1, 2. a) ¿Tleka melak ouijtika tajtin kinmachtiskej inkoneuan makipiyakan tlaneltokijli itech Jehová? b) ¿Kenon uelis tajtin kichiuaskej yejuin? c) ¿Katlejua naui tlemach tikitaskej ipan yejuin tlamachtijli?

SE NANTLI niman se tajtli akin chantij Francia kijtouaj: “Tejuamej titlaneltokaj itech Jehová, san ika, yejon xkijtosneki ika tokoneuan tlaneltokaskej. Tlaneltokijli xueli nopanoltia. Tokoneuan ika yolik kiskaltiaj”. Se tokniuj chanej Australia okijkuilo: “Tikinpaleuis makipiyakan chikauak intlaneltokil mokoneuan nesi kanaj yejon tlen ouijtika tikixnamikis. Uelis tiknemilis ika kuajli ken otiknankili mokoneuj. Sakin tikitas ika yejua oksejpa mitstlajtoltis yejon tlen yotiknankilijka. Tlen tikinnankilis aman ijkuak mitstlajtoltiaj sakin kinekiskej kimatiskej okse tlanankilistli itech tlajtoltilistli tlen omitschiuilijkej”. Ijkuak kokonej noskaltijtiuej, miyekej tajtin kitaj ika noneki kintomiliskej aman ika okseki tlajtoltin itech tlen yokimilijkaj. Niman kitaskej ika aman noneki kipatlaskej ken kinmachtiskej inkoneuan makitlasojtlakan Jehová.

² Tla tejua titajtli, ¿kanaj timotlajtoltia tla uelis kuajli tikinmachtis mokoneuan makitlasojtlakan Jehová niman makitekichiuilikan ijkuak yonoskaltijkej? Xakaj uelis kichiuas yejuin tekitl san iselti (Jeremías 10:23). Ika yejon noneki matiktlajtlanilikan itlapaleuilis Jehová. Yejua kinmaka tajtin miyek tlamachtijli. ¿Kenon uelis tikinpaleuis mokoneuan? 1) Xkimixmati kuajli, 2) xkinmachti itech Jehová tlen yotiktlali ipan  moyojlo, 3) xtekitilti neskayomej niman 4) xtlajtlanili iespíritu santo toTajtsin niman xkimijyoui mokoneuan.

3. ¿Kenon uelis tajtin kichiuaskej ken Jesús okinmachti inomachtijkauan?

³ Jesús miyekpa kintlajtoltiaya inomachtijkauan tlenon kineltokayaj (Mateo 16:13-15). Tejua noijki uelis ijkon tikchiuas. Ijkuak tejua imiuan titlajtoua noso san sekan tikchiua imiuan itlaj, xkintlajtolti tlenon kinemiliaj niman xkinkauili mamitsijlikan tlenon yemelak kimachiliaj. Kanaj onka itech tlen ometlamatij. Se tokniuj akin kipiya 15 xiuitl akin chanej Australia kijtoua: “Miyekpa notaj nouan tlajtoua itech notlaneltokil niman nechpaleuiya manitlanemili. Nechtlajtoltia: ‘¿Tlenon kijtoua Biblia?’ ‘¿Tikneltoka tlen kijtoua?’ ‘¿Tleka tikneltoka?’. Yejua kineki maniknankili ika notlajtoluan niman maka san manikijto itlajtoluan noso itlajtoluan nonan. Sakin opeuj melak kuajli ken nitlanankiliaya xijkon ken ijkuak nikonetl”.

4. ¿Tleka melak noneki tikpiyas ijyouilistli niman tikinnankilis tlen notlajtoltiaj mokoneuan? Xkijto se neskayotl.

⁴ Tla mokoneuan xnimantsin kineltokaj itlaj tlen temachtia Biblia, xpiya ijyouilistli. Xkinpaleui makinextikan kenon nonankilia tlen notlajtoltiaj. Se tajtli kijtoua: “Tlen mitstlajtoltia mokoneuj xkita ika yemelak kineki kimatis. Maka xkita ika xueyi kijtosneki noso xtiknekis titlajtos itech itlaj san pampa yejon uelis kichiuas xkuajli timomachilis”. Tla kokonej kichiuaj tlajtoltilistin yejon melak kuajli, pampa kijtosneki ika kinekij itlaj kasikamatiskej. Hasta Jesús otetlajtolti ijkuak konetl katka (xpoua Lucas 2:46). Se telpochtli chanej Dinamarca okijto: “Ijkuak onikimijli ika xnikneltokaya ika tla kipiayaj tlaneltokijli tlen melauak, notajuan xonechajuakej maski kanaj yejuamej onajmankej nopampa. Yejuamej onechnankilijkej ika Biblia nochi tlen onikintlajtolti”.

