl niman kachtopa tlakatl, ika yejon, kuajli kimatstok tlenon noneki kichiuaskej akin yononamiktijkej para yolpakiskej (Marcos 10:6-9). Se tlakatl niman se siuatl akin yononamiktijkej, más yolpakiskej tla cada se kinemilia tlenon noneki kichiuas para kuajli nemiskej, niman xsan tlanemilijtokej itech tlen uelis kiseliskej. Teueuentsin akin kitlasojtla isiuauj, kititia ika kitlasojtla ijkuak kuajli kinotsa niman kitlajpiya. Niman se tesiuauj akin kitlakaita iueuentsin, kititia ika kitlakaita ijkuak kipaleuiya ipan tlen kichiua niman noijki ijkuak kuajli kinotsa.
TLEN KIJTOUA BIBLIA TEPALEUIYA: Quang niman isiuauj Thi, akin ualeuaj Vietnam, xok kuajli nemiyaj niman kinemiliayaj ika xok yolpakiskiaj. Quang nochipa melak xkuajli kinotsaya isiuauj. Yejua kijtoua: “Xnechajmanaya kenon nomachiliaya Thi niman melak miyekpa onikpijpinaujti”. Thi kinekiya kikauas. Yejua kijtoua: “Nikmachiliaya ika xok ueliya itech nitlaneltokaya niman xniueliya niktlakaitaya”.
Sakin, Quang niman Thi opeuj nomachtiaj Biblia niman opeuj kichiuaj tlen kijtoua Efesios 5:33. ¿Kenon okinpaleui yejuin tlaxelojli? Quang kijtoua: “Yejuin tlaxelojli onechasikamachilti ika nonekiya kuajli niknotsas Thi niman nikititis ika niktlasojtla. Onikasikamat ika nonekiya nikmakas tlen kipolouaya, nikitas ika maka itlaj ipan manochiua niman nikchiuas ika kuajli manomachili. Nikita ika ijkuak ijkin nikchiua, yejua más nechtlasojtla niman nechtlakaita”. Thi kijtoua: “Mojmostla ninokojtilia niktlakaitas noueuentsin ijkon ken kijtoua Efesios 5:33, niman yejua kichiua manikmachili ika nechtlasojtla niman itech ika noyojlo ninemi”.
Tla tikneki más tikmatis itech tlenon uelis kinpaleuis akin yononamiktijkej, xuiya ipan jw.org niman xkita revista ¡Xtlachiakan! número 2 del 2018, tlen itoka “Ken uelis tiyolpakis iuan mofamilia”.
2. Ken timouika iuan oksekimej
Miyekej kinchiuiliaj tlen xkuajli akin xsan noijki ken yejuamej, akin ualeuaj okse país, akin kipiyaj okse religión, ipampa ken nesij niman tlakamej akin kinuelitaj tlakamej noso siuamej akin kinuelitaj siuamej.
TLEN BIBLIA KIJTOUA: “Kuajli xkintlakaitakan nochi tlakatl” (1 Pedro 2:17).
TLEN KIJTOSNEKI: Biblia temachtia ika xkuajli tla titechikoitaj, tla tikintlauelitaj akin ualeuaj okse país noso tla tikintlauelitaj tlakamej akin kinuelitaj tlakamej noso siuamej akin kinuelitaj siuamej. Niman noijki techmachtia ika noneki tikintlakaitaskej nochimej, maski tla xsan noijki ken tejuamej, maski san kanon maualeuakan noso maski tla kipiyaj tomin noso ka (Hechos 10:34). Tejuamej noneki nochimej kuajli tikinnotsaskej niman tikintlakaitaskej maski tla xtlaneltokaj ken tejuamej titlaneltokaj noso maski tla kichiuaj tlen tejuamej xtikuelitaj (Mateo 7:12).
TLEN KIJTOUA BIBLIA TEPALEUIYA: Desde ijkuak konetl katka, Daniel okititijkej ika nochimej akin ualeuayaj Asia ueliskia kixnamikiskej ipaís. Ika yejon, opeuj kintlauelita nochimej akin ualeuayaj Asia, niman hasta kiuijuikaltiaya teixpan. Yejua kijtoua: “Nejua niknemiliaya ika san nikpaleuijtoya nopaís niman xkeman oniknemili tla xkuajli tlen nikchiujtoya”.
Sakin, Daniel okimat tlen temachtia Biblia. Yejua kijtoua: “Ononek nikpatlas ken nitlanemiliaya. Onikasikamat ika toTajtsin nochimej san noijki kimita maski san kanon maualeuakan niman nejua ononek noijki ijkon nikimitas”. ¿Aman tlenon kinemilia Daniel ijkuak yakaj kixmati? Yejua kijtoua: “Aman xok san nikita kanon ualeua. Nejua nochimej nikintlasojtla. Niman nikinpiya noamigos akin miyekan ualeuaj”.
Tla tikneki tikmatis más itech yejuin, xuiya ipan jw.org niman xkita revista ¡Xtlachiakan! número 3 del 2020, tlen itoka “¿Kemanon xok titechikoitaskej?”.
