1. ¿Kenon noneki tomachiliskej pampa tikpiyaj tlaneltokijli?

XNOCHIMEJ kipiyaj tlaneltokijli (2 Tesalonicenses 3:2). San ika, Jehová kinmaka tlaneltokijli nochimej akin kiueyichiuaj (Romanos 12:3; Gálatas 5:22, TNM). Melak tiktlasojkamatij ika Jehová techmaka tlaneltokijli.

2, 3. a) ¿Katlejua tlateochiualistin tikseliaj pampa tikpiyaj tlaneltokijli? b) ¿Tlenon tlajtoltilistin tikinnankiliskej?

² Jehová okitemakak isenteKonetsin niman ijkon nochimej akin kipiyaskej tlaneltokijli kintlapopoluilis intlajtlakoluan. Ipampa yejuin uelis touikaskej iuan Jehová niman tikpiyaskej nemilistli tlen xkeman tlamis (Juan 6:44, 65; Romanos 6:23). Jehová melak yolkuajli iuan tlaltikpakchanejkej. Maski titlajtlakolejkej niman techmelaua timikiskej, yejua kita ika uelis tikchiuaskej tlen kuajli (Salmo 103:10). Ika yejon otechmachti itech Jesús niman itech uentli tlen okitemakak. Ijkuak opeuj noskaltia totlaneltokil itech Jesús niman opeuj tikchiuaj ken yejua, opeuj tikpiyaj tlamachialistli ika tikseliskej nemilistli tlen xkeman tlamis (xpoua 1 Juan 4:9).

³ San ika ¿tlenon okseki uelis tomachtiskej itech tlaneltokijli?  Tla tiknekij tikpiyaskej tlaneltokijli, ¿san kipiya ika tikmatiskej tlen toTajtsin yokichiuj topampa niman itech tlenon kichiuas ika tlayekapan? Noneki okseki tikchiuaskej. Matikitakan tlenon noneki.

4. ¿Tlenon tiknekiskej tikchiuaskej tla tikpiyaj tlaneltokijli?

⁴ Tla tikpiyaj totlaneltokil itech Jehová niman Jesús, xsan tikmatiskej tlenon yokichiujkej niman tlenon kichiuaskej topampa. Tiknekiskej ika nochi toyojlo toyekanaskej ijkon ken yejuamej techmachtiaj niman tikinpaleuiskej oksekimej noijki makimixmatikan. Pablo, itlatitlankauj Cristo, okijto: “Tla ikan mokamak tikijtos ika Jesús yejua moTeko, niman tla ipan moyojlo tikneltokas ika Dios okiyoliuitij niman oketsteu ipan itlalkon, timakisas. Ijkon nochiuas pampa ijkuak se tlakatl ikan iyojlo tlaneltoka, Dios kijtoua ika itlajtlakoluan yokitlaxtlau. Niman ijkuak ika ikamak teixpan kijtoua ika kineltoka Cristo, yejua makisas” (Romanos 10:9, 10; 2 Corintios 4:13).

5. ¿Tleka melak noneki tikpiyaskej tlaneltokijli? Xkijto ika se neskayotl tlenon noneki tikchiuaskej niman ijkon tikpiyaskej chikauak totlaneltokil.

⁵ Tla tiknekij tinemiskej nochipa ipan yenkuik tlaltikpaktli, noneki tikpiyaskej totlaneltokil niman nochipa machikauak. Tlaneltokijli yeskia kentla se xochitl. Tla tiknekij kuajli manesi niman maueyixtiuj, noneki nochipa tikatekiskej. Tla xijkon tikchiuaj, uakis niman mikis. Noijki ijkon, noneki ika totlaneltokil nochipa machikaujto niman maueyixtiuj (Tito 2:2; 2 Tesalonicenses 1:3; Lucas 22:32; Hebreos 3:12).

6. Ijkon ken kijtoua Hebreos 11:1 ¿tlenon ome kijtosneki tlaneltokijli?

⁶ Ipan Hebreos 11:1 (xpoua) Biblia kijtoua tlenon kijtosneki tlaneltokijli. Kachtopa, tlaneltokijli “kijtosneki ika tikyolmelajka matstokej ika tikseliskej on tlen tikchaj”. Yejuin tlen tikchiaj teuan nopoua tlen yokijto toTajtsin kichiuas ika tlayekapan. Se neskayotl, kuajli tikmatstokej ika popoliuis nochi tlen xkuajli niman ika onias se yenkuik tlaltikpaktli. Ika ome, “tlaneltoktli kijtosneki [...] ika tikmatij ikan nochi toyojlo” noso onka tlen techtlaneltokiltia ika yemelak “maski xtikitaj”. Seki itech tlen xtikitaj, san ika, tikmatstokej ika yemelak nemij yejuamej Jehová, Jesucristo, iluikaktekitkej niman Tekiuajyotl (Hebreos 11:3). ¿Kenon tikteititiaj ika tikpiyaj melauak tlaneltokijli itech tlen toTajtsin yokijto kichiuas niman ipan tlemach tlen xueli tikitaj? Tikteititiskej ipampa ken tinemij, tlen tikijtouaj niman tlen tikchiuaj.