5. Maski kokonej nesi ika kipiyaj intlaneltokil itech Jehová, ¿tlenon noneki kichiuaskej tajtin?

⁵ Kuajli xkimixmati mokoneuan. Maka xnemili ika mokoneuan tlaneltokaj itech Jehová san pampa yauej ipan tlanechikoltin noso ontenojnotsaj. ¿Kenon yemelak nomachiliaj itech Jehová niman tlenon kinemiliaj itech Biblia? Xchiua nochi tlen tiueli niman ijkon tikmatis tla onka tlen kichiua makitlalkauikan Jehová. Xtlajto iuan mokoneuan itech toTajtsin mojmostla ijkuak tikchiuas itlaj imiuan. Xchiua teoyotl inpampa, ijkuak imiuan tinemis niman ijkuak san moselti tinemis.

6. Ijkuak tajtin xkikauaj ika nomachtiaj itech Jehová niman itech Biblia, ¿kenon kinpaleuis kinmachtiskej inkoneuan?

⁶ Tlaltikpakchanejkej yolpakiyaj kikakiskej Jesús pampa yejua kitlasojtlaya Jehová niman kuajli kixmatiya iTlajtol toTajtsin. Yejuamej noijki kimachiliayaj ika Jesús noijki kintlasojtlaya. Ika yejon noijki kinekiyaj kikakiskej (Lucas 24:32; Juan 7:46). Noijki ijkon, ijkuak mokoneuan kitaskej ika tejua tiktlasojtla Jehová, yejuin kinpaleuis noijki makitlasojtlakan Jehová (xpoua Deuteronomio 6:5-7; * Lucas 6:45). Kuakon tla xtijkaua ika kuajli timomachtia Biblia niman tikinpoua nochipa amatlajkuiloltin, kuajli tikixmatis itech tlemach tlen Jehová yokichijchiuj (Mateo 6:26, 28). Ijkuak melak kuajli tikixmatis Jehová, noijki melak kuajli tikinmachtis mokoneuan itech yejua (Lucas 6:40).

7, 8. a) Nochipa ijkuak itlaj timomachtis itech Jehová, ¿tlenon uelis tikchiuas? b) ¿Kenon yokichiujkej yejuin sekimej tajtin?

⁷ Ijkuak itlaj timomachtis itech Jehová, xkinnojnotsa mokoneuan itech yejon. Xchiua yejuin ijkuak imiuan tinemis, maka san ijkuak nemomachtiaj tlen nopanoltia ipan tlanechikojli noso ijkuak nenkiueyichiuaj toTajtsin ken familia. Yejuin tlen se nantli niman se tajtli chanejkej Estados Unidos kichiuaj. Yejuamej tlajtouaj itech Jehová imiuan inkoneuan ijkuak kitaj itlaj tlen kualtsin noso ijkuak kikuaj se tlakuajli tlen melak kiueliliaj.  Yejuamej okijtokej: “Tikimilnamiktiaj tokoneuan ika Jehová techtlasojtla niman tlanemilia topampa ijkuak techmaka nochi tlen techpoloua”. Niman oksekimej tajtin chanejkej Sudáfrica kuelitaj kinnojnotsaskej omemej imichpokauan itech tlen toTajtsin okichichiuj ijkuak tekitij san sekan kampa yejuamej okintokakej xochimej. Se neskayotl, yejuamej kimijliayaj kenon melak kualtsin nesi maski se pitentsin xinachtli melak ueyiya ijkuak yokis. Tajtin okijtokej: “Tikyejyekouaj tikchiuaskej ika toichpokauan makitlakaitakan nemilistli niman makimojkaitakan ika ononek ueyi tlamachilistli ijkuak onotlali”.

