XKONNEMILI ika yakaj mitstlajtlajtouilijtika inemilis se siuatl akin nokuikatia niman melak kixmatij, niman kanaj hasta tikuelita se itlakuikal. Mitsijlia ika ijkuak konetl katka, kuelitaya nokuikatis, nochipa nomajmachtiaya niman ika yolik oueltiaj kuajli nokuikatis. Sakin, opeuj nokuikatia ipan iluimej niman ijkon okixmatkej ipan miyek kalpamej. Ijkuak ontlami akin mitsnojnotstika, mitsijlia ika yejon siuatl olamajtsintiak niman onomikili.

Tlen omitsijlijkej yemelak opanok, san ika, yejon tlakuikaketl xok nemi. Noijki ijkon ipan panoskia se tlamachtijketl, se tlapajtiketl noso se akin melak kixmatij. Maski miyek tlen okichiuj ijkuak yoltoya, kanaj timotlajtoltiskia, ¿tlenon okseki ueliskia kichiuas tla xmikiskia?

Teyolkoko tikijtoskej ika yejon tlen tinochimej topan nochiuas (Eclesiastés 9:5). Maski melak yotikyejyekojkej, xueli tikchiuaj ika maka matiueuentsintiakan nion matimikikan. Niman xsan yejon, hasta uelis san totoka tikpoloskej tonemilis ipampa se accidente noso se kokolistli. Ijkon ken kijtoua Biblia, tejuamej san “ken on ayautli yejuan uajnonextia pero nimantsin popoliui” (Santiago 4:14).

Pampa uelis san totoka timikiskej, miyekej kijtouaj: “Ma titlakuakan niman ma titlaonikan, pampa mostla timikiskej” (1 Corintios 15:32). ¿Xmelak ika ijkuak ijkon kijtouaj kiteititiaj ika kimatstokej ika mikiskej? Yejon kichiua matotlajtoltikan: ¿Tleka otinemikoj? Yejuin uelis panos ijkuak tikixnamikij itlaj tlen melak teyolkoko. ¿Kanon uelis tiknextiskej tlen uelis technankilis?

Ipan yejuin tonaltin miyekej kinemiliaj ika ciencia uelis kinpaleuis. Tlen yokinextijkej científicos niman tlapajtikej yokichiuj achijtsin mauejkaui matinemikan, niman seki ixtlamatkej kitejtemojtokej kenon más uejkauis tinemiskej. Maski ijkon, onka seki tlen xueli nonankilia: ¿Tleka tiueuentsintiaj niman timikij? ¿Ajsis tonajli ijkuak xok timikiskej? Tlamachtiltin tlen tikimitaskej itech yejon tlajtoskej, niman noijki technankiliskej tleka otinemikoj.