Tlen techijlia Biblia: “Maka sanoyej xnekikan nenkipiyaskej tomin. Yej xpakikan san  ika on tlen nenkipiyaj” (Hebreos 13:5).

Ipan yejuin tonaltin miyekej kinekij matikpiyakan miyek tlen nion xtechpoloua ipan tonemilis. San ika, Biblia kijtoua ika uelis tiyolpakiskej san ika tlen tikpiyaj. ¿Kenon?

Maka matiktlasojtlakan tomin. Sekimej akin sajnoye kinekij kipiyaskej tomin hasta yokinmasik kokolistli, kinkauaj inchanejkauan, inamigos niman xok kuajli nemij (1 Timoteo 6:10). ¡Melak ueyi tlen kipolouaj akin notomintisnekij! Noijki akin kitlasojtlaj tomin “xkaman yolpachiui” (Eclesiastés 5:10).

Se más tlasojti xijkon ken tlen kipiya. Melauak ika onka miyek tlemach tlen melak tepaleuiyaj, san ika, tlen tikpiyas xuelis mitstlasojtlas. Yejon san tlaltikpakchanejkej uelis kichiuaskej. Ijkuak tikpiyas se kuajli moamigo kichiuas xyolpaki (Proverbios 17:17).

Tlen techijlia Biblia: “On pakilistli [...] nochiua ken sen kuajli pajtli yejuan tepajtia” (Proverbios 17:22).

Ijkuak se ueli paki maski kualo, kipaleuiya ijkon ken se pajtli. San ika ¿kenon uelis tipaktoskej ijkuak tikualoj?

Matitetlasojkamachilikan. Ijkuak san tiknemilijtokej tlen techajmana, kichiua ika maka matikpiyakan se “tonajli yejuan kuajli” (Proverbios 15:15). Biblia kuajli techijlia tlenon noneki tikchiuaskej: “Xpiyakan tetlajsojkamachilistli” (Colosenses 3:15). Matiktlasojkamatikan nochi tlen kuajli tikpiyaj maski tla tikitaj ika melak pitentsin. Ijkon ken ijkuak kalaki tonaltsintli, ijkuak kualtsin ajakatika noso ijkuak yakaj touan uetska. Pampa yejuin uelis kichiuas ika kuajli matomachilikan.

Matikinpaleuikan oksekimej. Biblia kijtoua ika “más paki yejuan kitemaka xken on yejuan kiselia”, tejua uelis ijkon timomachilis maski tikualo (Hechos 20:35). Ijkuak oksekimej techtlasojkamachiliaj ijkuak itlaj tikchiuaj inpampa, melak tiyolpakij niman tikilkauaj tlen techajmana. Tla tikchiuaj itlaj tlen kinyolseuiya oksekimej, tejuamej noijki kuajli tomachiliskej.

Tlen techijlia Biblia: Nochipa xkitakan kenijki “nenkitlapejpeniskej on tlen más kuajli” (Filipenses 1:10).

Tla akin yononamiktijkej, xuejkaui san sekan nemij, uelis noxeloskej. Ika yejon, melak kuajli tla se teueuentsin niman se tesiuauj kachtopa kitlajpiyaj innamiktilis, niman kitaj ken itlaj tlen melak ueyi kijtosneki ipan innemilis.

San sekan itlaj xchiuakan. Maka san xchiua tlen tejua tikuelita, noneki xnemili tlenon san sekan uelis nenkichiuaskej. Biblia kijtoua ika “más kuajli omemej xken se san iselti” (Eclesiastés 4:9). Uelis nentlakualchiuaskej, nenpaxaloskej, nenkoniskej se café noso itlaj okse ika nemoyolpaktiskej.

Xmoititikan ika nemotlasojtlaj. Biblia kijtoua ika teueuentsin niman tesiuauj noneki notlasojtlaskej niman notlakaitaskej (Efesios 5:28, 33). Uelis nenkichikauaskej nemonamiktilis tla nemixuetskiliaj, nemonapalouaj ika tlasojtlalistli noso nenkimotlayokoliaj itlaj maski xpatioj. Niman se akin yononamikti noneki san notekas iuan ixnamik (Hebreos 13:4).