3. Tomin
Miyekej kinemiliaj ika yolpakiskej niman kuajli nemiskej tla notomintiaj.
TLEN BIBLIA KIJTOUA: “In melauak pampa on tlamatkilistli tepaleuiya no ijki ken kichiua on tomin. Pero on tlamatkilistli más tepaleuij pampa kimanauiya inemilis on yejuan tlamatki” (Eclesiastés 7:12).
TLEN KIJTOSNEKI: Maski tomin kema tepaleuiya, xkichiuas matiyolpakikan niman xkichiuas kuajli matinemikan (Proverbios 18:11; 23:4, 5). San melauak uelis tiyolpakiskej niman nochipa kuajli tinemiskej tla tikchiuaj tlen toTajtsin techijlia ipan Biblia (1 Timoteo 6:17-19).
TLEN KIJTOUA BIBLIA TEPALEUIYA: Cardo, akin ualeua Indonesia, kinekiya notomintis, niman ouel onotominti. Yejua kijtoua: “Ueliya niaya kampa niknekiya niman nijkouaya tlen melak patioj, ken carros niman kaltin. Nejua nikpiaya nochi tlen oksekimej kinekiyaj”. San ika, nochi yejon nimantsin opopoliuj. Yejua kilnamiki: “Onechtlachtekilijkej niman nochi tomin tlen nikpiaya pampa chikauak onitekit, san opopoliuj. Nochi nonemilis oniknek ninotomintis niman aman xok itlaj nikpiaya, nochi onechkuilijkej niman melak oninoyolkoko”.
Cardo opeuj kichiua tlen Biblia kijtoua itech tomin. Aman xok kineki notomintis, aman yolpaki san ika tlen kipiya. Yejua kijtoua: “Onikitak ika más tepaleui niman más patioj tlen kijtoua Biblia. Aman kuajli nikochi niman yemelak niyolpaki”.
Tla tikneki tikmatis más itech tlen kijtoua Biblia itech tomin, xuiya ipan jw.org niman xkita tlamachtijli “¿Uelis kuajli tinemis tla timomachtia noso tla tikpiya miyek tomin?” ipan Amatl Tekakistilijketl número 3 del 2021.
4. Sexo
Ipan yejuin tonajli miyek tlen noijtoua ika kuajli itech sexo.
TLEN BIBLIA KIJTOUA: “Dios kineki maka xauilnemikan. Yej cada se ma kimati kenijki kipiyas isiuau ikan chipaualistli niman ikan tetlakaitalistli. Niman maka sanoyej xpiyakan on xkuajli eleuilistli ijkon ken kichiuaj on tlakamej” (1 Tesalonicenses 4:3-5).
TLEN KIJTOSNEKI: Biblia kuajli techijlia tlenon uelis tikchiuaskej ika tlen totlalnakayo kileuiya. Ijkuak Biblia kiteneua auilnemilistli, kiteneua se akin kikajkayaua ixnamik, akin tlakapapatla noso siuapapatla, ijkuak yakaj noteka iuan yakaj akin xiuan nonamiktia, ijkuak se tlakatl noteka iuan se tlakatl noso se siuatl noteka iuan okse siuatl niman ijkuak yakaj noteka iuan yolkamej (1 Corintios 6:9, 10). ToTajtsin kijtoua ika san akin yononamiktijkej uelis san sekan notekaskej, niman yejon uelis noitas ken se tetlayokolijli tlen ualeua itech toTajtsin (Proverbios 5:18, 19).
TLEN KIJTOUA BIBLIA TEPALEUIYA: Kylie akin chanti Australia, kijtoua: “Ijkuak xninonamiktiaya niknemiliaya ika tla ninotekaya iuan yakaj, yejon kichiuaskia ika kuajli maninomachili. San ika, xyejon opanok. Melak xkuajli ninemiya niman melak oninoyolkoko”.
Sakin, Kylie opeuj nomachtia Biblia niman opeuj kichiua tlen kijtoua Biblia itech sexo. Yejua kijtoua: “Yonikitak ika tlen kijtoua toTajtsin kichiua maka matitlajyouikan. Pampa nikchiua tlen Jehová kineki, aman kuajli ninomachilia niman nikmachilia ika nechtlasojtlaj. Pampa Biblia nechyekana, yejon yonechpaleui maka melak maninoyolkoko”.
Tla tikneki tikmatis más itech yejuin, xuiya ipan jw.org niman xkita tlamachtijli “¿Tlenon kijtoua Biblia intech akin san sekan nemij, san ika, xnonamiktiaj?”.
ToTajtsin akin otexchijchiuj techpaleuiya matikmatikan tlenon kuajli niman tlenon xkuajli. Kemantika ouijtika tikchiuaskej tlen technauatia, san ika, tla tikchiuaj, nochi kuajli onkisas. Kuajli matikmatstokan ika tla tiktlakamatij, nochipa tiyolpakiskej.