7. ¿Kenon techpaleuiya ineskayo Noé matikasikamatikan tlenon kijtosneki tikpiyaskej tlaneltokijli? (Xkita tlaixkopinajli kampa peua tlen tomachtijtokej).

⁷ Ineskayo Noé techpaleuiya matikasikamatikan tlenon kijtosneki tikpiyaskej tlaneltokijli. Pablo, itlatitlankauj Cristo, okijto ika Noé “okitlakamat Dios, maski xe nesiya on tlen temojtij yejuan Dios okijlij nochiuas. Yejua okichijchiu se ueyi akajli yejuan ipan omakis iuan ichanchanejkauan” (Hebreos 11:7). Noé okineltokak nochi tlen Jehová okijli, ika yejon okichijchiuj se ueyi akajli. Kanaj akin nisiuj chantiyaj kitlajtoltiayaj tleka kichijchiujtoya. Kuajli tikmatstokej ika Noé okimijli pampa Biblia kijtoua ika “okiteijlij ken ijki se uelis kuajli nouikas ken noneki” (2 Pe dro 2:5). Yejua okimijli tlaltikpakchanejkej ika toTajtsin kuajkuiskia se apachiuilistli tlen ika kipopoloskia tlen xkuajli. Kanaj yejua okimijli ijkon ken Jehová yokijlika: “Tonajli ijkuak popoliuis tlen yoltok yoyejkok notech, pampa tlaltikpaktli tentika ika tlen xkuajli inpampa yejuamej”. Jehová noijki yokijlika Noé: “Kuakon, nikuajkuis se apachiuilistli ipan tlaltikpaktli niman nikpopolos nochi tlen onka itsintlan iluikak, nochi tlen yoltika niman nijyotia. Nochi tlen onka ipan tlaltikpaktli popoliuis”. Sakin kanaj Noé opeuj kintomilia tlaltikpakchanejkej tlenon nonekiya makichiuakan niman ijkon makisaskej. Jehová yokijlika: “Kipiya ika tikalakis itech akajli” (Génesis 6:13, 17, 18).

8. ¿Tlenon okijto Santiago itech tlaneltokijli?

⁸ Santiago noijki otlajto itech tlaneltokijli. Kanaj okichiuj ijkuak san kemach Pablo yokintlajkuilouilijka hebreos akin kichiuayaj ken Cristo. Santiago okijto: “Xnechititi motlaneltok xiuan on tlen kuajli yejuan tlajtlamach tikchiua, niman nejua nimitsititis notlaneltok itechkopa on kuajli tlajtlamach yejuan nikchiua” (Santiago 2:18). Okiteasikamachilti ika tikpiyas tlaneltokijli xsan kipiya ika tikneltokaskej ika nemi toTajtsin noneki okseki tikchiuaskej. Xkuakualtin espíritus kimatstokej ika toTajtsin nemi, san ika, xtlaneltokaj itech. Yejuamej melak kixnamiktokej (Santiago 2:19, 20). Tla se tlaltikpakchane kipiya tlaneltokijli, kinekis kiyolpaktis toTajtsin ika tlen kuajli kichiua. Yejuin tlen okichiuj Abrahán. Santiago okijkuilo: “Xkelnamiki toachtojta Abraham. Dios okijtoj ika itlajtlakoluan yokintlaxtlau ipampa on tlen okichiu ijkuak okuentij ikoneu Isaac ne tlaixpan. Aman, tej, tikmati ika itlaneltok Abraham niman on tlen okichiu tekitiyaj san sekan. Niman no tikmati ika itlaneltok onaxitij  ika on tlen okichiu”. Sakin Santiago okijto ika tlaneltokijli xtlaj ika tepaleui tla xnoteititia ika tlen nochiua. Okijto: “Xitlaj kijtosneki itlaneltok se tlakatl tla xkichiua tlajtlamach tlen kuajli” (Santiago 2:21-23, 26).

9, 10. ¿Tlenon noneki tikchiuaskej tla tiknekij tikpiyaskej tlaneltokijli itech iKoneuj toTajtsin?

