¿Uelis tikneltokaskej ika nochiuas nochi tlen toTajtsin yokijto? Jesús kuajli kimatiya ika kema, niman ika itlamachtiluan okinchikauili intlaneltokil akin kikakiyaj. Xtlanemili itech yejuin neskayotl tlen okijto ipan Tlamachtijli ipan Tepetl tlen nesi ipan Mateo 5:18: “Ika tlen melauak nemechijlia ika xnokixtilis se letra nion se punto itlanauatil Dios chika onyas on cielo niman in tlaltikpaktli. Xitlaj nokixtilis hasta nochiuas nochi tlen onijkuiloj”.

Letra tlen melak pitentsin ipan tlajtojli hebreo itoka י (yod), niman ika yejuin peua Tetragrámaton, ken ika hebreo noijkuiloua Jehová, itokayo toTajtsin tlen chipauak. * Escribas niman fariseos xsan melak kiueyitayaj tlajtoltin niman letras itech iTlanauatil toTajtsin, noijki kinemiliayaj ika “se punto” melak ueyi kijtosnekiya.

Jesús okijto ika iluikak niman tlaltikpaktli ueliskiaj popoliuiskej, san ika, nochi tlen kijtouaya Tlanauatijli, nochiuaskia. Niman iTlajtol toTajtsin kuajli techijlia ika iluikak niman tlaltikpaktli tlen tikimitaj xkeman poliuiskej (Salmo 78:69). Ijkon tej, ijkuak Jesús okijto yejuin, oteasikamachilti ika nion se pitentsin tlajtojli itech Tlanauatijli san ijkon nokauas.

¿Kita Jehová itlaj tlen melak pitentsin? Kema. Xtlanemili itech yejuin: israelitas okimijlikej ika xnonekiya kipostekiliskej nion se iomiyo borreguito tlen nokuaya ipan Pascua (Éxodo 12:46). Yejuin ueliskia nesis ika xueyi kijtosneki. ¿Kasikamatiyaj tleka xnonekiya kipostekiliskej nion se iomiyo? Kanaj ka. San ika, Jehová kimatiya ika yejuin tlen pitentsin, katka se teotlajtojli, kampa noijtoua ika Mesías nion se iomiyo xkipostekiliskiaj ijkuak mikiskia ipan kojtli melaktik (Salmo 34:20; Juan 19:31-33, 36, TNM).

Itlajtoluan Jesús kichiua ika ijkon ken yejua, kuajli matikmatstokan ika nochi tlen Jehová yokijto, maski melak mapitentsin, nochiuas. ¡Letra tlen melak pitentsin ipan hebreo techititia ika ijkon yes!