⁸ Se tajtli chanej Australia okuikak ikoneuj, akin kipiaya kanaj majtlaktli xiuitl, ipan se museo. Kuakon tajtli okinemili ika kikuis tiempo ika ikoneuj machikaui itlaneltokil niman makita kenon Jehová yejua akin yemelak otlachijchiuj. Yejua okijto ika otikitakej miyek yolkamej tlen onenkej melak yeuejkaui tlen aman xok nemij. Melak okinmojkatlachialti ika yejon yolkamej kualtsitsintin, ika ononek tlamachilistli ijkuak okinchijchiujkej niman xtlaj kinpolouaya, ijkon ken yolkamej tikimitaj ipan yejuin tonajli. Noijki okijto: “Tla nemilistli oualeuj itech evolución, ¿tleka yejuin yolkamej tlen yeuejkaui onenkej nesi ika ononek tlamachilistli ijkuak onochijchiujkej? Yejuin tlen onechmachti okichiuj melak manitlamojkaita niman noijki onikijli nokoneuj”.

9. a) ¿Tleka melak kuajli tla tikintekitiltis neskayomej? b) ¿Katlejua neskayotl okitekitilti se nantli?

⁹ Jesús miyekpa kitekitiltiaya neskayomej. Yejua kitemakaya se tlamachtijli ika se neskayotl noso ika se historia (Mateo 13:34, 35). Tla tejua tiktekitiltia neskayomej, tikchiuas ika mokoneuan makitekitiltikan intlanemilil. Yejuin kinpaleuis matlanemilikan itech tlamachtijli tlen tikinmachtijtika, kuajli makasikamatikan niman makilnamikikan. Noijki yejuamej nomachtiskej ika pakilistli. Se neskayotl, se nantli chanej Japón okinek kinmachtis omemej inkoneuan ika ken Jehová okichijchiuj atmósfera kiteititia ika yejua melak techtlasojtla. Se itelpokatsin kipiaya 8 xiuitl niman okse 10 xiuitl. Kuakon yejua okitekitilti se neskayotl tlen ika ueliskiaj nimantsin kasikamatiskiaj. Yejua okinmakak leche, azúcar niman café. Kuakon yejua okimijli makiyektlalikan café tlen koniskej. Yejua kijtoua: “Yejuamej melak kuajli okichijchiujkej. Ijkuak nejua onikintlajtolti tleka ijkon okichijchiujkej, yejuamej okijtokej ika kinekiyaj ika yejon café makisa ken nejua nikuelita. Nejua onikintomili ika toTajtsin noijki ijkon okichijchiuj atmósfera ijkuak okisentlali miyek tlemach tlen xueli tikitaj san ken kinamiki niman ijkon maueli matinemikan”. Yejon telpokatsitsintin okuelitakej yejon tlamachtijli niman xkeman okilkaujkej.

10, 11. a) ¿Katlejua neskayotl uelis tiktekitiltis ika tikinpaleuis mokoneuan ika nemi toTajtsin akin otlachijchiuj? (Xkita tlaixkopinajli kampa peua tlen tomachtijtokej). b) ¿Katlejua neskayomej yotikintekitilti?

¹⁰ ¿Katlejua neskayotl uelis tiktekitiltis ika tikimititis mokoneuan ika nemi toTajtsin akin otlachijchiuj? Tejua kanaj uelis tikchijchiuas tamajli iuan mokoneuj. Tikijlis tleka melak noneki nochiuas ijkon ken noneki. Sakin xmaka mokoneuj se manzana noso okse kojtlakilyotl niman xtlajtolti: “¿Tikmatiya ika yejuin manzana onka kenon nonekiya nochijchiuas?”. Sakin xteki manzana makisa  ome niman xkititi iyojlo. Xkijli ika iyojlo kentla itlaj ken kampa kijtoua kenon nochijchiuas se manzana. San ika, yejuin melak noneki tlamachilistli xijkon ken tikmatis tikchijchiuas tamajli. Tejua uelis tiktlajtoltis: “Yakaj okijto kenon nochijchiuas tamajli. Kuakon, ¿akinon okijkuilo kenon yes se manzana?”. Tla mokoneuan iuejueyimej tejua uelis tikimijlis ika ipan iyojlo se manzana onka, tlen noixmati ken ADN, tlen kijtoua kenon yes ikojyo niman manzana. Tejua noijki uelis tikimititis seki tlaixkopinaltin niman neskayomej tlen uajnestiuej ipan página 10 ontlami ipan 20 itech amatlajkuilojli El origen de la vida. Cinco cuestiones dignas de análisis.