⁹ Ijkuak yopanoka ipantsin 30 xiujtin ika Santiago otlajkuilo itech tlaneltokijli, Juan okijkuilo Evangelio tlen kuika itoka niman yeyi amatlajkuiloltin. Ijkon ken oksekimej akin okijkuilojkej Biblia, Juan kasikamatiya tlenon kijtosnekiya tlaneltokijli. Miyekpa okitekitilti se tlajtojli griego tlen ika náhuatl uelis kijtosnekis “tikteititis motlaneltokil”.

¹⁰ Se neskayotl, Juan okijto: “Yejuan kineltoka iKonetsin Dios kipia nemilistli para nochipa, pero on yejuan xkitlakamati xkipias yejua in nemilistli, yej kiselis on temojtij itlauel Dios” (Juan 3:36). Tla tiknekij tikpiyaskej totlaneltokil itech iKoneuj toTajtsin, noneki tiktlakamatiskej itlanauatiluan. Ijkuak tikpouaj nochi tlen okijkuilo Juan, tikitaj ika Jesús miyekpa otemachti ika tla tiknekij tikseliskej nemilistli tlen xkeman tlamis, noneki tikpiyaskej tlaneltokijli itech yejua niman itech iTaj (Juan 3:16; 6:29, 40; 11:25, 26; 14:1, 12).

11. ¿Kenon tikteititiaj ika tiktlasojkamatij ika Jehová otechmachti tlen melauak?

¹¹ Jehová okitekitilti iespíritu santo tlen ika otechpaleui matikasikamatikan tlen melauak itech yejua niman itech iKoneuj, niman otechpaleui matikpiyakan totlaneltokil intech yejuamej (xpoua Lucas 10:21). ¿Kenon tikteititiskej ika tiktlasojkamatij tlen Jehová yokichiuj topampa? Nochipa matiktlasojkamachilikan pampa techkauilia iuan matouikakan itechkopa Jesús, “yejuan itech ualeua totlaneltok niman sa no yejua kimelajkatlalia” (Hebreos 12:2). San ika, noneki  nochipa matikchikaujtokan totlaneltokil. ¿Kenon? Ijkuak tikchiuaj teoyotl niman tomachtiaj Biblia mojmostla (Efesios 6:18; 1 Pedro 2:2).

12. ¿Tlenon tikchiuaskej tla tikpiyaj tlaneltokijli?

¹² Tla tikpiyaj chikauak totlaneltokil itech tlen Jehová yokijto kichiuas ika tlayekapan, nochipa tikteititiskej ika tlen tikchiuaj. Se neskayotl, xtijkajkauaskej ika tikinnojnotsaskej tlaltikpakchanejkej itech iTekiuajyo toTajtsin niman tikinpaleuiskej makixkopinakan ineskayo Jesús. Niman “nochimej [...] tikinchiuili[skej] on tlen kuajli, niman más on yejuan kineltokaj Jesucristo” (Gálatas 6:10). Noijki nochipa tokojtiliskej xok tikchiuaskej ken kachtopa tikchiuayaj pampa xtiknekij tikchiuaskej itlaj tlen makijtlako ken touikaj iuan Jehová (Colosenses 3:5, 8-10).

13. a) ¿Tleka melak noneki tikpiyaskej tlaneltokijli? b) ¿Tlenon kijtoua Biblia itech tlaneltokijli niman tleka?

¹³ Biblia kijtoua: “Dios xuelis tikpaktiskej tla xitech tikpiaj totlaneltok, pampa para se uelis kinisiuis, ika onkaj kineltokas ika yejua melauak nemi, niman ika Dios kimakas tlaxtlauijli on yejuan melauak kitejtemouaj” (Hebreos 11:6). Biblia noijki kijtoua ika tlaneltokijli itech toTajtsin yejua teuan nopoua itech tlen kachtopa tomachtiaj. ¿Tleka? Pampa tlaneltokijli itech toTajtsin yejua se kualneskayotl tlen noneki kachtopa makipiyakan akin kichiuaj ken Cristo (Hebreos 6:1). San ika, xsan noneki tikpiyaskej tlaneltokijli noijki noneki tikpiyaskej okseki kualneskayomej tlen techpaleuis kuajli matouikakan iuan toTajtsin (xpoua 2 Pedro 1:5-7; Judas 20, 21).

14, 15. ¿Tleka melak ueyi kijtosneki tikpiyaskej tlasojtlalistli xken tikpiyaskej tlaneltokijli?

¹⁴ Akin okijkuilojkej Biblia miyekpa kiteneuaj tlaneltokijli xken okseki kualneskayomej. Kuakon, ¿kijtosneki ika tlaneltokijli san tlen melak noneki kipiyas se akin kichiua ken Cristo?

