Ipan miyek xiujtin, yejuin kokolistin melak miyekej okinmikti san pampa xkimatiyaj kenon nosemoyauaj. Sakin, ixtlamatkej okinextijkej tlen melauak niman okiteititijkej ika miyekej kokolistin ualeuaj itech gérmenes, bacterias niman virus. Yejuin tlen okinextijkej okichiuj manoita kenon maka techajsiskej kokolistin, kenon topajtiskej, kenon más uejkaujtipan tinemiskej niman maka sajnoye matikualokan.

Tla pampa onomat yejuin melak yotechpaleui, ¿tiknemilia ika noijki techpaleuis tla tiknankiliaj yejuin tlen kemantika totlajtoltiaj?

• ¿Akinon toTajtsin?

• ¿Akinon Jesucristo?

• ¿Tlenon kijtosneki iTekiuajyo toTajtsin?

• ¿Tlenon panos ika tlayekapan?

Melak miyekej yokinextijkej kenon nonankilia yejuin tlen notlajtoltiayaj niman yokitakej ika aman más kuajli nemij. Tejua noijki uelis mitspaleuis.

Kanaj tejua timotlajtoltia tla uelis tiknextis tlen melauak itech itlaj, pampa aman melak ouijtika tikmatis tlenon melauak niman tlenon xmelauak. ¿Tleka ijkon panoua?

Miyekej xok kineltokaj tla melauak tlen kijtouaj tekiuajkej, akin tlanemakaj noso akin kitemakaj noticias. Xok kimatij tla tlen kimijliaj melauak noso san yakaj ijkon kinemilia, noijki tla nochi kimijliaj noso tla san kinkajkayaujtokej. Pampa aman miyekej xok kineltokaj tlen noijtoua niman xnoijtoua tlen yemelak onochiuj, sekimej xok kimatij akinon kineltokiliskej niman xok kineltokaj tlen yemelak opanok.

Maski ijkon, tejua uelis tiknextis tlen melauak itech tlen tikneki tikmatis ipan monemilis. ¿Kenon? San noijki ken tiktejtemoskia itlaj tlen xtikmati.

Maski kanaj xijkon tikitaj, mojmostla tiktejtemouaj tlen melauak. San xtlanemili itech tlen ipan panoua Jessica, yejua noneki kitas ika nochi tlen kikoua maka makipiya tlalkakauatl. Yejua kijtoua: “Noichpokatsin melak kichiuilia tlalkakauatl, tla yejua kikuaskia maski san achijtsin hasta uelis kimiktis. Ika yejon, achto itlaj nijkouas, nikpoua tlenon ika tlachijchiujtli. Sakin más ninomachtia itech tlen kuajkui niman hasta nikominotsa akin okichijchiujkej pampa ijkon kuajli nikmatis tla tlen nijkouas xkipiya tlen ualeua itech tlalkakauatl. Noijki nikita tla akin okichijchiujkej tlen nijkouas yemelak kuajli kichijchiuaj tlen kinemakaj”.

Maski tejua kanaj xnoneki tikchiuas ijkon ken Jessica, noijki uelis titlatejtemos ijkon ken yejua, kuakon:

• Xtejtemo tlen tikneki tikmatis.

• Xtejtemo okseki tlen mitspaleuis.

• Kuajli xkita ika kampa titlatejtemoua yemelak tlen temachtia.

Tla ijkon tikchiua, uelis tiknextis tlen tikneki tikmatis. Matikitakan kenon.

Pampa Jessica kinekiya kimatis tlenon melauak temachtia Biblia, ononek kichiuas ijkon ken ijkuak kita tlen kikuas ikoneuj. Yejua kijtoua: “Pampa nikneki kuajli nikasikamatis tlen Biblia temachtia, kuajli nikpoua tlen kijtoua niman sakin niktejtemoua tlen xnikasikamati”. Melak miyekej noijki yokichiujkej ijkon ken Jessica niman yokitakej tlenon kijtoua Biblia itech yejuin:

• ¿Tleka otexchijchiujkej?

• ¿Tlenon panoua ijkuak timikij?

• ¿Tleka melak titlajyouiyaj?

• ¿Kenon toTajtsin kipopolos tlen techtlajyouiltia?

• ¿Kenon uelis tiyolpakiskej iuan tochanejkauan?

Tejua uelis tiknextis tlen melauak itech nochi yejuin tla tikpoua Biblia niman tla tikalaki ipan www.pr418.com/ngu.