Kuajli tlajtoltin tlen ualeuaj itech toTajtsin noteijlitika ipan nochi tlaltikpaktli ijkon ken okijto Jesús (Mateo 24:14, TNM). Ipan Biblia, amoxtli Daniel kijtoua ika yejuin Tekiuajyotl, toTajtsin kiyekantok. Ipan tlaxelojli ueyi 2 itech yejon amoxtli kipiya teotlajtoltin tlen tlajtouaj itech tekiuajkej akin opeujkej ipan yeuejkaui Babilonia niman tlami ipan totonaluan. Ipan tlaxelojli pitentsin 44 kijtoua ika sakin panos yejuin:

“Ipan itonaluan yejon tekiuajkej toTajtsin iluikakchane kitlalis se tekiuajyotl tlen xkeman kipopoloskej. Niman yejuin tekiuajyotl xpanos imak okse kalpan. Kinkuechos niman kinpopolos nochi tekiuajyomej, niman san yejua nochipa nemis”.

Yejuin niman okseki teotlajtoltin tlen kinteneua Biblia kijtoua kenon toTajtsin kinpatlas tekiuajyomej, ijkon tlayektlalis niman kichiuas maonia yolseuilistli ipan tlaltikpaktli. ¿Kenon yes tonemilis ijkuak techyekanas yejuin Tekiuajyotl? Matikitakan seki tlen yokijto toTajtsin kichiuas xuejkaujtipan.

• XOK ONIAS GUERRAS

  Salmo 46:9. ToTajtsin “kipopolos guerras ipan nochi tlaltikpaktli. Yejua kiposteki arco niman kitlajtlapana lanza; yejua kintlatia ika tlitl carros tlen ika tlauisokij”.

  Xkonemili kenon yeskia tlaltikpaktli tla nochi tomin tlen onka niman tlamachilistli tlen aman kitekitiltiaj ika kinchijchiuaj armas notekitiltiskia ika kinpaleuiskej tlaltikpakchanejkej. Yejuin tlen kichiuas iTekiuajyo toTajtsin ijkuak techyekanas.

• XOK ONIAS KOKOLISTLI

  Isaías 33:24. “Nion se tlaltikpakchane xkijtos: ‘Nikualo’”.

  Xkonemili kenon yes tlaltikpaktli ijkuak xok yakaj kualos ipan iyojlo, xok kipias cáncer nion diabetes nion okse tekokojkayotl. Kampa xok nonekiskej hospitales nion pajtli. Ipan nochi tlaltikpaktli xok yakaj kualos.

• XOK ONIAS APISTLI

  Salmo 72:16. “Onias miyek trigo ipan nochi tlaltikpaktli; inkuatipan tepemej melak tlatlakis”.

  Tlaltikpaktli melak tlatlakiltis niman ijkon nochimej kipiyaskej tlen kikuaskej niman nochiuiyan tlatlakis. Xok onias apistli nion xok yakaj kualos ipampa apistli.

• XOK ONIAS TEKOKOJKAYOTL, AJMANTLI NIMAN MIKILISTLI

  Apocalipsis (Revelación) 21:4. ToTajtsin “kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok”.

   Tlaltikpakchanejkej xok tlajtlakolejkej yeskej niman nemiskej nochipa ipan tlaltikpaktli tlen nochiuas se xochitlalpan. Yejuin tlen yokijto toTajtsin kichiuas pampa techtlasojtla.

¿Tiknemilia ika yemelak nochiuas? Maski miyekej tlaltikpakchanejkej kuelkakij tlen kijtoua Biblia, kitekiyomaka kasikamatiskej ika uelis nemiskej nochipa pampa xakaj kixmatij akin manemi nochipa.

Tlaltikpakchanejkej melak youejkaujkej kipiyaj tlajtlakojli niman mikilistli, ika yejon, kinemiliaj ika nochi tlen tikixnamikij ken tlajyouilistli, tekokojkayotl niman tlauejli tikinpiyaj pampa ijkon otexchijchiujkej. San ika, xyejuin tlen toTajtsin Jehová, Akin otexchijchiuj, kinekiya manochiua inpampa tlaltikpakchanejkej.

Itlaj tlen techpaleuis matikneltokakan ika yemelak nochiuas tlen yokijto toTajtsin, tiknextiaj ipan itlajtol kampa kijtoua: “Xnokuepas notech tla xtlaj nochiua, melauak kichiuas nochi tlen nejua nechyolpaktia, niman yemelak kuajli onkisas itech tlen nejua yoniktitlan manochiua” (Isaías 55:11).

Biblia kijtoua ika toTajtsin “xueli tekajkayaua” (Tito 1:2). Niman pampa yejua akin techijlia ika kichiuas nochi yejuin, kuajli tla titlanemiliaj itech yejuin tlajtoltilistin: “¿Yemelak uelis tinemiskej nochipa ipan tlaltikpaktli? ¿Tlenon noneki tikchiuaskej tla tiknekij tikseliskej tlen toTajtsin yokijto kichiuas?”. Ipan okseki páginas itech yejuin amatlajkuilojli, mitspaleuiskej tikinnankilis yejuin tlajtoltilistin.