¹⁵ Pablo otlajto itech tlaneltokijli niman tlasojtlalistli. Yejua okijto: “Ueliskia nikimejkuaniskia on tepemej ika notlaneltok, pero [tla] xnitetlajsojtla, xitlaj nikijtosneki” (1 Corintios 13:2). Jesús okijto ika tlasojtlalistli itech toTajtsin “más ueyixtika [...] de nochimej on tlanauatiltin” (Mateo 22:35-40). Tlasojtlalistli techpaleuiya matikpiyakan okseki kualneskayomej tlen kipaktiaj toTajtsin. Se neskayotl, Biblia kijtoua ika tlasojtlalistli kineltoka nochi. Ijkon  tlasojtlalistli techpaleuiya matikneltokakan noso matikpiyakan totlaneltokil itech nochi tlen toTajtsin yokijto ipan Biblia (1 Corintios 13:4, 7).

16, 17. a) ¿Kenon techpaleuiya Biblia matikasikamatikan ika tlaneltokijli niman tlasojtlalistli melak noneki? b) ¿Katlejua kualneskayotl melak ueyi niman tleka?

¹⁶ Biblia techmachtia ika melak noneki matikpiyakan tlaneltokijli niman tlasojtlalistli. Ika yejon, akin okijkuilojkej Biblia miyekpa kinteneuaj san sekan. Akin kichiuaj ken Cristo Pablo okimijli: “Ma titotsakuilikan ikan totlaneltok niman totetlajsojtlalis” (1 Tesalonicenses 5:8). Pedro otlajto itech Jesús ijkuak okijto: “Nemejuamej nenkitlajsojtlaj Jesucristo maski xkeman onenkitakej. Maski aman xnenkitaj, nenkineltokaj” (1 Pedro 1:8). Santiago noijki okimijli tokniuan tlapejpeniltin: “Dios okintlapejpenij on yejuan mayankej ipan in tlaltikpaktli para ma ricojtikan ikan tlaneltoktli, niman para nemiskej ne kampa Dios tlamandaroua ijkon ken okitlalij ipan ipromesa para on yejuan kitlajsojtlaj” (Santiago 2:5). Noijki Juan okijto ika toTajtsin technauatia yejuin: “Ma tikneltokakan iKonetsin Jesucristo, niman ma titotlajsojtlakan inuan oksekimej” (1 Juan 3:23).

¹⁷ Pablo noijki okijto: “Aman, tej, yeyi tlamantli yejuan xkeman tlamis: tlaneltokalistli, tlamachalistli niman tetlajsojtlalistli. Pero on tetlajsojtlalistli yejua más ueyi kijtosneki” (1 Corintios 13:13). Ika tlayekapan xok nonekis tikpiyaskej tlaneltokijli itech tlen toTajtsin yokijto kichiuas. Pampa ipan yejon tonaltin itikpiyaskej melak kualtsin nemilistli tlen Biblia techijlia. San ika, nochipa nonekis tikmachiliskej tlasojtlalistli itech toTajtsin niman itech oksekimej. Tlasojtlalistli tlen tikmachiliskej inpampa nochipa ueyixtias.

18, 19. a) ¿Kenon yokinpaleui itekipanojkauan toTajtsin ika kipiyaj tlaneltokijli? b) ¿Akinon noneki matikueyichiuakan ipampa yejon?

¹⁸ Itekipanojkauan toTajtsin nokauiliaj ika iespíritu santo makinyekana ipan innemilis. Ika yejon, kipiyaj tlaneltokijli ipan iTekiuajyo toTajtsin niman kipaleuiyaj. Noijki nochimej notlasojtlaj (Gálatas 5:22, 23, TNM). Ika yejuin, ipan nochi tlaltikpaktli onka ipantsin ocho millones akin ikipiyaj yolseuilistli niman san sekan nemij ipan tlanechikoltin. Kuajli nesi ika tlasojtlalistli niman tlaneltokijli melak tepaleuiyaj.

¹⁹ Yejuin ueli nochiua san ika itlapaleuilis Jehová. Yejua kinamiki matikueyichiuakan ipampa yejuin (Isaías 55:13). Melak tiktlasojkamachiliaj Jehová ika techmakixtis “itechkopa [to]tlaneltok” (Efesios 2:8). Jehová ok kinpaleuis melak miyekej tlaltikpakchanejkej makipiyakan tlaneltokijli itech. Niman yejkos tonajli ijkuak nochi tlaltikpaktli temis ika tlaltikpakchanejkej akin xkipiyaskej tlajtlakojli, yeskej yolmelaujkej niman pakiskej pampa kiueyichiuaskej Jehová nochipa.