¹¹ Miyekej tajtin kinpouaj tlamachtiltin tlen intoka “¿Casualidad o diseño?” iuan inkoneuan. Tla ok pitentsitsintin inkoneuan, tajtin uelis kitejtemoskej kenon kintomiliskej niman ijkon uelis kasikamatiskej se tlamachtijli. Se neskayotl, se tajtli niman se nantli akin chantij Dinamarca kijtouaj: “Aviones noijki kentla totomej. San ika ¿uelis aviones kinpiyaskej pitentsitsintin aviones? ¿Noneki totomej makipiyakan san sekan kampa temoskej ijkuak patlanij? ¿Uelis tikijtos ika ken kakisti avión sa noijki kakisti ken ijkuak nokuikatia se tototl? Kuakon, ¿akinon melak tlamachilise? ¿Akin okinchijchiuj aviones noso toTajtsin akin okinchijchiuj totomej?”. Ijkuak tikintlanemililtis mokoneuan niman tikintlajtoltis, tejua tikinpaleuis makitekitiltikan intlanemilil niman tikinchikauilis intlaneltokil itech Jehová (Proverbios 2:10-12).

12. ¿Kenon uelis tikintekitiltis neskayomej ika tikinmachtis mokoneuan ika nochi tlen kijtoua Biblia xnopopoloua?

¹² Tejua uelis tikintekitiltis neskayomej ika tikinmachtis mokoneuan ika nochi tlen kijtoua Biblia xnopopoloua. Se neskayotl, kanaj uelis tikinpouilis Job 26:7 (xpoua). * Maka san xkimijli mokoneuan ika nochi tlen kijtoua Biblia ualeua itech Jehová. Noneki tikinpaleuis matlanemilikan. Kanaj tejua uelis tikimijlis ika tlaltikpakchanejkej akin nemiyaj ipan itonaluan Job xueliyaj kineltokaj ika tlaltikpaktli xtlaj kajsitoya. Yejuamej kimatiyaj ika nochi tlemach, ken se pelota noso se tetl, itlaj kajsitoya. Ipan yejon tonaltin, xakaj ueliya kiteititiaya ika tlaltikpaktli xtlaj ipan onkatka, pampa xonkatka telescopios niman okseki tlemach. Maski Biblia onoijkuilo melak yeuejkaui, xkeman nopopoloua itech tlen kijtoua pampa ualeua itech Jehová (Nehemías 9:6).

13, 14. ¿Kenon uelis tajtin kinmachtiskej inkoneuan makitlakamatikan tlen kijtoua Biblia?

¹³ Noijki melak noneki tikinmachtis mokoneuan ika yejuamej melak yolpakiskej ijkuak kitlakamatiskej tlen kijtoua Biblia (xpoua Salmo 1:1-3). * Se neskayotl, tejua uelis tikimijlis mokoneuan ika makinemilikan ika yaskej onchantiskej ipan se atlajkotian. Yejuamej kipiya ika kitlapejpeniskej akin imiuan ompa onchantiskej. Kuakon uelis tikintlajtoltis: “¿Akinomej tlaltikpakchanejkej nenkintlapejpeniskiaj tla nenkinekij nochimej kuajli imiuan nemouikaskej?”. Ika tontlamis, uelis tikinpouilis Gálatas 5:19-23 niman ijkon makitakan katlejuamej tlaltikpakchanejkej kineki Jehová manemikan ipan yenkuik tlaltikpaktli.

¹⁴ Ijkon, tejua uelis tikinmachtis mokoneuan ome tlamachtijli tlen melak ueyi kijtosneki. Kachtopa, Jehová techmachtijtika kenon tinemiskej ika paktli aman niman ika yolseuilistli. Ika ome, yejua techmachtijtika kenon tinemiskej ipan yenkuik tlaltikpaktli (Isaías 54:13; Juan 17:3). Tejua noijki uelis tikimititis mokoneuan kenon Biblia yokinpaleui oksekimej tokniuan. Se neskayotl, xtejtemo se tlamachtijli ipan toamatlajkuiloluan itech se tokniuj tlen matlajto itech inemilis, kanaj ken tlamachtiltin tlen kisaj itoka “La Biblia les cambió la  vida” ipan Amatl Tekakistilijketl. Noso uelis tikijlis se tokniuj ipan tlanechikojli mamechnojnotsa itech kenon Biblia yokipaleui makipatla miyek tlemach ipan inemilis niman ijkon kiyolpaktis Jehová (Hebreos 4:12).

