Timiyekej yotikitakej kenon nochiujtok tlen xkuajli niman kenon yotlajyouijkej tlaltikpakchanejkej akin kipiyaj kuajli inyojlo. ¿Kemantika popoliuis tlen tetlajyouiltia niman nochi tlen xkuajli nochiua? Biblia kinankilia yejuin tlajtoltilistli niman techijlia tlenon noneki tikchiuaskej.

Xkita kenon Salmo 37 kinnankilia yejuin tlajtoltilistin tlen ueyi kijtosnekij:

• ¿Tlenon noneki tikchiuaskej ijkuak yakaj texchiuilis tlen xkuajli? (tlaxelojli pitentsin 1 niman 2).

• ¿Tlenon inpan nochiuas akin xkuakualtin? (tlaxelojli pitentsin 10).

• ¿Tlenon inpan panos ika tlayekapan akin yolmelaujkej? (tlaxelojli pitentsin 11 niman 29).

• ¿Aman tlenon noneki tikchiuaskej? (tlaxelojli pitentsin 34).

Tlajtoltin tlen onoijkuilojkej ipan Salmo 37 kuajli techititiaj ika akin tlamachia ipan Jehová niman kitlakamati, ika iyojlo nemis ika tlayekapan. Iteixpantijkauan Jehová ika inyojlo kinekiskej mitspaleuiskej xmomachti Biblia, ijkon tejua iuan mochanejkauan nenkimatiskej tlenon nenkichiuaskej niman ijkon ninemiskej ika nemoyojlo ika tlayekapan.