15. ¿Tlenon uelis mitspaleuis tikinmachtis mokoneuan?

¹⁵ Xtekitilti motlanemilil niman ijkon tikchiuas ika mokoneuan makuelitakan nomachtiskej. Xpatla ken tikinpaleuis mokoneuan mayolpakikan ijkuak nomachtiskej itech Jehová niman nonisiuiskej itech. Niman nochipa xchiujtiuj yejuin ijkuak mokoneuan noskaltijtiaskej. Se tajtli okijto: “Maka xmosiaujkaua tikyejyekos tikpatlas niman tikyenkuilis ken titemachtis tlen yotitemachtijka”.

16. a) Ijkuak tikinmachtis mokoneuan, ¿tleka melak noneki tikimijyouis? b) ¿Kenon sekimej tajtin yokimijyouijkej inkoneuan?

¹⁶ Ika iespíritu santo toTajtsin, uelis chikauis intlaneltokil mokoneuan (Gálatas 5:22, 23, TNM). San ika, panos seki tonaltin ika intlaneltokil machikaui. Ika yejon xkimijyoui mokoneuan niman maka keman xkaua tikinmachtis. Se tajtli chanej Japón akin kipiya ome ikoneuan kijtoua: “Nosiuauj iuan nejua uejkaujtipan tipanouayaj iuan tokoneuan. Ijkuak ok pitentsitsintin katkaj, imiuan tomachtiayaj mojmostla ipan 15 minutos, san ijkuak tikpiayaj tlanechikoltin xtikchiuayaj. 15 minutos xtikitayaj uejkaujtipan nion tokoneuan xijkon kitayaj”. Se tokniuj tlayekanketl ipan circuito okijto: “Ijkuak nitelpochtli katka, onkatka miyek tlen ninotlajtoltiaya noso tlen xueli nikneltokaya niman xnikijtouaya. Miyek itech yejon ononankilijkej ipan tlanechikoltin noso ijkuak tomachtiayaj ken familia noso ijkuak ninomachtiaya noselti. Ika yejon melak noneki ika tajtin nochipa makinmachtikan inkoneuan”.

17. a) ¿Tleka melak noneki ika tajtin makichikauakan intlaneltokil? b) ¿Kenon se nantli niman se tajtli okinpaleuijkej imichpokauan makipiyakan intlaneltokil itech Jehová?

¹⁷ Kema, mokoneuan melak miyek nomachtiskej ijkuak yejuamej kitaskej ika tejua tikpiya chikauak motlaneltokil itech Jehová. Yejuamej kitaskej tlenon tikchiua. Ika yejon, nochipa xpiya chikauak motlaneltokil. Noneki mokoneuan makitakan ika tejua tikita ika Jehová yemelak nemi. Se neskayotl, ijkuak se nantli niman tajtli chanejkej ipan Bermudas najmanayaj itech itlaj, kichiuayaj teoyotl imiuan ichpokauan niman kitlajtlaniliayaj Jehová makinyekana. Noijki kinyolchikauayaj inkoneuan makichiuakan teoyotl. Yejuamej kijtouaj: “Tejuamej noijki otikijlijkej tochpoch akin iueyi: ‘Xtlaneltoka itech Jehová, kachtopa xtejtemo iTekiuajyo niman maka melak xmajmana’. Ijkuak yejua kitaya ika tlen kichiua kuajli onkisa, kimati ika Jehová kipaleuijtoya. Yejuin melak yokipaleui makipiya chikauak itlaneltokil itech toTajtsin niman itech Biblia”.

18. ¿Tlenon xnoneki makilkauakan tajtin?

¹⁸ Tajtin, maka xkilkauakan ika xkipiya ika nenkichiualtiskej nemokoneuan makipiyakan tlaneltokijli. Nemejuamej kentla san nentlatokaj niman nenkitekiliaj atl niman Jehová yejua kichiua manoskalti (1 Corintios 3:6). Ika yejon xmochikauakan ika nenkinmachtiskej nemokoneuan niman xtlajtlanilikan iespíritu santo toTajtsin makinpaleui makipiyakan tlaneltokijli. Kuajli tikmatstos ika Jehová mitsteochiuas pampa chikauak titekiti (Efesios 6:4).